Wia Onop en Paipel me Pahn Pweida Mwahu
1. Soangen pwukoa dah kan me sounkalohk kan me kin wia onop Paipel kan ahneki?
1 Sohte emen kak papah Koht ihte ma Siohwa ketin ‘kainangihedo reh.’ (Sohn 6:44) Mendahki met, sounkalohk kan me kin wia onop en Paipel anahne wia ar pwukoa en sewese aramas akan en karanihala Samarail me ketiket nanleng. (Seims 4:8) Met anahne en kin kaunopada mwahu. En wadek ehuehu parakrap oh idek peidek kan me mi nan pwuhko sohte itar en sewese neitail tohnsukuhl kan en wehwehkihla rohngo oh kekeirda.
2. Dahme kitail anahne wia pwehn wia onop en Paipel me pahn pweida mwahu?
2 Pwehn wia onop en Paipel me pahn pweida mwahu, sounkalohk kan anahne sewese neirail tohnsukuhl kan en (1) wehwehki dahme Paipel kin padahngki, (2) pwungki dahme Paipel kin padahngki, oh (3) kapwaiada dahme Paipel kin padahngki. (Sohn 3:16; 17:3; Seims 2:26) Anahne sounpwong kei pwe tohnsukuhl men en ekisekis kekeirda nan soangen kahk pwukat. Ahpw ehuehu kahk pwukat kin kasalehda eh kakairada eh nanpwung mwahu rehn Siohwa oh wiahda inou ong ih.
3. Dahme kahrehda sounpadahk pweida men en idek peidek kan me pahn kamwakid tohnsukuhlo en kasalehda eh madamadau?
3 Dahme Tohnsukuhl en Paipelo Kin Medemedewe?: Pwehn ese ma neitail tohnsukuhl en Paipelo wehwehki oh pwungki dahme e sukusukuhlki, ke dehr lokaia tohr ahpw kangoange tohnsukuhlo en kasalehda eh pepehm. (Seims 1:19) Ia duwe, e wehwehki dahme Paipel mahsanih nan ire me kumwa koasoiapeneo? E kak pein kawehwehda ireo ni pein eh lokaia? Ia eh pepehm ong dahme e sukuhlkier? E kin kamehlele me dahme Paipel mahsanih kin pwung? (1 Des. 2:13) Ia duwe, e wehwehki me dahme e sukusukuhlki pahn anahne wiahda wekidekla kan ong mwomwen eh mour? (Kol. 3:10) Pwe en kak ale pasapengpen peidek pwukat, kitail anahne idek peidek kan ni wahu me pahn kamwakid tohnsukuhlo en kasalehda eh madamadau, oh rong.—Mad. 16:13-16.
4. Dahme kitail anahne wia ma tohnsukuhl men apwalki wehwehki de kapwaiada dahme e sukuhlkihsang nan Paipel?
4 Dahme aramas akan kin ahn wia oh medewe kin tengla reh oh kin anahne ahnsou laud pwe ren kak sohla wia. (2 Kor. 10:5) Ia duwen ma neitail tohnsukuhlo sohte pwungki de sohte kin kapwaiada dahme e kin sukuhlki? Kanengamah kin anahn pwehn mweidohng ahnsou mwahu pwe sapwellimen Koht Mahsen oh manaman en doadoahk nan loalen tohnsukuhlo. (1 Kor. 3:6, 7; Ipru 4:12) Kitail en dehr kin iding ih, ahpw e kin mwahu en koasoia ehu oaralap tohrohr ma tohnsukuhlo kin apwalki en wehwehki oh kapwaiada ehu padahk en Paipel. Ni atail kin pousehla kasukuhlih ih ni kanengamah oh ni limpoak sang nan Paipel, e pahn kak mwadangete wiahda wekidekla kan me anahn.