I Warohng Iang Kalohk?
1. Dahme kahrehda kitail en dehr pehm me kitail sohte warohng iang kalohk?
1 Ma ke kin iang idek peidek wet, dehr mworusala. Kaidehn sukuhl laud de pein atail koahiek me pahn kahrehiong kitail en warohng wia doadoahk wet. Ekei tohnpadahk kan en mahs kin wia aramas me “sohte wad oh pil sohte iang sukuhl.” Mendahki met, irail sounkalohk en rongamwahu koahiek kei pwehki re kin koasoanehdi teng en idawehn mehn kahlemeng en Sises.—Wiewia 4:13; 1 Pit. 2:21.
2. Ia duwen Sises eh kin ketin wia sapwellime padahk?
2 Mwomwen Sapwellimen Sises Padahk: Sapwellime padahk kin mengei en wehwehki oh wia sawas mwahu ong koaros. Sapwellime peidek kan, karasaras kan oh tepin padahk kan me mengei kin kahrehiong aramas kan en men rong. (Mad. 6:26) E kin ketin uhdahn nsenohki aramas. (Mad. 14:14) E kin mahsen ni manaman oh e kin ketin kasalehda me e kin kamehlele dahme e kin ketin padahngki pwehki e mwahngih me Siohwa me ketikihong ih pwukoa wet oh manaman en wia met.—Luk 4:18.
3. Ia duwen Siohwa eh kin ketin sewese kitail en pweida nan atail kalohk?
3 Siohwa Kin Ketin Sewese Kitail: Atail Sounpadahk me Keieu Lapalap kin ketikihda kasukuhl me kitail anahne pwehn kak pweida nan atail doadoahk en kalohki rongamwahwo sang sapwellime Mahsen oh sapwellime pwihn. (Ais. 54:13) Pwehki Siohwa ketin koasoanehdi mwomwen sapwellimen Sises padahk en ntingdi, kitail kak kasawih oh kahlemengih wiepen sapwellime padahk kan. Siohwa kin ketikihong kitail sapwellime manaman oh kasukuhlih kitail sang nan mihting kan en mwomwohdiso. (Sohn 14:26; Ipru 10:24, 25) E pil ketin doadoahngki sounkalohk koahiek kan me kak sewese kitail en koahiekla.
4. Dahme kahrehda kitail kak pehm me kitail warohng iang meteikan kalohki rongamwahwo?
4 Mie kahrepen atail kak pehm me kitail warohng iang kalohk pwehki atail “koahiek kin kohsang rehn Koht.” (2 Kor. 3:5) Ni atail kin likih Siohwa oh nantihong doadoahngki sapwellime koasoandi limpoak kan, kitail pahn “koahiekla ni soangen wiewia mwahu koaros.”—2 Tim. 3:17.