Koakon En Peidek
◼ Ia keper kan en doadoahngki Internet pwehn kapehse rehn irail kan me kitail saikinte ese?
Tohto Web site kan wiawihda pwe aramas akan en kak tuhpene oh kapehse nan Internet. Tohtohn mepwukat kak mweidohng emen en wiahda oh kalangada ire kan me pid soangen aramas dahmen irail, me kin pil iangahki kilel kan oh soangen ire teikan duwen irail. Ni en aramas akan kilang ire pwukat irail eri kak en doadoahngki pwehn kapehse. Soangen Web site pwukat kin inenen rekla rehn me pwulopwul kan oh ekei pwulopwul en nan mwomwohdiso kin doadoahngkier pwe en kapehse rehn irail kan me dene irail Sounkadehdehn Siohwa kan.
E kin mengei ong aramas akan me kitail tuhwong nan Internet en likamwkihda ihs irail, ah irair en pali ngehn de duwen ah mwekid kan. (Melkahka 26:4) Emen me dene ih Sounkadehdehn Siohwa kan ele kaidehn kisehn tohn kaudok mehlel, emen me piskenla de ih emen sounpelian padahk mehlel me kin kalap songosong en kaluwetala Kristian kan. (Kalesia 2:4) Ripoht kasalehda me irail akan me kin ineng ki tiahk suwedih seri kan kin doadoahngki soangen Web site kan pwe en rapahki ihs me re men mwersuwedih.
Mendahki ma kitail kin kamehlele me irail kan me kitail kin pehsepene reh wia Kristian mwahu kei, soangen mehn kapehse wet kak kamengei ong emen en wia lokaia kan me sohte konehng. Met pwehki aramas akan kin mengei en sohte irehdi arail koasoi kan de wiewia kan ong irail kan me re saikinte pein tuhwong. Ele re kin wiahki elen kapehse wet mehkot rir oh pehm me arail pahpa oh nohno de elder kan sohte pahn esehda dahme re kin koasoia. E kin kansensuwed en ese me tohto me pwulopwul kan sang peneinei en Kristian kan pwupwudier nan lidip en lokaia suwed. (Episos 5:3, 4; Kolose 3:8) Ekei kin kapatahiong nan neirail computer kan kilel en irail me sohte konehng, doadoahngki ahd akan me sohte konehng de kapatahiong Web site kan me kin kasalehda kasdo en koul kan me pid nenek.
Me pid soahng pwukat koaros, pahpa oh nohno kan anahne en tehk kanahieng neirail seri kan iaduwen re kin doadoahngki computer. (Lepin Padahk 29:15) E pahn keper en lukehdo aramas kitail saikinte ese nan imwatail kan pwe en kelehpwla rehn neitail seri kan. E pil kin keper ong kitail de neitail seri kan en werekiong aramas akan nan Internet, mendahki wiahki irail Sounkadehdehn Siohwa kan.—Lepin Padahk 22:3.