Peidek Kan Sang Sounwadawad Kan
Ia duwe, “wahn sapwellimen Koht manaman” kin pidadahte irair kaselel kan me kileldi nan Kalesia 5:22, 23?
Iretikitik pwukat kilelehdi irair kaselel duwau ko: “Wahn sapwellimen Koht manaman iei limpoak, peren, popohl, kanengamah, kadek, kamwahu, pwoson, mpahi, kaunda pein emen.” Ahpw mepwukat kaidehn ihte irair kaselel kan me sapwellimen Koht manaman kak sewese kitail en kakairada.
Tehk dahme wahnpoaron Pohl ntingihedi nan iretikitik kan en mwoweo: “Wiewiahn uduk . . . iei tiahk samin me pid wia nsenen pwopwoud, samin, wia me suwed ni ngidingid, tiahk en pwongih dikedik, wunahni, kailok, pei, luwak, lingeringer, akamai, saminimin, wiahda palih kan, peirin, sakau daulihala, kamadipw mwoarongorong kan, oh soahng kan me duwehte mepwukat.” (Kal. 5:19-21) Eri Pohl kakete koasoia ekei soahng kan me pil wia “wiewiahn uduk,” duwehte me kileldi nan Kolose 3:5. Pil duwehte, mwurin eh kilelehdi irair duwau kaselel ko, e nda: “Sohte kosonned ehu me uhwong mepwukat.” Eri Pohl sohte songosong en kilelehdi irair mwahu ko koaros me kitail kak kakairada sang ni sawas en sapwellimen Koht manaman.
Kitail wehwehki met ni atail kapahrekihong wahn sapwellimen Koht manaman ong wahn marain me Pohl ntingkihlahng mwomwohdisohn Episos: “Pwe wahn marain iei soangen mwahu koaros oh pwung oh mehlel.” (Ep. 5:8, 9) Ei, “mwahu,” iangahki pwung oh mehlel, iei kisehn “wahn marain” ahpw e pil wia kisehn “wahn sapwellimen Koht manaman.”
Pil duwehte, Pohl kangoange Timoty en “rapahki irair en pwung, poadidiong Koht, pwoson, limpoak, dadaur, oh mpahi”—irair mwahu weneu. (1 Tim. 6:11) Irair siluh pwukat (pwoson, limpoak, mpahi) me iang kileldi nin duwen “wahn sapwellimen Koht manaman.” Eri Timoty uhdahn anahne sawas sang sapwellimen Koht manaman pwehn kakairada irair teikan, me iei irair en pwung, poadidiong Koht, oh dadaur.—Pil kilang Kolose 3:12; 2 Piter 1:5-7.
Ihme kahrehda, Kalesia 5:22, 23 sohte kilelehdi irair kaselel kan koaros me Kristian kan anahne kasalehda. Sapwellimen Koht manaman kak sewese kitail en kakairada irair duwau ko me kileldi nin duwen “wahn sapwellimen Koht manaman.” Ahpw mie irair teikan me kitail anahne kakairada pwehn wiahla Kristian koahiek kei oh “pwuhriong nan mour kapw me wiawihda nin duwen kupwuren Koht ni pwung mehlel oh loalopwoat mehlel.”—Ep. 4:24.