Ke Pahn “Weweidki Ngehno”?

“Kumwail weweidki Ngehno, oh dehr kin kapwaiada ahnepen aramas.”—KALESIA 5:16.

1. Iaduwen atail kak kihsang kapwunodpen wiahda dihp ong ngehno?

MIE ahl ehu me kitail kak kihsang atail pwunodki wiahda dihp ong sapwellimen Siohwa ngehn sarawi. Met sang ni atail pahn kin wia dahme wahnpoaron Pohl mahsanih: “Weweidki Ngehno oh dehr kin kapwaiada ahnepen aramas.” (Kalesia 5:16) Ma kitail pahn mweidohng sapwellimen Koht ngehn sarawi en kaweid kitail, kitail sohte pahn pwupwudiong ineng sapwung en war akan.—Rom 8:2-10.

2, 3. Ma kitail pahn weweidki ngehno, iaduwen met pahn kamwakid atail mour?

² Ni atail pahn kin wie “weweidki ngehno,” sapwellimen Koht kehl pahn sewese kitail en peikiong Siohwa. Kitail pahn kin kasalehda irair en Koht kan nan atail wasahn kalohk, nan mwomwohdiso, nan imwatail oh pil wasa koaros. Wahn ngehn akan pahn kin sansalda ni mwomwen atail kin ehuong atail pwoud, neitail seri kan, riatail Kristian kan, oh pil meteikan.

³ Ni atail kin mourki “mouren Koht ni pali ngehn” e kin sewese kitail en uhdihsang wia dihp. (1 Piter 4:1-6) Ma kitail pahn kin mourki mour en ngehn, kitail uhdahn sohte pahn wiahda dihp me sohte mahk pahn kohwong. Ahpw pil ia ekei kapai kan me kitail kak ale sang ni atail pahn kin weweidki ngehno?

Kolokolete Nanpwungmwahu Rehn Koht oh Krais

4, 5. Iaduwen atail pahn kin weweidki ngehn sarawi kin kamwakid mwomwen atail kin kilangwohng Sises?

⁴ Pwehki kitail kin weweidki ngehn sarawi, kitail kak en kolokolete nanpwung keren rehn Koht oh Sapwellimeo. Pohl ntingwohng irail Kristian kan en Korint duwen kisakis kan en ngehno oh mahsanih: “Eri, I men kumwail en ese mehlel met me sohte emen me audaudkidahr Ngehn Sarawi kak keriahla Sises, oh sohte me kak kasalehda me Sises iei Kaun ma Ngehn Sarawi sohte ketin kaweidki.” (1 Korint 12:1-3) Soangen kehl koaros me kin kamwakid aramas akan en keriahla Sises kin uhdahn kohsang rehn Sehdan me Tepil. Ahpw nin duwen Kristian kei me kin weweidki ngehn sarawi, kitail kin kamehlele me Siohwa me kaiasada Sises sang mehla oh wiahiong ih en wiahla kapikipik keieun lapalap. (Pilipai 2:5-11) Kitail pwoson sapwellimen Sises meirong me pwainda dihp oh pwungki Sises en wia atail Kaun me Koht piladahr.

⁵ Irail akan me kin nda me irail Kristian kei nan senturi keieu C.E. kin kahmahmki me Sises wia aramasala. (2 Sohn 7-11) Irail akan me kin iang pwungki soangen lamalam wet kin kahrehda re en soikala padahk mehlel kan duwen Sises, me Mesaia. (Mark 1:9-11; Sohn 1:1, 14) Weweidki ngehn sarawi kin pere kitail sang soangen lamalam en lahlahwe wet. Ihte ma kitail pahn pepehd ni pali ngehn me pahn kahrehda kitail en kak doudoulahte ale sapwellimen Siohwa mahk kalahngan oh “momourki mour mehlel.” (3 Sohn 3, 4) Eri kitail en koasoanehdi teng kitail en kin soikala soangen lamalam en lahlahwe koaros pwe kitail en kak kolokolete atail nanpwungmwahu rehn samatail nanleng.

6. Soangen irair dah kan me sapwellimen Koht ngehn kin kihong irail akan me kin weweidki ngehno?

⁶ Pohl kin kapahrekihong soangen tiahk lahlahwe kan en kaudokiong dikedik de aramas teikan, ong tiahk en nenek oh tiahk samin me wia kisehn “ahnepen aramas kan.” Ahpw e kawehwehda: “Sapwellimen Krais Sises akan kemelahr pein ahneparail, iangahki tiahk suwed oh ineng suwed akan. Ngehno ketikihongkitailehr mour; eri, e uhdahn pahn ketin kakaun mouratail.” (Kalesia 5:19-21, 24, 25) Soangen irair dah kan me sapwellimen Koht kehl kin ketikihong irail akan me kin mour oh weweidki ngehno? Pohl ntingihdi: “A iet akan wahn Ngehno: limpoak, peren, popohl, kanengamah, kadek, loalopwoat, pwoson, opampap, oh liksang me suwed.” (Kalesia 5:22, 23) Kitail tehkpene duwen wahn ngehn pwukat.

“Poakpene” Nanpwungamwail

7. Dahkot limpoak oh ia ekei irair en limpoak kan?

⁷ Limpoak—ehu irair en wahn ngehn kan—kin kalapw pidada pepehm loal oh nsenohki meteikan iangahki ahneki nanpwungmwahu oh karanih irail. Paipel mahsanih me “Koht iei limpoak” pwehki ih me wia poahsoanpen irair wet. Sapwellimen Koht oh Sises limpoak ong aramas sansaldahr ki tomw en Sises Krais. (1 Sohn 4:8; Sohn 3:16; 15:13; Rom 5:8) Nin duwen aramas kei me kin idawehn Sises, aramas teikan kin kasawihada kitail ki atail limpoakpene nanpwungatail. (Sohn 13:34, 35) Ni mehlel, kehkehlik kohwong kitail en “poakpene.” (1 Sohn 3:23) Oh Pohl mahsanih me limpoak kin kanengamah oh kadek. E sohte kin peirin, pohnmwahso, aklemei, oh mehwo. Limpoak sohte kin mwadang lingeringerda oh inaptihnmwomw. E kin perenki dahme pwung, ahpw kaidehn dahme sapwung. Limpoak kin loalenohng apwal kan, pwoson, likih oh kanengamah ni mehkoaros. Limpoak me poatopoat oh sohte imwi.—1 Korint 13:4-8.

8. Dahme kahrehda kitail anahne en kasalehda limpoak ong riatail kan me pil kin kaudokiong Siohwa?

⁸ Ma kitail pahn mweidala sapwellimen Koht ngehn sarawi en kakairada limpoak nan loalatail, eri irair wet pahn pwarada ni atail kin ehuong Koht oh mehn mpatail kan. (Madiu 22:37-39) Wahnpoaron Sohn mahsanih: “Mehmen me sohte ahneki limpoak kin mihmi pahn manaman en mehla. Mehmen me kin kailongki rie, ih sounkam aramas emen, oh kumwail ese me sounkam aramas sohte kak ahneki mour soutuk.” (1 Sohn 3:14, 15) Soun kamaramas emen kak rukala nan kahnihmw en ruk nan Israel ihte ma e sohte kailongki me e kemehlao. (Deuderonomi 19:4, 11-13) Ma ngehn sarawi me pahn kahluwa kitail, kitail pahn kasalehda limpoak ong Koht, riatail Kristian kan, oh pil ong meteikan.

“Peren me KAUN-O Pahn Ketikihong Kumwail Pahn Kakehlakeikumwailla”

9, 10. Dahkot peren oh ia ekei kahrepe kan me kitail kak perenki?

⁹ Peren wia irair kaselel ehu. Siohwa me wia “Koht kalahngan [“peren,” NW].” (1 Timoty 1:11; Melkahka 104:31) Sapwellime Ohlo kin perenki kapwaiada kupwuren Semeo. (Melkahka 40:8; Ipru 10:7-9) Oh “peren me KAUN-O pahn ketikihong [kitail] pahn [kakehlakeikitailla].”—Nehmaia 8:10.

¹⁰ Peren me kin kohsang rehn Koht kin kihong kitail pepehm en itarki ni atail kin kapwaiada kupwuren Koht mehnda ma kitail mih nan ahnsou apwal, kansensuwed de pil nan ahnsoun lokolok. Ia uwen laud en atail peren ni atail kin “padahngki duwen Koht”! (Lepin Padahk 2:1-5) Atail nanpwungmwahu rehn Koht me kaperen kin poahsoanda pohn atail kin loalokongkihla pwung oh pwoson ih oh sapwellimen Sises tomwo. (1 Sohn 2:1, 2) Iang wia kisehn pirien mehlel tehieu me mih nan sampah pwon pil wia ehu poahsoanpen atail peren. (Sepanaia 3:9; Akkai 2:7) Atail koapworopworki Wehio oh kapai kesempwal en iang kalohki duwen rongamwahuo pil kin wahdohng kitail peren. (Madiu 6:9, 10; 24:14) Kapai en mour soutuk pil wia mehn peren ehu ong kitail. (Sohn 17:3) Pwehki mie soangen koapworopwor kaselel rehtail, kitail pahn “pereperen.”—Deuderonomi 16:15.

Kitail en Popohl oh Kanengamah

11, 12. (a) Ia wehwehn popohl? (b) Iaduwen popohl sang rehn Koht kin kamwakid kitail?

¹¹ Popohl—pil ehu kisehn wahn ngehn kan—iei irair en meleilei oh sohte kedirepw. Samatail nanleng iei Koht en meleilei, oh kitail kak kamehlele met: “KAUN-O ketin kupwuramwahwih kin irail popohl.” (Melkahka 29:11; 1 Korint 14:33) Sises padahkihong sapwellime tohnpadahk ko: “I kihong kumwail popohl, pein ei popohl me I kihong kumwail.” (Sohn 14:27) Iaduwen met kin sewese sapwellime tohnpadahk ko?

¹² Popohl me Sises ketikihong sapwellime tohnpadahk ko kin kameleileidi arail mohngiong oh madamadau oh kin katikitikihala arail pepehm en masak. Eri mehlel ni ahnsou me irail ale ngehn sarawi me inoupe wiawihda, irail kin ahneki popohl. (Sohn 14:26) Ni atail kin ale ngehn sarawi oh pasapengpen atail kapakap kan rahnwet, kitail kin pehm “Sapwellimen Koht popohl,” me inenen sikla, me kin kakommoalehdi atail mohngiong oh madamadau. (Pilipai 4:6, 7) Patehng met, sapwellimen Siohwa ngehn sarawi kin sewese kitail en meleilei oh pil popohl rehn riatail kan nan pwoson oh pil rehn meteikan.—Rom 12:18; 1 Desolonika 5:13.

13, 14. Dahkot kanengamah, oh dahme kahrehda kitail anahne en kasalehda met?

¹³ Kanengamah pil kin duwehte popohl, pwe ih me kihong kitail kanengamah en dadaur ni atail kin kasik irair en ahnsouwet en mwahula. Koht kin kanengamah. (Rom 9:22-24) Sises pil kin kasalehda soangen irair wet. Kitail pil kak iang ale soangen irair wet, ihme Pohl ntingihdi: “Pwehki iei kahrepe wette me Koht ketin mahkikihong ie, pwe I en kak kasalehda uwen laud en Krais Sises eh ketin kanengamahiong ie. Mehnda ma I suwedsang me dipan akan koaros ahpw I en wiahla mehn kahlemengih ehu ong koaros me pahn pwoson Krais mwuhr oh ale mour soutuk.”—1 Timoty 1:16.

¹⁴ Irair en kanengamah kin sewese kitail en dadaur ni ahnsou me meteikan kin nda de wia soahng kansensuwed kan ong kitail. Pohl kangoange ienge Kristian kan: “Kanengamahiong aramas koaros.” (1 Deselonika 5:14) Pwehki kitail koaros sohte unsek oh kin wiahda sapwung, ni mehlel kitail kin men aramas akan en kin kanengamahiong kitail ni atail pahn kin wiahda sapwung kan ong irail. Eri kitail en pil akadeiong en kin “kanengamah” ni peren.—Kolose 1:9-12.

Kasalehda Kadek oh Kamwahu

15. Kawehwehda dahkot kadek oh kihda karasepe kan.

¹⁵ Kadek kin sansalda ni atail kin kasalehda me kitail kin nsenohki meteikan oh sang ni atail kin lokaia oh mwekid ni elen kadek. Siohwa me kadek oh pil duwehte sapwellime ohl. (Rom 2:4; 2 Korint 10:1) Sapwellimen Koht oh Sises ladu kan pil anahne en kadek. (Maika 6:8; Kolose 3:12) Pil ekei me sohte arail nanpwung keren ong Koht pil kin “inenen kadek.” (Wiewia 27:3; 28:2) Eri met kasalehda me kitail uhdahn kak kasalehda kadek ma kitail pahn “weweidki ngehno.”

16. Ia ekei irair kan me konehng kamwakid kitail en kasalehda kadek?

¹⁶ Kitail pil kak kasalehda kadek mendahte ma e konehng kitail en lingeringerda pwehki mehkot kamedek me emen nda de wia. Pohl mahsanih: “Ma kumwail pil lingeringer, kumwail dehr mweidohng amwail lingeringer en kahrehiong kumwail nan dihp; pil dehr kolokol amwail lingeringer rahn ehu pwon. Kumwail dehr kihong Tepil eh ahnsou mwahu. A kumwail en kin kadekpene oh loallamwahupene, oh mahkpene duwen Koht eh ketin mahkohng kumwail rehn Krais.” (Episos 4:26, 27, 32) E pil uhdahn konehng en kasalehda kadek ong irail me mihmi nan apwal. Ei, Kristian elder men sohte kin kasalehda kadek ma e sohte pahn kihsang eh kaweid kan sang nan Paipel pwe en dehr kansensuwedihala pepehm en meno me mihmi nan keper en pwupwusang nan elen “soangen mwahu koaros, soangen pwung koaros, oh soangen mehlel koaros.”—Episos 5:9.

17, 18. Dahkot kamwahu oh iaduwen met kin kamwakid atail mour?

¹⁷ Kamwahu iei pwung, mwakelekel en tiahk oh irair me mwahu. Sapwellimen Koht mwahu inenen unsek. (Melkahka 25:8; Sekaraia 9:17) Sises pwung oh tiahk mwakelekel. Ahpw, e sohte pwungki en kamwarenki “Mwahu” ni ahnsou me irail likwerihki ih “Sounpadahk mwahu.” (Mark 10:17, 18) Met sansal pwehki e kin pohnese me Koht me karasepe keieu kaselel en kamwahu.

¹⁸ Atail sohsohki dihp kin kerempwa atail koahiek en wiahda dahme pwung. (Rom 5:12) Mendahki met, kitail kin kasalehda irair wet ni atail kin kapakapkiong Koht en ‘padahkihong kitail irair en kamwahu.’ (Melkahka 119:66) Pohl padahkiong irail me kin pwoson kan nan Rom: “Riei [Kristian] ko, pein ngehi ese mwahu duwen amwail kin audaudki soangen mwahu koaros.” (Rom 15:14) Sounapwalih me wia Kristian emen anahne en “pwungki soahng koaros me mwahu.” (Taitus 1:7, 8) Ma sapwellimen Koht ngehn sarawi me kin kahluwa kitail, aramas pahn ese kitail ki soahng mwahu kan me kitail kin wiahda, oh Siohwa pahn ‘taman kitail ki soahng mwahu kan me kitail wia.’—Nehmaia 5:19; 13:31.

“Pwoson me Sohte Mwalaun”

19. Kawehwehda dahkot pwoson, me sansalda nan Ipru 11:1.

¹⁹ Pwoson—pil wia kisehn wahn ngehn kan—“iei kamehlele mehkan me kitail kin koapworopworki de kasikasik, kamehlele mehkan me kitail sohte kak kilangki masatail.” (Ipru 11:1) Ma mie atail pwoson, kitail kak kamehlele me soahng koaros me Siohwa kin inoukihda uhdahn pahn pweida. Kamehlel en pweida en mehkan me kitail sohte kak kilang kin inenen kehlail me kahrehda pwoson pil kin duwehte met. Karasepe, mieier kapikipikda kan kamehlelehiong kitail me mie Sounkapikada men. Met iei soangen pwoson me kitail kin kasalehda ma kitail kin weweidki ngehn sarawi.

20. Dahkot “dihp me kin salihkitaildi,” oh iaduwen kitail kak soikala met oh mehkan en uduk?

²⁰ Sohte pwoson iei “dihp me kin salihkitaildi.” (Ipru 12:1) Kitail anahne en kehliki sapwellimen Koht ngehn sarawi pwe kitail en kak kihsang rehtail mehkan en war, noahrok kepwe, oh padahk likamw akan me kak en kauwehla atail pwoson. (Kolose 2:8; 1 Timoty 6:9, 10; 2 Timoty 4:3-5) Sapwellimen Koht ngehn sarawi kin ketikihong sapwellime ladu kan nan rahnwet soangen pwosonohte me irail kan en mahsie oh pil meteikan me kileldi nan Paipel kin ahneki. (Ipru 11:2-40) Oh pein atail “pwoson mehlel” pahn pil kakehlailih pwoson en meteikan.—1 Timoty 1:5; Ipru 13:7.

Kasalehda Kamantik oh Kanengamah

21, 22. Dahkot kamantik oh dahme kahrehda kitail anahne kasalehda met?

²¹ Kamantik iei en meleilei ni mwomwatail oh atail wiewia. Ehu sapwellimen Koht irair kaselel iei kanengamah. Kitail ese met pwehki Sises, me wia ohl kanengamah men, kin wia karasepe keieu mwahu en Siohwa. (Madiu 11:28-30; Sohn 1:18; 5:19) Eri, dahme kitail uhd anahne en wia nin duwen sapwellimen Koht ladu kei?

²² Nin duwen Kristian kei, kitail anahne en ‘kin kasalehda saramwahu ong aramas koaros.’ (Taitus 3:2) Kitail pil kin kasalehda kamantik nan atail wasahn kalohk. Irail me pilipilda kan kin ale kaweid en kapwungala irail Kristian kan me kin wiahda sapwung kan ni “kamantik.” (Kalesia 6:1) Kitail koaros kak iang wahdo ehupene oh meleilei nanpwungen pwihn en Kristian kan sang ni atail pahn kasalehda “mpahi, meleilei oh kanengamah.” (Episos 4:1-3) Kitail kak kasalehda meleilei ma kitail pahn weweidki ngehno oh kasalehda kanengamah.

23, 24. Dahkot kanengamah oh iaduwen met kak sewese kitail?

²³ Kanengamah kin kahrehiong kitail en kak tetehk kanaiehng atail lamalam, lokaia oh wiewia. Siohwa “kin kanengamah” ong mehn Papilon kan me kauwehla Serusalem. (Aiseia 42:14, NW) Sapwellime ohl ‘kihdiong kitail mehn kahlemeng mwahu’ en kasalehda kanengamah ni ahnsou me e kin lelohng nan lokolok. Oh wahnpoaron Piter kaweidki ienge Kristian kan en “kapatahiong arail dehdehki, kanengamah.”—1 Piter 2:21-23; 2 Piter 1:5-8.

²⁴ Kristian elder kan pil anahne kasalehda kanengamah. (Taitus 1:7, 8) Ni mehlel, koaros me kin weweidki ngehn sarawi kak kasalehda kanengamah oh kak liksang tiahk suwed kan, lokaia suwed, de pil sohte lipilipil mehkot me Siohwa sohte kin kupwurki. Ma kitail pahn mweidala sapwellimen Siohwa ngehn sarawi en kihong kitail kanengamah, met pahn kin sansalda mwohn meteikan pwehki mwomwen atail kin lokaia oh tiahk.

En Weweidki Ngehn Sarawi

25, 26. Iaduwen weweidki ngehn sarawi pahn kamwakid atail ehuong meteikan rahnwet oh pil atail mour en ahnsou kohkohdo?

²⁵ Ma kitail kin weweidki ngehn sarawi, kitail pahn wia soun kalohk ngoang kei en Wehio. (Wiewia 18:24-26) Kitail pahn wia werek mwahu kei, oh mehlel irail kan me kin papah koht pahn kin perenki werekiong kitail. Nin duwen aramas kei me kin weweidki ngehn sarawi, kitail pahn pil wia mehn kangoang kei en pali ngehn ong irail tohnkaudok kan en Siohwa. (Pilipai 2:1-4) Kaidehn met me Kristian koaros kin mwahuki?

²⁶ Nan sampah wet me mih pahn manaman en Sehdan, e sohte mengei en weweidki ngehn sarawi. (1 Sohn 5:19) Mendahki met, aramas rar kei kin wia met nan rahnwet. Ma kitail pahn likih Siohwa ki mohngiong unsek, kitail pahn perenki mour rahnwet oh kitail pahn kak keid nan ahl pwung en Ih me kin ketikihda ngehn sarawi ni limpoak kohkohlahte.—Melkahka 128:1; Lepin Padahk 3:5, 6.

Ia Ahmw Pasapeng?

• Iaduwen “weweidki ngehn sarawi” kin kamwakid atail nanpwungmwahu rehn Koht oh Sapwellimeo?

• Ia wahn ngehn kan?

• Ia ekei ahl me kitail kak kasalehda wahn ngehn en Koht kan?

• Iaduwen weweidki ngehn sarawi kin kamwakid atail mour en rahnwet oh pil ahnsou kohkohdo?

[Kawehwehpen kilel kan nan ehu ehu pali 19]

Sapwellimen Siohwa ngehn sarawi kin kangoange limpoak ong riatail me pwoson kan

[Kawehwehpen kilel kan nan ehu ehu pali 20]

Kasalehda kadek ki lokaia oh wiewia kan me kin wia mehn sawas