“Kumwail En Kaukaule Kapwarehda Wa Tohto”
“Kumwail [kaukaule] kapwarehda wa tohto oh ih duwen amwail pahn wiahla nei tohnpadahk.”—Sohn 15:8.
1. (a) Anahn dahieu emen anahne wia ma e men wiahla tohnpadahk men en Sises, nin duwen me Sises mahsen ong sapwellime wahnpoaron kan? (b) Mehnia peidek kitail anahne pein idek rehtail?
PWONGO mwohn e pahn matala, Sises isaneki ahnsou laud en kangoange sapwellime wahnpoaron kan ni e kin wia koasoi kan me kin lel mongiongirail kan. Ahnsouwo, e dauliher lukepen pwong, ahpw pwehki Sises kin poakong kompoakepah keren kan, e pousehla mahsen ong irail. Oh ni ahnsou me e mahsen ong irail, e katamankin irail duwen pil ehu mehkot me irail anahne wia pwehn wiahla sapwellime tohnpadahk mehlel kan. E mahsanih: “Iet duwen lingaling en Sahmo eh pahn sansalada, ma kumwail pahn kapwarehda wa tohto, oh ih duwen amwail pahn wiahla nei tohnpadahk.” (Sohn 15:8) Nan rahnwet, kitail pil kin kapwaiada anahn wet pwehn wiahla sapwellimen Sises tohnpadahk? Ia wehwehn “kapwarehda wa tohto”? Pwehn ese pasapengpen peidek wet, kitail pahn koasoiapene dahme wiawi ni pwongo.
2. Karasaras dahieu me pid wa me Sises kasalehda ni soutik mwohn e pahn pwoula?
2 Kaweid me kohwong irail en kapwarehda wa iei kisehn karasaras me Sises padahkiong sapwellime wahnpoaron akan. E mahsanih: “Ngehi me tuhkehn wain mehlel, a Semeio soumwet men. Rah koaros me wosasang ie ahpw sohte wa, Semeio kin ketikihsang. E kin koakoahk rah koaros me kin kapwarehda wa, pwe re en pil wa tohtohla. Kumwail mwakelekelkidahr mahsen kan me I padahkihongkumwailehr. Kumwail poadohng ie, oh I pil pahn poadohng kumwail. Ma kumwail sohte poadohng ie, kumwail sohte kak wa, duwehte rahntuhke pwoat pil sohte kak wa, ma e sohte poadohng ni kahlap en tuhkeo. Ngehi me tuhkehn waino, oh rah kan kumwail. . . . Iet duwen lingaling en Sahmo eh pahn sansalada, ma kumwail pahn kapwarehda wa tohto, oh ih duwen amwail pahn wiahla nei tohnpadahk. I poakohng kumwail, duwehte Sahmo eh ketin loalloale ie; kumwail eri poadidiong ei limpoak. Ma kumwail pahn kapwaiada ei kosonned akan, kumwail pahn poadidiong ei limpoak, duwehte ei kin kapwaiada mahsen en Semei, oh kin poadidiong sapwellime limpoak.”—Sohn 15:1-10.
3. Dahme sapwellimen Sises tohnpadahk kan anahne wia pwen kapwarehda wa?
3 Nan karasaras wet, Siohwa iei Soumwet men, Sises me tuhkehn wain, oh rah kan iei irail wahnpoaron kan me Sises mahsen ong. Ma wahnpoaron kan kin pousehlahte en “poadidiong” Sises, irail pahn wa mwahu. Sises uhd kawehwehda iaduwen irail wahnpoaron akan pahn kak pweida en kolokolehte arail kin miniminiong ih: “Pwe ma kumwail pahn kapwaiada ai kosonned akan, eri, amwail mour pahn miniminiong sapwellimeo ahnsou koaros.” Mwuhr, wahnpoaron Sohn pil nting ong ienge Kristian akan mahsen pwukat: “Mehmen me peikiong sapwellimen [Krais] kosonned kan kin mihmi rehn Koht.”a (1 Sohn 2:24; 3:24) Ihme kahrehda, ma sapwellimen Sises tohnpadahk kan pahn peikiong sapwellimen Krais kosonned akan, irail pahn kak miniminiong Krais ahnsou koaros, oh minimin wet kin uhd sewese irail en wa mwahu. Dahme kin wia kilelepen wa kan me kitail anahne kapwarehda?
Ahnsoun Kekeirada
4. Dahme kitail kak sukuhliki ni ahnsou me Siohwa kin ketin “ketikihsang” rah koaros me sohte kapwarehda wah?
4 Nan karasaras en tuhkehn wain mehlel, Siohwa kin “ketikihsang,” de lopukasang, rah koaros me sohte kapwarehda wa. Dahme met kin padahkiong kitail? E sohte ihte kasalehong kitail me tohnpadahk kan anahne kapwarehda wa, ahpw e pil kasalehda me irail koaros kak wia met—sohte lipilipil soangen irair dah me re mih loale de soangen soh koahiek dah kan me re ahneki. Ni mehlel, e pahn uhwong sapwellimen Siohwa elen limpoak en ‘kihsang,’ de kasapwilidi, emen sapwellimen Krais tohnpadahk pwehki e sohte kak wiahda mehkot me daulih dahme e kakong.—Melkahka 103:14; Kolose 3:23; 1 Sohn 5:3.
5. (a) Iaduwen sapwellimen Sises karasaras kin sewese kitail kapwarehda wa tohto? (b) Soangen wa riau dah kei kitail pahn sukuhliki?
5 Karasaras en tuhken wain mehlel me Sises ketikihda kin pil kasansalehda me kitail anahne ni uwen me pein kitail kak en rapahki ahl akan en kalaudehla atail doadoahk nin duwen tohnpadahk kan. Tehk duwen dahme Sises mahsanih duwen ire wet: “Rah koaros me wosasang ie ahpw sohte wa, Semeio kin ketikihsang. E kin koahkoa rah koaros me kin kapwarehda wa, pwe re en pil wa tohtohla.” (Sohn 15:2) Ni imwin karasaraso, Sises kangoange sapwellime tohnpadahk kan en “kapwarehda wa tohto.” (Iretikitik 8) Ia wehwehn mahsen pwukat? Eri, nin duwen tohnpadahk kan, kitail en dehr ahneki madamadau en soukautih. (Kaudiahl 3:14, 15, 19) Ahpw, kitail anahne rapahki ahl akan me kitail kak pein kapwarehda wa tohto. Soangen wah dah kei kitail anahne nantiong kapwarehda wa tohto? Mie soahng riau (1) “wahn ngehno” oh (2) wahn Wehio.—Kalesia 5:22, 23; Madiu 24:14.
Wahn Irairen Kristian akan
6. Iaduwen Sises Krais kasansalehda duwen uwen kesempwal keieun wahn ngehno me ntingihdier?
6 Me tepin ntingihdi mahs nin duwen irekdien “wahn ngehn akan” iei limpoak. Sapwellimen Koht ngehn sarawi kin kapwarehda limpoak rehn Kristian akan, pwe irail kin peikiong kaweid me Sises kihda mwohnte e mahsanih duwen karasaras en tuhkehn wain me kin wa mwahu. E padahkiong sapwellime wahnpoaron kan: “I pahn kihong kumwail kosonned kapw ehu: kumwail en poakpene nanpwungamwail.” (Sohn 13:34) Ni mehlel, ni kaimwiseklahn pwong en eh mour nin sampah, pak tohto Sises katamankin sapwellime wahnpoaron akan duwen kesempwalpen irail en kasalehda limpoak.—Sohn 14:15, 21, 23, 24; 15:12, 13, 17.
7. Iaduwen wahnpoaron Piter kin kasalehda me kapwarehda wa kin pid atail kin kasalehda irair en Krais akan?
7 Ni pwongo, Piter me iang irail oh e pil kin wehwehki me limpoak duwehte me Krais kin kasansalehda oh iangahki irair teikan iei irair akan me tohnpadahk mehlel akan en Krais kin anahne kapwarehda. Sounpar tohto mwuri, Piter kangoange Kristian akan en kapwarehda soangen irair akan duwehte ese kaunda paliwararail oh poakohng riarail kan. E pil kasalehda me: ma kitail pahn wia met, e pahn sewese kitail “wah mwahu oh pweida.” (2 Piter 1:5-8, NW) Sohte lipilipil soangen irair dah me kitail mihmi loale, kitail koaros kak kasalehda wahn ngehn akan. Eri, kitail en wia uwen atail kak koaros en kasalehda limpoak, kadek, opampap, oh irair teikan me Krais kin ketin kasalehda, pwe “sohte kosonned ehu me kin uhwong mepwukat.” (Kalesia 5:23) Eri, kitail en “kapwarehda wa tohto.”
Kapwarehda Wahn Wehio
8. (a) Iaduwen karasepene en wahn ngehno oh wahn Wehio? (b) Peidek dahieu me kesempwal kitail en medemedewe?
8 Wah lingan oh mas iou kin kalinganahda tuhke ieu. Ahpw, kesempwalpen wah pwukat kin laudsang ihte en wia mehkot lingan. Wah kan kin wia mehkan me kesempwal en kaparala tuhkeo sang ni were kan. Duwehte wahn ngehn akan, e kin pil wia laudsang kalinganahda atail irairen Kristian akan. Irair akan me duwehte limpoak oh pwoson pil kin kamwekid kitail en kamwarekiseli Rongamwahu en Wehio me dierekda nan Mahsen en Koht. Tehk ni ahl dahieu me wahnpoaron Pohl kin karasepe wah riau pwukat. E mahsanih: “Kitail pwoson [kisehn wahn ngehn akan] oh ihme kitail lokaiahki.” (2 Korint 4:13, NW) Ni ahl wet, Pohl kin doula kawehwehda me kitail “poaden wiahiong Koht atail tungoal meirong en kaping, iei wahn atail lokaia kan”—keriaun wa me kitail anahne en kasalehda. (Ipru 13:15) Mie ahnsou kan nan atail mour me kitail pahn kak kalaudehla atail kin kapwarehda wa, ei en “kapwarehda wa tohto,” nin duwen sounkalohk kan en Wehin Koht?
9. Kapwarehda wa kin wehwehki katohnpadahk? Kawehwehda.
9 Mwohn kitail kak sapeng peidek wet ni pwung, kitail anahne wehwehki duwen wehwehn wahn Wehio. E pahn konehng kitail en kamehlele me kapwarehda wa kin wehwehki katohnpadahk? (Madiu 28:19) Iaduwen, wa me kitail kin kapwarehda kin dokedoke irail ako me kitail kin sewese pwehn wiahla tohnkaudok en Siohwa me papidaislahr? Soh. Pwe ma ih duwen, met pahn kansensuwed ong irail Sounkadehde lelepek kan me kin kalohkiseli Rongamwahu en Wehio ni erein sounpar tohto nan sahpw me aramas malaulau kin perenki rong. Eri, ma wahn Wehio kin ihte wehwehki irail aramas akan me kin wiahla tohnpadahk kapw kan, irail Sounkadehde kan me kin doadoahk laud pahn rasehng rahn tuhke kan me sohte kak wa nan karasaras en Sises! Ni mehlel, met kaidehn wehwehn karasaras wet. Eri, ia wahn Wehio keieu kesempwal me kin pid atail doadoahk en kalohk?
Wa Tohto Sang ni Kamwarekihseli en Weren Wehio
10. Ia wehwehn sapwellimen Sises karasaras duwen sounkamwarek werentuhke oh soangsoangen pwehl akan kin kasalehda soangen wa dah kan oh dahme e sohte kin pid ong?
10 Sapwellimen Sises karasaras duwen sounkamwarak werentuhke oh soangsoangen pwehl kan kin kihda pasapeng ong peideko—pasapengpe kin wia kangoang laud ieu ong irail akan me kin kalohk nan sahpw akan me aramas malaulau kin pedolong nan padahk mehlel. Sises mahsanih me kisin werentuhke kei iei Rongamwahu en Wehio me mih nan Mahsen en Koht oh pwehlo kin karasaiong mohngiong ni pali ngehn en aramas akan. Ekei kisin werentuhke kei “mweredi ong nan pwelmwahu, re ahpw keirda oh wa.” (Luk 8:8) Mehnia wa? Eri, ni ahnsou paliwaren wihd kan kin wosada oh mahla e sohte kin wiahda pil paliweren wihd tikitik kan ahpw e kin wiahda war akan. Kristian akan kin wiahda mehkan me rasehng wa, e sohte kesempwal met en wehwehki tohnpadahk kapw akan, ahpw e kin wehwehki war kapw kan en Wehio.
11. Ia wehwehn wahn Wehio?
11 Ihme kahrehda, nan karasaras wet, wah sohte kin wehwehki katohnpadahk de irair mwahu en Kristian akan. Kisin weren tuhke me kin mweredi ong nan pwehlo iei mahsen en Wehio, wah wet kin wehwehki atail kin padahkiong meteikan duwen Wehio. (Madiu 24:14) Kitail pahn kak kapwarehda wahn Wehio—sang ni atail pahn kalohkiseli Rongamwahu en Wehio—sohte lipilipil soangen irair dah kan me kitail kin mih loale? Ei, uhdahn! Nan karasaraso, Sises kawehwehda kahrepen kitail pahn kak wia met.
Wia Uwen Me Kitail Kak ong Kalinganahda Koht
12. Kristian akan koaros kak kapwarehda wahn Wehio? Kawehwehda.
12 Sises mahsanih, “A me pwupwudiong nan pwelmwahuwo, . . . e ahpw kin wa rehrail, rehn ekei uwen tohtohn wa epwiki, a rehn ekei weneisek, a rehn ekei silihsek.” (Madiu 13:23) Kisin werentuhke kan me pwupwudiong nan mwetuwel ieu kin wekpeseng arail kin wa, pwehki irairen pwehl me wekpeseng. Dahme kitail kak wia ni atail kin kalohkiseli Rongamwahu kin wekpeseng pwehki atail irair akan kin wekpeseng, oh Sises kasalehda me e kin pohnese met. Ekei aramas mwein kin ahneki ahnsou laud sang meteikan; oh ekei kin ahneki roson mwahu oh kehlail sang ekei. Eri, dahme kitail kak wia mwein pahn tikitik sang dahme aramas teikan kin wia, ahpw Siohwa kin kupwurperenki kilang emenemen kitail en wia uwen atail kak koaros. (Kalesia 6:4) Edetehn kitail kin mahla de soumwahu laud kin kahrehong kitail en sohte iang doadoahk en kalohk ahnsou koaros, Samatail, Siohwa me limpoak, oh e kin kilangwong kitail nin duwen aramas akan me kin “kapwarehda wa tohto.” Dahme kahrehda? Pwehki kitail kin kihong Ih ‘uwen me kitail kak’—atail mour unsek ong sapwellime doadoahko.b—Mark 12:43, 44; Luk 10:27.
13. (a) Ong kitail, ia kahrepe me keieu kesempwal kitail en “pousehla” oh kapwarehda wahn Wehio? (b) Dahme pahn sewese kitail en kapwarehda wa mendahki kitail kin kalohk nan wasahn kalohk kan me aramas tohto sohte kin perenki rong? (Kilang koakon ni pali 19.)
13 Eri, kitail en wia uwen me kitail kak en kapwarehda wahn Wehio, kitail pahn ale kangoang en “pousehla oh kaparahda wa tohto” ni ahnsou me kitail kin tamanda duwen kahrepen kitail kin wia doadoahk wet. (Sohn 15:16) Sises kihda keieu kahrepen kitail kin wia doadoahk wet: “Lingaling en Sahmo eh pahn sansalada, ma kumwail pahn kapwarehda wa tohto.” (Sohn 15:8) Ei, atail doadoahk en kalohk kin kawauwih mwaren Siohwa mwohn aramas koaros. (Melkahka 109:30) Sounkadehde lih lelepek emen me ede Honor, mahki mpen sounpar 65, koasoia: “I kin tamatamante me e kin wia pwais kaselel en wiliandi Wasa Lapalahpie ni atail kin kalohk nan wasahn kalohk kan, edetehn aramas akan sohte kin perenki rong.” Claudio, me wia Sounkadehde ngoang men sangete pahr 1974, sapeng peidek me kohwong ih duwen dahme kahrehda e kin nantihong kalohk nan wasahn kalohk ieu me aramas malaulau kin perenki rong, oh e koasoia duwen pwuhken Sohn 4:34, me Sises mahsanih: “Ei kapwaiada kupwuren Ih me ketin poaroneiehdo, oh wiahda sapwellime doadoahk, iei me ei tungoal.” Claudio kapataiong met, koasoia: “Duwehte Sises, I sohte men ihte tepida wia doadoahk wet, ahpw I men kanekehla ai doadoahk nin duwen sounkalohk en Wehio.” (Sohn 17:4) Sounkadehdehn Siohwa kan nin sampah pwon kin ahneki madamadau wet.—Kilang koakon “Iaduwen ‘Kitail kak Wa Mwahu ni Kanengamah,’ ” pali 19.
Kalohk oh Padahk
14. (a) Doadoahk me Sohn Sounpapidais oh Sises wia kin pid duwen kahrepe riau dah kei? (b) Iaduwen ke pahn kawehwehda doadoahk en Kristian me kin wiawi rahnwet?
14 Sohn Sounpapidais me wia tepin sounkalohk en Wehio me ntingdier nan Rongamwahu kan. (Madiu 3:1, 2; Luk 3:18) E kin kesempwaliki eh pwukoa en “wia kadehdepen maraino,” oh e kin wia met ki pwoson laud oh koapworopwor “pwe aramas koaros en rong Mahseno oh pwosonla.” (Sohn 1:6, 7) Ekei aramas me Sohn kalohk ong wiahla sapwellimen Krais tohnpadahk kan. (Sohn 1:35-37) Ihme kahrehda, Sohn wiahla emen sounkalohk oh emen me kin katohnpadahk. Sises pil wiahla emen sounkalohk oh sounpadahk. (Madiu 4:23; 11:1) Kahrehda, e sohte wia mehkot kapwuriamwei ni ahnsou me Sises kehkehlikiong sapwellime kan en kaidehn ihte kalohki Rongamwahu en Wehio ahpw pil sewese aramas akan en kamehlele oh wiahla sapwellime tohnpadahk kan. (Madiu 28:19, 20) Rahnwet, atail doadoahk kin pid atail kin kalohk ong aramas teikan oh pil padahk ong irail.
15. Soangen pahrekpene dah me mie me pid ong irail akan me kin mwekidki kalohk nan keieun senturi C.E. oh irail akan me kin mwekidki padahk nan atail ahnsou?
15 Irail aramas akan nan keieun senturi C.E. me rong ahn Pohl kalohk oh padahk kan, a “ekei irail kamehlele eh koasoi kan, a ekei sohte kamehlele.” (Wiewia 28:24) Aramas akan kin duwehte nan rahnpwukat. Ahpw, e kansensuwed pwe pali laud en “kisin weren tuhken en Wehio” kin pwupwudiong nan pwehl me wehwehki me aramas sohte kin perenki rong. Ahpw, ekei weren tuhke kan kin pwupwudiong nan pwehlmwahu, oh kadarawei kalowe kan, oh wosada nin duwen me Sises kohpadahr. Ni mehlel, nin sampah pwon, mpen aramas 5,000 kin wiahla sapwellimen Krais tohnpadahk mehlel kan ehu ehu wihk nan sounpar ehu! Tohnpadahk kapw pwukat kin “kamehlele dahme irail sukuhliki,” edetehn aramas teikan sohte kin kamehlele. Dahme sewese irail en perenki rong Rongamwahu en Wehio? Pak tohto, aramas pwukat kin mwekidki nsenoh me Sounkadehde kan kin kasalehda—me rasehng kalamwurih weren tuhke kapw kan—met kin kahrehda e kin pweida mwahu. (1 Korint 3:6) Mie ekspiriens tohto me kasalehda met, ahpw kitail pahn koasoiapene duwen ekspiriens riau.
Nsenohki Aramas akan kin Imwila Mwahu
16, 17. Dahme kahrehda e kesempwal en kasalehda me kitail kin nsenohki aramas akan me kitail kin tuhwong nan atail doadoahk en kalohk?
16 Karolien, Sounkadehde pwulopwul emen me mih nan Belgium, koasoiong emen lih mah me sohte kin perenki rong duwen Rongamwahu en Wehio. Pwehki pehn liho kidikidki likou, Karolien oh ienge idek rehn liho ma e anahne sawas, ahpw liho sohte men ale sawas. Rahn riau mwuri, Sounkadehde riemen pwukat pwurala rehn liho oh idek reh duwen ire. Karolien koasoia, “Aht wia met imwila mwahu. Liho pwuriamweikihla me se nsenohki ih. E luhke kiht en pedolong nan imweo, oh se tepida onop Paipel reh.”
17 Sandi, emen Sounkadehde nan United States, pil kasalehda me e kin nsenohki aramas akan me e kin kalohk ong. E kin wadek nan nuhspepa duwen pakair kan me kasalehda ipwidien seri oh mwurin mwo, e kin mwemweitala rehn pahpa oh nohno kapw pwukat oh kihong irail neirail pwuhken Nei Pwuhk en Poadoapoad kan en Paipel.c Pwehki nohno kapw akan kin kalap mihmi nan ihmw pwehn apwalih neirail seri pwelel oh irail kin perenki kasalehong aramas me kin mwemweitla rehrail neirail seri pwelel, pali laud en ahnsou e mengei en koasoi ong irail nohno pwukat. Sandi kawehwehda: “I kin koasoiong pahpa oh nohno kan duwen kesempwalpen pahpa oh nohno kan en karanih neirail seri pwelel ki arail wadek ong irail. Mwurin met, I kin koasoiong irail duwen kahpwal akan en kekeirada seri kan nan sampah en rahnpwukat.” Imwilahn met: emen nohno oh nah seri wenemen ahpwtehn tepida papah Siohwa. Pein medewehda oh nsenohki meteikan pahn kak imwikihla soangen ekspiriens kaperen kan duwehte met nan atail doadoahk en kalohk.
18. (a) Dahme kahrehda kitail koaros kak kapwaiada anahn ieu en ‘kapwarehda wah?’ (b) Anahn siluh dah kei en wiahla tohnpadahk kan kin mih nan Rongamwahu en Sohn me pein kitail kin nantihong en men kapwaiada?
18 E kin kangoange kitail laud en wehwehkihla me koaros kak kapwaiada anahn en “kaukaule kapwarehda wa!” Sohte lipilipil, ma kitail pwulopwul de mah, roson de soumwahu, kalohk nan wasahn kalohk me aramas tohto kin perenki rong de kalohk nan wasahn kalohk me aramas tohto sohte kin perenki rong, kitail koaros kak kapwarehda wa tohto. Iaduwen kitail kak wia met? Sang ni atail kin kalaudehla atail kin kapwaiada wahn ngehn akan oh wia uwen atail kak en kalohkiseli Rongamwahu en Wehin Koht. Ni ahnsowohte, kitail anahne nantihong en ‘kapwaiada sapwellimen Sises mahsen’ oh ‘limpoakpene.’ Ei, ma kitail pahn kapwaiada anahn siluh pwukat en wiahla tohnpadahk kan nin duwen me kileledi nan Rongamwahu en Sohn, kitail kin kasalehda me “kitail sapwellimen [Krais] tohnpadahk kan.”—Sohn 8:31; 13:35.
[Nting tikitik me mi pahs]
a Edetehn rah kan nan karasaras kin karasaiong sapwellimen Sises wahnpoaron akan oh Kristian teikan me pahn sohsohki arail pwais nan sapwellimen Koht Wehi nanleng, karasaras wet kin audaudkihda padahk mehlel kan me sapwellimen Krais tohnpadahk koaros pahn kak paiekihda sang.—Sohn 3:16; 10:16.
b Aramas akan me sohte kak pedoi sang imwarail pwehki mahlahr de soumwahu mwein pahn kak kalohk ong aramas teikan ni arail pahn ntingihdi kisin likou kan, de ma kak, doadoahngki telepon, de irail kak ehukihong aramas akan me kin mwemweitla rehrail Rongamwahu en Wehin Koht.
c Wiawihda sang rehn Sounkadehdehn Siohwa kan.
Peidek kan ong Kohsapahl
• Soangen wah dah kitail anahne en kapwarehda wah tohtohla?
• Dahme kahrehda kitail koaros kak lel atail mehn akadei en “kapwarehda wa tohto?”
• Ia anahn siluh kesempwal en wiahla tohnpadahk men me koasoiada nan Rongamwahu en Sohn?
[Box/Picture on Page 19]
Iaduwen Kitail Kak “Wa Mwahu Ki Kanengamah”
DAHME kin sewese iuk en kaukaule lelepek kalohkiseli Rongamwahu en Wehio nan wasahn kalohk me aramas tohto sohte kin perenki rong? Iet ekei pasapeng en peidek wet me pahn kak kihong kitail sawas laud.
“En esehla me Sises kin sewese kitail kin kangoange ie en ahneki koapworopwor laud oh kanengamah, sohte lipilipil dahme aramas akan nan wasahn kalohk pahn nda.”—Harry, sounpar 72; papidaisla nan pahr 1946.
“Iren Paipel en 2 Korint 2:17 kin ahnsou koaros kihong ie mehn kangoang. E mahsanih me kitail kin iang wia doadoahk en kalohk ‘mwohn silangin Koht, duwen ladun Krais kei.’ Ni ahnsou me I kin iang doadoahk en kalohk, I kin perenki iang kompoakepai kan me keieu karanih ie.”—Claudio, sounpar 43; papidaisla nan pahr 1974.
“Ni mehlel, I kin apwaliki wia doadoahk en kalohk. Ahpw, I kin pein kilang mahsen kan en pwuhken Melkahka 18:29 pweida nan ai mour: ‘Ai Koht kin kakehleiehda pwe I en kak douda pohn kehl ieu.’ ”—Gerard, sounpar 79; papidaisla nan pahr 1955.
“Ma I kak wadek ong aramas emen iren Paipel ehu ni ahnsou me I kin iang kalohk, I kin perenki en ese me aramas menet mweidong Paipel en kasawih eh mohngiong.”—Eleanor, sounpahr 26; papidaisla nan pahr 1989.
“I kin nantihong doadoahngki soangsoangen tepin koasoi kan. Ni mehlel, mie tepin koasoi tohto kahrehda I sohte pahn kak doadoahngki koaros erein ai mour.”—Paul, sounpar 79; papidaisla nan pahr 1940.
“I sohte kin nsensuwed ni ahnsou me aramas akan sohte kin perenki rong. Ni kadek, I kin song en wia koasoi ong aramas akan oh rong kanahieng dahme irail kin nda.”—Daniel, sounpar 75; papidaisla 1946.
“I tuhwong aramas akan me kin ahpwtehn papidaisla oh irail ndaiong ie me ai doadoahk en kalohk pil sewese irail en iang wiahla Sounkadehde. Eri, mwurin mwo, I sehse ahpw irail tepida onop Paipel rehn emen Sounkadehde oh irail kekeirada ni pali ngehn. I kin peren ni ahi kin tamataman me atail doadoahk en kalohk kin wia doadoahk ieu me kitail koaros kin sawaspene.”—Joan, sounpar 66; papidaisla nan pahr 1954.
Dahme kin sewese iuk en “kapwarehda wa ni kanengamah”?—Luk 8:15.
[Kilels nan Pali 18]
Kitail kin wah tohto sang ni atail kin kasalehda wahn ngehn oh kalohki Rongamwahu en Wehio
[Kilel nan Pali 21]
Ia wehwehn mahsen en Sises ni ahnsou me e mahsanih ong sapwellime wahnpoaron akan met: “Kumwail kaukaule kapwarehda wa tohto”?