Papah Kohto me Kin Ketikihda Saledek

“Iet duwen wehwehn poakohng Koht: kitail en peikiong sapwellime kosonned akan. Oh sapwellime kosonned akan me sohte apwal.”​—1 SOHN 5:3.

KE KAK SAPENG?

Dahme Sehdan men kitail en medewehiong dahme Koht kin ketin kupwurki?

Dahme kahrehda kitail anahne kanahieng ni atail kin pilada kompoakpatail kan?

Dahme pahn sewese kitail en pousehlahte loalopwoat ong Koht me kin ketikihda saledek?

1. Ia duwen Siohwa eh ketin doadoahngki sapwellime saledek? Soangen saledek dah me e ketikihong Adam oh Ihp?

SIOHWA kelehpw me sapwellimanki saledek me sohte irepe. Ahpw e kin ketin ahnsou koaros doadoahngki sapwellime saledek ni ahl me pwung. E sohte kin ketin kaunda soahng koaros me sapwellime ladu kan kin wia. Ahpw, e ketikihong irail saledek en wiahda pein arail pilipil oh kaitarala arail ineng ni ahl me pwung. Karasepe, soahng ehute me Koht ketin mahsanihong Adam oh Ihp me ira sohte mweimwei en wia. E ketin mahsanihong ira me ira sohte pahn kang “wahntuhkehn kehsehki aramas dahme mwahu oh dahme suwed.” (Sen. 2:17) Eri, ira kak wia kupwur en Koht oh ahnekihte saledek laud.

2. Dahme kahrehda Adam oh Ihp wiahla liduhn dihp?

² Dahme kahrehda Koht ketikihong Adam oh Ihp saledek laud? Pwehki Siohwa ketikihong ira kadeikpen loalara oh e ketin kapikirahda rasehng ih. E ketin kasik me ira pahn wia dahme pwung pwehki ara limpoak ong ih nin duwen Sounkapikpara. (Sen. 1:27; Rom 2:15) E kansensuwed pwehki Adam oh Ihp sohte kalahngankihong Sounkapikparao saledek me e ketikihong ira. Ahpw ira pein pilada dahme pwung oh dahme sapwung. Ira medewe me met pahn kihong ira saledek laud, ahpw ni mehlelo, ara pilipilo kahrehiong ira oh neira seri kan en wiahla liduhn dihp me imwikihla lokolok oh mehla.​—Rom 5:12.

3, 4. Dahme Sehdan men kitail en medewehki dahme Koht ketin kupwurki?

³ Ma Sehdan kak kamwakid aramas unsek riemen oh tohnleng tohto ren soikala sapwellimen Koht kaunda, e kak wiahiong kitail soahngohte. Ahn Sehdan widing kan sohte wekila. E men kitail en medewe me dahme Koht ketin kupwurki kin nohn kakos. Sehdan men kitail en medewe me ma kitail papah Koht, atail mour sohte pahn kaperen. (1 Sohn 5:3) Aramas tohto nan sampah kin ahneki soangen madamadau wet, oh ma kitail pahn kalapw werekiong irail, ele atail madamadau pahn tepida duwehla arail. Sister men me met sounpar 24 koasoia me eh werek suwed kin uhdahn kamwakid laud eh madamadau. E kin masak ahneki madamadau me weksang ahn me pwulopwul teikan. Imwilahn met, sister menet wiahda tiahk samin. Mwein ke pil iang pehm duwen kompoakepahmw kan ar kak kamwakid laud omw madamadau.

⁴ E kansensuwed pwehki ekei nan mwomwohdisohn Kristian ele kak wia werek suwed. Emen brother pwulopwul nda me ekei kompoakepah kan nan mwomwohdiso kin ahnekihda me sohte kin kaudokiong Siohwa. Uwen ahnsou me e kin kalapw patehng kompoakepah pwukat, ih uwen eh kin duweirailla. E nda: ‘Ei nanpwungmwahu rehn Siohwa luwetala. I sohte kin perenki mihting kan oh I kereniong sohla kin iang kalohk. Ih ahnsowo me I esehda me I anahne uhdihsang werekiong irail, oh I wia met!’ Ke kin ese uwen laud en kompoakepahmw kan ar kamwakid uhk? Tehk karasaras ehu nan Paipel me kak sewese kitail rahnwet.​—Rom 15:4.

E KIN ALKENIKEN PAHN ARAMAS

5, 6. Ia duwen Apsalom eh pitihedi meteikan? Ahn Apsalom pilahno pweida?

⁵ Tohto karasepe kan nan Paipel duwen irail kan me kin kamwakid suwed meteikan. Ehu karasepe pwukat iei Apsalom, nein Nanmwarki Depit pwutak. Apsalom inenen masamwahu. Duwehte Sehdan, e mweidohng ineng sapwung en kekeirda nan eh mohngiong. E men ih me en wiahla nanmwarki a kaidehn eh papaho, mendahki e ese me e sohte ahneki pwung en wia nanmwarki.a Pwehn ale dahme e mwahuki, Apsalom kahrehiong aramas ako ren kamehlele me e men sewese irail ahpw nanmwarkio sohte men sewese irail. Duwehte Tepilo nan mwetuwel en Ihden, Apsalom kahrehiong aramas ko ren medewe me e nsenohki irail oh pil ahnsowohte kinehda likamw laud ehu duwen eh pahpao.​—2 Sam. 15:1-5.

⁶ Ia duwe, ahn Apsalom pilahno pweida? Kitail ese me e ekis pweida. Paipel koasoia me Apsalom “kin men alkeniken pahrail.” (2 Samuel 15:6) Apsalom pitihedi aramas tohto, ahpw ni imwila, e lohdi. Eh pohnmwahso kahrehda ih oh aramas kid kei me e pitihedi mehla.​—2 Sam. 18:7, 14-17.

7. Dahme kitail kak sukuhlki sang mehn kahlemeng en Apsalom? (Menlau kilang kilel nan pali 19.)

⁷ Dahme kahrehda e mengei ong Apsalom en pitihedi mehn Israel ko? Mwein pwehki re men ahneki soahng kan me e inoukihong irail. De mwein re masamwahuki. Sohte lipilipil ia kahrepeo, kitail kak kamehlele me irail sohte loalopwoat ong Siohwa oh ong nanmwarki me e ketin pilada. Rahnwet, Sehdan kin pousehlahte doadoahngki aramas akan me duwehte Apsalom pwehn song en pitihedi sapwellimen Siohwa ladu kan. Mwein re kin nda me dahme Siohwa ketin kupwurki nohn kakos de irail kan me sohte kin papah Siohwa kin ahneki peren laud. Ni omw kin rong soahng pwukat, ke pahn ese me mepwukat likamw kei oh pousehlahte loalopwoat ong Koht? Ke pahn ese me sapwellimen Siohwa “kosonned unseko,” de kosonned en Krais kelehpw me kak imwikihla saledek mehlel? (Seims 1:25) Ma ei, kasalehda me ke poakohng kosonnedo oh doadoahngki omw saledek ni ahl me pahn kaperenda Siohwa.​—Wadek 1 Piter 2:16.

8. Ia ekei karasepe kan me kasalehda me en sapeikiong dahme Siohwa ketin kupwurki sohte kin kahrehiong aramas en peren?

⁸ Sehdan kin uhdahn men pitihedi me pwulopwul kan. Emen brother me met dauliher sounpar 30 nda me ahnsou me e pwulopwul, e sohte leme me dahme Siohwa ketin kupwurki kin pere ih. E kin pehm me e sohte ahneki saledek oh e imwikihla eh wiahda tiahk samin. Met sohte kahrehiong en peren. Ahpw e uhd kahrehiong en nsensuwedkihla oh koluhkihla erein sounpar tohto dahme e wiadahro. Emen sister me wiahda tiahk samin ni ahnsou me e pwulopwul ntingihedi me mwuhr e nsensuwedkihla oh pehm me sohte katepe. E kapatahiong: “Mendahki sounpar 19 douwehr powe, I kin kalapw tamanda dahme I wiahdao.” Emen sister pil nda me met kin kihong nsensuwed laud ni eh kin medewe imwilahn eh wiewia kan ar kin kansensuwedihala aramas akan me e poakohng. E pil kapatahiong: “E uhdahn kansensuwed en mour ma ke sohte ahneki nanpwungmwahu rehn Siohwa.” Sehdan sohte men ken medewe imwilahn dipomw kan.

9. (a) Peidek dah kan me kitail en idek rehtail duwen Siohwa oh sapwellime kosonned oh kaweid kan? (b) Dahme kahrehda e kesempwal en uhdahn ese Koht?

⁹ Nin duwen me karasaras pwukat ar kasalehda, imwilahn omw sapeikiong Koht kin uhdahn suwed. E inenen kansensuwed me me pwulopwul kan nan padahk mehlel, pil me mah kan, anahne sukuhlki met sang ni arail lelohng soangen kahpwal wet. (Kal. 6:7, 8) Eri, idek rehmw: ‘I ese widing kan me Sehdan kin doadoahngki pwehn song en pitihiedi?’ ‘Ia duwe, I kin medewe me Siohwa iei Kompoakepahi me keieu mwahu me kin ahnsou koaros koasoi mehlel oh kin mwahuki dahme keieu mwahu ong ie?’ ‘I uhdahn kamehlele me e sohte pahn kolasang ie mehkot me uhdahn mwahu oh me pahn kahrehda ien peren?’ (Wadek Aiseia 48:17, 18.) Ke kak sapengki ei ong peidek pwukat ihte ma ke uhdahn ese Siohwa. Ke anahne pohnese me kosonned oh kaweid kan en Paipel kin kasalehda me Siohwa ketin poakohng uhk oh e sohte kupwurki ketikihsang omw saledek.​—Mel. 25:14.

KAPAKAPKI MOHNGIONG PEIK OH ERPIT

10. Dahme kahrehda kitail anahne song kahlemengih Nanmwarki Solomon ni eh pwulopwul?

¹⁰ Ni eh pwulopwul, Solomon kapakap ni karakarahk ong Siohwa oh koasoia me e ­“pwulopwul oh soakoahiek.” Solomon eri peki rehn Siohwa en ketin sewese ih en wia nanmwarki erpit oh peik men. (1 Nan. 3:7-9, 12) Siohwa ketin sapengala kapakap wet. Ma ke peki rehn Siohwa soahngohte, e pil pahn ketin karonge omw kapakap, mehnda ma ke pwulopwul de mah. Mehlel me Siohwa sohte pahn ketin mwadangete wiahiong uhk ken loalokongla. Ahpw e pahn ketin wiahiong uhk ken loalokongla ma ke kin onopki sapwellime Mahsen ni mehlel, kapakapki sapwellime manaman oh idawehn kaweid kan me ke kin ale nan mwomwohdiso en Kristian. (Seims 1:5) Siohwa kin ketin kahrehiong sapwellime ladu pwulopwul kan ren loalokong sang irail koaros me sohte kin peikiong ih iangahki “me loalokong oh koahiek” en sampah wet.​—Luk 10:21; wadek Melkahka 119:98-100.

11-13. (a) Mehn kasukuhl kesempwal dah kan me kitail kak sukuhlki sang Melkahka 26:4, Lepin Padahk 13:20 oh 1 Korint 15:33? (b) Ia duwen omw pahn doadoahngki mehn kasukuhl pwukat nan omw mour?

¹¹ Kitail koasoiapene ekei iren Paipel kan me kin padahkihong kitail mehn kasukuhl kesempwal kan duwen kompoakepatail kan me kitail pilada. Met pahn sewese kitail en wehwehki uwen kesempwal en onopki Paipel oh doudouloale pwe kitail en kak uhdahn esehla Siohwa. Melkahka 26:4 koasoia: “I sohte kin patehng aramas soh-katepe kan; sohte ahiong me liksansalamwahu kan.” Lepin Padahk 13:20 koasoia: “Ma ke pahn padahngki mehkot sang rehn me loalokong kan, ke pahn pil loalokongla. A ma ke pahn kompoakepahnki me pweipwei kan, ke pahn ohkihla.” 1 Korint 15:33 pil koasoia: “Werekiong aramas suwed kan e kin kauwehla tiahk mwahu.”

¹² Mehn kasukuhl kesempwal dah kan me kitail kak sukuhlki sang iren Paipel pwukat? (1) Siohwa ketin kupwurki kitail en kanahieng atail kin pilada kompoakpatail kan. E ketin kupwurki pere kitail sang atail en wia mehkot me kak kauwehla kitail oh atail nanpwungmwahu reh. (2) Kompoakpatail kan kin kahrehiong kitail en wia me mwahu de me suwed. Met wia ire mehlel ehu nan atail mour. Mwomwen iren Paipel pwukat ar ntingdi kin kasalehda me Siohwa kin ketin song en sair atail mohngiong. Tehk me iren Paipel pwukat kin ntingdi nin duwen ire mehlel kei, a kaidehn kosonned kei me duwehte “dehr wia met” de “dehr wia mwo.” E kin mwomwen me Siohwa kin mahmahsanihong kitail: ‘Mepwukat mehlel. Dahme ke pahn wia? Ia uhdahn omw pepehm?’

¹³ Eri, pwehki iren Paipel siluh pwukat kin ntingdi nin duwen ire mehlel kei, e kin mehlel rahnwet duwehte ahnsou me re ntingdi oh aramas kak doadoahngki nan soangsoangen irair kan. Idek rehmw soangen peidek pwukat: Nan soangen irair dah kan me I kakete tuhwong aramas “liksansalamwahu kan”? Ia duwen ei pahn soikala kompoakepahnki irail? (Lep. Pad. 3:32; 6:12) Ihs irail me “loalokong kan” me Siohwa ketin kupwurki ien kompoakepahnki? Ihs irail me “pweipwei kan” me e ketin kupwurki ien soikala? (Mel. 111:10; 112:1; Lep. Pad. 1:7) Soangen “tiahk mwahu” dah kan me I pahn kauwehla ma I pilada soangen kompoakepah suwed kan? “Werekiong aramas suwed kan” kin wiawihte nan sampah suwed wet? (2 Pit. 2:1-3) Ia duwen omw pahn sapengala peidek pwukat?

14. Ia duwen amwail kak kamwahwihala amwail Kaudok en Peneinei ni soutik?

¹⁴ Ni soangen ahlohte me ke medemedewe iren Paipel siluh pwukat, ke kak wadek iren Paipel teikan pwehn wehwehki sapwellimen Koht madamadau ong ire kan me kesempwal ong uhk oh omw peneinei.b Pahpa oh nohno kan, medemedewe duwen amwail en koasoiapene ire pwukat nan amwail Kaudok en Peneinei ni soutik. Ni amwail wia met, tamataman me amwail mehn akadei iei en sewese emenemen nan peneinei en wehwehki me sapwellimen Koht kosonned oh kaweid kan kin kasalehda uwen eh ketin poakohng kitail. (Mel. 119:72) Ma kumwail pahn wia met nin duwen peneinei ehu, amwail nanpwungmwahu rehn Siohwa oh pil rehn emenemen pahn kehlailla.

15. Ia duwen omw kak ese ma ke kin uhdahn wiahla aramas loalokong oh peik men?

¹⁵ Ia duwen omw kak ese ma ke kin uhdahn wiahla aramas loalokong oh peik men? Ehu ahl iei en kapahrekihong omw madamadau madamadau en sapwellimen Koht ladu lelepek kan mahs, duwehte Nanmwarki Depit. E ntingihedi: “Maing ei Koht, ia uwen ei kin ngoangki kapwaiada kupwuromwien! I kin kolokol sapwellimomwi padahk kan nan mohngiongiet.” (Mel. 40:8) Sounnting en Melkahka 119 pil koasoia: “Ia uwen ei poakohng sapwellimomwi kosonnedo! I kin medemedewe sang nimenseng lel nipwong.” (Mel. 119:97) Ke anahne doadoahk laud pwe ken kak alehdi soangen limpoak wet. Limpoak wet kin kekeirda ni omw kin onopki Paipel ni mehlel, kapakap oh doudouloale. E pil kin kekeirda ni omw kin kilang nan omw mour me omw peikiong dahme Siohwa ketin kupwurki kin imwikihla kapai tohto.​—Mel. 34:8.

PEIKI OMW SALEDEK EN KRISTIAN!

16. Ma kitail men kana ni atail peiki atail saledek, dahme kitail anahne tamataman?

¹⁶ Nan poadopoad, wehi kan kin men pei nan mahwen suwed kan pwe ren ahneki saledek. Ke pil anahne uhdahn men peiki ken kolokol saledek me ke ahneki nin duwen Kristian men. Tamataman me omw imwintihti kan kaidehn ihte Sehdan oh pil madamadau keper en sampah wet. Ke pil anahne peiong omw irair en soh unsek oh omw mohngiong me kak pitihiukedi. (Ser. 17:9; Ep. 2:3) Sawas sang rehn Siohwa kak seweseiuk ken kana nan pei wet. Ahnsou koaros me ke pilada ken wia dahme mwahu, e kin mie imwila mwahu riau. Keieu, ke pahn kaperenda Siohwa. (Lep. Pad. 27:11) Keriau, ahnsou koaros me ke esehda me omw peikiong “kosonned unseko me kin kasaledekla aramas” kin mwahu ong uhk, met pahn kalaudehla omw koasoanehdi teng en kekeidte nan ahl me kohlahng mour soutuk. Ni ahnsou kohkohdo ke pahn ahneki saledek laud me Siohwa ketin inoukihong koaros me kin loalopwoat ong ih.​—Seims 1:25; Mad. 7:13, 14.

17. Dahme kahrehda kitail en dehr nsensuwedla ni ahnsou me kitail kin wiahda sapwung kan? Ia duwen Siohwa eh kin ketin sewese kitail ni ahnsou me kitail wiahda sapwung?

¹⁷ E mehlel me kitail koaros kin wiahda sapwung ekei pak. (Ekl. 7:20) Ahnsou me met kin wiawi, dehr pehm me sohte katepomw de nsensuwedla. Ma ke wiahda sapwung ehu, wia dahme anahn pwehn kapwungala, mehnda ma ke anahne peki sawas sang rehn elder kan. Seims ntingihedi me arail “kapakap wet me pahn wiawi ni pwoson, pahn komourala me soumwahwo: Kaun-o pahn ketin kakehlahda, oh ketin lapwahsang dipe kan.” (Seims 5:15) Dehr manokehla me Koht kin ketin uhdahn kalahngan oh e ketin kupwurki ken mi nan mwomwohdiso pwehki e mwahngih me mie mehkot mwahu rehmw. (Wadek Melkahka 103:8, 9.) Siohwa pahn ahnsou koaros ketin seweseiuk erein omw pahn papah ih sang mohngiong unsek.​—1 Kron. 28:9.

18. Dahme kitail anahne wia pwe Siohwa en ketin pere kitail?

¹⁸ Ni pwongo mwohnte e ketin pwoula, Sises ketin iang sapwellime wahnpoaron lelepek 11 ko kapakap oh peki rehn Semeo en ketin pere irail. E ketin mahsanih mahsen kaselel pwukat: “Komwi en ketin perehsang irail Me Suwedo.” (Sohn 17:15) Sises kin ketin nsenohki sapwellime tohnpadahk koaros rahnwet duwehte eh kin ketin nsenohki sapwellime wahnpoaron ko. Eri, kitail kak kamehlele me Siohwa pahn ketin sapengala en Sises eh kapakap en pere kitail nan ahnsou apwal pwukat. Lepin Padahk 2:7, 8 padahkihong kitail me Siohwa kin duwehte mehn perepe ehu ong irail kan me kin lelepek ong ih oh e pahn “kin ketin sinsile irail kan me poadidiong.” Kaidehn ahnsou koaros e kin mengei en peikiong dahme Siohwa ketin kupwurki. Ahpw irail kante me kin peikiong Siohwa me pahn ahneki mour soutuk oh saledek mehlel. (Rom 8:21) Madamadau en meteikan ele weksang met, ahpw dehr mweidohng ren pitihiukedi.

[Nting tikitik kan me mi pah]

[Kilel en pali 19]

Ia duwen atail kak kasawihada irail kan me duwehte Apsalom rahnwet oh pere kitail sang irail?