Sewese Irail Pwe ‘Arail Pwoson en Kin Kehlailla Mehlel’

E kaperen en kilang duwen Siohwa eh kin ketin kapaiada doadoahk en kihpene aramas akan. Aramas me tohtohsang meh 250,000 kin papidaisla sounpar koaros. (Deud. 28:⁠2) Ni sounkalohk men eh sewese nah tohnsukuhl men en papidaisla, mwein sounkalohko kin uhdihsang onop reh oh uhd sewese meteikan. Mwein tohnsukuhlo pil men uhdihsang eh onop pwehn kalaudehla eh ahnsou ong kalohk. Ahpw e kesempwal tohnsukuhl en Paipel kan ren ahneki poahsoan kehlail nan padahk mehlel. Re anahne “poadidiong” Krais oh ‘arail pwoson en kin kehlailla mehlel.’ (Kol. 2:6, 7; 2 Tim. 3:12) Kahrehda, mwurin tohnsukuhl men eh papidaisla, e anahne pousehla eh onop en Paipel lao e kanekehla pwuhken Paipel Padahngki oh “Limpoak en Koht” koaros.​—⁠Kilang Atail Doadoahk ong Wehio, April 2011, pali 2.