Kaukaule “Kapwarehda Wa Tohto”
1 Ni koasoi en karasaras, Sises karasahiong pein ih tuhkehn wain mehlel, Semeo me Soun kakairada, oh sapwellime me keidi kan me wia soun idawehn kan me wia rah pweida mwahu en tuhke. Ni kawehwehpen doadoahk en Soun kakairadaho, Sises kasalehdahr kesempwalpen en kehlail poadidiong ni kahlap en tuhke waino. (Sohn 15:1-4) Mehn kasukuhl wasaht iei me irail koaros me kin ahneki nanpwung mwahu rehn Siohwa en duwehte rahn “tuhkehn wain mehlel,” Sises Krais. Kitail en nantihong kapwarehda laud ire pwukat koaros, “wahn Ngehn” oh wahn doadoahk en kalohki wehio.—Kalesia 5:22, 23; Madiu 24:14; 28:19, 20.
2 Wahn Ngehn: Atail kekeirada ni pali ngehn kak keieu sansalda sang ia uwen mwahu en atail kin kasalehda wahn ngehn. Ke kin nantihong en kakairada wahn sapwellimen Koht ngehn sang omw kin kaukaule onop oh doudouloale sapwellimen Koht Mahsen? (Pilipai 1:9-11) Ke dehr pweiek en kapakapki ngehn sarawi, me kak kapwarehda irair en kalinganahda Siohwa oh me kak seweseiuk en pousehlahte kekeirada ni pali ngehn.—Luk 11:13; Sohn 13:35.
3 Sukuhliki wahn ngehn pil pahn sewese kitail en wia sounkalohk ngoang kei. Karasepe, limpoak oh pwoson me kamwakid kitail en wiahda ahnsou en iang kaukaule wia doadoahk en kalohk mendahki kedirepw kan. Irair kan me duwehte popohl, kanengamah, kadek, opampap, liksang me suwed kak sewese kitail en wiewia mwahu ong irail me uhwong kan. Peren kin kahrehiong kitail en diarada nsenamwahu nan doadoahk en kalohk mendahki aramas akan arail sohte kin mwekidki.
4 Wahn Doadoahk en Kalohk: Kitail pil men dolung wahn atail doadoahk en kalohk. Met kin pidada atail “meirong en kaping me iei wahn kilin awatail me kin pakairkiong wehipokon duwen mwaren [Siohwa].” (Ipru 13:15, NW) Kitail kin wia met ni ngoang oh karuwaru en kalokalohki duwen rongamwahuo. Ke kin song en kalaudehla wahn doadoahk en kalohk sang omw kin kamwahuwihala ahmw onop Paipel?
5 Sises kasansalehda me sapwellime tohnpadahk pwoson akan pahn dolung soangsoangen wah kan. (Madiu 13:23) Ihme kahrehda, kitail sohte pahn kapahrekiong kitail mehteikan ahpw kitail en kihong Siohwa uwen me kitail kak. (Kalesia 6:4) En ni mehlel kasawih pein atail irair kan ni atail doadoahngki sapwellimen Koht Mahsen pahn sewese kitail en pousehlahte kalinganahda Siohwa sang ni atail kin dolung wahn rahk laud.—Sohn 15:8.