Koakon En Peidek
◼ “Ladu lelepek oh loalokong” kin pwungki pwihn tohrohr en Sounkadehde kan me kin kaukaule tuhpene en wia pein arail roporop en iren Paipel kan de koasoipene kan?—Madiu 24:45, 47, NW.
Soh. Ahpw, nan soangsoangen sahpw kan, ekei nan atail pwihn kin wiahda pein arail pwihn kan en wia pein arail roporop en oaralap en Paipel kan. Ekei kin wia pein arail pwihn en onop lokaiahn Ipru oh Krihk en Paipel pwehn tehk ia uwen pwung en kawehwe en New World Translation. Meteikan kin wia roporop en oaralap en sains kan me pid Paipel. Irail wiahda pein arail Web site kan oh chat room kan pwehn ehukihpene oh koasoipene arail madamadau kan. Re pil kin wia arail mihding kan oh wiahda pwuhk kan pwehn kihda dahme re diarada oh kapatahiong ire kan me kin kohda nan mihding en Kristian akan oh neitail pwuhk kan.
Nin sampah pwon, sapwellimen Siohwa aramas akan kin ale kaweid en pali ngehn tohto oh kangoang kan nan mihding en mwomwohdiso kan, kapokon kan, oh pil pwuhk kan me sapwellimen Siohwa pwihn me wiahda. Pahnangin kaweid en sapwellime ngehn sarawi oh poahsoankihda sapwellime Mahsen en padahk mehlel, Siohwa kin ketikihda dahme anahn pwe sapwellimen Koht aramas koaros pahn “kin ahnekipene lamalamteieu” oh arail “pwoson en kin kehlailla mehlel.” (1 Korint 1:10; Kolose 2:6, 7) Kitail kin uhdahn kalahnganki sapwellimen Siohwa koasoandi en ngehn kan nan imwin rahn akan. Kahrehda “ladu lelepek oh loalokong” sohte kin pwungki pwuhk kan, mihding kan, de Web site kan me kaidehn pwihno me wiahda de koasoanehdi.—Madiu 24:45-47, NW.
Se men kapinga irail akan me men doadoahngki arail kehl en madamadau pwehn utungada rongamwahu. Ahpw, e sohte konehng me pein ahn emen koasoandi en kauwehla dahme Sises Krais kin ketin wia nan sapwellime mwomwohdiso pohn sampah rahnwet. Ni ahnsoun tepin Kristian akan, wahnpoaron Pohl panawih duwen iang pidada soangen oaralap kapwang kan, duwehte “ireirekdohn eden mehn mahs ako, pwehki soahng pwukat kin kahrehda akamai; oh re sohte kin wia mehn kamwahu ong sapwellimen Koht koasoandi kan me sansalda sang ni pwoson.” (1 Timoty 1:3-7) Kristian koaros anahne “kaleke [irail] sang akupwung mwahl akan, oh irekdohng eden samatail kahlap ako, oh akamai kan, oh uhkipene kosonnedo. Sohte mwahn katepen soahng pwukat.”—Taitus 3:9.
Ong irail akan me men wia kalaudepen onop en Paipel oh roporop, se men kangoange irail en doadoahngki pwuhken Insight on the Scriptures, “All Scripture Is Inspired of God and Beneficial,” oh neitail pwuhk teikan duwehte soangen pwuhk kan me kin koasoipene duwen kokohp kan me dierek nan pwuhken Paipel en Daniel, Aiseia, oh Kaudiahl. Pwuhk pwukat kin kihda ire tohto ong onop en Paipel oh doudouloale, oh kak “audehkin[kitail]da kupwure iangahki erpit koaros oh marain sang rehn Ngehno. Eri, [kitail] ahpw pahn kak momour nin duwen me Kaun-o kin ketin kupwurki, oh pil wiewia dahme e kin ketin kupwurperenki. [Atail] mour pahn kasalehda wa mwahu ni soangen doadoahk mwahu koaros, oh [kitail] pil pahn kekeirda ni [atail] marainkihla Koht.”—Kolose 1:9, 10.