Doadoahngki Kisin Pwuhk Rohng Mwahu
1. Ia mwomwen kisin pwuhk Rohng Mwahu eh wiawihda?
1 Nin duwen me kitail koasoiapenehr nan Atail Doadoahk ong Wehio nan sounpwong en July, ehu dipwisou kesempwal nan neitail koakon en kasukuhl iei kisin pwuhko Rohng Mwahu Sang Rehn Koht! Mie iren Paipel kan me kileldi oh sohte kasalehda lepin lokaia kan, pwehki tohnihmwo en perenki sukuhlki ni eh pahn pein pahkala oh wadek nan Paipel. Mendahki pali laud en neitail pwuhken onop kan wiawihda ni ahl ehu me emen me wadek kak pein sukuhlki, ahpw kisin pwuhk wet wiawihda pwe koasoakoasoipene en wiawi nanpwungen sounpadahk men oh tohnsukuhl men. Ihme kahrehda, ni ahnsou me kitail kihla kisin pwuhk wet, kitail en pil song en kamwomwada wiepen onopki kisin pwuhk wet pwe tohnihmwo en kak kilang uwen kaperen en sukuhlki rongamwahu kan me mi nan Paipel.—Mad. 13:44.
2. Ia duwen atail kak doadoahngki kisin pwuhk Rohng Mwahu ni ahnsou me kitail tepin tuhwong emen?
2 Tepin Tuhwong Emen: Ele ke pahn nda: “I pwarodo pwehki aramas akan kin medemedewe dahme pahn wiawiong tohnsampah. Ia omw madamadau, ke medewe me irair en sampah wet pahn mwahula? [Mweidohng tohnihmw en sapeng.] Paipel kin audaudki rohng mwahu me kak kihong kitail koapworopwor. Iet ekei peidek kan me Paipel sapengala.” Kihong tohnihmwo kisin pwuhko, oh mweidohng en pilada ehu peidek ni tihnsewen pwuhko. Kowe eri kamwomwada mwomwen onop doadoahngki keieun parakrap nan iren mehn kasukuhl me e piladao. Pil ehu me ke kak wia iei kalelapak rehn tohnihmwo ire ieu me ke piladahier, kowe eri kamwomwada ia duwen kisin pwuhk wet eh kak sewese ih en rapahkihda pasapeng en Paipel. Ma iren mehn kasukuhlo pahrekiong ehu oaralap en kisin kasdo mwotomwot nan jw.org, ekei sounkalohk kan kin kasalehda kasdo.
3. Menlau kawehwehda ia mwomwen omw pahn wia onop doadoahngki kisin pwuhk Rohng Mwahu.
3 Ia Mwomwen Omw Pahn Wia Onop: (1) Wadek peidek kan me kileldi ni mesen nting laud kan me toantoal pwehn sewese tohnihmwo en medemedewe ire kesempwalo. (2) Wadek parakrap kan me mi pah. (3) Wadek iren Paipel kan me kilel pangapang, oh doadoahngki peidek kan ni kadek pwehn sewese tohnihmwo en kilang ia duwen iren Paipel pwukat eh sapengala peideko me kileldi. (4) Ma mie ehu parakrap pahnangin peideko, pwurehng wia kahk 2 oh 3. Ma mie ehu kisin kasdo mwotomwot me pahrekiong peideko oh ma ke saikinte kasalehiong tohnihmwo, wia met erein amwa onopki iren mehn kasukuhlo. (5) Kaimwisekihla ni omw pahn kalelapak rehn tohnihmwo eh pasapeng me pid peideko me kileldi pwe ken ese ma e uhdahn wehwehki.
4. Dahme pahn sewese kitail en koahiekla doadoahngki mehn doadoahk kesempwal wet?
4 Song en ahnla doadoahngki mehn doadoahk kesempwal wet. Doadoahngki ahnsou koaros me konehng. Mwohn ehuehu onop, medewe duwen tohnsukuhlo oh ahl me keieu mwahu en kasukuhlih ni omw pahn doadoahngki iren Paipel kan nan iren mehn kasukuhlo. (Lep. Pad. 15:28; Wiewia 17:2, 3) Ni omw pahn koahiekla, ele ke pahn diarada me kisin pwuhk wet pahn iang wia ehu mehn doadoahk kan me ke kin perenki en doadoahngki pwehn padahkihong aramas akan me mehlelo!