Koul Kapw ong Kaudok!
1 Ni mihting en Watch Tower Bible and Tract Society of Pennsylvania me ahpwtehn wiawi, nan October 4, 2014, pakair wiawi me pid wekideklahn neitail pwuhken koul. Ni mehlel met rohng kaperen ehu! Koaros me iang towehda tamanda kesempwalpen neitail koul kan ong Wehio nan atail kaudok.—Mel. 96:2.
2 Ele mwein ke pahn medewe, ‘Dahme kahrehda e kesempwal en wiahda wekidekla ong pwuhken koul wet?’ Mie ekei kahrepe kan. Keieu, atail wehwehkihla iren Paipel kan kin wie mwamwahula, oh met kak wekidala ekei lepin lokaia kan nan neitail koul kan. (Lep. Pad. 4:18) Pil kahrepen wekidekla wet iei: Tohto lepin lokaia kan me mi nan neitail pwuhken koul kohsang nan neitail New World Translation en mwoweo. Lepin lokaia pwukat anahne wekidekla pwe en kak pwungohng lepin lokaia kan nan neitail New World Translation me kapw. Pwehki e pahn anahne lapalahn wekidekla pwe lepin lokaia kan en koul pwukat en duwehte neitail Paipel kapw, se pwungkipene en kapataiong ekei koul kapw kan nan pwuhken koul.
3 Kitail pahn anahne awih lao pwuhken koul kapwo wiawihda mwohn atail pahn kak doadoahngki koul kapw kan? Soh. Se perenki kehsehkin kumwail me mwurin sounpwong kei, ekei koul kapw kan pahn kohda nan neitail Web site, jw.org. Ni ahnsou me koul kapw pahn kohda nan pein amwail lokaia, e pahn koasoandi pwe mwurin Mihting en Kalohk mie kisin kilel ehu me pahn kasalehda “koul kapw.”
4 Ia Duwen Omw Kak Sukuhlki Koul Kapw kan: E pahn kak apwal en esehla ehu koul kapw. Ahpw duwehte sounmelkahkao, kitail en koul ni ngihl laud nan mihting en mwomwohdiso kan oh ‘sohte nennenla.’ (Mel. 30:12) Pwehn sukuhlki koul kapw, idawehn kahk mengei pwukat.
Kin pwurepwurehng rong koul kan ni ngilen piano, me pahn kohda nan neitail Web site. Uwen laud en omw rongorong ngilen koul, e pahn mengei ong uhk en tamatamante.
Onopki lepin lokaia kan nan koul pwukat, oh song en wadlikiala.
Koulki ngilen koul wet iangahki lepin lokaia kan me ntingdi. Wia met lao ke esehla douluhl koul pwukat.
Praktiski koul pwukat ekei ahnsou ong amwail Kaudok en Peneinei lao omw peneinei ahnla.
5 Nan sounpwong kan me pahn kohdo, ma ehu koul kapw me pahn kaimwisekala Mihting en Kalohk, tohnmwomwohdiso pahn rong mahs ngilen piano. Tohnmwomwohdiso eri pahn koulki koulo pwakih ngilen piano, duwehte dahme kitail kin wia nan koul teikan.
6 Ni omw kin medewe duwen met, en iang koul nan atail mihting kan pahn sewese kitail en perenki iang miniminiong riatail kan kapinga Siohwa. Ihme kahrehda, kitail en dehr kohkohsang nan dewetail kan ma sohte anahnepe ni ahnsou me koul ehu pahn wiawi nan atail mihting en Kristian akan.
7 Mie pil ehu ahl me kitail kak kasalehda atail kin kesempwalki atail koulen kaping kan. Nan mihting tohrohr kan, mie ngilen keseng kin wiawi mwohn prokram pahn tepida. Pak riau nan sounpar ehu, brother oh sister kei sang nan sampah pwon kin pein pwain irail kohla Patterson, New York, pwehn wiahda ngilen keseng kaselel kan ong atail kaudok. Ihme kahrehda, ni ahnsou me soun pakair pahn luke kitail en kohla mwohndi nan dewetail kan oh rong dahme sounkeseng kan kaunopada, kitail anahne wia met. Atail pahn wia met pahn sewese kitail en kaunopada atail mohngiong ong soahng kan me pahn wiawi.—Esra 7:10.
8 Ehu oaralap en koul kapw ko iei “Wehio Mihier nan Dewe—En Pweida!” Koul wet, kohda nan mihting en Watch Tower Society me ahpwtehn neko, e wiawihda pwehn wia kilelepen Wehio eh sounparehr 100.
9 Koul kapw pwukat uhdahn “mehkot mwahu” ehu sang rehn Siohwa. (Mad. 12:35a) Kitail en koasoanehdi teng en esehla koul kapw pwukat oh kouliki sang nan atail mohngiong, kihong kaping me konehng oh wahu ong atail Koht!—Mel. 147:1.