“Idawehn oh Kahlemengih” Sises
1. Iaduwen kitail kak wiahla sounkadehde koahiek kei?
1 Sises sohte kin ketin iang sukuhl en sounpadahk en palien lamalam en mehn Suhs akan, ahpw e ketin wia Sounkadehde keieu lapalap. Mie rekord en sapwellimen Sises doadoahk en kalohk me kitail kak paiekihda. Pwe kitail en wiahla sounkadehde koahiek kei, kitail anahne “idawehn oh kahlemengih” ih.—1 Pit. 2:21.
2. Dahme pahn sewese kitail en kakairada soangen limpoak me Sises sapwellimaniki ong aramas kan?
2 Kasalehda Limpoak ong Aramas kan: Limpoak oh nsenoh ong aramas kin kamwakid Sises. (Mark 6:30-34) Aramas tohto nan atail wasahn kalohk kin “weiweirek” oh uhdahn anahne padahk mehlel. (Rom 8:22) En medemedewe duwen arail kahpwal laud oh sapwellimen Siohwa limpoak oh nsenoh ong irail pahn kamwakid kitail en nantihlahte en wia doadoahk en kalohk. (2 Pit. 3:9) Patehng met, aramas kan pahn mwekidki atail padahk ma re pahn wehwehki me kitail kin uhdahn nsenohki irail.
3. Ni soangen ahnsou dah kan Sises kin ketin kalohk ong meteikan?
3 Kalohk ni Ahnsou Mwahu kan Koaros: Sises kin ketin isaneki ahnsou mwahu kan koaros pwehn ehukihong meteikan rongamwahu. (Mad. 4:23; 9:9; Sohn 4:7-10) Duwehte Sises, kitail men onopada mwahu en kalohk ni ahnsou me kitail pahn wia mehkan me kitail kin wia nan ehuehu rahn. Ekei kin wahda Paipel oh sawaspen Paipel kan pwe irail en kak kalohk nan wasahn doadoahk, sukuhl, oh ni ahnsoun seiloak oh netinet, oh ahnsou teikan.
4. Iaduwen kitail kak wiahki Wehio oaralap en atail kalohk?
4 Wiahki Wehio Oaralap en Kalohk: Rongamwahu en Wehio iei oaralap en sapwellimen Sises kalohk. (Luk 4:43) Mehnda ma ekei pak atail padahk sohte kin pid Wehio, ahpw kitail kin tamanda me kitail anahne sewese tohnihmw kan en wehwehki me irail anahne Wehio. Pil ni ahnsou me kitail kin koasoia duwen irair suwed en sampah me kin kasalehda me kitail kin momour ni imwin rahn akan, kitail en kin keieu kalohki “rongamwahu.”—Rom 10:15.
5. Pwe kitail en kalohk ni pwung, iaduwen kitail anahne doadoahngki Paipel?
5 Doadoahngki Mahsen en Koht: Sises kin ketin doadoahngki iren Paipel kan ahnsou koaros pwehn utungada sapwellime padahk. E sohte kin ketikihda pein eh padahk. (Sohn 7:16, 18) E kin ketin wadek oh onop Mahsen en Koht oh ketin doadoahngki ong pein ih pwehn pere pein ih sang ahn Sehdan uhwong. (Mad. 4:1-4) Pwe kitail en padahkihong meteikan ni pwung, kitail anahne wadek Paipel rahn koaros oh doadoahngki nan pein atail mour. (Rom 2:21) Ni ahnsou me kitail pahn sapeng peidek kan nan kalohk, kitail anahne kawehwehda iaduwen iren Paipel kan kin utungada dahme kitail kin padahngki oh wadek iren Paipel kan ma kak. Kitail men tohnihmw kan en wehwehki me kitail sohte kin kihda pein atail madamadau ahpw atail padahk kin uhdahn poahsoankihda sapwellimen Koht padahk.
6. Dahme Sises kin ketin wia pwehn sair mohngiong en irail me kin rong sapwellime padahk?
6 Song en Sair Mohngiong en Aramas ni Ahnsou me Ke Kin Kalohk: Pilismen ko koasoia duwen Sises ni ahnsou me samworo lapalap ko oh Parisi ko idek rehrail dahme kahrehda irail pilismen ko sohte kak koledi ih: “Sohte mehmen me kin padahk duwehte ohlo.” (Sohn 7:46) Sises kin ketin wia laud sang ihte padahngki ire kan, e kin ketin padahk ni ahl me kak sair mohngiong en irail akan me e kin padahk ong. (Luk 24:32) E kin ketin doadoahngki karasaras kan me pid duwen mour en aramas nan ehuehu rahn pwehn sewese irail en wehwehki sapwellime padahk. (Mad. 13:34) Sises sohte kin ketin padahkihong me rongorong kan laud sang dahme irail kak wehwehki. (Sohn 16:12) E kin ketin sewese irail en sohpeiong Siohwa ah kaidehn pein ih. Duwehte Sises, kitail kak wia sounpadahk koahiek kei ma kitail kin ‘kanakanahieng atail padahk kan.’—1 Tim. 4:16.
7. Dahme kahrehda Sises kin ketin kanengamah nan sapwellime doadoahk en kalohk?
7 Kanengamah Mendahki Aramas kan Sohte men Rong oh Uhwong: Mendahki Sises ketin wiahda manaman kan, aramas tohto sohte kin perenki rong ih. (Luk 10:13) Pein sapwellimen Sises tohnpeneinei pil pehm me “e iahkalahr.” (Mark 3:21) Ahpw Sises kin ketin kanengamah. E kin ketin kolokol lamalam pwung pwehki e kin ketin kamehlele ni unsek me e sapwellimaniki padahk mehlel me kak kasaledek aramas kan. (Sohn 8:32) Ki sapwellimen Siohwa sawas, kitail pil kin koasoanehdi teng en kanengamah.—2 Kor. 4:1.
8, 9. Iaduwen kitail kak kahlemengih Sises pwehn wiahda tounmetei ong rongamwahu?
8 Wiahda Tounmetei kan me Anahn Pwehn Uhdahn Iang Doadoahko: Sises kin ketin tounmeteikihla kepwe kan ong doadoahk en kalohk. (Mad. 8:20) E kin ketin ngoangki kalohk, oh ekei pak lel ni soutik. (Mark 6:35, 36) Sises mwahngih me miehte ahnsou mwotomwot me e kak doadoahngki pwehn kanekehla sapwellime doadoahk. Pwehki “atail ahnsou mwotomwotalahr,” kitail pil anahne tounmeteikihla atail ahnsou, kehl, oh kepwe kan ni atail kahlemengih Sises.—1 Kor. 7:29-31.
9 Irail tepin Kristian akan kin wia sounkadehde koahiek kei pwehki irail sukuhl sang Sises. (Wiewia 4:13) Kitail pil kak uhdahn kapwaiada atail pwukoa en kalohk ma kitail kin kahlemengih Sounkadehde keieu lapalapo.—2 Tim. 4:5.