Dehr Irehiukedi Pwehki Omw Kedirepw
1. Dahme kahrehda ekei kin pweiek en onop Paipel rehn emen?
1 Ekei kin pweiek en wia onop en Paipel pwehki ar kedirepw. En apwalih tohnsukuhl en Paipel men kin anahne ahnsou. Ahnsou kin anahn pwehn kaunopadahng onopo, wia onopo oh sewese tohnsukuhlo en powehdi eh kahpwal kan. Wahnpoaron Pohl koasoia me e kin toukihda eh mour pwehn sewese irail kan nan Deselonika ren esehla Siohwa. (1 Des. 2:7, 8) Ia duwen atail kak onop Paipel rehn emen mendahki atail kin kedirepw ahnsou koaros?
2. Ia duwen atail poakohng Siohwa kin kamwakid atail doadoahngki atail ahnsou?
2 En Papah Siohwa Kin Anahne Ahnsou: E mehlel me atail papah Siohwa kin anahne ahnsou. Karasepe, ahnsou koaros kitail kin anahne ahnsou pwehn iang towehda mihting kan, iang doadoahk en kalohk, wadek Paipel oh kapakap. Aramas kedirepw men me pwopwoud pahn uhdahn perenki wiahda ahnsou ong eh pwoudo. Eri ia uwen atail anahne “isaneki ahnsou mwahu koaros” pwehn papah Siohwa pwehki atail poakohng ih. (Ep. 5:15-17; 1 Sohn 5:3) Sises ketin medewe me doadoahk en katohnpadahk inenen kesempwal nanpwungen doadoahk kan en papah Siohwa. (Mad. 28:19, 20) Atail medemedewe duwen met pahn sewese kitail en dehr pweiek alehdi pwukoa en onop Paipel rehn emen.
3. Ia duwen atail kak onop Paipel rehn emen mendahki atail irair kan kin kedirepwehla atail koasoandi en kalohk?
3 Ahpw ia duwen ma kitail anahne doadoahk en mwohni, kohwahki soumwahu, de ahneki pwukoa kan nan sapwellimen Siohwa pwihn? Ekei sounkalohk kan me kin anahne seiloak ekei pak kin wia arail onop en Paipel ni delepwohn de ni computer. Irail me kin kohwahki soumwahu kin koasoanehdi neirail tohnsukuhl en Paipelo en kohdo ni imwarailo pwehn onop. Ekei kin koasoanehdi rehn emen sounkalohk me re koapworopworki en wiliandi irail oh wia onopo ni ahnsou me re sohte kak.
4. Kapai dah kan kohsang iang doadoahk en wia onop Paipel?
4 Pohl kin diar peren tohto sang eh kin doadoahngki eh ahnsou oh kehl pwehn sewese meteikan ren sukuhlki padahk mehlel. (Wiewia 20:35) Ni eh medemedewe irail koaros me e sewese nan Deselonika, met kamwakid ih en kalahngankihong Siohwa. (1 Des. 1:2) Atail peren oh nsenamwahu kak laudla ma kitail sohte mweidohng kedirepw kan en irekitail sang iang doadoahk en wia onop en Paipel.