Liksang Nantihong Alehdi “Soahng kan me Sohte Katepe”

¹ Ehu ahl en koasoiong aramas teikan me inenen popular rahnwet iei “E-mail.” Mehlel, wiahda kisinlikou ong ahmw peneinei oh kompoakepahmw kan me pid duwen ahmw ekspiriens kan oh ahmw madamadau kan oh E-mail kisinlikou pwukat kin wia mehkot mwahu, ahpw mie “soahng kan me sohte katepe” me kak wia ni aramas kin doadoahnki E-mail ni ahl sohte lipilipil?​—Lepin Padahk 12:11.

² Soahng kan me Kitail Anahne Kanahieng Me Pid E-Mail: Ekei kin nda me re pehm me re karanih sapwellimen Siohwa pwihn ahnsou me re kin alehdi E-mail kan me kin pid ekspiriens kan, dahme kin wiawi nan Bethel, ripoht kan me pid duwen melimel kan, lapake kan, rerrer en sahpw akan, ripoht kan me pid kalokolok kan me kin wiawi nan ekei sahpw kan, oh ekei pil kin koasoia duwen padahk kan me elder kante kin sukuhliki nan Kingdom Ministry Sukuhl kan. Likamwete ekei kin nohn ngoangki kadarala soangen E-mail kan, mwein pwe re mwahuki wia keieun aramas me pahn pakairki soangen rohng pwukat ong kompoakparail.

³ Ahpw, ekei pak, soangen rohng pwukat iangahki ekspiriens kan kakete wekila mwuhr, kahrehda mwuhr re diarada me rohng pwukat sohte mehlel. De mwein ekei aramas kin perenki kalaudehla ekspiriens kan oh met kin imwikihla koasoi kan me sohte mehlel. Irail me kin pwurur en kasalehda rohng pwukat kin kalap sapwungala oh sohte kin ale ire mehlel kan koaros me pid dahme uhdahn wiawi. (Lepin Padahk 29:20) Ekei pak, ahnsou me emen kin koasoia duwen ekspiriens ehu me kin kapwuriamwei, aramas akan kin kadarseli soangen E-mail kan pwe re ese me aramas teikan kin perenki rohng duwen mehkot me kapwuriamwei. Soangen ripoht pwukat me kin likamw kin duwehte “poadoapoad likamw akan,” me sohte kin sewese kitail en lelepek ong Koht ni mehlel.​—1 Tim. 4:​6, 7.

⁴ Ma ke kin kadarala soangen rohng kan me mwuhr diarada me e likamw, pein kowe anahne pwukoahki aramas teikan kin nsensuwed de pingiping pwehki rohng likamw. Ni ahnsou me Depit rong pakairo me dene sapwellime pwutak koaros mehla, e “tehrpeseng sapwellime likou” pwehki e nsensuwed laud. Ahpw, ni mehlel, emente sapwellime pwutak me mehla. Mehlel, e pahn nsensuwed duwen sapwellime pwutak me mehla, ahpw pwehki pakair likamwo, met kin kalaudehla ah nsensuwed. (2 Sam. 13:30-​33) Eri, kitail sohte men wia mehkot me pahn pitih de kansensuwedihala riatail brother oh sister kan.

⁵ Pwihno me Koht Idihada Pwehn Doadoahngki: Tamataman me Samatail nanleng ketin idihadahr pwihn ehu me E pahn doadoahngki pwehn kadarpeseng rohng kesempwal kan iei “ladu lelepek oh loalokong.” “Ladu” menet kin ahneki pwukoah en pilada rohng kan me kesempwal en pakairkihong irail me pwoson kan oh re pil pahn pilada “ahnsou konehng” en wia met. Mwengehn ngehn wet kin ihte kohsang sapwellimen Siohwa pwihn. E pahn mwahu en ahnsou koaros sohpeiong sapwellimen Siohwa pwihn me E ketin idihdda en ale rohng kesempwal kan me kitail kak likih me mehlel, oh kitail en dehr likih aramas akan me kin doadoahngki Internet me kin kadarseli rohng kan me kakete likamw.​—Madiu 24:45.

⁶ Internet Web Sites: Mie ahn Society Internet Web site: www.watchtower.org. Met kin itar ong kehsehkin aramas duwen dahme aramas anahne ese me pid Sounkadehdehn Siohwa kan. E sohte kin wia mehkot kesempwal ong aramas emen, de pwihn ehu, de mwomwohdiso ehu en wiahda pein arail “Web Page” me pid Sounkadehdehn Siohwa kan. Ekei kin wiahda kisin pwuhk kan me audaudkihda audepen neitail sawaspen Paipel kan iangahki iren Paipel koaros oh reference kan oh pil audepen padahk kan me kin wiawi nan kapokon oh re kin kihseli pwuhk pwukat oh ndaiong aramas me re kin ale sawas en mwohni (donation) sang mehpwukat. Sohte lipilipil ma aramas pwukat kin wihn de soh, e sapwung arail wiahda soangen pwuhk pwukat (pwe e sapwung en copy sang pwuhk kan me Society wiahda oh kihpeseng) iangahki kihpeseng ni emen doadoahngki E-mail​—⁠soahng pwukat koaros kin kauwehla kosonned en sahpw kan me pid copyright. Mehlel, ekei aramas kin nda me met kin wia sawas laud ong brother oh sister kan, ahpw, e sapwung oh aramas me kin wia met anahne uhdi sang.

⁷ Kitail anahne doadoahngki atail loalokong ni atail kin doadoahngki E-mail oh ma kitail pahn wia met, e pahn sewese kitail en audehkihda atail madamadau soahng kan me “kesempwal oh kansenamwahu.”​—Lepin Padahk 24:​4, NW.