Alasang Soukohp akan—Eimwos
1. Dahme kahrehda mehn kahlemeng en Eimwos kak kangoange kitail?
1 Mie pak ke pehm me ke sohte kak kalohk pwehki omw semwehmwe oh sohte sukuhl laud? Ma ei, mehn kahlemeng en Eimwos kak kangoange iuk. Ih silepen sihpw men oh e kin doadoahk ekeite ahnsou nan mwaht, ahpw Siohwa ketikihong ih pwukoa en kalohki rohng kesempwal ehu. (Eimw. 1:1; 7:14, 15) Pil duwehte met, nan atail ahnsou, Siohwa kin ketin doadoahngki me aktikitik kan. (1 Kor. 1:27-29) Dahme kitail sukuhlki sang soukohp Eimwos ong atail doadoahk en kalohk?
2. Dahme kahrehda kitail kak kekehlail ni atail kin lelohng uhwong nan doadoahk en kalohk?
2 Kekehlail Mendahki Uhwong: Amasaia iei samworo men me kin kaudokiong kou pwul nan keinek eisek en Israel. Ni eh rong dahme Eimwos kohpada, e mwomwen me eh sapengki: ‘Kohkohla ni imwomwo! Kohkohweisang met! Mie pein at pelien lamalam!’ (Eimw. 7:12, 13) Amasaia kasapwungehla mahsen en soukohpo ni eh peki rehn Nanmwarki Seropoham en keinapwihdi ahn Eimwos doadoahk. (Eimw. 7:7-11) Ahpw Eimwos sohte masepwehkada. Rahnwet, ekei kaunen pelien lamalam kan kin rapahki sawas sang palien politik ni ar kin songosong ren kaloke sapwellimen Siohwa aramas akan. Ahpw Siohwa ketin kamehlelehiong kitail me sohte tehtehn mahwen ehu pahn kak kauwekitailla.—Ais. 54:17.
3. Ia rohng riau me kitail kin kalohki rahnwet?
3 Kalohki Sapwellimen Koht Kadeik oh Kapai en Ahnsou Kohkohdo: Mendahki Eimwos eh kin kohpada kadeik ong keinek eisek en Israel, e kaimwisekala pwuhken Paipel me mi ni ede ni eh ntingihedi sapwellimen Siohwa inou en onohnsapahl oh kapai tohto. (Eimw. 9:13-15) Kitail pil kin koasoia sapwellimen Koht “rahnen kadeik” me kohkohdo, ahpw met kisehnte “rongamwahu en Wehin Koht” me kitail anahne kalohki. (2 Pit. 3:7; Mad. 24:14) Ni Siohwa eh pahn ketin kasohrehla me suwed nan Armakedon, met pahn kaunopada ahl ong paradais nin sampah.—Mel. 37:34.
4. Dahme kitail kamehlele me kahrehda kitail kak kapwaiada kupwuren Siohwa?
4 Kalohki rongen Wehio nan sampah me diren aramas uhwong kan kin uhdahn kasonge atail koasoanehdi teng en mourki atail inou ong Siohwa oh wia kupwure. (Sohn 15:19) Ahpw kitail kin kamehlele me Siohwa pahn ketikihong kitail dahme kitail anahne pwe kitail en kapwaiada kupwure, duwehte me e ketin wiahiong Eimwos.—2 Kor. 3:5.