Kupwurokong Kin Sansalkihda Doadoahk
1. Ia duwen ekei ar kin kilangwohng atail doadoahk?
1 Ekei pak kitail kin lelohng uhwong kan sang tohnihmw kan me sohte kin wehwehkin kitail de me alehdi rong sapwung duwen Sounkadehdehn Siohwa kan. Mwein re kin ahneki soangen madamadau wet pwehki dahme re kin rong sang pelien rohng kan me kin lipilipilki aramas. Nan ekei wasa, re kin wiahkin kitail “kisin pwihn keper ehu.” Dahme kitail pahn wia ma aramas kauwei kitail?
2. Dahme pahn sewese kitail en dehr luwetala ni atail lelohng uhwong kan?
2 Kolokol Madamadau Pwung: Aramas ni mwehin tepin Kristian ako sohte kin wehwehki mwahu oh pil kin uhwong Sises oh ekei sapwellimen Siohwa ladu kan. (Wiewia 28:22) Ahpw irail sohte kin mweidohng uhwong kan en kahrehiong irail en namenengki arail doadoahk en kalohk. Sises mahsanih: “Kupwurokong en Koht kin dehdehda sang ni wahn sapwellime doadoahk kan.” (Mad. 11:18, 19) Sises kin ketin usehlahte wia kupwuren Seme ni ngoang oh kamehlele me irail kan me uhdahn kin rapahki me mehlelo, pahn kilang kesempwalpen rongamwahwo. Kitail kak soikala soahng kan me pahn kaluwetala kitail ni atail pahn tamanda me sapwellimen Koht Ohl pil lelohng soahngohte.
3. Dahme kahrehda rohng en kauwe oh uhwong kan sohte kin wia mehkot kapwuriamwei ong kitail?
3 Sises ketin kasalehda me sampah pahn kailongki sapwellime kan duwehte eh kin kailongki ih. (Sohn 15:18-20) Ihme kahrehda, rohng kan me kin kauwe oh uhwong kitail, sohte pahn wia mehkot me kapwuriamwei ong kitail. Ni mehlel, kitail kin kasik me soahng pwukat pahn wie lalaudla ni atail kin mihla nan imwin rahn akan oh en Sehdan lingeringer pahn laudla sang mahs. (Kaud. 12:12) Kitail kak perenki me ahn Sehdan sampah pahn kereniong kasohrala.
4. Dahme kitail pahn wia ma mie me uhwong atail doadoahk en kalohki rongamwahu?
4 Sapeng ni Kadek: Ni atail kin lelohng uhwong, kitail en kin ahnsou koaros sapeng ni kadek oh meleilei. (Lep. Pad. 15:1; Kol. 4:5, 6) Ma kak, kitail kak kawehwe ong tohnihmw men me uhdahn men ese, me mie sawehwe laud me pid duwen Sounkadehdehn Siohwa kan de idek reh dahme kahrehda e ahneki soangen pepehmo. Atail kin sapeng ni meleilei kak kahrehda tohnihmwo en idek soahng kan me e kin rong duwen Sounkadehdehn Siohwa kan oh e pahn pil rong ni ahnsou me emen Sounkadehde pahn pwurehng pwurala reh. Ahpw, ma tohnihmwo uhdahn lingeringer ni ahnsowo, eri e pahn keieu mwahu kitail en kohkohla ni meleilei. Kitail kak kamehlele me sohte lipilipil dahme meteikan kan kin medewe kin kitail, Siohwa kin ketin kesempwalki atail doadoahk en kalohk.—Ais. 52:7.