Perenki Wahn Atail Doadoahk Laud
1. Dahme pahn kak katikala atail ngoang en kalohk?
1 Aramas kapikipikda pwehn “pereperenki wahn eh doadoahk.” (Ekl. 2:24) Ahpw ni atail sohte kin kilang imwila mwahu en atail kalohk, pepehm en mworusala kak kahrehda kitail en sohla peren oh katikala atail ngoang. Dahme kak sewese kitail en kolokol madamadau pwung?
2. Dahme kahrehda kitail en ahneki madamadau pwung ong ahn aramas ar mwekidki atail kalohk?
2 Ahneki Madamadau Pwung kan: Kitail en tamataman me mendahki me malaulau me mwekidki sapwellimen Sises padahk kan, sapwellime doadoahk en kalohk uhdahn pweida. (Sohn 17:4) Nan sapwellime karasaras en sounkamwarako, Sises ketin kohpada me pali laud en mohngiong kan sohte pahn mwekidki rong en Wehio me rasehng werentuhke. (Mad. 13:3-8, 18-22) Ahpw atail doadoahk laud kin wiahda soahng tohto.
3. Ia duwen atail pahn “kin wa” mendahki aramas sohte mwekidki atail kalohk?
3 Mwomwen Atail Kapwarehda Wa Tohto: Me pid sapwellimen Sises karasaraso, irail me pwungki rongamwahu en Wehio iei me pahn “kin wa.” (Mad. 13:23) Mwurin paliweren wihd kan ar kin wosada oh keirda, re sohte kin wiahda pil ehu paliweren wihd tikitik kan ahpw re kin wiahda werentuhke kapw kan. Eri wahn en Kristian doadoahk mwahu sohte kin wehwehki tohnpadahk kapw kan, ahpw e wehwehki ar kin pwurepwurehng kamwarak werentuhke tohto me iei atail doadoahk en lohkiseli Wehio. Met kin imwikihla atail “pereperenki” wahn atail doadoahk mendahki ma aramas rong de soh. Kitail kin sewese kasarawihla mwaren Siohwa. (Ais. 43:10-12; Mad. 6:9) Kitail kin perenki pwais kaselel en iang Koht nan sapwellime doadoahk. (1 Kor. 3:9) Oh soangen wa de “meirong en kaping” wet kin kaperenda Siohwa.—Ipru 13:15, 16.
4. Dahme atail doadoahk en kalohk kak imwikihla mendahki atail sehse?
4 Patehng met, atail doadoahk laud ele kin imwikihla soahng kan me kitail sohte kilang. Mwein kakete ekei me rong sapwellimen Sises padahk sohte wiahla sapwellime tohnpadahk kan lao lel mwurin eh ketin kaimwisekala sapwellime doadoahk nin sampah. Pil duwehte, weren Wehio me kitail kin kamwarak ele sohte tepida keirada nan mohngiong en emen lao mwuhr. Mwein e pahn iangala padahk mehlel nan atail sehse. Atail doadoahk en kalohk kin uhdahn kapwaiada doadoahk mwahu tohto. Ihme kahrehda, kitail en kin “kapwarehda wa tohto” oh kadehdehda me kitail sapwellimen Sises tohnpadahk kan.—Sohn 15:8.