Nantihong en Pweida Mwahu nan Ahmw Kalohk

¹ Nan wehwe rotala, oh mie ngihl ehu me wie lalaudla oh kipehdi wasa koaros. Depwek ehu me mwomwen ediniei kohkohdi pohn sampah. Dahkot mwo? Karis en mensiek rar rar kei kohkohdo pwehn kauwehla sahpwo! Kasansal wet me soukohp Soel kohpadahr kin wie pweipweida nan atail ahnsou ni en sapwellimen Siohwa ladu keidi kan, iangahki pokon kalaimwun, wiewia doadoahk en kalohk.​—Soel 2:9.

² Weksang mensiek kan me kin ihte rapahki mwenge ong pein irail, kitail sapwellimen Siohwa aramas akan kin nsenohki mehlel mour en aramas teikan me kitail kin kalohk ong. Kitail men sewese meteikan en sukuhliki padahk mehlel sang Mahsen en Koht oh mwekidki met pwehn kak ale komourparail. (Sohn 17:3; 1 Timoty 4:16) Kahrehda, kitail men wia uwen atail kak en sewese aramas nan kalohk. Sohte lipilipil wiepen kalohk me kitail kin wia, kitail men wia ni ahl oh ahnsou me pahn keieu mwahu pwehn tuhwong oh sewese aramas. Pwehki “irair en sampah wie wekiwekila,” kitail anahne kasawih pein kitail pwehn tehk ma atail padahk kan oh elen tuhwong aramas akan kin pweida mwahu.​—1 Korint 7:31.

³ Mendahki kitail kin doadoahngki soangsoangen ahl akan en tuhwong aramas akan, doadoahk en kalohk ihmw-lel-ihmw kin wia utupen keieu laud en doadoahk kesempwal ehu. Ke kin diar me aramas akan sohte kalap mihmi ni imwarail kan de irail memeir ni ahnsou me ke kin kohla rehrail? E inenen kansensuwed pwe kitail sohte kak ehukihong irail Rongamwahuo! Dahme ke kak wia pwehn tuhwong aramas pwukat?

⁴ Kitail en Kak Kawekila Atail Koasoandi oh Doadoahngki Atail Loalokong: Nan keieun senturi nan Israel, sounlaid kan kin laid ni pwong. Dahme kahrehda irail kin laid ni pwong? Mendahki met sohte mengei ong irail, ahpw e wia ahnsou keieu mwahu en koledi mwahmw tohto. Ni pwong kin wia ahnsou me keieu mwahu en laid. Watchtower (lokaiahn wai) en June 15, 1992, kin koasoia duwen met: “Kitail anahne kasawih mour en aramas akan me kin mihmi nan atail wasahn kalohk pwe kitail en kak kohla kalohk ahnsou me pali laud en tohnihmw kan kin mihmi nan imwarail kan oh kak kasamwo kitail.” Nan wasa tohto, aramas tohto kin mihmi nan imwarail ni menseng en Rahn Kaunop oh Rahn Sarawi kan, ahpw irail mwein sohte men kasamwo kitail nan soangen ahnsou kan. Ma met kin wiawi nan ahmw wasa, kitail kak koasoanehdi pwehn kalohk ni imwarail kan soangen kuloak me duwehte kuloak 11 ni menseng de mwurin souwas? Met kin wia ahl ehu me pahn kasalehda me kitail wia uwen me kitail kak en kamwahuwihala atail doadoahk en kalohk pwehn sewese irail en sukuhliki padahk mehlel, oh e pil pahn wia elen kasalehda limpoak mehlel me kin wia kilelepen Kristian mehlel akan.​—Madiu 7:12.

⁵ Nan Pilipai 4:5, wahnpoaron Pohl kin katamankin kitail en ‘doadoahngki atail loalokong.’ Pwehki kaweid wet kohsang rehn Siohwa Koht, kitail anahne toupahrek oh doadoahngki atail loalokong ni atail kin wia atail doadoahk en kalohk ni ngoang. Kitail sohte men ‘ekihsang aramas akan mehkot me pahn kak sewese irail sang ni atail kin kalohk nan wasahn pokon kan oh sang ihmw-lel-ihmw,’ ahpw kitail men wia doadoahk en kalohk ni soangen ahnsou kan me keieu mwahu en tuhwong aramas oh irail pahn perenki rong. (Wiewia 20:20) Duwehte sounlaid nan keieun senturi nan Israel, kitail en ‘laid’ ni ahnsou kan me pahn keieu pweida mwahu, kaidehn ahnsou kan me pahn mwahu ong pein kitail.

⁶ Soangen wekidekla dah kan kak wiawi? Pali laud en ahnsou, tuhpene ong kalohk kin wiawi kuloak 8:30 ni menseng en Rahn Kaunop oh Rahn Sarawi, oh mwurin tuhpene, sounkalohk kan kin inenla kalohk ihmw-lel-ihmw. Ahpw, ekei pwihn en elder kan koasoanehdi me sounkalohk kan pahn kalohk nanial, nan wasahn pisnis, de pwurehng pwurala rehn aramas akan (pwehn return visit) mahs, oh mwuri kalohk ihmw-lel-ihmw. Soangen koasoandi kapw kan kin pweida mwahu oh sounkalohk kan kin kak koasoiong aramas tohto ni ahnsou me irail pahn kalohk ihmw-lel-ihmw.

⁷ Kitail en Kasalehda Kadek oh Ese Lamalam: Ni atail kin tuhwong aramas akan sang ihmw lel ihmw, kitail kin kilang me aramas kin wekpeseng ni arail kin kilangwohng atail doadoahk en kalohk. Ekei aramas kin perenki rong, oh ekei aramas sohte kin perenki rong, oh ekei aramas kin men akamai oh uhwong kitail. Nan pwuhken Reasoning From the Scriptures, pali 7 kin kasalehda me kitail en dehr “akamai ong aramas akan me sohte kin wauneki padahk mehlel.” Ma tohnihmwo men akamai ong kitail, e pahn mwahu en kohkohla sang reh. Kitail sohte men kahrehong tohnihmwo en lingeringer pwehki kitail iding irail en rong atail padahk de pwungki atail padahk kan. Ma kitail pahn wia met, e pahn kak kahpwale sounkalohk kan me pahn uhd kalohk ong irail mwuhr oh pil e pil pahn suwed ong doadoahk en kalohk.

⁸ Kitail kak pweida mwahu nan kalohk ma kitail pahn tehk kanahieng likin ihmw de soahng teikan. Kasawih mwahu ihmwo ni ahmw aluhlahng ihmwo. Kahdeng en ihmwo pwon kin ritidi? E mwomwen meleilei oh sohte katairong? Met kak kasalehda me tohnihmwo memeir. Mwein e pahn mwahu ma kitail pahn pwurodo mwuhr. Kitail kak daulih ihmwo. Kitail kak pwurala ni ihmwo mwohn kitail kohkohsang wasahn kalohk de kitail kak kileledi nan neitail rekord pwehn kak pwurala mwurin awa kei de pil ehu rahn.

⁹ Miehte ahnsou me kitail kin sapwungala kapirida tohnihmwo ni arail memeir de kauwehla ah onepek. Ele mwein e kak nsensuwedida de lingeringerda. Dahme kitail pahn wia? Lepin Padahk 17:27 mahsanih: “Aramas me kin kanengamah ahneki erpit.” Mehlel, kitail sohte kin pek mahk pwehki kitail wia doadoahk en kalohk, ahpw kitail kak pek mahk pwehki atail kohdo ni ahnsou me sohte nohn soanamwahu ong aramaso. Kitail kak idek rehn tohnihmwo ma kitail kak pwurodo pil ehu ahnsou me mwahu ong ih. Kasalehda loalokong oh doadoahngki lokaia kamantik kin kak kansenamwahuwih aramaso. (Lepin Padahk 15:1) Ma tohnihmwo ndaiong sounkalohk kan me e kin doadoahk ni pwong kan, e pahn mwahu en ndaiong sounkalohk teikan oh ntingihdi met nan rekord en wasahn kalohk pwe sounkalohk teikan en dehr kauwehla ah meir oh onepek.

¹⁰ Pwehki aramas tohto sohte kin mihmi ni imwarail ni atail tepin kohla, kitail en nantihong wia uwen atail kak pwehn tuhwong irail oh ehukihong irail rohng en kamour. (Rom 10:13) Ahpw, kitail anahne doadoahngki atail loalokong. Ma atail nanti en tuhwong tohnihmwo ni rahn de ni soutik sohte pweida, eri e pahn mwahu en doadoahngki telephone pwehn tuhwong. Ma kitail sohte kak tuhwong ni ahl pwukat, kitail kak kihdi tract de handbill ni wenihmwo, de wasa ieu me tract de handbill sohte pahn ohla de wisekisekla ie, keieu ma kitail kin kalap kalohk wasao. Mwein ele kitail kak tuhwong tohnihmwo ehu ahnsou mwuhr nan kalohk.

¹¹ Soandi Mwahu oh Kasalehda Wahu ong Siohwa oh Meteikan: E pahn mwahu en koasoanehdi pwihn en kalohk kan en wia kisin pwihn tikitik de malaulau. Ekei tohnihmw kan kin masepwehkada ma sidohsa tohto kin peidi likin imwarail oh aramas tohto kin doudi sang sidohsa pwuko. Kitail sohte men kahrehiong aramas en lemeleme me kitail pahn wia mehn kedirepw nan arail wasahn kousoan. E pahn mwahu ma koasoandi kan koaros ong kalohk pahn wiawi ni wasahn tuhpenehn kalohk. Tohnihmw akan sohte kin masepwehk ma pwihn en sounkalohk malaulau, duwehte peneinei ehute, pahn kalohk nan arail wasa, oh pil, e pahn mengei en koasoanehdi ma sounkalohk malaulau kin kalohk nan ehu wasa.

¹² Pwehn kasalehda me kitail kin soandi mwahu, e pahn kesempwal pahpa oh nohno kan en tehk dahme neirail seri kan kin wia nan wasahn kalohk kan. Seri kan anahne tiahk mwahu ni arail kin iang me laud kan kohla ni imwen aramas akan. E sohte konehng seri kan en saledek mwekimwekidseli de mwadong de wia soangen tiahk me pahn kahrehiong tohnihmwo de meteikan en sohpeiong serio oh nsensuwedkihla mehkot me e wia.

¹³ Sounkalohk tohto diarada me arail kalohk kin pweida mwahu ni ahnsou me irail kin nantihong tuhwong aramas sohte lipilipil nan wasa sohte lipilipil kan me irail kin mih ie​​—nanial, oh nan wasahn peidi en sidohsa kan, oh nan wasa teikan me aramas kin mih ie. Kitail kak kihda mehn kadehde mwahu nan soangen wasa pwukat, kaidehn ihte sang atail lokaia ahpw pil sang ni atail kin ese lamalam oh koasoandi mwahu. Nan ekei mwomwohdiso me kalohk ong wasahn wehi pokon kin kak wiawi, irail koasoanehdi wasa pwukat en wiahla wasahn kalohk. Brother kan kin koasoanehdi sounkalohk emen de ekei sounkalohk kan en pwukoahki kalohk nan wasa pwukat. Soangen koasoandi pwukat kin sewese doadoahk en kalohk en pweida mwahu, oh pil, sounkalohk malaulaute me pahn kalohk nan ehu wasa ni ahnsou tehieu, oh soangen koasoandi pwukat pahn kasalehda me kitail men kapwaiada kaweid en 1 Korint 14:40 me mahsanih: “Kumwail wiahda mehkoaros nin duwen me konehng oh koasoandi pwung.”

¹⁴ Mwomwatail en ahnsou koaros kasalehda wahu oh pil kasalehda me kitail wia sounkalohk kan me wa mwaren Siohwa. Met pil pahn sansal sang ni dipwisou kan me kitail kin doadoahngki. E pahn kauwehla mwaren Siohwa ma kitail pahn weuwa soangen ehd de kopwou en kalohk me ohla de meringlahr douluhl de ma kitail pahn doadoahngki Paipel de sawaspen Paipel kan me pwelipwel de ohla de amwurekpene. Mie lepin koasoi me nda me atail likou oh kapwat kin wia “kasalepen soangen aramas dah kitail oh mehnia dake me kitail mi ie.” Ihme kahrehda, atail likou oh kapwat anahne soandi mwahu, sohte pahn kasalehda paliwar, oh sohte pahn kala, ahpw e pahn “konehng pwe kitail en kak kalohkiseli duwen Rongamwahu.”​—Pilipai 1:27; 1 Timoty 2:9, 10.

¹⁵ Nan 1 Korint 9:26, wahnpoaron Pohl mahsanih: “Ihme I sohte kin tang, pweiengki; oh ihme I kin pei, rasehng sounpaker men me sohte kin pakepakere mwahl nan wehwe.” Kitail en kahlemengih Pohl oh wia uwen atail kak en pweida mwahu nan kalohk. Kitail en ngoangki iang kalohk ni atail wia kisehn sapwellimen Siohwa “karis en loukust” rahnwet, kitail en doadoahngki atail loalokong oh ese lamalam ni atail kin kasalehiong aramas nan atail wasahn kalohk duwen rohng en kamour wet.

[Kilel nan Pali 3]

Dahme Kitail Anahne Wia Pwehn Pweida Mwahu Nan Kalohk

[Kilel nan Pali 3]

▪ Kawekila Atail Koasoandi

▪ Doadoahngki Atail Loalokong

▪ Ese Lamalam

▪ Kasalehda Kadek

▪ En Soandi Mwahu

▪ Kasalehda Wahu ong Siohwa  oh Meteikan