Alehier Kaiahn Pwehn Wia Uwen Atail Kak Koaros Nan Kalohk
“Kumwail ahpw pahn kadehde ie nan Serusalem, nan Sudia pwon, oh Samaria oh lelohng ni irepen sampah.”—WIEWIA 1:8.
1, 2. Ia pwukoa en Piter, oh ihs me kihong ih ah pwukoa?
“SISES mehn Nasaret . . . oh e ketin mahsanihong kiht se en wia uwen atail kak koaros en kalohkiseli rongamwahu ong aramas akan oh kadehde me iei ih me Koht ketin idihadahr pwe en wia sounkopwung en me momour oh me melahr akan.” (Wiewia 10:38, 42) Ki mahsen pwukat, wahnpoaron Piter kawehwe ong Kornilius oh ah peneinei pwukoa ieu me e aleier en wiahla sounkalohk men.
2 Iahd me Sises ketikihda kehkehlik wet? E sansal me Piter kin medemedewe duwen dahme Sises mahsanih mwohnte e ketidahla nanleng. Pwe ni ahnsowo, Sises padahkiong sapwellime tohnpadahk lelepek kan: “Kumwail ahpw pahn kadehde ie nan Serusalem, nan Sudia pwon, oh Sameria, oh lelohng ni irepen sampah.” (Wiewia 1:8) Ahpw, mehlel, ekis werei mwohn Sises mahsanih mahsen pwukat, Piter eseier me nin duwen tohnpadahk emen en Sises, e pahn anahne padahkiong meteikan duwen ah pwoson me kin pid Sises.
Aleier Kasukuhl ni Erein Sounpahr Siluh
3. Dahme wiawi ni ahnsou me Sises luhke Piter en wiahla sapwellime tohnpadahk?
3 Sounpwong kei mwurin ah papidais nan pahr 29 C.E., Sises wia doadoahk en kalohk nan wasao me Piter oh rie Andrew kin doadoahk nin duwen sounlaid ni Lehn Kalili. Ira laid pwong ehu pwon, ahpw sohte koledi mwahmw. Eri, Sises padahkiong ira: “Kumwail kaieilahng mahs kisin pwohto wasa loal, pwe kumwail en sehngkipeseng amwail uhk kan.” Ni ahnsou irail kapwaiada dahme Sises mahsanih, “re ahpw koledi kiden mwahmw, kereniong pwe arail uhk ko en teipeseng.” Ni en Piter kilangada manaman wet, e ahpw masapwehkada, eri Sises mahsanih ong ih met: “Eri, Saimon, ke dehr masak, pwe sang met kohla ke pahn kin laidih aramas.”—Luk 5:4-10.
4. (a) Iaduwen Sises sewese sapwellime tohnpadahk kan en kalohk ong aramas teikan? (b) Iaduwen doadoahk en kalohk me sapwellimen Sises tohnpadahk ko kin wia pahn pahrekiong ahn Sises doadoahk en kalohk?
4 Piter oh Andrew—Seims oh Sohn nein Sepedi ko—mwadang pwilikihdi arail doadoahk oh iangala Sises. Kereniong sounpar silu, irail iangada Sises wia doadoahk en kalohk oh irail aleier kasukuhl laud ong wia sounkalohk kan. (Madiu 10:7; Mark 1:16, 18, 20, 38; Luk 4:43; 10:9) Ni kaimwiseklahn ahnsoun kasukuhl, nan Nisan 14, 33 C.E., Sises padahkiong irail: “Mehmen me pwoson ie pahn wia doadoahk kan me I kin wia. Ei, e pahn wia me lapasang.” (Sohn 14:12) Sapwellimen Sises tohnpadahk kan pahn duwehte Sises ni arail wia uwen arail kak nan kalohk ahpw irail pahn wia doadoahk laudsang me e wia. Irail sukuhlikier me irail oh aramas akan me pahn wiahla tohnpadahk kan ni ahnsou kohkohdo pahn wia kadehde ong “wehi kan koaros,” lao lel “imwin koasoandi wet.”—Madiu 28:19, 20.
5. Iaduwen kitail kak paiekihda sang kasukuhl ieu me Sises ketikihong sapwellime tohnpadahk kan?
5 Kitail miehr ni “imwin koasoandi wet.” (Madiu 24:3) Weksang irail tepin tohnpadahk kan en Sises, kitail sohte kak iang Sises oh kilang ih kalohk ong aramas teikan. Ahpw, kitail kak ale kasukuhl sang rehn Sises ni atail kin wadek nan Pwuhk Sarawi iaduwen e kin wia doadoahk en kalohk oh kaweid dah kan e ketikihong sapwellime tohnpadahk kan. (Luk 10:1-11) Oh pil, artikel wet pahn kawehwehda duwen mehkot kesempwal me Sises kasalehiong sapwellime tohnpadahk kan—en ahneki madamadau pwung ong doadoahk en kalohk.
Nsenohki Aramas akan
6, 7. Mehnia irair en Sises kin kahrehong ah doadoahk en kalohk pweida mwahu, oh iaduwen kitail kak kahlemengih ih?
6 Dahme kahrehda Sises kin pweida mwahu ni ah kin wia doadoahk en kalohk? Ehu kahrepe, pwe e kin nsenohki aramas akan. Sounmelkahkao kohpada me Sises pahn “ketin kupwurkalahngan ong me luwet oh semwehmwe kan.” (Melkahka 72:13) Kokohp wet pweida rehn Sises. Pwuhk Sarawi mahsanih: “Ni eh kin mahsanihada pokon en aramas akan, e kin kupwureirailla, pwehki ar pwunod akan oh sohte epwelparail, pwe re rasehng sihpw kei me sohte silepahr.” (Madiu 9:36) Pil irail aramas dipan akan kin kehn me Sises kin kupwureirailla oh met kin kahrehong irail en kohla reh.—Madiu 9:9-13; Luk 7:36-38; 19:1-10.
7 Atail doadoahk en kalohk pil pahn pweida mwahu ma kitail pahn nsenohki aramas akan. Mwohn kitail pahn kohla kalohk, kitail soh medemedewe duwen ia uwen laud aramas akan anahne rong duwen padahk kan me ke pahn ehukihong irail? Medemedewe duwen kahpwal akan me re kin ahneki oh me ihte Wehin Koht kelepw me pahn kak kamwahuiala arail kahpwal kan. Oh pil, nantiong koapworopworki aramas koaros, pwe kitail sehse ihs me pahn mwekidki padahk mehlel. Mwein aramas me ke pahn tuhwongo kin kapakapki emen duwehte kowe en kalohk reh pwen sewese ih!
Mwekidkihda Limpoak
8. Ni ahr kin kahlemengih Sises, dahme kin kamwekid sapwellime tohnpadahk kan en kalohki Rongamwahuo?
8 Rongamwahu me Sises kalohki kin pid kapwaiada kupwuren Siohwa, kasarawihala mwaren Koht, oh kalinganahda sapwellime kaunda—irair pwukat me keieu kesempwal me aramas akan kin anahne pohnese. (Madiu 6:9, 10) Pwehki Sises kin poakohng Seme, met kin kamwekid ih en kolokolete ah lelepek lao lel ni imwio oh met kin pil sewese ih en wia uwen ah kak koaros en kalohki Wehio, oh met kin sapengala irair pwukat. (Sohn 14:31) Pwehki sapwellimen Sises tohnpadahk kan en rahnwet kin ahnekihte soangen ngoang wet, irail kin pil nantiong en wia uwen arail kak koaros en kalohki Wehio. Wahnpoaron Sohn mahsanih: “Pwe iet duwen wehwehn poakohng Koht: kitail en peikiong sapwellime kosonned akan,” iangahki kosonned me kin pid kalohki Rongamwahu oh katohnpadahk.—1 Sohn 5:3; Madiu 28:19, 20.
9, 10. Likin limpoak ong Koht, soangen limpoak dahieu kin pil kamwekid kitail en wia uwen atail kak koaros nan kalohk?
9 Sises padahkiong sapwellime kan: “Ma kumwail poakohng ie, a kumwail pahn kapwaiada ei kosonned akan. Mehmen me kin rong oh kapwaiada ei kosonned kan, iei ih me kin poakohng ie.” (Sohn 14:15, 21) Eri, limpoak ong Sises anahne kamwekid kitail en kadehde ong aramas teikan duwen padahk mehlel oh pil peikiong sapwellimen Sises kosonned teikan. Ehu ahnsou mwurin Sises iasada, e kangoange Piter: “Kamwenge nei sihmpwul kan. . . . Apwalih nei sihpw kan. . . . Kamwenge nei sihpw kan.” Dahme pahn kak kamwekid Piter en wia met? Sises kihda pasapengpen peidek wet ni ah pwurpwurehng idek rehn Piter: “Ke poakohng ie? . . . Ke poakohng ie? . . . Ia duwe, ke poakohng ie?” Ei, ahn Piter limpoak ong Sises pahn kak kamwekid ih en wia uwen ah kak koaros nan kalohk, rapahki sapwellimen Sises “sihpw kan,” oh pil wiahla silipen sihpw men ni pali ngehn ong irail.—Sohn 21:15-17.
10 Rahnwet, kitail sohte kak uhdahn esehla Sises duwehte Piter kin ese ih. Ahpw, kitail kin wehwehki dahme Sises ketin wiaiong kitail. Mohngiongitail kin mwekidkihda limpoak laud me Sises ketin kasalehda ni ah ketin “pwoukihla aramas koaros.” (Ipru 2:9; Sohn 15:13) Atail pepehm kan kin duwehte Pohl ni ah ntingihdi: “Pwe limpoak en Krais me kamwekamwekid kiht . . . E ketin pwoukihla aramas koaros, pwe irail kan me momour, re dehr kin mourki pein ihr, ahpw re en kin mourkihte ih me pwoukinirailla oh ketin iasada pwe en ketikihong irail mour.” (2 Korint 5:14, 15) Kitail kin kasalehda me kitail kin kesempwaliki sapwellimen Sises limpoak ong kitail oh kitail kin pil kasalehda atail limpoak ong ih sang ni atail kin nantihong kapwaiada kehkehliko en wia uwen atail kak nan kalohk. (1 Sohn 2:3-5) Kitail sohte men ahneki madamadau en soukautih nan atail doadoahk en kalohk, pwe met pahn kasalehda me kitail kin mwamwahleki meirong en Sises.—Ipru 10:29.
Kilikilangwongete Mehkan me Kesempwal
11, 12. Ia kahrepe Sises ketidihdo sampah, oh iaduwen e kin kasalehda me doadoahk wet me keieu kesempwal?
11 Ni ahnsou me Sises ket mwohn Pondius Pailet, e mahsanih: “A iei, ong ni kahrepe wette me I kohkidohng sampah, pwe I en kadehdehda duwen me mehlel.” (Sohn 18:37) Sises sohte kin mweidong mehkot de emen en kerempwa ih sang ah kadehde ong aramas teikan duwen me mehlelo. Met iei kupwuren Koht.
12 Sehdan kin kasonge Sises. Mwurin Sises papidaisla, Sehdan men kihong ih “wehi koaros en sampah oh ar lingan,” oh Sises kak wiahla aramas ndand men nin sampah wet. (Madiu 4:8, 9) Mwurin met, irail mehn Suhs akan mwahuki Sises en wiahla nanmwarki emen. (Sohn 6:15) Ekei aramas ele mwein kin medemedewe duwen kapai tohto me pahn kak kohwong kitail ma Sises aleier pwais en wiahla nanmwarki nin sampah wet, pwe mwein irail kin ahneki madamadau ieu, ma Sises pahn wiahla nanmwarki nin duwen aramas emen, e pahn kakete sewese aramas tohto. Ahpw Sises, kin soikala soangen madamadau wet. E kin keieu kesempwaliki doadoahk en kalohki padahk mehlel.
13, 14. (a) Mehn kerempwa dahieu sohte kin kahrehong Sises en kesehla ah doadoahk en kalohk? (b) Edetehn Sises semwehmwe, dahme e ketin wia ong kitail koaros?
13 Oh pil patehng met, Sises sohte kin mweidong kepwehn sampah en kerempwa ih, kahrehda e sohte kin paiekihda paien sampah kan. Sohte pil pein imwen Sises. Ehu ahnsou, e mahsanih: “Kidien wel kan mie deurail, oh menpihr en pahnlahng kan mie pasarail, a Nein-Aramas sohte wasa e kak kaulewei ie tapwi.” (Madiu 8:20) Ni ahnsou me Sises pwoula, Pwuhk Sarawi ntingihdi me ihte dipwisou kesempwal me Sises kin sapwellimaniki iei sapwellime likou me sounpei en mehn Rom kan usuhski. (Sohn 19:23, 24) Met wehwehki me mouren Sises sohte pweida? Soh, e uhdahn pweida!
14 Sises kin ketikihda sawas laud sang aramas kepwehpwe kan me kin kadek ong aramas teikan. Pohl mahsanih: “Pwe kumwail ese mwahu duwen kalahngan en atail Kaun Sises Krais: duwen eh uhdahn kepwehpwe, e ahpw ketin wiahla me semwehmwe men pwehki kumwail, pwe kumwail en kepwehpwekihla sapwellime semwehmwe.” (2 Korint 8:9; Pilipai 2:5-8) Mendahki Sises semwehmwe, e ritingada ahl ieu ong irail aramas opampap kan en alehdi mour soutuk oh wiahla aramas unsek kei. Ia uwen laud atail kalahngan ong ih! Oh kitail kin perenki ah aleier katingo pwehki e kin kesempwaliki wia kupwuren Koht!—Melkahka 40:8; Wiewia 2:32, 33, 36.
15. Dahme kesempwal sang wiahla aramas kepwehpwe?
15 Kristian akan nan rahnwet me kin nantiong kahlemengih Sises sohte kin mweidong noahrok en mwohni de nantihong kepwehpwehla en kerempwa irail. (1 Timoty 6:9, 10) Irail kin pohnese me mwohni kak kahrehda emen en mour nsenamwahu, ahpw irail pil ese me mwohni sohte kak kihong irail mour soutuk. Ni ahnsou me Kristian emen pahn mehla, nah mwohni kan sohte katepe ong ih, duwehte sapwellimen Sises likou sohte katepe ong ih ni ahnsou me e ketin pwoula. (Eklesiasdes 2:10, 11, 17-19; 7:12) Ni ahnsou me Kristian emen pahn mehla, ihte me mie katepe iei ah nanpwungmwahu rehn Siohwa oh Sises Krais.—Madiu 6:19-21; Luk 16:9.
E Sohte kin Mweidong Uhwong en Kauhdi Ih
16. Dahme Sises kin wia ni ahnsou me e kin lelong kalokolok kan?
16 Uhwong sohte kak kahrehong Sises en sohlahr kalohkiseli padahk mehlelo. E sohte kin pahtoula, edetehn e ese me sapwellime doadoahk en kalohk nin sampah pahn imwikihla ah pahn meirongkihla ah mour. Pohl koasoia duwen Sises: “A, pwehki peren me e kasikasik, e sohte mwahn kupwurohkihla kanamenekpen eh pahn pwoula nin tuhkeo; eri, ahnsou wet e ketiketier ni palimaun en mwoalen Koht.” (Ipru 12:2) Tehk wasaht me Sises ‘sohte mwahn kupwurohkihla kanamenek.’ E sohte kin pwunodki dahme aramas me kin uhwong lemeleme duwen ih. E sohte kin mweidohng mehkot de emen en kerempwa ih sang wia kupwuren Koht.
17. Dahme kitail kak sukuhlikihsang ahn Sises kin kanengamah mendahki kalokolok?
17 Pohl kin kangoange Kristian akan ni ah kin kawehwehda duwen mehn kahlemeng mwahu en Sises ni ah kin kanengamah mendahki uhwong: “Kumwail medemedewe uwen me e ketin lokolongki, oh duwen eh ketin kanengamahiong kailok me e ketin alehsang rehn me dipan akan! Eri, kumwail dehr mworusala oh nan kapehd tikitikla.” (Ipru 12:3) Ni mehlel, kitail kak pwangada lelohng uhwong de kapailok rahn koaros. Kitail pil kak pwangada ni atail kin nantihong liksang lidip kan en sampah wet, mwein kisetail kan kin kangoange kitail en “wiahla aramas kepwehpwe de ndand men” nin sampah. Ahpw, duwehte Sises, kitail kin sohpeiong Siohwa pwehn ale sawas ni atail kin nantihong rapahki mahs Wehio.—Madiu 6:33; Rom 15:13; 1 Korint 2:4.
18. Mehn kasukuhl kaselel dahieu kitail kak sukuhliki sang dahme Sises mahsanihong Piter?
18 Sises sohte kin mweidong mehn kerempwa kan en kaluwetala ih, oh met kin sansalada ni ahnsou me e kin tepida padahkiong sapwellime tohnpadahk kan duwen ah pahn pwoula. Piter kin kangoange Sises en “kadek” ong pein ih oh Piter kamehlelehong Sises me “mepwukat sohte mwahn pahn lelohng ih.” Sises sohte men rong mehkot me pahn kaluwetala ih oh kahrehong en sohte kapwaiada kupwuren Siohwa. E ahpw ketin pirekeksang Piter oh mahsanih: “Kohla mwuri, kowe Sehdan! Meninkau men kowe rehi, pwe ke kin lemelemehte mehkan me en aramas, a kaidehkin mehkan me sapwellimen Koht.” (Madiu 16:21-23) Kitail anahne en pil ahnsou koaros soikala madamadau en aramas akan. Ahpw, kitail en mweidong kupwuren Koht en kahluwa kitail ahnsou koaros.
Wehio Pahn Wahdohng Kitail Kapai Kaselel kan
19. Edetehn Sises kin wia manaman tohto, dahme keieu kesempwal nan doadoahk en Sises?
19 Sises ketin wiahda manaman tohto pwe en kasalehong aramas akan me iei ih me Mesaia. E pil kin kaiasada aramas akan. Manaman pwukat kin kahrehong pokon en aramas akan en men kilang ih, ahpw Sises sohte ketido nin sampah pwen ihte wia doadoahk en sewese aramas akan ni ahl wet. E ketido nin sampah pwen kadehde duwen padahk mehlelo. E kin wehwehki me sawas me e kin ketikihong aramas akan pahn wiawi ahnsoukiste. Irail akan me Sises kaiasada pahn pwurehng mehla. Ihte ahl me Sises pahn kak sewese aramas en ale mour soutuk iei ma e pahn kadehde ong irail duwen padahk mehlel.—Luk 18:28-30.
20, 21. Iaduwen Kristian mehlel akan kin toupahrek me pid wiewia mwahu kan ong aramas teikan?
20 Rahnwet, ekei aramas kin song en kahlemengih sapwellimen Sises wiewia mwahu kan sang ni ahr kin wiahda imwen wini kan de wia doadoahk en sawas teikan ong aramas semwehmwe kan. Ekei ahnsou, irail kin kihda pein ahr sawas en mwohni laud pwehn sewese aramas semwehmwe kan, oh ni mehlel, arail wia met kin wia mehkot mwahu ieu; ahpw soangen sawas pwukat pahn wahdohng aramas pwukat nsenamwahu ong ahnsoukiste. Ihte Wehin Koht me pahn kak wahdohng aramas nsenamwahu ong ahnsou kohkohlahte. Ihme kahrehda, Sounkadehdehn Siohwa kan kin kahlemengih Sises en keieu kesempwaliki wia doadoahk en kadehde ong aramas teikan duwen padahk mehlel me pid duwen Wehin Koht.
21 Ni mehlel, Kristian mehlel akan kin iang wia doadoahk mwahu kan ong aramas teikan. Pohl mahsanih: “Eri, nin dokon eh mie atail ahnsou, kitail en wia mwahu ong aramas koaros; ahpw mehlel ong irail kan me kisehn atail pwoson.” (Kalesia 6:10) Ni ahnsoun kahpwal kan kin wiawi de ni ahnsou me aramas emen anahne sawas en mwohni, kitail sohte kin pweiek en “wia mwahu” ong mehn mpatail kan de ong riatail Kristian akan. Ahpw, kitail kin kilangwohngete dahme keieu kesempwal iei kalohkihong aramas teikan padahk mehlelo.
Sukuhlikihsang Mehn Kahlemeng Mwahu en Sises
22. Dahme kahrehda Kristian akan kin kalohk ong mehn mparail kan?
22 Pohl ntingihdi: “Oh meid suwediong ie, ma I sohte pahn lohkiseli Rongamwahu!” (1 Korint 9:16) E sohte kin soukautih ni e kin wia doadoahk en kalohki Rongamwahu, pwe doadoahk wet kin wehwehki mour ong pein ih oh aramas me kin rong ah padahk kan. (1 Timoty 4:16) Ni ahlohte, kitail kin kilangwong atail doadoahk en kalohk. Kitail men sewese mehn mpatail kan. Kitail men kasalehda atail limpoak ong Siohwa. Kitail pil men kasalehda atail limpoak ong Sises oh atail kalahngan ong sapwellime limpoak me e kasalehong kitail. Ihme kahrehda, kitail kin kalohki Rongamwahu oh weweidki kupwuren Koht, a kaidehk ineng en aramas.”—1 Piter 4:1, 2.
23, 24. (a) Dahme kitail sukuhliki sang manaman en Sises me kin pid mwahmw? (b) Ihs rahnwet kin wia uwen arail kak koaros en kalohk?
23 Duwehte Sises, kitail sohte kin mweidong mehn kerempwa kan en kahrehong kitail en sohlahr wia atail doadoahk en kalohk, duwehte ni ahnsou me aramas akan kin kapailoke kitail de ni ahnsou me aramas kin lingeringer oh sohte men rong atail padahk kan. Kitail kak sukuhliki sang manaman me Sises wiahda ni ahnsou me e luhke Piter en idawehnla ih. Kitail kin wehwehki me ma kitail kin peikiong Sises, kitail kin ni karasaras, sehngkipeseng atail uhk kan wasa me mwomwen sohte mwahmw, ahpw atail doadoahk en “laid” pahn kak pweida. Ni karasaras, Kristian sounlaid tohto kin “koledi mwahmw tohto” mwurin arail kin doadoahk ni sounpar tohto nan wasa me mwomwen sohte mwahmw. Ekei sounkalohk kan kin keseula nan wasa me “laidih aramas” kin pweida mwahu oh arail doadoahk en “laidih aramas” kin pweida wasao. Sohte lipilipil dahme kitail pahn wia, kitail sohte pahn uhdi sang doadoahk en kalohki duwen padahk mehlelo. Kitail ese me Sises saikinte padahkiong kitail me doadoahk en kalohk wet nekier.—Madiu 24:14.
24 Tohto sang Sounkadehdehn Siohwa wenerar kin soupisengki wia doadoahk en kalohk nan sahpw 230 samwa. Ripoht en kalohk me wiawi wasa koaros nan sampah nan pahr en kalohk en 2004 pahn kohda nan Kahn Iroir en February 1, 2005. Ripoht wet pahn kasalehda me Siohwa kin kapaiada doadoahk en kalohk wet. Eri, ni ahnsou luhwe nan imwin koasoandi suwed wet, kitail en pousehla mwekidkihda mahsen en Pohl: “Ke en kalohkiseli mahseno, ke en nantihong koasoakoasoia duwe.” (2 Timoty 4:2) Kitail en nantihong wia uwen atail kak koaros en kadehde ong aramas akan lao lel Siohwa mahsanih me doadoahk wet me nek.
Ke Kak Sapeng?
• Iaduwen kitail kak paiekihda sang mehn kasukuhl me Sises wia ong sapwellime tohnpadahk kan?
• Ia madamadau en Sises ong aramas akan me e kin kalohk ong?
• Dahme kin kamwekid kitail en wia uwen atail kak koaros nan kalohk?
• Ni ahl dah kei kitail kak en dehr mweidohng mehkot de emen en kerempwa kitail en wia kupwuren Koht nin duwen Sises wia?
[Kilel nan Pali 24]
Tepida sang sounpar wet, Ripoht en Kalohk en Sounkadehdehn Siohwa kan nan Sampah Pwon sohte pahn pwarada nan Kahn Iroir en January 1. E pahn uhd pwarada nan sounpwong en February 1.
[Kilel nan Pali 25]
Atail doadoahk en kalohk pahn pweida ma kitail kin kahlemengih Sises ni ah kin nsenohki aramas akan
[Kilel nan Pali 26]
Sises ketido nin sampah keieu pwen kadehde ong aramas teikan duwen padahk mehlel
[Kilel nan Pali 27]
Sounkadehdehn Siohwa kan kin nantiong wia uwen arail kak koaros nan kalohk