Kaitarala Anahn Laud Ong Kingdom Hall Kan
1 Nan sahpw tohto, sohte itar en mwohni oh tohndoadoahk koahiek kan kin kerempwa doadoahk en kauwada Kingdom Hall kan. Ihme kahrehda, nan November en 1999, Governing Body tepiada koasoandi ehu en kauwada Kingdom Hall nan sahpw kan me sohte itar mwohni oh tohndoadoahk koahiek kan. Nan artikel wet, se pahn sewese kumwail en wehwehki mwahu iaduwen mwomwohdiso kan en deke kan koaros me mih pahn epwelpen Guam branch kak paiekihda koasoandi wet.
2 Ni ahnsou wet, koasoandi wet kin apwalih anahn en riatail kan nan sahpw 115. Pwehn kaitarala anahn wet oh doadoahngki meirong kan ni ahl me konehng, Governing Body kin koasoanehdi me pwihn me adaneki Design/Build Department nan Brooklyn oh Regional Kingdom Hall Office limau me pahn apwalih doadoahk wet. Mwomwohdiso kan nan Micronesia iangahki Guam oh CNMI pahn ale sawas sang Regional Office me mih nan Australia Branch.
3 Mehn akadei ong koasoandi en kauwada Kingdom Hall iei en kauwada Kingdom Hall kan me soandi mwahu, me kasalehda wahu, sohte pweilaud, oh sohte nohk doadoahk laud en apwalih nan wasa kan me kisinlikou de doaropwe mie me kin kasalehda me mwomwohdiso ahneki pwuhng en doadoahngki wasao oh me tohnsahpw kan pil pwungki. Met kak wiawi nan Micronesia? Mie anahn ong koasoandi wet nan Micronesia? Se kak nda ei ong peidek riau pwukat! Pilahn ehu wiawihda en kauwada Kingdom Hall, imwen misineri kan, oh kisin ohpis ong doadoahk en kawehwe 26 me anahne wiawihda mwadang Iaduwen met pahn kak pweida?
Kahrepen Kingdom Hall Construction Desk
4 Ohpis en Kingdom Hall Construction Desk wiawihda nan Guam branch pwehn apwalih doadoahk wet. Ohpis wet kin wia eh doadoahk pahn epwelpen Branch Committee oh e pil kin ale sawas sang Service Department. Ni ahl wet, pilipil toupahrek kan kak wiawihda pwe sawas pahn mwadang kohwong mwomwohdiso kan me anahn laud mie. Ni ahnsowohte, dahme sansalda nan 1 Korint 9:26 pil kin kadoadoahk pwe wasa kan me doadoahk wet pahn mwadang pweida pahn kak mwadang ale sawas. Pilahn kan me kak kadoadoahk ong wasa tohto kin wiawihda pwehn mwahu oh konehng ehuehu wasa. Mendahki pilahn kan en mwomwen Kingdom Hall kin mengei, dipwisou kan oh wiepen kauwada ihmw nan ehuehu sahpw pahn kadoadoahk. Uwen laud en Kingdom Hall kin wekpeseng pwehki nempe en tohnmwomwohdiso oh koahiek en mwomwohdiso en apwalih Kingdom Hall oh uwen laud en mwohni me mwomwohdiso kak kihda kin wekpeseng.
5 Kingdom Hall Construction Desk kin pwukoahki en apwalih soahng koaros me pid doadoahk en kauwada Kingdom Hall. Met kin pid en pilada wasa me Kingdom Hall pahn wiawihda ie, en wiahda pilahn, en ale doaropwe oh mweimwei en kauwada Kingdom Hall nin duwen kosonned, oh uhdahn doadoahk en kauwada Kingdom Hall. Kasukuhl en apwalih Kingdom Hall pahn wiawi pwe en kak mihmi nan irair mwahu erein sounpar tohto. Pak ehu nan mpen sounpar riau koaros, emen me wiliandi Kingdom Hall Construction Desk pahn tehk Kingdom Hall oh kihda kaweid mwahu kan ong irail me kin idihdda pwehn apwalih Kingdom Hall.
Pwihn en Kauwada Kingdom Hall
6 Governing Body koasoanehdier Pwihn kan en Kauwada Kingdom Hall pwehn kamwadangahla doadoahk en kauwada Kingdom Hall kan. Pwihn pwukat kin sewese mwomwohdiso kan en kauwada Kingdom Hall kan oh pil tehk mwohni me kin kadoadoahk. Ehu pwihn kin wiawihkihda me wenemen de welimen me wia Kingdom Hall construction servant kan oh volunteer kan. Iaduwen irail kak sewese doadoahk wet en pweida mwahu?
7 Kingdom Hall construction servant kan: Irail kin wia doadoahk wet ni full-time oh irail ohl oh lih me kehlail nan padahk mehlel oh mie arail koahiek en kauwada ihmw. Ekei pak, pwopwoud kan kin idihdda en wia Kingdom Hall Construction Servant kan. Koasoandi en ale pwukoa wet iei ma emen kin papidaislahr ki sounpar ehu de reirei sang, oh kak wia doadoahk wet ahnsou reirei, mahki sounpar 19 lel 55, ahneki roson mwahu, oh e kak wia doadoahk laud, oh e pahn mwahu ma e kin wia doadoahk en regular pioneer. Mwohn emen pahn ale doadoahk full-time wet, e anahne keieu kasalehda eh koahiek en wia doadoahk wet nin duwen Kingdom Hall construction volunteer men.
8 Kingdom Hall construction volunteer kan: Koasoandi kan ong volunteer kan pil duwehte koasoandi kan ong Kingdom Hall construction servant kan. Construction volunteer kan kin doadoahk erein wihk riau lel sounpwong siluh. Ekei pak, brother koahiek kan kak kaukaule doadoahk ni lepin ahnsou. Ni ahnsou me Pwihn en Kingdom Hall Construction pahn mie pilahn en kauwada Kingdom Hall tohto nan ehu wasa, doaropwehn application (A-25) pahn kohwong mwomwohdiso kan me karanih wasao pwe irail kan me men iang doadoahko en audehda doaropwe wet.
Kauwada Kingdom Hall—Doadoahk en Mwomwohdiso Ehu
9 Kitail anahne kilangwohng doadoahk en kauwada Kingdom Hall nin duwen doadoahk en mwomwohdiso ehu. Tohnmwomwohdiso kan me pwukoahki en wia uwen arail kak en iang doadoahk wet oh mwurin mwo, irail anahne en kaukaule apwalih Kingdom Hall me ahpwtehn wiawihda iangahki anahn en mwohni. Sangete nin tepio, elder kan kin nantihong en kakairada irair en ngoangki apwalih Kingdom Hall kapw. Mwomwohdiso kan me kin ale sawas en mwohni pil kak kasalehda arail kalahngan ni arail wiahda inou pwehn wiahda meirong en mwohni ong branch ohpis ong arail Kingdom Hall. Met kin pahrekiong mouren kaweid me sansalda nan Lepin Padahk 3:9 (NW): “Wauneki Siohwa ni omw pahn meirongkihong ahmw dipwisou kesempwal kan.”
10 Ni ahnsou me branch ohpis kamanahla pilahn ehu, e pahn kehsehkin mwomwohdiso duwen iahd doadoahko pahn tepida oh tohndoadoahk depe me anahn. Tohnmwomwohdiso kan me pahn iang doadoahk ong pein arail Kingdom Hall sohte anahne audehda doaropwe, ahpw irail anahne wia sounkalohk kan me kin wia mehn kahlemeng mwahu, oh lelehr sounpar 17, oh pwihn en Congregation Service Committee me pwungki irail en iang doadoahko. Brother kan oh sister kan koaros kak iang doadoahk wet. Likin doadoahk me kin wiawi ni wasa me Kingdom Hall pahn wiawihda, tohnmwomwohdiso kan pil kak iang soangen doadoahk me duwehte kaunopada mwenge ong tohndoadoahk kan oh lopworada likou kan en irail me kisehn Pwihn en Kauwada Kingdom Hall.
11 Ke kak kilang me koasoandi en kauwada Kingdom Hall wet anahne utuht sang mwomwohdiso, ahpw keieu irail elder kan oh ministerial servant kan. Kitail kin ale mehn kataman en ekei mouren kaweid kan en Paipel. Karasepe, 1 Korint 14:40 mahsanih: “Kumwail wiahda mehkoaros nin duwen me konehng oh koasoandi pwung.” Kaweid kan kin wiawihda pwe soahng koaros pahn wiawi ni ahl me Koht kin ketin kupwurki. Kitail kin kalahnganki kaweid kan me kohsang Governing Body me pid iaduwen doadoahk pahn wiawi pahnangin koasoandi en kauwada Kingdom Hall. Wahnpoaron Pohl kihda mehn kataman kaselel wet nan Ipru 13:17: “Kumwail peikiong amwail sounkaweid akan oh kapwaiada ar kosonned kan. Pwe re sohte kin tokedihsang apwahpwalih ngenomwail kan; pwehki ar uhdahn pahn wehkadahng Koht ar kohwa doadoahk wet. Ma kumwail pahn peikiong irail, re pahn perenki kapwaiada ar doadoahk; ma soh, re pahn kin nsensuwedla; eri, met sohte kak sewesei kumwail.” Ni atail kin idawehn mouren kaweid en Paipel pwukat, kitail kak kamehlele me Siohwa pahn ketin kapaiada atail nantihong kalaudehla atail kaudok ong ih.
Kahk kan ong Kauwada Kingdom Hall
12 Ni ahnsou me mwomwohdiso ehu lemeleme me irail anahne Kingdom Hall kapw, keieun kahk me mwomwohdiso pahn wia iei en kadarala kisinlikou ong branch ohpis. Pekipek wet kin pid irair en amwail wasahn mihding, iangahki kilel kan pwe e pahn mengei ong pwihn en Kingdom Hall Construction Desk en kak wehwehki irairo. Patehng met, e pil anahne kasalehda sounkalohk depe me mih nan mwomwohdiso, aramas depe kin kalapw iang Mihding ong Wehipokon, oh rekord en meirong me mwomwohdiso kin wiahda erein sounpwong weneu (meirong ong doadoahk en sampah pwon, meirong ong Society Kingdom Hall Fund, oh meirong ong mwomwohdiso).
13 Mwurin Kingdom Hall Construction Desk alehdi amwail pekipek, e pahn koasoanehdi pwe wilieperail kan pahn tuhwong pwihn en elder kan en mwomwohdiso wet, oh sounapwalih en circuit ma e kak, oh pil pwihn en elder kan sang mwomwohdiso kan me karanih wasaht ma mwomwohdiso pwukat tohto sang ehu pahn pil iang paiekihda Kingdom Hall kapw wet. Sounwieperail pwukat kin ale kasukuhl en sewese pwihn en elder kan pwehn koasoanehdi anahn en Kingdom Hall kapw, en rapahki sahpw, en wia doadoahk me pid kosonned kan, oh en wehwehki mouren kaweid kan en Paipel me pahn kaweidih doadoahk wet.
14 Ma konehng, mwomwohdiso kan pahn ale kaweid en doadoahngki Kingdom Hall teieu. Ni ahl wet, meirong kan kak kadoadoahk ni pwung, oh mwomwohdiso kan kak sawaspene en apwalih anahn en mwohni. Doadoahk en kauwada Kingdom Hall kan me sounkalohk tohto pahn paieki pahn mwadang tepida wiawi.
15 Ma mwomwohdiso tohto men doadoahngki Kingdom Hall teieu, pwihn en elder kan anahne koasoiapene duwen ma ekei mwomwohdiso kan kak patpene oh wiahla ehu mwurin Kingdom Hall pahn wiawihda. Met anahne wiawi mwurin arail koasoiong sounapwalih en circuit oh ale mweimwei sang Service Department en Guam branch. Patehng met, e kesempwal en ese ia uwen laud en mwohni mie ong doadoahko. Pwihn en Kingdom Hall Construction Desk kin kapwaiada mouren kaweid me Sises ketikihda ni Luk 14:28: “Ihs rehmwail, nan eh koasoakoasoane en kauwada eh imwen doulik ehu, e soh pahn mwohndi mahs oh medemedewe uwen pweine, pwe en kilang ma mie reh mwohni me itar kanekehla ihmwo.” Pwehn diarada uwen laud en mwohni me mwomwohdiso pahn kak kihda ong doadoahk en kauwada Kingdom Hall oh en kapwurehla sawas me mwomwohdiso ale, elder kan pahn wia roporop ehu mwurin irail tuhwong irail me wiliandi pwihn en Kingdom Hall Construction Desk.
16 Ia pahn mwomwen koasoandi ong soangen meirong pwukat? Mwomwohdiso sohte pahn ale mwohni sang rehn emenemen tohnmwomwohdiso. Ahpw tohnmwomwohdiso kan kak kihdi arail meirong nan koakon en meirong ong anahn en mwomwohdiso. Peneinei kan oh emenemen tohnmwomwohdiso anahne medemedewe oh koasoanehdi uwen laud en meirong me irail kak wiahda ong ehuehu sounpwong.—1 Kor. 16:1, 2.
17 Pil ehu kahk me anahne wiawi pwehn kauwada Kingdom Hall kapw kin pid en wiahda inou ehu ong (1) pwungki pilahn me society kin doadoahngki, (2) pwungki wasa me Kingdom Hall pahn wiawihda, (3) pwungki en apwalih wasa me irail en Pwihn en Kingdom Hall Construction pahn pweidi ie oh kamwenge irail, (4) ale pwukoa en kamwahwihala wasa me Kingdom Hall pahn wiawi, (5) koasoanehdi uwen laud en mwohni me mwomwohdiso pahn pwain ehuehu sounpwong, (6) pwungki doadoahk me pwihn en Kingdom Hall Construction Desk kin wia ong doadoahko oh uhdahn utung koasoandi ong sewese doadoahk en kauwada Kingdom Hall, oh (7) ale pwukoa en apwalih Kingdom Hall kapw oh anahn en mwohni mwurin e wiawihda. Pil ehu kahk kesempwal iei me mwomwohdiso en pwainda wasao de ahneki pwuhng en doadoahngki wasao nin duwen kosonned. Met kak koasoanehdi me mwomwohdiso pahn kapwaiada kosonned en koperment oh koasoandi ong me pid daksis nin duwen kosonned.
18 Koasoandi wet en kauwada Kingdom Hall kapw kin anahne ahnsou laud. En pwainda sahpw de ehu ihmw nan wasa me konehng ong wasahn kaudok kak wia kahpwal ehu. Ahpw, ni atail kin idawehn kaweid me kohsang rehn sapwellimen Koht pwihn oh ni atail kin kapakapki oh likih sapwellimen Siohwa kapai, kitail kak kamehlele me Kingdom Hall tohto pahn wiawihda.
Imwilahn Koasoandi Kapw kan me Inenen Kaselel
19 Sang ahnsou me koasoandi en kauwada Kingdom Hall kan nan sahpw kan me sohte itar mwohni oh tohndoadoahk koahiek kan tepida wiawi nan pahr 1999, Kingdom Hall me tohto sang meh 16,300 wiawihda nan sahpw 115. Meirong kan me brother kan nan sampah pwon kin wiahda ni limpoak kin kahrehda “pahrekteieu” wet en kak wiawi, oh ‘mwomwohdiso me rikpene me tohto, e sohte depala; oh mwomwohdiso me rikpene me malaulau, e pil itar.’ (2 Kor. 8:14, 15) Mie doadoahk laud me anahne wiawi. Iaduwen koasoandi wet en kak pousehla en wiawi kin poahsoankihda uwen laud en meirong me pahn wiawi nan pein atail wehi. Kitail kin kasikasik en kilang sapwellimen Siohwa kapai ong koasoandi en kauwada Kingdom Hall nan Micronesia.
[Peidek en Onop]
1, 2. Mehnia koasoandi me artikel wet pahn sewese kitail en wehwehki mwahu?
3. (a) Ia mehn akadei ong koasoandi en kauwada Kingdom Hall? (b) Iaduwen pilahn en kauwada Kingdom Hall kin wiawi nan Micronesia?
4, 5. Pwukoa dah kan me Kingdom Hall Construction Desk kin apwalih?
6. Ihs me kin wia Pwihn en Kauwada Kingdom Hall, oh ia kahrepe?
7. Ia koasoandi kan ong Kingdom Hall construction servant men? (Pil kilang koakon.)
8. Ia mwomwen Kingdom Hall construction volunteer men weksang construction servant men?
9, 10. Iaduwen mwomwohdiso kak kasalehda arail utuht ong doadoahk en kauwada Kingdom Hall?
11. Iaduwen mouren kaweid me kileldi nan 1 Korint 14:40 oh Ipru 13:17 kin kasalehda anahn en utuht sang mwomwohdiso?
12. Soahng dah kan me mwomwohdiso me men kauwada Kingdom Hall anahne kehsehkin branch ohpis?
13, 14. (a) Irail wiliepen Kingdom Hall Construction Desk kan kin ale kasukuhl ong soahng dah kan? (b) Dahme kahrehda mwomwohdiso kan kak ale kaweid en doadoahngki Kingdom Hall teieu?
15, 16. (a) Ma mwomwohdiso tohto men doadoahngki Kingdom Hall tehieu, dahme irail oh sounapwalih en circuit anahne koasoiapene? Pil kilang koakon nan pali 6. (b) Ni ahnsou me irail pahn tehk uwen laud en mwohni me irail anahne oh uwen laud en meirong me mwomwohdiso kak wiahda, mehnia mouren kaweid en Paipel me irail anahne tehkpene, oh pwekida?
17. Mwomwohdiso anahne wiahda inou ong soahng dah kan mwohn e pahn ale mweimwei en kauwada Kingdom Hall?
18. Dahme kahrehda e kesempwal en idawehn kaweid me kohsang rehn sapwellimen Koht pwihn oh kapakapki oh likih sawas sang rehn Siohwa?
19. Kitail kak kilang Sapwellimen Siohwa kapai ong koasoandi en kauwada Kingdom Hall, oh iaduwen kitail kak utung koasoandi wet?
[Kaokon nan Pali 4]
Construction Volunteer kan Kin Wiahda Adamwahu
Mwurin arail Kingdom Hall kapw wiawihda, Mwomwohdiso en Niebla nan Chile ntinglahng branch ohpis oh kasalehda arail kalahnganki koasoandi en kauwada Kingdom Hall.
Kisinlikouo koasoia: “Brother kan me kohdo sewese kiht kin wia kapai ehu ong mwomwohdiso. Se kin tamanda irail ar kin kasalehda irair mwahu kan me duwehte karakarahk, madamadau pwung, oh kadek.”
Volunteer kan ong doadoahk en kauwada Kingdom Hall pil kin kaukaule iang doadoahk en kalohk oh kaunopada mwahu ong arail padahk kan ni ahnsoun mihding kan en mwomwohdiso. Kisinlikouo doula oh koasoia: “Pwehki arail mehn kahlemeng mwahu, me pwulopwul kan nan mwomwohdiso kin wiahda mehn akadei kan en wiahla volunteer kan en doadoahk en kauwada Kingdom Hall ehu rahn.”
[Kaokon nan Pali 6]
Meirong en Mwohni Laud, Meirong en Sahpw, oh Meirong en Dipwisou kan en Kauwada Ihmw
◼ Irail kan me men wiahda meirong en mwohni laud kak kadarala mwohnio ong account en Kingdom Hall kan en branch ohpis. Soangen meirong pwukat kak wiawi ong ehu pilahn en kauwada Kingdom Hall. Ih me wiahda meirongo anahne ntinglahng branch ohpis me pid iaduwen meirongo pahn kadoadoahk.
◼ Irail kan me men meirongkihla sahpw anahne ntinglahng branch ohpis oh kawehwehda iawasa sahpwo mih ie, uwen laud en sahpwo, ihs me sapweniki sahpwo oh naineki doaropwe ong sahpwo, oh ma mie koasoandi kan me re men wiahda duwen sahpwo. Kaidehn sahpw koaros me irail men meirongkihla pahn kak konehng koasoandi en kauwada Kingdom Hall.
◼ Irail kan me men meirongkihla dipwisou kan en wia ihmw anahne koasoiong Kingdom Hall Construction Desk de sounapwalih men me kin apwalih doadoahk en kauwada arail Kingdom Hall.