Irelaud 7

Mihding Kan Me Kin Sewese Kitail En “Kasalehda Limpoak Oh Wiewia Mwahu”

IA UWEN eh wia mehkot me inenen konehng koasoandi kan me kin wiawihda ohng Kristian kan ong kaukaule tuhpene pwehn kaudok oh en ale mwengehn ngehn. E wia mehkot kesempwal ohng kitail koaros en kin tuhpene pwehn rong Mahsen en Koht oh en pil sukuhliki kupwure kan oh iaduwen atail pahn papah ih. Met kin pidada kitail koaros, sohte lipilipil atail sounpar, duwehte irail sapwellimen Koht aramas inouda kan me iei wehin Israel. Me pid Sarawien Impwal, Siohwa kehkehlikihong Wehio ni ah padahkiong Moses: “Kapokonepene aramas akan koaros, ohl, lih, seri, oh pil mehn liki kan koaros me kin kousoan nan amwail kahnimw kan, pwe re en rong oh esehla duwen ar pahn lemmwiki Siohwa, amwail Koht, oh loalopwoatohng kapwaiada sapwellime padahk kan.”—Deuderonomi 31:12.

E sansal me kahrepen mihding kan rahnwet, me duwehte mahso, iei en rong oh ale “kasukuhl sang rehn Siohwa.” (Aiseia 54:13) Tuhpenehn kaudok kan me kin wiawi nan Israel en mahs kin wia ahnsou kaperen, me sansalda nan mahsen kan en Depit, me ntingihdi: “I nsenamwahukihla ni ar patohwanohng ie, ‘Kitail patohla nan tehnpas en Siohwa.’” (Melkahka 122:1) Wahnpoaron Pohl kasalehda duwen pil ehu kahrepen en peren ni ahnsou me kitail kin tuhwong iengetail tohnkaudok kan. E ntingihdi: “Kitail nsenoh sawaspene ni kasalepen atail limpoak oh atail wiewia mwahu kan.” (Ipru 10:24) Mihding en mwomwohdiso kan kin wia ahnsou ehu ohng irail tepin Kristian akan ahnsou mwahu en esehla emenemen, kihda mehn kangoang, oh ale kakehl sang arail kin werekpene. Met pil kin wiawi rehn irail Sounkadehdehn Siohwa kan rahnwet ni arail kin tuhpenehn kaudok ohng Siohwa.

MIHDING KAN EN MWOMWOHDISO

Paipel kin kasalehda duwen kesempwalpen kohpene ohng kaudok oh kapinga Siohwa. (Melkahka 26:8, 12; Madiu 18:20) Irail ako me alehda padahk mehlelo ni Pendekos 33 C.E. sohte kin mwamwahleki tuhpene pwukat. Irail kin sukuhliki duwen padahk kan en wahnpoaron ako, oh “rahn koaros re kin tuhpene oh wiahki ehu nan Tehnpas Sarawio.” (Wiewia 2:42, 46) Mwuhr ni ahnsou me Kristian akan kohpene en kaudok, irail kin wadek nting sarawi kan me pwilisang rehn Koht, oh pil iangahki kisinlikou kan me ntingda sang rehn wahnpoaron ko oh pil tohnpadahk en Kristian teikan. (1 Korint 1:1, 2; Kolose 4:16; 1 Deselonika 1:1; Seims 1:1) Kapakap kin wiawi ahnsou me tohnmwomwohdiso kin tuhpene. (Wiewia 4:24-29; 20:36) Ekei pak, irail kin kasalehda duwen ekspiriens kan me kin pid doadoahk en misineri kan. (Wiewia 11:5-18; 14:27, 28) Kosonned en Paipel oh pweidahn kokohp kan sang Koht kin kohieng petehkpe. Kaweid kin kohda ohng ire kan ohng wiewiahn Kristian me konehng oh me lelepek ohng Koht. Kangoang kohieng koaros re en pwerisek oh lohkiseli Rongamwahuo.—Rom 10:9, 10; 1 Korint 11:23-26; 15:58; Episos 5:1-33.

Nan atail ahnsou, mihding kan en Kristian ni soangen ahl tohto kin duwehte elen kaudok en irail ko nan keieun senturi. Kitail kin peikiong kaweid me sansal nan Ipru 10:25 sang ni atail kin “sohte tokedihsang atail tiahk en pokonpene, duwen ekei ar kin epwehnki wia. A kitail nantihong kakehlaka nan kapehd en emenemen, pwe duwen amwail ese Rahnen Kauno kerendohr.” Erein ahnsou apwal wet en imwin rahn akan, kitail anahne mehn kangoang kan me kin kohsang kaukaule tuhpene ohng mihding kan pwehn kolokolete atail kehl en pali ngehn oh loalopwoat. (Rom. 1:11, 12) Me duwehte en Pohl ahnsou, Kristian akan rahnwet kin momour nan dih ieu me kin soaloalopwoat oh mwersuwed. Kitail kin pwilikihdi oh liksang soahng kan me kaidehn kupwuren Koht ahpw iei ngenen koasoandi suwed wet. (Pilipai 2:15, 16; Taitus 2:12-14) Ni mehlel, iawasa kitail konehng mih ie likin rehn irail sapwellimen Siohwa aramas akan? (Melkahka 84:10) Oh dahme kak wahdo kamwahu likin rongorong Mahsen en Koht?

Siohwa iei Sounketikihda mwengehn ngehn akan me inenen tohto. (Melkahka 145:14, 15) Siohwa kin doadoahngki Sises oh “ladu lelepek oh loalokong” pwe mwengehn ngehn en kin kohda ahnsou konehng. (Madiu 24:45) Iaduwen mwengehn ngehn pwukat kin kak kohieng emenemen nan sapwellimen Siohwa pwihn? Ehu ahl iei sang ni soangsoangen mihding kan me kin wiawi wihk koaros nan mwomwohdiso. Tehk duwen mihding kan oh kapai kan me kin kohsang atail kin kaukaule ‘kasalehda limpoak oh wiewia mwahu.”

ONOP EN KAHN IROIR

Kahn Iroir me kin Pakapakairki Wehin Siohwa iei ahl keieu laud me kin kihong sapwellimen Siohwa aramas akan mwengehn ngehn ni ahnsou konehng kan. Ekei artikel me kin wiawihda nan Kahn Iroir kin wiawihda ohng onop en mwomwohdiso nan ehuehu wihk, iangahki kaweid tohrohr me kin poahsoanda pohn Mahsen en Koht. Ire kan me petehkpe keneinei kin kohwong nan Onop en Kahn Iroir kin kamwekidada mohngiong oh madamadau en tohnmwomwohdiso oh kakairada arail kehl en pali ngehn.

Oaralap en artikel kan kin wekiwekila. Artikel kan kin kalap pid duwen doadoahngki kaweid en Paipel nan atail mour oh kakehle Kristian akan sang “ngenen sampah” oh pil sang wiewia suwed kan. (1 Korint 2:12) Ehuehu audepen Kahn Iroir kin kalaudehla marain me kin pid padahk kan en Paipel oh pweidahn kokohp me kin sansalda sang rehn Siohwa me kin sewese koaros en kolokolete teng padahk mehlel oh weweidwei nan ahl en me erpit kan. (Melkahka 97:11; Lepin Padahk 4:18) Iang towehda Onop en Kahn Iroir oh iang pasapeng kak sewese kitail en perenki koapworopwor en sapwellimen Siohwa koasoandi kapw me pwung. (Rom 12:12; 2 Piter 3:13) Onop en Kahn Iroir kak sewese kitail en kekeirada wahn ngehn akan nan atail mour oh kolokolete kehlail atail ineng en papah Siohwa ni ngoang. (Kalesia 5:22, 23) E pil kin sewese kakehlaka atail pwoson pwehn kak dadaur pahn kasongosong kan oh pil kauwada “ehu poahsoan kehlail ong ni ahnsou kohkohdo” pwe kitail en “kak lelohng ni mouro me uhdahn mour mehlel.”—1 Timoty 6:19; 1 Piter 1:6, 7.

E sansal me sawaspen Paipel me kitail kin sukuhliki nan wihk koaros nan Onop en Kahn Iroir kin inenen kesempwal. E kin sewese kitail en kekeirada ni pali ngehn, wiahkihla Mahsen en Koht kisehn atail mour, kin kak kawekila atail mour pwehn pahrekiong padahk kan en Paipel, oh en ehuiong riatail kan ni pali ngehn nan sampah pwon. Dahme emenemen kak wia pwehn paiekihda koasoandi en mwengehn ngehn wet? Kaunopada iren onopo mwowe, tehk iren Paipel kan koaros, oh iang pasapeng nan mihdingo. Ni ahmw pahn wia met, e pahn kahrehda iren Paipel kan en kamwekid kitail laud oh katengehdi loal padahk mehlel kan nan atail mohngiong. Ni ahnsowohte, meteikan kin pil paiekihda arail kin rong koasoiepen atail pwoson oh koapworopwor. Rongorong kanahieng ahn meteikan pasapeng pahn kahrehong atail pahn paiekihda laud iren onopo oh mehn kasukuhl kan me kitail kin sukuhliki wihk koaros.

Onop en Kahn Iroir kin sewese kitail en dadaur atail kehl en pali ngehn oh tengeteng nan pwoson. Kitail en dehr kilangwohng met nin duwen wiewia ieu me kitail kin ihte wia pwehki kitail ahnlahr. Koaros konehng en ale kapai kesempwal wet me Siohwa ketikihda pwehn kakehle koaros me kin iang mih nan pwoson.

MIHDING ONG WEHI POKON

Mihding ohng Wehi Pokon kin wiawi ni rahnohte me Onop en Kahn Iroir kin wiawi nan wihk koaros, ahpw ihte mwomwen kihwei padahk kan me wekpeseng. Onop en Kahn Iroir kin wiawi ni mwomwen peidek oh pasapeng me kin kohsang rehn irail kan me iang towehda, ahpw Mihding ohng Wehi Pokon kin wiawi ni padahk kan me kin poasoanda pohn Paipel. Soangen mihding pwukat kin wia ehu irair kesempwal ohng kaitarlahn pali ngehn en irail me kapw akan oh tohnmwomwohdiso kan.—Wiewia 18:4; 19:9, 10.

Ni atail kin luhke irail kan me men rong de pil wehi pokon, kitail kin kak kahrehong aramas tohto en esehla padahk kesempwal kan en Paipel. Mihding ong Wehi Pokon kin sewese koaros me towehda en kak mwadang rong oh kapwaiada padahk kan en Kristian oh kangoange kitail en kak kehlail oh tengeteng nan atail doadoahk en papah Siohwa oh kalohki Wehio.

Soangsoangen oaralap me kin kohda nan Mihding ong Wehi Pokon. Padahk kan kin pidada padahk mehlel en Paipel oh kokohp kan iangahki kaweid kan sang Paipel oh kaweid me pidada mour en peneinei, pwopwoud, irair en me pwulopwul kan, oh tiahk mwahu en Kristian kan. Ekei padahk kan kin pidada sapwellimen Siohwa doadoahk kaselel en kepikipikda kan. Ekei pil kin kasalehda mehn kahlemeng mwahu en pwoson, eimah, oh mehlel en irail kan me Paipel kin koasoia, oh kasalehda iren kaweid ohng atail ahnsou. Mihding ohng Wehi Pokon ni mehlel kin wia ahnsou en alehda mwengehn ngehn me kin sawas oh kakehle kitail.

Ma kitail men alehdi kapai koaros en koasoandi en Mihding ohng Wehi Pokon, eri e kesempwal kitail en iang towehda kaukaule, rongorong kanahieng, kilang iren Paipel kan me aramas me padahko kihda, oh iang wadek ni ahnsou me ih me wia padahko kin wadek oh kawehwe. (Luk 8:18) Met pahn kak sewese kitail en esehla iawasa iren Paipel kan mih ie, oh e pahn pil kalaudehla atail loalokongkihla iren Paipel kan. Ni atail pahn kin tehk duwen pwung en soahng kan me kitail kin sukuhliki, kitail en nantihong koledi teng dahme kitail sukuhliki oh kapwaiada nan atail mour.—1 Deselonika 5:21.

Ma kin itar irail kan me pahn wia padahk, eri mwomwohdiso uhdahn pahn kin wia padahk en wehi pokon nan wihk koaros. Pak tohto, me kin kihda padahko kin kohsang nan ehu mwomwohdiso me keren pwehn wia padahk. Ma sohte itar irail kan me pahn wia padahk nan ehu wasa, eri, koasoandi kan kin wiawihda pwe padahk en kak wiawi.

Sises Krais, sapwellime tohnpadahk ko, oh iengerail kan kin wia mihding ong wehi pokon duwehte me kin wiawi rahnwet nan mwomwohdiso en Sounkadehdehn Siohwa kan. E sansal me Sises me wia sounpadahk keieu lapalap me mour nin sampah. Aramas koasoia duwen Sises: “Sohte mehmen me kin padahk duwehte ohlo.” (Sohn 7:46) Sises kawehwe sapwellime mahsen kan ki manaman, oh met kin kahrehong irail kan me kin rongorong en kin pwuriamweikihla. (Madiu 7:28, 29) Irail oko me sapwellime padahk kan kin lel nan mohngiongarail kin alehda kapai tohto. (Madiu 13:16, 17) Irail tohnpadahk ko kin kahlemengih ih. Nan Wiewia 2:22-36, kitail wadek duwen sapwellimen Piter padahk kehlail ni Pendekos 33 C.E. Me tohto mwekidki oh kapwaiada dahme re rong. Mwuhr, mie irail me paiekihda sapwellimen Pohl padahk nan Adens. (Wiewia 17:22-34) Me duwehte nan atail ahnsou, irail aramas rar kei kin alehdi kapai kan sang ni Mihding ong Wehi Pokon me kin wiawi nan wihk koaros nan mwomwohdiso kan oh pil padahk ong wehi pokon me kin kohda nan Kapokon en Circuit, District, oh kapokon laud kan. Kitail en kihong atail utuht koaros ohng koasoandi kan en Mihding ohng Wehi Pokon.

SERVICE MIHDING

Service Mihding kin pidada atail doadoahk en kalohk. E kin kaunopadahng kitail ohng doadoahk en kalohki Rongamwahu en Wehio, katohnpadahk, oh lohki duwen sapwellimen Koht rahn en kadeik lapalap me kohkohdo. (Madiu 28:20; Mark 13:10; 2 Piter 3:7) Pali laud en ahnsou, doadoahk wet kin pidada koasoiong aramas akan oh kihong irail sawaspen Paipel kan. Ahpw, atail kapwaiada sapwellimen Siohwa kaweid, ih me pahn kahrehong pweidahn atail doadoahk en kalohk oh wah kan me kitail kapwarehda. (Madiu 13:23; Sohn 15:8) Kitail kin kasalehda imwila mwahu me kin kohsang kapwaiada iren Paipel kan. Service Mihding kin kasalehda duwen ire pwukat koaros me kesempwal ohng atail kaudok ohng Koht.

Nan ehuehu sounpwong, Atail Doadoahk en Wehio kin kasalehda duwen koasoandi en Service Mihding nan ehuehu wihk. Ke kak ale noumw doaropwe en Atail Doadoahk en Wehio sang nan mwomwohdiso. Ni ahnsou me kitail kin alehdi ehu sounpwong kapw en Atail Doadoahk en Wehio, Presiding Overseer kin kousapahlih audepe oh koasoanehdi irail brother kan me konehng ale pwukoah kan nan ehuehu pwais nan mihding kan. E pil kak mweidong emen elder en wiahda koasoandi pwukat.

Elder kan oh irail ministerial servant kan kin ale pwukoah kan en apwalih ehuehu pali en nan prokram en Service Mihding. Irail kin kanahieng dehr kapatahiong ekei soahng likin dahme koasoandi ohng irail nan Atail Doadoahk en Wehio. Met wehwehki me irail anahne onopki duwen dahme kohieng irail ni keneinei pwehn kilangada ia mouren kaweid kan oh iaduwen arail kak kapwaiada met pwe irail en wehwehki oh tamataman. Madamadau keneinei kin kohwong ire me anahn en kapwaiada ohng ni irair en mwomwohdiso.

Pwehki mie soangsoangen ahl tohto me brother kan kak wiahda arail padahk kan, irail en dehr kihsang de katikitikihala kesempwalpen iren sawaspen Paipel me re kin kihda. Kamwomwada kan en dehr nohn daulihala de linganla oh wiahla mehn kapwat de kapoudial ekei pohn stage. Doadoahngki soangen kamwomwada kan me duwehte ahn emen wasahn doadoahk, de kalohk en ihmw lel ihmw, onop en Paipel, de koasoakoasoi en peneinei kan. Soangen mehn kamwomwada kan en kin pahrekiong wiepen sapwamwail de amwail wasa pwe irail sounkalohk kan en kak wehwehki.

Irail sounkalohk papidaislahr kan me kin wia mehn kahlemeng mwahu kan oh neirail seri tikitik kan me kaiahnda mwahu kak pil iang kisehn kamwomwada kan. Sang kaweid en irail brother koahiek kan, irail kak interview irail de pil luhke irail en kasalehda arail ekspiriens kan. Ma ke iang ale ahnsou mwahu en iang wia met, eri, wia met ni peren oh ni me konehng, oh pohnese me met wia kisehn ahmw papah Siohwa.

E pahn wia ineng en mohngiong en emenemen Kristian en mour ni ahl ehu me pahn kangoange meteikan en idawehn Sises Krais nin duwen Sounkadehdehn Siohwa inouda kei. Pwehki met, prokram en Service Mihding kin wiawihda pwehn lel mehn akadei pwukat: (1) en kangoange kitail en iang pidada nan doadoahk en kalohk ni uwen me kitail kak—sohte lipilipil ma kalohk en ihmw lel ihmw, nanial akan, de sohte lipilipil wasa me kitail kak tuhwong aramas ie—oh en kamwahuwihala atail padahk me pahn kasalehda mwahu duwen Rongamwahu en Wehio; (2) padahkihong kitail iaduwen kitail pahn pwurala rehn irail kan me kasalehda me irail perenki rong de pil ale sawasepen Paipel kan; (3) kamwekid kitail en kak wiahda ahnsou ohng wia onop en Paipel kaukaule rehn meteikan oh kaweidih irail kan me kin ale kasukuhl wet ohng sapwellime Siohwa pwihn; (4) kihong kitail ekei sawas akan ohng kalohk ni ahnsou soh lipilipil; (5) kasalehong kitail iaduwen atail kak kamwahuwihala atail nantihong sewese irail me kapw kan, neitail seri kan, oh irail me pwulopwul kan en wiahla tohnpadahk inouda kei.

Ke pahn paiekihda ma mwohn mihdingo, ke kousapahlih prokram me sansalda nan Atail Doadoahk en Wehio. Ekei pak, kitail anahne tehk nein Sounkadehdehn Siohwa kan neirail soangsoangen artikel kan nan sawaspen Paipel kan. En wiahda research mwowe sohte pahn ihte kahrehong uhk en sukuhlikihdi soahng teikan, ahpw met pahn pil kaunopuhkadahng pwukoah kan nan prokram akan me anahne tohnmwomwohdiso en iang kiseh. Ni ahmw pahn kalaudehla ahmw sukuhliki duwen soahng teikan nan Service Mihding, eri, ahmw doadoahk en kalohk pahn pil pweida mwahu.

Ni ahnsou me koaros nan mwomwohdiso kin iang towehda Service Mihding kaukaule, met kin imwikihla arail kin miniminpene. Pwehki emenemen Sounkadehde papidais men kin wiahla sounkalohk emen, kahrehda, en iang towehda mihding kin kesempwal pwehn sewese kitail kapwaiada atail pwukoah. E kin wia kamwahu ohng sohte lipilipil me men wiahla sapwellimen Koht ladu inouda men. Towehda mihding pwukat en kin wia kisehn atail koasoandi en ehuehu wihk.

Soangen mihding pwukat sohte wia mehkot kapw. Re kin poasoanda pohn iren Paipel kan. Mwohn Sises kadarala sapwellime tohnpadahk kan en kalohk, e kihong irail kaweid oaritik kan ohng dahme re pahn koasoia oh wia. (Madiu 10:5–11:1; Luk 10:1-16) Mwuhr, sapwellime tohnpadahk kan kin doulahte wia soangen mihding pwukat oh re kin koasoiahda arail ekspiriens kan nan doadoahk en kalohk, oh met kin kakehle irail en pwerisek nan doadoahk en kalohki Wehio. (Wiewia 4:23-31) Kitail kin pil wiewiahte met ahnsou wet.

THEOCRATIC MINISTRY SUKUHL

Theocratic Ministry Sukuhl kin wia koasoandi ieu me kin doudoulahte kasukuhlih irail kan nan mwomwohdiso. Koasoandi wet kin pidada wadawad en Paipel, padahk kan sang Paipel, kamwomwada kan, oh soangen kasukuhl en kalohk teikan. Kaweid kin kohieng irail tohnsukuhl kan pwe en sewese irail en kekeirada oh kamwahuwihala arail padahk kan. Ni ahnsou me soangsoangen ire kan kin kohda me tohnmwomwohdiso kin perenki oh paiekihda, Theocratic Ministry Sukuhl kin pil kahrehong irail kan me kin wia kamwomwada oh pil irail kan me kilikilang ahnsou mwahu en kamwahuwihala pein arail doadoahk en kalohk. Ekei pak kousapahl kin wiawi pwehn kihda ahnsou en kasawih pein kitail me pid kekeirdahn emen emen nan doadoahk en kalohk.

Ehuehu sounpar sapwellimen Siohwa pwihn kin ketikihda koasoandi en Theocratic Ministry Sukuhl me kitail pahn idawehn. Koasoandi wet kin kasalehda mehnia sawaspen iren Paipel kan kitail en doadoahngki oh iaduwen pwukoah kan pahn wiawi. Erein sounpar tohto, Theocratic Ministry Sukuhl kin kesempwal ohng ni kaiahnepen irail Sounkadehdehn Siohwa kan en pweida nan arail kalohki duwen Wehio. Irail koaros me kin kaukaule ehuiong mwomwohdiso, iangahki irail kan me ahpwtehn towehda mihding kan, kak tepida iang ma irail kin kamehlele oh pwungkin padahk kan en Paipel oh arail mour kin pwungiong kaweid en Kristian.

Sang ni atail pahn iang towehda Theocratic Ministry Sukuhl, kitail kin kasalehda me kitail kin kesempwaliki kalaudehla atail kekeirdahn pali ngehn. Kaweid kan me kin kohda kak sewese kitail en kasalehda “wiewia mwahu” nin duwen sounkapinga Siohwa ohng koaros. (Madiu 5:16) E kak kaunop kitail en alehdi soahng tohto nan ahnsou kan me kitail kihong nan doadoahk en kalohk oh pil en kangoange meteikan en mwekidki atail pasapeng kan nan mihding kan en mwomwohdiso. Me pid brother kan, kaweid wet pahn kak sewese irail en kak wiahla ministerial servant de elder oh mwuhr iang pwukoahki pwukoah laud kan en Service Mihding oh pil wia padahk en wehi pokon.

Irail kan me iang towehda pahn ese arail pwukoah kan ekis mwowe pwe en mie arail ahnsou en kaunopada oh pwurehng tehk sapahlih. Ma mie atail pwukoah nan kasukuhl wet, e pahn inenen kesempwal en mwadangodo mwohn mihding pahn tep. Kitail en nantihong en iang towehda mihding pwehn kak wia atail pwukoah. Ahpw, ma mie kahrepe karuwaru pwarada oh kitail sohte kak wia atail pwukoah, kitail en mwadang padahkihong ih me apwalih sukuhlo de brothero me pahn sewese iuk pwe koasoandi en wiawihda ohng emen en wiliandi.

Nin duwen kisehn atail prokram en mwengehn ngehn, Theocratic Ministry Sukuhl kin kihda kapai tohto. Soukohp Aiseia mahsanih: “Siohwa Koht, Wasa Lapalahpie, ketin padahkihong ie dahme I pahn patohwan, pwe I en kakehlada me pwangadahr akan.” (Aiseia 50:4) E sansal me sukuhl wet kin wia kisehn koasoandi kesempwal kan en kaiahnehda aramas rar kei en esehla lokaiahn irail kan me kin ale kasukuhl sang rehn Siohwa. Erein sounpar tohtohie, prokram wet kin sewese irail kan me iang towehda en kekeirada ni pali ngehn oh sukuhliki iaduwen arail kak kasalehda ni ahl mwahu duwen Rongamwahu en Wehio. Sang ni kaweid en ngehn sarawi, soangen kasukuhl wet kin sewese sapwellimen Koht aramas akan en kihda pasapeng ohng koaros me kin men ese dahme irail kin koapworopworki. Sukuhliki en doadoangki Mahsen en Koht ni ahl wet kin wia kapai ehu.

Irail kan me towehda Theocratic Ministry Sukuhl kak ale kapai laud sang ni arail pahn kin doadoangki library en Kingdom Hall. Libraryo kin audaudki soangsoangen sawaspen Paipel kan en Sounkadehdehn Siohwa kan duwehte Watch Tower Publications Indexes iangahki soangen kawehwehn Paipel teikan, concordance, oh soangen sawaspen Paipel teikan. Kitail en doadoahngki soangen sawaspen Paipel teikan nan Kingdom Hall de mwurin mihding kan.