Ke Dehr Pweiek!
1. Ni ahl dahieu kitail “sohte kin pweiek sang kihwei dahme mwahu”?
1 Ni ahmw pahn kaukaule iang towehda doadoahk en kalohki Wehin Koht, kitail sohte pahn “pweiek sang kihwei dahme mwahu” ong irail akan me anahne sawas nan atail wasahn kalohk. (Lep. Pad. 3:27, NW) Sohte ehu rong me mwahu sang atail kin ehukihong aramas akan duwen ahnsou mwahu kan me wehio pahn wahdo ni ahnsou me e pahn kaunda. Mwein ele ke kin iang perenki ehukihong meteikan duwen koapworopwor me wehio pahn wahdo, ni ahmw ehukihong irail sawaspen Paipel kan. Eri e sou pahn wia mehn akadei mwahu en tepiada onop Paipel rehn emen, ma saikinte mie ahmw Paipel study?
2. Dahme kak kapweiek kitail sang tepida wia onop en Paipel?
2 Ekei pak, pein atail pepehm me kin kahrehda apwal en tepida onop en Paipel rehn emen. Ekei kin ahneki pepehm en soh itar oh medewe me re sohte ese padahk de irail me nohk kedirepw. Eri mie sawas kan me kak sawas laud pwe ken dehr pweiek sang tepida onop en Paipel.—Mad. 28:19; Wiewia 20:20.
3. Dahme kahrehda kitail warohng en padahki duwen Paipel?
3 Sohte Koapworopworki Ahmw Koahiek: Mwein ele ke sohte kanekehla ahmw sukuhl de pwehki kahrepe teikan me kahrehong uhk en sohte likih me ke kak onop Paipel rehn emen. Tepin Kristian akan kin wia tohnpadahk koahiek kei mendahki irail aramas me “sohte wad oh pil sohte iang sukuhl.” Dahme sewese irail en kak padahkihong meteikan dahme mehlel? “Ira kin ieiang Sises mahso.” (Wiewia 4:13) Irail kin ieiang Sounpadahk Lapalap, Sises, me kileledier wiepen eh padahk kan nan Pwuhk Sarawi oh nekinekidier lao lel atail ahnsou. Mehnda ma ahmw sukuhl sohte laud, kasukuhl me pid duwen Koht oh kupwure kan me ke pahn ale, kohsang rehn emen me keieu loalokong.—Ais. 50:4; 2 Kor. 3:5.
4. Dahme kitail kak sukuhliki sang men kahlemeng en Eimwos?
4 Siohwa kin ekei pak doadoahngki soukohp akan en kapwungala irail aramas lapalap akan me kin wiahda sapwung. Duwehte Eimwos, ih emen me sohte kohsang sukuhl laud de pil wia aramas wad emen. Eimwos pein wehkada oh nda: “Kaidehk ngehi soangen soukohp me kin wia kokohp . . . Ngehi silepen sihpw men, oh I pil kin apwahpwalih tuhke pik kan.” (Eimw. 7:14) Mendahki met, Eimwos sohte pweiek en padahkihong soukohp suwed Amasaia me kin kaudokiong mahn kou. (Eimw. 7:16, 17) Kitail en ahnsou koaros tamataman me kitail wiewia doadoahk en Siohwa oh eh pahn kihong kitail koahiek nan doadoahk wet.—2 Tim. 3:17.
5. Dahme kahrehda kitail en nantihong tepiada onop en Paipel mendahki atail mour me kedirepw?
5 Pwehki Kedirepw: Ele mwein ke kin kedirepw ahpw ke koasoanehdi ahnsou en iang wia doadoahk en kalohk kaukaule. En wia onop Paipel rehn emen, kin wia mehkot me keieu kaperen nan doadoahk en kalohk. Kapai mehlel ehu en kilang mahsen en Siohwa tepidahr doadoahk nan mour en emen aramas. (Ipru 4:12) Siohwa kin kupwurperenki ni emen eh kin tounmeteikihla eh ahnsou pwehn sewese emen en “marainkihla me mehlel.” (1 Tim. 2:4) Pil irail tohnleng kan kin ngisingiski arail peren ni arail kin kilang emen eh kin koluhla oh wiliakapwala oh tepida kekeirda en wia sapwellimen Koht ladu men.—Luk 15:10.
6. Kapai dahieu kitail ahneki ni atail kin nantihong kapwaiada kupwuren koht?
6 Koht “kin ketin kupwurki aramas koaros en ale komourparail oh marainkihla me mehlel.” (1 Tim. 2:4) E wia kapai mehlel ehu en iang wia kisehn doadoahk wet me iei kupwuren Koht oh dehr pweiek sang onop Paipel rehn aramas akan!