Peiki Atail Pwoson

“Ahpw kumwail lemmwiki Krais nan kapehdomwail kan, oh wiahki amwail Kaun. Onopada ahnsou koaros pwe kumwail en kak sapeng mehmen me peki rehmwail kumwail en kawehwehiong koapworopwor me mi rehmwail.”​—1 PITER 3:15.

1, 2. Dahme kahrehda Sounkadehdehn Siohwa kan sohte kin pwuriamweiki ahr lelohng kalokolok kan, ahpw dahme re kin inengieng en wiawi?

NAN pali moron en wehi kan, aramas akan kin kilangwong Sounkadehdehn Siohwa kan nin duwen aramas mehlel oh tiahk mwakelekel kei. Aramas tohto kin kilangwong irail nin duwen mehn mparail mwahu kan me sohte kin wia me suwed kan. Ahpw, Kristian pwukat me kin popohl oh limpoak kin lellong kalokolok​—ni ahnsoun mahwen oh ni ahnsoun popohl. Irail sohte kin pwuriamweiki kalokolok pwukat. Ahpw, ni mehlel, re kin kasik me re pahn lellong kalokolok pwukat. Pwe, irail ese me Kristian lelepek kan nan tepin senturi C.E. pil kin lellong aramas akan me kin “kailongkinirailla,” eri pil nan rahnpwukat, aramas akan me kin idawehnla Krais ni mehlel soh pahn pil kak lellong soangen kalokolokohte? (Madiu 10:22) Oh pil, Paipel mahsanih: “Aramas koaros me men ahneki mour mwahu ni arail pahn miniminiong Krais Sises, re pahn ale kamakam.”​—2 Timoty 3:12.

² Sounkadehdehn Siohwa kan sohte kin rapahki kalokolok en lellong irail, oh re pil sohte kin perenki kahpwal kan me kin kohsang kalokolok​—duwehte pwainla pweinen kawehla kosonned akan, selidi nan imweteng, de lellong kalokolok lemei kan. Re kin men ahneki ‘mour meleilei oh popohl’ pwe ren kak ni saledek kalohki rongamwahu en Wehin Koht. (1 Timoty 2:1, 2) Re kin kalahnganki me re kak ni saledek wia ahr kaudok nan wasa tohto en sahpw akan, oh re kin nsenohki wie dahme re kak wie pwehn “ahneki popohl rehn aramas koaros,” oh pil rehn kaunen koperment kan. (Rom 12:18; 13:1-7) Eri, dahme kahrehda aramas akan kin “kailongkinirail”?

3. Ia ehu kahrepe me aramas akan kin kailongki Sounkadehdehn Siohwa kan?

³ Kahrepen aramas akan kin kailongki Sounkadehdehn Siohwa kan nan rahnpwukat kin poahsoankihda kahrepe kante me tepin Kristian akan en mahs kin lokolongki. Keieu, Sounkadehdehn Siohwa kan kin kapwaiada ahr kaudok ni ahl akan me sohte pahn kahrehong irail en ndandla rehn aramas akan. Karasepe ieu, re kin ngoangki kalohki rongamwahu en Wehin Koht, ahpw aramas akan sohte kin wehwehki ahr ngoang, oh kin kilangwong arail doadoahk en kalohk nin duwen “kalohk ehu me kin idingkihong aramas en rong.” (Pil kilang Wiewia 4:19, 20.) Re pil kin soupoupalih nan politik oh mahwen kan, ahpw aramas kin lemeleme me Sounkadehde kan kin wia tohn wehi salelepek kan.​—Maika 4:3, 4.

4, 5. (a) Dahme aramas akan kin karaunehki Sounkadehdehn Siohwa kan? (b) Ihs irail akan me kin keieu pwukoahki en tepiada kaloke sapwellimen Siohwa ladu kan?

⁴ Keriau, aramas akan kin lahlahwe Sounkadehdehn Siohwa kan​—⁠aramas akan kin wiahda likamw kan oh padahk sapwung kan pwehn kauwe dahme Sounkadehde kan kin kamehlele. Met kin imwikihla aramas akan nan ekei sahpw kin kilangwong irail nin duwen pwihn keper ehu. Oh pil, pwehki re kin rapahki sawas ni epwelpen wini me nta sohte iang pwehn peikiong kosonned en Paipel en ‘liksang nta,’ aramas akan kin kahdaneki irail nin duwen “aramas akan me kin kemehla seri kan” oh “pwihn ehu me kin kemehla pein irail.” (Wiewia 15:29) Ahpw, Sounkadehdehn Siohwa kan kin kesempwaliki mour, oh re kin rapahki epwelpen wini me keieu mwahu ong pein irail oh neirail seri kan. Oh sohte poahsoanpen lahlahwe kan me aramas akan kin wiahda me dene tohto nein Sounkadehdehn Siohwa kan kin mehla ehu ehu sounpar pwehki irail kin kang ale doken nta. Sohte rekod kan me kasalehda duwen irewet. Pwehki Padahk mehlel en Paipel sohte kin kamwekidada tohnpeneinei kan koaros nan ehu ehu peneinei, aramas akan kin karaunih me dene Sounkadehde kan kin katohrohrpeseng tohnpeneinei kan. Ahpw, irail akan me ese Sounkadehdehn Siohwa kan, irail wehwehki me Sounkadehde kan kin kesempwaliki mouren peneinei oh irail kin nantiong en kapwaiada kosonned en Paipel me ohl pwopwoud oh lih pwopwoud anahne en kasalehda wahu nanpwungara oh seri kan anahne peikiong ahr pahpa oh nohno kan mehnda ma ahr pahpa oh nohno iang pwoson de soh.​—Episos 5:⁠21–​6:⁠3.

⁵ Pali laud en ahnsou, aramas akan me kin tepiada kaloke Sapwellimen Siohwa ladu kan iei irail akan me iang pelien lamalam teikan oh irail kin doadoahngki ahr manaman en doadoahk ong kaunen wehi kan oh pwihn en nuhs kan pwehn song en kauhdi doadoahk kan en Sounkadehde kan. Iaduwen kitail Sounkadehdehn Siohwa kan mwekidki uhwong pwukat​—mendahki ma met imwilahn atail padahk kan oh wiewia kan de pwehki soun karaun likamw akan?

“Kumwail Kadekohng Aramas Koaros”

6. Dahme kahrehda e kesempwal en ahneki madamadau toupahrek ong irail akan me mihmi likin mwomwohdisohn Kristian?

⁶ Kitail anahne ahneki madamadau pwung​—en ahneki sapwellimen Siohwa madamadau​—ong irail akan me sohte kin kamehlele atail padahk kan. Ma kitail sohte wia met, kitail ele mwein pahn kahrehong irail ni soh katepe en kaloke de lahlahwe kitail. Wahnpoaron Pohl ntingihdi, “Kumwail kadekohng aramas koaros.” (Pilipai 4:5) Ihme, Paipel kin kangoange kitail en ahneki madamadau toupahrek ong irail akan me mihmi likin mwomwohdisohn Kristian.

7. Dahme kin pidada atail “dehr saminkihla tiahk suwed kan en sampah wet”?

⁷ Iren Paipel kan kin ni sansal kaweidkin kitail en “dehr saminkihla tiahk suwed kan en sampah wet.” (Seims 1:27; 4:4) Lepin lokaia wet “sampah”, duwehte me pwarada nan wasa tohto nan Paipel, kin wehwehki pali moron en aramas kan likin Kristian mehlel akan. Aramas pwukat kin kapilpene kitail nan atail wasahn doadoahk kan, nan sukuhl, oh nan atail wasahn kousoan kan. (Sohn 17:11, 15; 1 Korint 5:9, 10) Ahpw, kitail kin mwakelekel sang sampah wet, sang ni atail pahn liksang madamadau kan, lokaia kan, oh tiahk kan me kin uhwong sapwellimen Koht kosonned akan. E pil kesempwal kitail en pohnese me e wie keper ehu ong kitail ma kitail pahn kerenih sampah wet, keieu irail akan me kin mwamwahleki sapwellimen Siohwa kosonned akan.​—Lepin Padahk 13:20.

8. Dahme kahrehda kaweid en dehr saminkihla tiahk suwed kan en sampah wet sohte kin kihong kitail kahrepe ehu en mwamwahleki mehteikan?

⁸ Edetehn mie kaweid en liksang sampah wet, met sohte kin wehwehki me kitail pahn pohnsehsehla de mwamwahleki irail akan me sohte iang Sounkadehdehn Siohwa kan. (Lepin Padahk 8:13) Tamanda duwen wiewiahn kaunen pelien lamalam en mehn Suhs akan nan artikel en mwowe. Soangen mwomwen kaudok me re wiahda sohte kin kenikenla rehn Siohwa; oh e pil sohte kahrehong irail en ahneki nanpwung mwahu rehn mehn Liki kan. (Madiu 21:43, 45) Pwehki ahr kin aklapalap, ohl pwukat kin mwamwahleki mehn Liki kan. Kitail sohte kin ahneki soahngen lamalam wet en mwamwahleki mehteikan me sohte kin iang Sounkadehde kan. Duwehte wahnpoaron Pohl, kitail men kilang aramas koaros en rong padahk mehlel en Paipel oh kenikenla rehn Koht.​—Wiewia 26:29; 1 Timoty 2:3, 4.

9. Ma kitail kin doadoahngki iren Paipel kan en kamwekid kitail, ni ahl dahieu met pahn kamwekid atail madamadau kan oh koasoi kan ni atail pahn koasoia duwen aramas akan me sohte kin kamehlele atail padahk kan?

⁹ Kitail anahne mweidohng iren Paipel kan ni toupahrek en kamwekid atail madamadau kan oh koasoi kan ni kitail kin koasoia duwen aramas akan me sohte iang Sounkadehde kan. Pohl kaweidkin Taitus en katamankin Kristian akan me mihmi nan deke en Krihd “en dehr kauwe emen, ahpw re en kin meleilei oh kadek, oh ahnsou koaros re en kasalehda saramwahu ong aramas koaros.” (Taitus 3:2) Tehk me Kristian akan sohte ale mweimwei en kauwe “emen”​—pil irail aramas akan nan Krihd me kaidehn Kristian, ekei irail me kin likamw, kapehd en mwenge, oh pohnkahke. (Taitus 1:12) Eri, e pahn sohte konehng nin duwen me Paipel mahsanih en doadoahngki lepin lokaia kan me kin mwamwahleki irail akan me sohte kin iang kitail. Lamalam aklapalap de ileile sohte pahn kahrehong aramas teikan en iangala sapwellimen Siohwa kaudok. Ahpw, ma kitail kin kasalehda wahu ong aramas teikan nin duwen sapwellimen Siohwa Mahsen kin kaweidkin kitail en wie, eri kitail kin kahrehong aramas akan en “kapingahki atail padahk” duwen Koht.​—Taitus 2:10.

Ahnsoun Nennenla oh Ahnsoun Koasoi

10, 11. Iaduwen Sises kasalehda me e ese (a) “ahnsoun nennenla”? (b) “ahnsoun koasoi”?

¹⁰ Pwuhken Eklesiasdes 3:7 (New World Translation) mahsanih duwen, “ahnsoun nennenla oh ahnsoun koasoi.” Eri met iei kahpwal ieu: en ese iahd kitail sohte pahn sapeng aramas akan me kin uhwong kitail oh iahd kitail pahn koasoi pwehn utungada atail pwoson. Kitail kak sukuhliki laud sang kahlemeng mwahu en meno me kin ahnsou koaros wiahda eh pilipil mwahu​—meno iei Sises. (1 Piter 2:21) E ese “ahnsoun nennenla.” Karasepe ieu, ni ahnsou me samworo lapalap kan oh iangahki ohl mah kan kin karaunih ih mwohn Pailet, Sises “ahpw sohte mwahn sapeng.” (Madiu 27:11-14) E sohte men nda mehkot me pahn wie kerempwa ehu ong ih en kapwaiada kupwuren Koht. E pilada en mweidohng eh wiewia kan en koasoi. E ese me padahk mehlelo sohte kak kawukihla ahr madamadau oh mongiongarail aklapalap akan. Eri, e pohnsehsela ahr lahlahwe kan, oh e sohte mwahn koasoia mehkot.​—Aiseia 53:7.

¹¹ Ahpw, Sises pil ese “ahnsoun koasoi.” Ekei ahnsou, e kin koasoi ni inen oh sansal, kapwungala ahn aramas lahlahwe kan. Karasepe ieu, ni ahnsou Sounkawehwehn Kosonnedo kan oh Parisi kan song en lahlahwe ih mwohn pokon ehu, dene kaunen ngehn suwed kan me kihong Sises manaman en kausasang ngehn suwed rehn aramas, Sises pilada en dehr mweidohng lahlahwe wet en wiawi. Sang ni elen kawahsek madamadau oh iangahki elen karasaras kehlail, e kasalehda me dahme re nda me likamw. (Mark 3:20-30; pil kilang Madiu 15:1-11; 22:17-21; Sohn 18:37) Pil ni ahlohte, mwurin arail pangala Sises oh parokedi ih, re urahdeki ih mwohn pwihn en Sanhedrin oh Samworo Lapalap Kaiapas ni widing ngidingidiki ndahda: “Ni mwaren Koht ieias, komwi en kahukihong kiht ma iei komwi Mesaiao, Sapwellimen Koht!” Met iei “ahnsoun koasoi,” pwe ma e sohte pahn sapeng, aramas akan ele pahn lemeleme me e kamahmki me ih me Krais. Eri Sises sapeng, mahsanih: “Iei ngehi ih.”​—Madiu 26:63, 64; Mark 14:61, 62.

12. Ia irair akan me kin wiawi me kahrehong Pohl oh Parnapas en koasoi ni eimah nan Aikonium?

¹² Tehk duwen mehn kahlemeng en Pohl oh Parnapas. Wiewia 14:1, 2 ketihtihki: “Soahngohte pil wiawi nan Aikoniomw: Pohl oh Parnapas kohla ni sinakoke en mehn Suhs ako oh padahk ni mwohmw ehu me kahrehda me tohtohie, mehn Suhs oh pil mehn liki kan, pil pwosonla. Eri, mehn Suhs ako me sohte men kamehlele ahpw kamwoarongehda mehn liki kan oh kahrehiong arail uhwong me pwoson ako.” The New English Bible mahsanih: “Ahpw, irail mehn Suhs akan me sohte iangala Kristian akan uhd kamwoarongehda mehn liki kan oh kasaminehla ahr madamadau kan pwen uhwong Kristian akan.” Mehn Suhs pwukat me kin uhwong Kristian akan sohte kin itarki pein irail te en uhwong padahk en Kristian akan, ahpw irail kin song en kahrehong mehn liki kan koaros en pil uhwong Kristian akan.a Ia uwen loal ahr kin kailongki padahk en Kristian akan! (Pil kilang Wiewia 10:28.) Eri, Pohl oh Parnapas lemeleme me met iei “ahnsoun koasoi”, pwe tohnpadahk kapw kan sohte pahn luwetkihla uhwong wet. “Ira [Pohl oh Parnapas] eimah padapadahngki duwen Kauno,” oh e ketin kasalehda me ara padahngki duwen sapwellime kalahngan me mehlel oh pwung ni eh ketikihong ira manaman en wia manaman kapwuriamwei kei. Met imwikihla aramas akan nan kahnimwo ahpw pwalpeseng, “ekei iangala mehn Suhs ako, a ekei iangala wahnpoaron ako.”​—Wiewia 14:⁠3, 4.

13. Ni ahnsou me kitail pahn tuhwong aramas akan me pahn lahlahwe kitail, ahnsou dah me e pahn konehng en “nennenla”?

¹³ Iaduwen kitail anahne mwekidki soangen lahlahwe pwukat? Met kin poahsoankihda irair akan. Ekei ahnsou, kitail anahne kapwaiada kaweid duwen “ahnsoun nennenla.” Keieu ni ahnsou me aramas akan kin nantiong uhwong kitail oh song en akamaiong kitail. Kitail anahne tamanda me ekei aramas sohte men ese padahk mehlelo. (2 Deselonika 2:9-12) Sohte katepe ma kitail pahn nantiong song en sewese irail akan me mongiongarail kan kin poadidiongehr padahk sapwung. Ahpw laudsang met, ma kitail pahn isaneki ahnsou laud en akamaiong aramas koaros me kin karaunih kitail, kitail sohte pahn ahneki ahnsou laud en sewese aramas akan me men sukuhliki duwen padahk mehlel en Paipel. Eri, ni ahnsou me kitail kin tuhwong aramas akan me kin karaunih kitail, kitail pahn peikiong kaweid me kohsang Koht: “Kaleke kumwail sang irail.”​—Rom 16:17, 18; Madiu 7:6.

14. Ni ahl dah kei kitail kak utungada atail pwoson mwohn mehteikan?

¹⁴ Met sohte kin wehwehki me kitail sohte kak utungada atail pwoson. Pwe, pil mie “ahnsoun koasoi.” Kitail kin nsenohki aramas mehlel akan me pil kin rong duwen lahlahwe pwukat. Kitail kin perenki en kawehwe ni sansal duwen atail pwoson ong mehteikan; ni mehlel kitail kin kasikasik soangen ahnsouwet. Piter ntingihdi: “Ahpw kumwail lemmwiki Krais nan kapehdomwail kan, oh wiahki amwail Kaun. Onopada ahnsou koaros pwe kumwail en kak sapeng mehmen me peki rehmwail kumwail en kawehwehiong koapworopwor me mi rehmwail.” (1 Piter 3:15) Ni ahnsou me aramas akan me kin mehlel oh kin idek rehmw duwen mehn kadehde kan ong atail padahk kan me kitail kin kesempwaliki oh duwen karaun likamw akan aramas akan kin wiaiong kitail, e wia atail pwukoah en utungada atail pwoson, oh kasalehda pasepeng kan me kohsang nan Paipel. Oh pil, atail mehn kahlemeng mwahu kan pahn kak wie kadehde mwahu ehu. Ni en aramas wehwe akan kin kilang me kitail kin song en kapwaiada sapwellimen Koht kosonned pwung kan, irail pahn kak kilang me lahlahwe pwukat me sohte mehlel.​—1 Piter 2:12-15.

Iaduwen Lahlahwe kan me kin Kapwareseli nan Wehi Pokon?

15. Ia ehu karasepen sounwia nuhs akan kin karaunlikamwe Sounkadehdehn Siohwa kan?

¹⁵ Ekei ahnsou, aramas akan kin doadoahngki pelien nuhs kan en lahlahwe Sounkadehdehn Siohwa kan. Karasepe ieu, nan August 1, 1997, ehu nuhspepa en Russia ntingihdi artikel ehu me likamw. Artikel wet dene me Sounkadehde kan kin padahkiong tohnmwomwohdiso kan en arail pelien lamalam en ‘soikala ahr pwoud lih kan, ohl kan, oh pahpa oh nohno kan ma irail sohte kin wehwehki oh iang ahr pwoson.’ Koaros me kin wehwehki Sounkadehdehn Siohwa kan kin ese me lahlahwe wet sohte mehlel. Paipel kin padahkiong Kristian akan en kasalehda limpoak oh wahu ong ahr tohn peneinei kan me sohte iang ahr pwoson, oh Sounkadehde kan kin nantiong song en kapwaiada kaweid wet. (1 Korint 7:12-16; 1 Piter 3:1-4) Ahpw, artikelo wiawihdahr oh aramas tohto me wadekehr. Iaduwen kitail kak utungada atail pwoson ni ahnsou me aramas kin lahlahwe kitail?

16, 17, oh pil koakon me oaralap koasoia “Kapwungala Karaun Likamw Ehu.” (a) Dahme The Watchtower koasoia duwen iaduwen kitail pahn sapeng aramas akan me kin lahlahwe kitail nan nuhs kan? (b) Pahn soahngen irair dah kei me Sounkadehdehn Siohwa kan pahn sapengla ripoht sapwung kan me pwarada nan nuhs?

¹⁶ Kitail en tamanda, mie “ahnsoun nennenla oh ahnsoun koasoi.” The Watchtower koasoiada ni ahl wet: “Atail pahn utungada padahk mehlel de atail pahn pohnsehsehla lahlahwe kan me pahn kohda nan nuhs, pahn poahsoanda pohn irair akan, pohn aramaso me tepida lahlahwe wet oh eh mehn akadei.” Ekei ahnsou e pahn mwahu en pohnsehsehla lahlahwe pwukat, pwe met sohte pahn kahrehong nuhs pwukat en laudla.

¹⁷ Ekei pak e pahn mwahu en “koasoi.” Sounwia nuhs men me likilik mwein sohte ale nuhs me pwung oh mehlel duwen Sounkadehdehn Siohwa kan oh ele mwein e pahn perenki rong duwen dahme me mehlel duwen kitail. (Kilang koakon “Kapwungala Karaun Likamw Ehu.”) Ma sounwia nuhs akan pahn wia nuhs me pahn kahrehong aramas akan en kailongki atail doadoahk en kalohk, irail akan me kin wiliandi rahn ohpis en Watch Tower Society ele mwein pahn utungada padahk mehlel.b Karasepe ehu, elder koahiek kan kak kawehwe ire mehlel kan nan prokram en TV. Pwe ma kitail sohte pahn pwarada nan prokram en TV, aramas pahn lemeleme me Sounkadehdehn Siohwa kan sohte kak sapengki ahr lahlahwe kan. Pein emen emen Sounkadehde kan kin ni loalokong peikiong kaweid me kin pid duwen ire pwukat oh kohsang rehn Watch Tower Society oh irail me kin apwalih kitail nin duwen met.​—Ipru 13:17.

Utungada Rongamwahu Ni Ahr Doadoahngki Kosonned en Sahpw akan

18. (a) Dahme kahrehda kitail sohte anahne mweimwei sang rehn koperment kan pwehn kalohk? (b) Dahme kitail pahn wia ni ahnsou me aramas akan irehdi kitail sang kalohk?

¹⁸ Koht kin kamanala atail pwung en iang doadoahk en kalohki Wehin Koht. Sises, me padahkihong kitail en wia doadoahk wet, alehdi ‘manaman koaros en nanleng oh sampah.’ (Madiu 28:18-20; Pilipai 2:9-11) Eri, kitail sohte anahne ale mweimwei en kalohk sang rehn koperment kan en aramas. Ahpw, kitail kin pohnese me saledek en pelien lamalam pahn kamengeila kitail en kaparaseli mahsen en Wehio. Nan sahpw akan me kitail ahneki saledek en wia atail kaudok, kitail pahn doadoahngki kosonned en sahpw pwehn perehla atail saledek. Ahpw nan sahpw akan me sohte mie atail saledek, kitail pahn nantiong song en alehdi saledek wet, ahpw ni ahnsouwohte kapwaiada kosonned en sahpw. Atail mehn akedei iei met, kaidehn kawukihla koperment kan, ahpw “uhki rongamwahu oh katengehdi pwehn kehlail.”​—Pilipai 1:7.

19. (a) Dahme pahn kak imwikihla atail pahn ‘kihong Koht mehkan me sapwellimen Koht’? (b) Ia atail mehn akadei?

¹⁹ Nin duwen Sounkadehdehn Siohwa kan, kitail kin pohnese me Siohwa iei Kaunen Lahng oh Sampah. Sapwellime kosonned me ilele. Kitail kin nantiong en peikiong koperment en aramas, ‘kihong Sihsar mehkan me en Sihsar.’ Ahpw kitail sohte pahn mweidohng mehkot en kerempwa atail pwukoah kesempwal​—⁠kihong ‘Koht mehkan me sapwellimen Koht.’ (Madiu 22:21) Kitail wehwehki me atail pahn wia met pahn kahrehong wehi kan en “kailongki kitail”, ahpw kitail pahn lelohng met pwehki met iei kisehn pweinen wiahla tohnpadahk men. Rekohd en Sounkadehdehn Siohwa kan nan senturi 20 kin wia mehn kadehde mwahu me kitail kin utungada atail pwosono nin duwen kosonned kan. Ki sawas sang Siohwa, kitail pahn wonoweite “ni padahk oh kawehwe Rongamwahu.”​—Wiewia 5:42.

[Nting tikitik kan me mi pah]

Komw kin Tamanda?

◻ Dahme karehda aramas akan kin “kailongki” Sounkadehdehn Siohwa kan”?

◻ Iaduwen kitail pahn kilangwong irail akan me sohte kin iang atail pelien lamalam?

◻ Mehn kahlemeng mwahu dahieu me Sises wia ni ahnsou me e kin lellong aramas akan me kin lahlahwe ih?

◻ Ni ahnsou me aramas akan kin lahlahwe kitail, iaduwen kitail kak kapwaiada kaweid wet: “ahnsoun nennenla oh ahnsoun koasoi”?

[Koakon nan pali 28]

Kapwungala Karaun Likamw Ehu

“Nan Yacuiba, Bolivia, pwihn en evangelical (pelien lamalam ehu) koasonehdi rehn wasahn TV en kasalehda ehu kasdo me wiawihda sang rehn aramas akan me lahlahwe pwoson mehlel. Pwehki prokram wet kak imwikihla suwed, elder kan pilahn en kohla ni wasahn TV riau oh pwainla irail pwe ren kak kasalehda video pwukat Jehovah’s Witnesses​—The Organization Behind the Name oh The Bible​—A Book of Fact and Prophecy. Mwurin e kilang video ko, ohlo me kin apwalih ehu radio station me lingeringerkihda karaun likamw akan me prokram me irail akan me kin lahlahwe pwoson mehlel wiahda. Oh e uhd kihong Sounkadehde kan ahnsoun wia ahr pakair nan radio (ni sohte isepe) duwen kapokon en district me pahn wiawi. Irail me iang tohwehda kapokono me inenen tohto, oh aramas tohto me kin mehlel tepida wia peidek mehlel kan ni ahnsou me Sounkadehde kan kin pwerek irail.”​—1997 Yearbook of Jehovah’s Witnesses, pali 61-2.

[Kilel nan pali 29]

Ekei pak, Sises kin ni eimah sapengla karaun likamw akan