Kumwail en Pwuhriong Nan Likoun Karakarahk
1 Emen pwutak me wia silepen sihpw kin likih Siohwa oh e kalowehdi sounpei kehlail men. (1 Sam. 17:45-47) Emen ohl kepwehpwe kin kanengamah oh kin dadaurete mendahki kalokolok. (Sohp 1:20-22; 2:9, 10) Sapwellimen Koht Ohlo kin ketin kasalehda me soahng koaros me e kin padahki kin kohsang Semeo. (Sohn 7:15-18; 8:28) Nan ehu ehu mehn karasepe pwukat, karakarahk me wia irair kesempwal me sewese irail pwukat. Duwehte rahnwet, karakarahk me kesempwal pwehn sewese kitail nan soangsoangen irair akan me kitail kin lelohng.—Kolose 3:12.
2 Ni Ahnsoun Kalohk: Nin duwen sounkalohk Kristian kan, kitail anahne kasalehda lamalam karakarahk ni atail pahn kalohki Rongamwahu ong soangsoangen aramas akan, oh kitail en dehr mwadang kadeik irail pwehki wasao me irail kohsang ie, de arail tiahk, de soangen irair me irail tikida loale. (1 Kor. 9:22, 23) Ma ekei aramas kin lemei ong kitail de irail kin aklapalap oh sohte men rong duwen Wehio, kitail en dehr kapwurehiong irail soangen lemei de aklapalap, ahpw kitail en kanengamah oh nantihong rapahki irail akan me men rong kitail. (Madiu 10:11, 14) Kitail sohte men aramas en wadek kitail pwehki atail loalokong de sukuhl, ahpw kitail men sewese aramas akan en sohpeiong Mahsen en Koht, oh pohnese me sapwellimen Koht Mahsen me kak kamwekid oh wekidala atail mour oh madamadau. (1 Kor. 2:1-5; Ipru 4:12) Ni atail kin kahlemengih Sises, kitail men kihong Siohwa atail kaping koaros.—Mark 10:17, 18.
3 Nan Mwomwohdiso: Kristian akan anahne ‘pwuhriong nan likoun karakarahk oh uhpahpene nanpwungarail.’ (1 Pit. 5:5) Ma kitail pahn ahneki madamadau me aramas teikan me mwahu sang kitail, eri, kitail pahn rapahki ahl akan en papah riatail kan, a kaidehn awiawih irail en papah kitail. (Sohn 13:12-17; Pilipai 2:3, 4) Ma kitail ahneki lamalam karakarahk, kitail sohte pahn ahneki pepehm me kitail sohte kak wia soangen doadoahk kan me duwehte kamwakele Kingdom Hall.
4 Karakarahk kin sewese kitail en ‘sawaspene oh miniminpene ni limpoak’ oh met pahn kahrehda popohl oh minimin nanpwungen tohnmwomwohdiso. (Episos 4:1-3) E kin sewese kitail en uhpaiong irail me Siohwa idihada en apwalih mwomwohdiso. (Ipru 13:17) E kin kamwekid kitail en alehdi kaweid oh kaiahn koaros me kin kohwong kitail. (Mel. 141:5) Oh karakarahk kin kamwekid kitail en likih Siohwa ni atail kin kapwaiada atail pwukoa kan nan mwomwohdiso me kohwong kitail. (1 Pit. 4:11) Duwehte Depit, kitail pil pohnese me kitail pahn kak pweida mwahu nan atail mour, kaidehn pwehki pein atail kehl oh koahiek, ahpw pwehki sapwellimen Siohwa kapai oh kupwurmwahu.—1 Sam. 17:37.
5 Mwohn Silangin Koht: Ahpw, kesempwal sang soahng koaros, kitail anahne ‘karakarahkala pahn nin limen Koht manaman.’ (1 Pit. 5:6) Ma kitail kin dadaurete mendahki kahpwal akan, kitail uhdahn pahn kasikasik kapai kan oh soahng kansenamwahu kan me Wehin Koht pahn wahdo. Ahpw, kitail anahne ahneki lamalam karakarahk oh kanengamah, ni atail awiawih Siohwa en kapwaiada sapwellime inou kan ni sapwellime ahnsou. (Seims 5:7-11) Pil duwehte Sohp me kin kolokolete eh lelepek, dahme kitail en keieu nsenohki iei me “kaping en kohwong mwaren Siohwa.”—Sohp 1:21, New World Translation.
6 Pwehki soukohp Daniel ‘aktikitikla mwohn silangin Koht,’ e ale kapai pwukat: Siohwa kupwurperenki ih oh pwais tohto kohwong ih. (Dan. 10:11, 12) Kitail en pil pwuhriong nan likoun karakarahk, pwe kitail wehwehki me “karakarahk oh lemmwiki Siohwa kin imwikihla kepwehpwe oh wahu oh pil mour.”—Lepin Padahk 22:4, NW.