Iaduwen Kitail Kak Sewese Irail me Pwoudki Sounkadehde kan Ahpw Saikinte Iangala Padahk Mehlel?
1 Ladu en Siohwa tohto pwoudki aramas akan me kadek ong Sounkadehde kan oh kin perenki tohnmwomwohdiso ahpw irail kin pweiek en uhdahn wiahla sapwellimen Koht ladu kan. Emen ohl me pwoudki sister men wehkada: “Ni ahnsou me I kin medemedewe duwen kalohk ihmw-lel-ihmw, met kin wia mehn kerempwa ong ie.” Pil ekei anahne kesehla soangen wiewia kan me suwed oh met irail kin apwaliki, de ekei kin lemeleme me e nohn apwal en kolokol koasoandi me arail pwoud kin kolokol. Iaduwen kitail kak sewese irail?
2 Kasalehda me Kitail Nsenohki Irail: Ma kitail pahn nsenohki meteikan oh tehk duwen dahme irail kin pwunodki, met pahn kak sewese irail en mwekidki padahk mehlel sang Paipel. (Pilipai 2:4) Irail me sangete mahs sohte kin iang ahn arail pwoud oko pelien lamalam nda me soangen limpoak oh nsenoh me Sounkadehde kan kin kasalehiong irail kin inenen kamwekid irail. Emen ohl me koasoipe mihmi ni parakrap en mwoweo koasoia: “José, emen elder nan mwomwohdiso, kin inenen nsenohkin ie. I lemeleme me ah kangoange ie sewese ie en mehlel nan ahi onop.” Pil emen ohl me ah pwoud Sounkadehde men kin tamataman me irail brother kan me kin mwemweitla reh kin kalap koasoia duwen soahng kan me e kin nsenohki. Ohlo koasoia: “I tepida kilangwong ahn ahi pwoud ah pelien lamalam ni ehu madamadau kapw. Irail me iang ahn ahi pwoud pelien lamalam inenen loalokong oh irail kin wehwehki duwen soangsoangen oaralap akan.”—1 Kor. 9:20-23.
3 Sewese Irail Ni Ahl me Konehng Irail: Irail me arail pwoud Sounkadehde kin pil mwekidki sawas kadek me kin kohwong irail. (Lepin Padahk 3:27; Kalesia 6:10) Ni ahn emen ohl (me ah pwoud sohte mih nan padahk mehlel) ohla were sidohsa, emen brother pwulopwul sewese ih. Ohlo koasoia: “Dahme pwutako wia inenen kamwekid ie laud.” Pil emen brother doadoahngki rahn ehu pwon en sewese ahn emen sister ah pwoud en wiahda kehl ieu en kelepene sapweo. Ni ahnsou me ira doadoahkpene rahno, ira kin koasokoasoipene oh ira kin ehupene. Wihk riau mwurin mwo, ohlo tuhwong brothero oh koasoia: “E wia ahnsou mwahu met ien wiliakapwala. Ke kak onop Paipel rehi?” E kekeirada mwadang ni pali ngehn oh met e wiahla emen Sounkadehde me papidaislahr.
4 Ni atail kin raparapahki irail me kin perenki rong nan atail wasahn kalohk, kitail en wia uwen atail kak en nsenohki irail akan me pwoudki Sounkadehde kan me saikinte iangala padahk mehlel.—1 Tim. 2:1-4.