Kohdo Micronesia oh Sewese Kiht!
1, 2. (a) Ia duwen Kristian tohto rahnwet arail kin alasang pwoson en Eipraam? (b) Pakair dahieu me kohda nan Atail Doadoahk ong Wehio ni lokaiahn wai oh ia imwilahn met?
1 En mwesel sang peneinei oh kompoakepatail kan pwehn kalaudehla atail papah Siohwa kin anahne pwoson mehlel. Eipraam iei emen me kin kasalehda soangen pwoson wet kereniong sounpar 4,000 samwalahro. Koht ketikihong ih kaweid wet: “Komw mweselweisang rehn omw peneinei oh nan omwi wehi, oh kowohng sahpw ehu me I pahn kasalehiong uhk.”—Wiewia 7:2, 3.
2 Kristian tohto rahnwet koasoanehdi pwehn wia dahme Eipraam wia. Re kosoula nan sahpw teikan pwehn kalaudehla pweidahn sapwellimen Siohwa doadoahk. Ni ahnsou me pakair en sawas ong Micronesia kohda nan Atail Doadoahk ong Wehio en February 2009 ni lokaiahn wai, tohtohsang meh 100 mwekidki oh mwesel sang imwarail oh arail peneinei pwehn kalaudehla arail papah Siohwa.
3. Dahme kin kamwakid riatail kan en kohdo Micronesia?
3 Ia Kahrepen Arail Kin Wia Met? Dahme kin kamwakid riatail kan en wia met? Ehu pwopwoud me kosoula Guam iangahki neira seri riemen nda: “Se mwekidki pakair nan Atail Doadoahk en Wehio pwehki se men kalaudehla at doadoahk en kalohk. Se pil men sewese nait seri kan en kilang me sapwellimen Siohwa pwihn kin mi wasa koaros oh re wia pirien mehlel ehu nan sampah pwon.” Ia uwen atail kin kalahnganki riatail kan me kin duwehte Eipraam me mweselsang imwarail kan oh arail peneinei kan pwehn ‘kohdo Micronesia’ pwehn sewese kitail nan doadoahk en Wehio!—Wiewia 16:9.
4. (a) Kahpwal dahieu me irail me kin kosoudo nan wasa me anahn laud kin lelohng? (b) Ia duwen emenemen tohnmwomwohdiso kak sewese irail?
4 Ia Duwen Atail Kak Sewese Irail: En kosoula nan ehu wasa me kapw me dohsang arail peneinei sohte mengei. Dahme kin sewese irail kan me wia met en kolokol arail koasoandi en papah wasa me anahn laud mie? Ehu pwopwoud nda: “Mwomwen en riat akan arail kasamwo kiht kin kasalehda limpoak oh kadek me kin dierekte nan sapwellimen Siohwa pwihn. E kin katamankihong kiht mahsen en Sises nan Mark 10:29, 30. Se kohkohsang at peneinei ahpw se pehm me Siohwa ketikihong kiht at peneinei kapw epwiki kei.” Ni arail kin kasalehda kadek, koaros tohnmwomwohdiso kak kapwaiada pwais kesempwal oh kaperen ehu me pahn sewese doadoahk mwahu en irail kan me kosoudo nan mwomwohdiso. Ke sou wiahda omw mehn akadei pwehn eseirailla oh wia uwen omw kak pwe ren peren?—3 Sohn 8.
5. (a) Ia duwen elder kan kak paiekihda koahiek me brother kapw kan wahdo nan pwihn en elder? (b) Dahme pahn sewese elder kan en doadoahkpene nin duwen pwihn ehu?
5 Ia duwen elder kan arail kak paiekihda koahiek me brother pwukat kin wahdo nan pwihn en elder kan? Elder kan kak idek rehrail ma re kak kihda sawas kan. Ni arail kin kasalehda me re men ale sawas, e kin kamengeihala brother ko en kihda sawas. Emenemen elder kak wiahda mehn akadei en ahneki pehse mwahu rehn pwihn en elder kan sang ni arail kin kaukaule koasoiong elder teikan iangahki irail me ahpwtehn kosoudo nan mwomwohdiso. Pwihn en elder kan kak diarada me re kak paiekihda “kisakis” en ohl kapw pwukat sang ni arail pahn kihong irail pwukoa kan pwe mwomwohdiso en paiekihda arail koahiek. (Ep. 4:8, 11, 12) Elder kan me kin wia pwukoa pwukat mahs kin utungada wekidekla pwukat ni aktikitik. Elder kan nan mwomwohdiso kin ese me re sohte kin siaipene oh re kin ehupene oh doadoahkpene nin duwen pwihn ehu. (Kal. 6:4) Re kin perenki sawas me emenemen elder kin kak kihda ong kamwahupen mwomwohdiso pwon, mehnda ma eldero kapw de wereila nan pwihn en eldero. Ni ahl wet, re wia mehn kahlemeng mwahu en miniminpene ong tohnmwomwohdiso teikan.
6. (a) Ia duwen Krais eh kin ketikihda kaweid ong pwihn en elder kan rahnwet? (b) Ia duwen elder kan kak kasalehda wahu ong emenemen?
6 Elder kan pil kin pohnese me Krais kak doadoahngki sapwellimen Koht manaman pwehn kahluwa madamadau en sohte lipilipil elder pwehn kihda kaweid en Paipel kan me anahn pwehn apwalih soangen irair koaros. (Wiewia 15:6-15) Pwihn en elder kan kak paiekihda arail rong brother kan me ahneki koahiek laud, ahpw sohte emen elder pahn kaunda elder teikan. Elder kan kin wauneki emenemen ni arail kin rong kanahieng emenemen irail nan pwihno me kihda ire kan sang nan Paipel de kaweid sang Pwihn me kin apwalih mwomwohdiso nan sampah pwon.
7, 8. Ia duwen irail me kin kosoudo nan wasa me anahn laud kak kahlemengih Nehmaia? Ia kamwahupen met?
7 Mehn Kahlemeng en Nehmaia: Irail kan me kosoula ni wasa kan me anahn laud kak paiekihda mehn kahlemeng en Nehmaia. Ni eh lella Serusalem, Nehmaia kanahieng pwe en dehr kahrehiong meteikan en medewe me e kin rapahki arail sapwung kan. E doadoahngki ahnsou pwehn kasawih oh wehwehki soahng kan mwohn e pahn koasoi. (Pil kilang Lep. Pad. 18:13.) Pwehki met, ienge tohndoadoahk kan kak miniminpene oh nda: “Kitail tepida wia doadoahk en onohnsapahlo,” oh “irail eri kaunopada pwe re en tapihada doadoahko.”—Neh. 2:11-18.
8 Riatail kan me “kohdo” Micronesia kin kalahnganki sawas me re kin ale ni arail kin nantihong en wehwehkihla duwen wasa kapw me re pahn mihla ie, pwehki re ese me re pahn anahne sukuhlki soahng tohto nan wasa kapw ehu. Duwehte Nehmaia, irail en ‘rong mwohn arail pahn sapeng’ ni arail pahn rapahki sawas sang meteikan pwehn wehwehki soahng kan mwohn arail kihda sawas kan.
9. Ia omw pepehm duwen irail kan me ‘kohdo Micronesia’ pwehn sewese kitail?
9 Emen sister koasoia: “E kaperen en kilang riatail kan me tohto arail kin pwilikihdi soahng koaros pwehn kohdo papah arail ‘peneinei’ nan Micronesia.” Eri, kitail koaros en perenki kihda mehn kangoang ong iengetail tohndoadoahk kan me kin ‘mweselweisang rehn arail peneinei oh nan arail wehi’ pwehn sewese kitail.