Doadoahngki Internet—Ken Pehmitikiong Irair Keper kan!
1 Sapwellimen Siohwa aramas akan kin perenki werek mwahu me mie nanpwungarail. Irail kin perenki koasoiapene ekspiriens mwahu kan nan kalohk oh irail pil kin perenki rong duwen dahme kin wiawiong Sounkadehdehn Siohwa kan oh arail doadoahk en kalohki Wehio wasa koaros nan sampah. Irail kin men ese duwen soahng kan me kin wiawiong riarail brother oh sister kan, duwehte ma melimel, lapake, rerrer en sahpw, de soahng pwukat pwe irail en kak kihda arail sawas. Ma kitail kin nsenohki riatail brother oh sister kan, met kin kasalehda me kitail kin limpoakpene nanpwungatail.—Sohn 13:34, 35.
2 Rahnwet, kitail kin rong mwadang duwen dahme kin wiwiawi nan sampah. Radio oh TV kin kak kasalehda duwen dahme wiawi ni oaritik ong aramas akan wasa koaros nan sampah. Oh pil, pwehki telephone, aramas kak koasoiong aramas teikan, sohte lipilipil, wasa koaros nan sampah ni ahnsou mwadang. A me ahpwtehn wiawi iei met: aramas koaros nan sampah pwuriamweikihla duwen wiepen Internet oh aramas tohto met kin doadoahngki Internet.—Kilang Awake! en July 22, 1997.
3 Ma aramas emen kin doadoahngki Internet, e kak nting ong aramas tohto nan sampah ni pweitikitik, oh Internet pil kak ritingada ahl en sukuhliki soahng tohto. (Awake! en January 8, 1998) Ahpw, ma emen sohte pahn kanahieng, e kak lelohng kahpwal akan—soangen keper en pali ngehn oh pil ong palien tiahk. Iaduwen met kak wiawi?
4 Se kasalehdahr pak tohto nan makisihn kan oh Atail Doadoahk Ong Wehio duwen keper kan ni pali ngehn me kin kohsang doadoahngki Internet. Web site tohto kin kasalehda duwen tiahk lemei oh kilel kan me sohte konehng Kristian kan en kilang. (Melkahka 119:37) Likin keper pwukat, mie pil ehu keper me inenen laud me kitail anahne kanahieng. Soangen keper dahieu met?
5 Ke pahn kak luhke emen me ke sehse ohng nan imwomwo ma ke pahn sehse soangen aramas dah ih? Iaduwen ma ke sohte ese mwahu ma soangen aramas dah men ih? Ke pahn mweidong aramaso me ke sehse en kelepw rehn noumw seri kan? Met kak wiawi ma ke pahn mweidohng noumw seri kan en doadoahngki Internet.
6 Ni mehlel, ke kak kadarala E-mail oh ale E-mail sang aramas me ke sehse. Kumwa kak pil koasoakoasoipene nan Internet nan “chat room” rehn aramas me ke pil sehse. Irail me kin iang Internet “chat room” kakete nda me irail Sounkadehdehn Siohwa kan ahpw pali laud en ahnsou, irail kaidehn Sounkadehdehn Siohwa kan. Emen kakete nda me e pwulopwul, ahpw ni mehlel, ih aramas laud. De emen kakete nda me ih lih men, ahpw ni mehlel, ih ohl men; de e kakete nda me ih ohl men, ahpw ni mehlel, ih lih men.
7 Pwehki keper pwukat kak wiawi, ma ke doadoahngki Internet, ke anahne pein idek rehmw: ‘Ohng dah me I kin doadoahngki Internet? Iaduwen—I kak kauwehla ahi pali ngehn ni ahi kin doadoahngki Internet? Iaduwen—I kak kauwehla pali ngehn en meteikan ni ahnsou me I kin doadoahngki Internet?’
8 Web Site kan en “Sounkadehdehn Siohwa kan”: Kitail en tehk mahs duwen ekei Internet web site kan me aramas me dene irail Sounkadehdehn Siohwa kan koasoanehdi. Irail kin luhke iuk en kilang arail web site ko pwehn wadek ekspiriens kan me dene irail Sounkadehde kan kin kihda. Irail kin kangoange iuk en kasalehda duwen ahmw madamadau kan oh ahmw pepehm kan duwen pwuhk, brochure, oh makisihn kan me Society kin kihda. Ekei irail kin kihda mehn sawas kan duwen padahk kan me kitail kak doadoahngki nan kalohk. Web site pwukat kin mie “chat room” kan me aramas kak doadoahngki oh ni ahl wet aramas kak koasoakoasoipene nanpwungarail, duwehte koasoakoasoi ni ahmw doadoahngki telephone. Irail kin pil kangoange iuk en tehk pil ekei web site kan me ke kak doadoahngki Internet oh koasoakoasoiong Sounkadehdehn Siohwa teikan wasa koaros nan sampah. Ahpw, iaduwen omw kak ese ni mehlel ma aramas me ke kin koasoiong uhdahn Sounkadehde kan de ma soh irail me kin lahlahwe padahk mehlel?
9 Atail Doadoahk Ong Wehio en December 1997, pali 7, koasoia duwen ma anahn mie en wiahda web site kan oh e koasoia: “Sounkadehde kan sohte anahne kaunopada mehkot pwehn kihong nan Internet soahng kan me pid Sounkadehdehn Siohwa kan, atail wiewia kan oh dahme kitail kin kamehlele. Ihte Society me pahn kaunopada dahme mihmi nan Internet [www.watchtower.org] oh pahn kasalehda ire kesempwal kan ong irail me anahne.”
10 Kitail kin ale mwengehn ngehn me kin kohsang “ladu lelepek oh loalokong” ihte sang mwomwohdiso en Kristian. (Madiu 24:45-47) Sang nanpwungen irail me kisehn sapwellimen Koht pwihn sansal, kitail pil kin diar kaweid oh perepatail pwehn sewese kitail en tohrohr sang sampah iangahki sawas me kin kamwekid kitail en kedirepwki doadoahk en Kauno. (1 Korint 15:58) Sounmelkahkao kasalehda me e kin ahneki peren oh nsenamwahu rehn sapwellimen Koht aramas akan. (Mel. 27:4, 5; 55:14; 122:1) Mwomwohdiso kin pil kihda sawas en pali ngehn ong irail me kin kaukaule iang towehda. Kahrehda, ke kak diar aramas me kin kasalehda limpoak oh nsenohki meteikan nan mwomwohdiso en Kristian—aramas me ke pein ese oh me kin men kihda arail sawas oh kak kamweitihala irail me lelohng apwal. (2 Korint 7:5-7) Irail tohn mwomwohdiso kan kak ale pereparail pwehki sapwellimen Koht koasoandi en piskensang mwomwohdiso irail me wia dihp laud ahpw sohte kouluhl de irail me uhwong padahk mehlel ni arail kin lahlahwe padahk mehlel. (1 Kor. 5:9-13; Taitus 3:10, 11) Kitail kak kasikasik soangen koasoandi limpoak kan en wiawi ma kitail kin miniminiong meteikan ni atail doadoahngki Internet?
11 E sansal me irail me kitail koasoakoasoiong ni atail doadoahngki Internet kakete nda me irail Sounkadehde ahpw irail kaidehn. Ekei web site kan kin audaudki koasoi kan me kohsang irail me lahlahwe padahk mehlel. Ekei web site kan kin nda me irail koaros Sounkadehde ahpw e sansal me irail mwomwehdahte me irail Sounkadehde kan, oh ekei irail me kin utungada ekei web site kakete kawehwehda duwen pwihn en Sounkadehdehn Siohwa kan oh kasalehda me irail uhdahn Sounkadehde kan ahpw irail kaidehn. Irail pil kakete idek rehmw ma mie mehkot me pahn kadehde me ke wia emen Sounkadehdehn Siohwa kan.
12 Ni ahnsou me kitail kin iang towehda mihding kan nan Kingdom Hall, kitail sohte kin peikasalki ihs me wia riatail brother oh sister kan. Kitail ese irail. Sohte emen irail anahne kihda mehn kadehde kan me irail Sounkadehdehn Siohwa kan pwehki limpoak en Kristian nanpwungatail kin sansal. Kitail sohte anahne kihda mehn kadehde kan me pahn kasalehda me pein kitail wia kisehn pwihn en Sounkadehdehn Siohwa kan. Kitail wehwehkier me nanpwungen riatail brother oh sister kan kitail kak diar limpoak mehlel nanpwungen Kristian kan me Pohl kasalehda nan pwuhken Ipru 10:24, 25. Web site kan me kin kangoange kitail en koasoiong aramas teikan sohte kak kihong kitail mehn kadehde kan me kitail anahne pwehn tehk ma aramaso me kitail koasoiong uhdahn wia Sounkadehde men de soh. Pwehki kitail wehwehkier duwen mahsen kan nan Melkahka 26:4, 5, met kak kasalehda duwen keper kan me kitail kak lelohng ma kitail doadoahngki web site kan nan Internet.
13 E kansensuwed pwehki ekei me wia riatail brother oh sister kan mahs anahne en piskensang mwomwohdiso pwehki irail kin miniminiong mehn liki kan nan “chat room” nan Internet oh mwurin mwo, pwupwudiong nan dihp en nenek de kamwahl. Elder kan kin pwuriamweikihla me ekei kesehla arail pwoud kan pwehki irail pwakpwakih pil emen me irail tuhwong nan Internet oh elder kan nting ong Society pwehn kehsehkin irail duwen met. (2 Tim. 3:6) Pil ekei aramas kesehla padahk mehlel pwehki irail kamehlele dahme irail me lahlahwe padahk mehlel ndaiong irail. (1 Tim. 4:1, 2) Pwehki soangen keper laud pwukat kin pwarapwarada, e soh kesempwal me kitail en kanahieng pwe kitail en dehr iang pidada “chat room kan” nan Internet? E sansal me erpit, loalokong, wehwe oh dehde me Lepin Padahk 2:10-19 kin koasoia kak pere kitail ni ahl wet.
14 Sawaspen Onop kan me Mihmi Nan Internet? Ekei pepehm me irail kin sewese riarail brother oh sister kan ma irail pahn kihong nan Internet soangen research kan me kin pid mihding kan, kalohk oh soahng pwukat me pid atail pali ngehn. Karasepe ehu, aramas mwein pahn wia research ong eh Kapahrek ong Wehi Pokon oh pahn kihong nan Internet research wet pwe e lemeleme me irail me pil pahn anahne kaunopada Kapahrekohte kak doadoahngki dahme e diaradahro. Pil ekei kin kihong nan Internet iren Paipel kan ong Onop en Kahn Iroir me kitail pahn wia ni ahnsou kohkohdo kan de irail pahn kihpene wasa kan nan pwuhk kan me kitail pahn doadoahngki ong Theocratic Ministry Sukuhl de Pwuhk Study en Mwomwohdiso. Ekei pahn kihda iren sawas kan me pahn mwahu en doadoahngki ong kalohk. Iaduwen—mehpwukat kin wia uhdahn sawas kan?
15 Pwuhk kan me sapwellimen Siohwa pwihn kin wiahda kin kamwekid atail madamadau kan pwe kitail en kak ahneki madamadau pwung pwehn kak pweida oh pil ong kaiahne kitail en “kasawihada mwahu dahme mwahu oh dahme suwed.” (Ipru 5:14) Kitail kak nda me kitail kin pweida ma kitail kin mweidong meteikan en wiaiong kitail atail research kan?
16 Mehn Peria kan kin “men rong Pohl oh Sailus sang aramas en Deselonika kan.” Pwekihda? Pwehki “irail ngoangki mehlel rong mahseno, oh rahn koaros irail kin onopki Pwuhk Sarawi pwe re en kadehde ma en Pohl koasoi me mehlel de soh.” (Wiewia 17:11) Mendahki Pohl oh Sailus kalohk ong irail, irail sohte kak kamehlele oh mwekidki padahk mehlel ma irail sohte pein tehk nan Pwuhk Sarawi ma dahme irail rong mehlel de soh.
17 Ma emen pahn doadoahngki ahn emen tohrohr research ong padahk ehu de ong kaunopada ong mihding kan, met kin kak kauwehla kahrepen kitail kin wia pein atail onop. E soh wia pein ahmw ineng en kakairada ahmw pwoson Mahsen en Koht? Ke kak kadehde duwen pein ahmw pwoson—nan ahmw padahk kan, nan ahmw pasapeng ni mihding kan, oh nan kalohk—oh ke kak wia met pwehki e poahsoankihda dahme pein kowe kin kamehlele. (Rom 10:10) Ma ke pahn doadoahngki ahn emen ah research, ke sohte kak pein wia dahme Lepin Padahk 2:4, 5 (New World Translation) padahkiong kitail koaros en wia: en pein ‘rapahki loalokong me pid duwen Koht duwehte ahmw kin rapahki takai kesempwal kan me rir.’
18 Karasepe ieu, ni ahnsou me ke pahn pein tehk iren Paipel kan nan noumw Pwuhk Sarawi, ke kak kousapahlih irelaudo pwon ni mwotomwot. Ke kak ‘medemedewe mwahu duwen mengihtik en mepwukat koaros,’ duwehte Luk wia ahnsou me e ntingihdi Rongamwahuwo. (Luk 1:3) Ma ke pahn wia soangen nannanti duwehte met, e pahn kak sewese iuk en koahiekla ni ahmw pahn tehk iren Paipel kan nan kalohk oh pil ahnsou me ke kin wia padahk kan. Aramas tohto kin nda me irail inenen pwuriamweikihla Sounkadehdehn Siohwa kan pwehki irail ese pahkalahng iren Pwuhk Sarawi kan. Ihte ahl me met kak mehlelki rehtail iei ma kitail pahn kin pein pahkpeseng neitail Pwuhk Sarawi kan pwehn tehk iren Paipel kan oh wia met ahnsou koaros.
19 Doadoahngki Atail Ahnsou Ni Erpit: Pil ehu me kitail en medemedewe iei ahnsou laud me aramas kin kesehla ni arail pahn ntingihdi, wadek oh sapeng duwen dahme mihmi nan Internet. Melkahka 90:12 kin kangoange kitail en kapakapki: “Kasalehong kiht duwen ia mwomwen se pahn wadek rahn en aht mour kan pwehn kak kasalehda erpit sang nan aht mohngiong.” Pohl ntingihdi: “Atail ahnsou mwotomwotlahr.”—1 Korint 7:29.
20 Kaweid pwukat kin sewese kitail en wehwehki me kitail anahne doadoahngki mwahu atail ahnsou. E pahn keieu mwahu ma kitail pahn doadoahngki atail ahnsou pwehn wadek Mahsen en Koht! (Melkahka 1:1, 2) Ih me pahn keieu mwahu ong kitail—kitail en miniminiong Siohwa. (2 Tim. 3:16, 17) Pahpa/nohno kan, kumwail kin padahkiong noumwail seri kan duwen doadoahngki arail ahnsou mwahu pwehn utungada wiewia kan me pid duwen Wehin Koht? (Eklesiasdes 12:1) E pahn keieu mwahu en doadoahngki atail ahnsou mwahu ni atail pein onop Paipel, onop Paipel rehn atail peneinei, iang towehda mihding kan, oh iang kalohk—oh atail doadoahngki atail ahnsou ohng wia soahng pwukat pahn mwahu sang doadoahngki atail ahnsou ohng kilikilang dahme mihmi nan Internet, oh kasikasik me mehkan pahn wia kamwahupatail.
21 Ni ahl wet, e pahn wia elen erpit en wiewia soahng ngehnin kan oh wiewia dahme kesempwal nin duwen momour en Kristian kan. Met kin wehwehki me kitail anahne pilada mwahu iaduwen kitail pahn doadoahngki atail ahnsou oh atail madamadau kan. Nin duwen momour en Kristian kan, Sises kasalehda dahme pahn keieu kesempwal nan atail mour ni e mahsanih: “Rapahki mahs Wehin Koht oh dahme e ketin kupwurki, a soahng teikan koaros e ahpw pahn kin ketikihong kumwail.” (Madiu 6:33) Ke soh pahn nda me ahnsou kan me ke kin keieu peren iei ahnsou me ahmw mour kin direkihla wiewia kan me pid Wehin Koht oh met mwahu sang wiewia soahng teikan?
22 Internet E-Mail: Mendahki e konehng en ehukihong meteikan ekspiriens kan me wiawi ong pein kowe oh madamadau kan nanpwungen kompoakpah kan de peneinei kan me kin dohsang emenemen, mehlel e wia elen limpoak en ehukihong meteikan duwen mehpwukat? De soahng pwukat konehng en kohieng nan Web page pwe aramas sohte lipilipil en kak wadek? Soahng pwukat konehng en kadarpeseng ong aramas me ke ese iangahki aramas me ke sehse? Ma ke pahn ale kisinlikou me sansal me e sohte nting ong uhk ahpw kisinlikou ong emen tohrohr, e pahn wia elen limpoak en kadaralahng meteikan kisinlikouwo?
23 Iaduwen ma ekspiriens me ke kadaralahng meteikan sohte pwung? Met soh wehwehki me ke utungada mehkot me likamw? (Lepin Padahk 12:19; 21:28; 30:8; Kolose 3:9) E sansal me kitail anahne “kanahieng duwen atail mour me kitail kin weweidki. Kitail dehr duwehte aramas me lampwon kan, ahpw kitail duwehte me loalokong kan” oh kitail en tehk mwahu dahme kitail pahn wia me pid irair wet ma kitail wia aramas loalokong kan. (Episos 5:15) Kitail kin peren pwehki Pwuhken Pahr (Yearbook), Kahn Iroir (The Watchtower), oh Awake! kin audaudki soangen ekspiriens kan me uhdahn wiawi oh mepwukat kin kangoange kitail oh kamwekid kitail en kekeid nan “ahlo”!—Aiseia 30:20, 21.
24 Mie pil ehu keper. Medemedewe duwen ahnsou laud kitail kak kesehla ma kitail pahn wadek E-mail koaros me kin kohdohng kitail. E inenen kapwuriamwei pwehki pwuhk me ede Data Smog koasoia: “Ni ahnsou me emen kin kesehla laud eh ahnsou nan Internet, e-mail solahr kin wia mehkot kaperen, ahpw e uhd wia mehkot me kin kangala laud atail ahnsou pwehki rahn koaros kitail kak ale kisinlikou tohto sang iengetail, kompoakpatail, oh peneinei kan, . . . iangahki irail me men netikihong kitail mehkot.” E kapataiong oh koasoia: “Aramas tohto kin perenki kadarseli e-mail kan me pid oaralap sohte lipilipil—kamwan kan, koasoi likamw akan, kisinlikou suwed kan me kin kohseli nanpwungen irail me ahneki E-mail (electronic chain letters), oh pil soahng tohto sang mehpwukat—oh aramas pwukat kin e-mail ong aramas koaros me mihmi nan arail pwuhken E-mail address wehwehki aramas sohte lipilipil.”
25 Met kin sansal sang E-mail kan me kin kohseli nanpwungen riatail brother oh sister kan—soahng kan duwehte kamwan kan oh koasoi ke men kouruhr kan duwen kalohk; poem kan duwen dahme kitail kin kamehlele; karasaras kan sang padahk kan me kin wiawi nan kapokon kan de ni mihding kan nan Kingdom Hall; ekspiriens kan nan kalohk; oh soahng pwukat me mwomwen sohte keper. Aramas tohto kin kadarpeseng soahng pwukat oh sohte kin tehk iawasa soahng pwukat kin kohsang, kahrehda kitail sehse ma soahng pwukat kin mehlel de soh.—Lepin Padahk 22:20, 21.
26 Pwehki kitail kin mihmi nan imwin rahn akan, met kin wia ahnsou konehng en kanahieng. Pwuhk Sarawi kin kaweidkin kitail ni e mahsanih: “Kumwail onohnop oh mwasamwasahn. Pwe amwail imwintihtio, Tepil, kin kohkohseli duwehte laion emen me kin weriwer, raparapahki ihs me e pahn kadallehla.” (1 Piter 5:8) Ma kitail sohte pahn kanahieng, Sehdan kak doadoahngki Internet pwehn kasonge kitail oh powehkinkitaildi eh manaman. Pak tohto, seri kan oh pil mwahnakapw oh peinakapw kan kin lohdi pahn kasongosong kan me kin kohsang Internet. Seri kan kin kalap likih aramas, oh irail kin men ese duwen soahng kan sohte lipilipil oh irail pil kin perenki tehk duwen soahng kan nan computer oh Internet. Pahpa oh nohno kan anahne tehk neirail seri kan oh kihong irail kaweid me mwahu me poahsoankihda Pwuhk Sarawi me pid doadoahngki Internet, duwehte soangen kaweid me irail kin kihda me pid arail pilipil mwahu duwen soangen keseng oh kasdo kan me irail pahn kilang.—1 Korint 15:33.
27 Ma kitail pahn ahneki madamadau toupahrek duwen doadoahngki Internet, met pahn pere kitail sang nan keper oh kahpwal kan. Kitail kin kalahnganki kaweid konehng me Pohl ketikihda: “Irail me pahn doadoahngki sampah en dehr doadoahngki sampah ni ahl me sohte konehng Kristian; pwe tamataman me irair en sampah wet wia wekiwekila.” (1 Korint 7:29-31) Ma kitail pahn tamataman met, e pahn sewese pein kitail oh atail peneinei en dehr doadoahngki sampah ni ahl me sapwung ni atail pahn mweidohng mehn kerempwa kan, duwehte Internet, en kauwehla atail pali ngehn.
28 E kesempwal kitail en karanih riatail brother oh sister kan nan atail mwomwohdiso oh doadoahngki ahnsou me luluhwe ni elen erpit, oh met wehwehki me kitail pahn tohnmeteiki pein kitail ong utungada Wehin Koht. Pwehki koasoandi suwed wet pahn kereniong imwisekla, kitail en “dehr idawehn mouren me rotorot akan, me ar lamalam sohte ekis katepe mie,” ahpw kitail en “rapahki dahme Kauno [“Siohwa,” NW] ketin kupwukupwure kitail en kin wia.”—Episos 4:17; 5:17.