Ia Kahrepen Omw Peren?
1. Ia kahrepen atail peren ni imwin ehuehu sounpwong?
1 Ni imwin ehuehu sounpwong eh lelehr oh koaros anahne kapidelong ripoht en kalohk, ia pahn kahrepen omw peren? (Kal. 6:4) Sohte lipilipil ma kitail pioneer tohrohr kei me wiahda awahn kalohk 130 de wia sounkalohk me mweimweiong en wiahdahte minit 15, kitail koaros kak perenkihda atail kak papah Siohwa ni uwen atail kak koaros.—Mel. 100:2.
2. Ia kahrepen atail kin wia uwen atail kak nan sapwellimen Siohwa doadoahk?
2 Nin duwen Kaunepen Lahng oh Sampah, Siohwa ketin warohng kitail en patohwanohng ih me keieu mwahu. (Mal. 1:6) Pwehki atail poakohng ih, kitail inoukidahr atail mour pwehn wia kupwure. Ihme kahrehda ni imwin ehuehu rahn de sounpwong, ma kitail kamehlele me kitail kihda “me keieu mwahu” en atail ahnsou, koahiek oh kehl nan sapwellimen Siohwa doadoahk, eri mie kahrepen atail peren. (Lep. Pad. 3:9) Ahpw ma kadeikpen loalatail padahkihong kitail me kitail kak wia mwahusang de laudsang, eri kitail en medewe dahme kitail kak wia pwehn kamwahwihala.—Rom 2:15.
3. Dahme kahrehda e soaloalokong en kapahrekiong kitail meteikan?
3 Ken Dehr “Kapahrekiong en Meteikan”: E soaloalokong en kapahrekiong kitail meteikan de kapahrekiong kitail ni ahnsou me kitail rosorosonte. Atail irair kan wekpeseng. Atail koahiek kan pil kin wekpeseng. Atail kapahrekiong kitail meteikan de pein kitail kin kalapw kahrehda siaipene de ahneki pepehm me ke sohte katepe. (Kal. 5:26; 6:4) Sises sohte kin ketin kapahrekihpene meteikan. Ahpw e kin ketin kapinga emenemen nin duwen dahme e kak wiahda.—Mark 14:6-9.
4. Mehn kasukuhl kesempwal dah kan kitail kak sukuhlki sang sapwellimen Sises karasaraso?
4 Nan sapwellimen Sises karasaras en papah silimeno, emenemen tohndoadoahk alehdi uwen mwohni “nin duwen eh koahiek.” (Mad. 25:15) Ni ahnsou me soumaso eh pwurodo oh men ese dahme re wiahda, irail me kin pwerisek doadoahk nin duwen ar koahiek oh irair, alehdi kaping oh iang nsenamwahuki ahn soumaso peren. (Mad. 25:21, 23) Eri ma kitail pil kin soupisengki doadoahk en kalohki Wehio, kitail kak kamehlele me Koht pahn ketin kupwurkin kitail oh mie kahrepen atail pereperen!