Kalaudehla Atail Koahiek nan Doadoahk en Kalohk—Kaiahnehda Tohnsukuhl en Paipel kan en Kakairada Koasoandi Mwahu en Onop

Dahme Kahrehda E Kesempwal: Pwe en kak kekeirda eh nanpwungmwahu rehn Koht oh koahiekla, tohnsukuhl en Paipel kan anahne audehkihda ar madamadau oh mohngiong kan padahk loal kan ah kaidehn ihte padahk mengei kan me kohsang Mahsen en Koht. (Ipru 5:12–6:1) Onop kin anahne en doadoahk laud. E kin pidada atail kin kapatahiong dahme kitail eseier ong ire kapw kan oh dehdehki kamwahupe. (Lep. Pad. 2:1-6) Ni arail pahn sukuhlki en pein wia arail roporop, tohnsukuhl en Paipel kan pahn kak sapengala peidek kan en Paipel ni ar doadoahngki neitail sawaspen Paipel kan. Arail nantihong kapwaiada dahme irail sukuhlkier pahn kaunopada irail en kesihnenda teng ong kahpwal kan me re pahn lelohng nin duwen Kristian kei.—Luk 6:47, 48.

Ia Duwen Omw Pahn Wia Met:

Kasansalehda kesempwalpen en rapahki sapwellimen Siohwa sawas ni kapakap mwohn ehuehu ahnsoun onop.—Sohn 14:26; 1 Kor. 2:10.
Sang nin tapio, kangoange tohnsukuhlo en kin kaunopada mwohn amwa pahn wia onop en Paipel. Kasalehiong noumw pwuhk me kumwa kin onopki, oh padahkihong ih ia duwen eh pahn lainihala de kasalehda lepin lokaia me kesempwal nan ireo.
Kangoange noumw tohnsukuhlo en kin sapeng ni pein eh lokaia. Song dehr wia soangen onop me sohte kaperen me ihte kihda peidek oh tohnsukuhlo kin ihte wadek eh pasapeng kan inensangte nan pwuhko.
Kangoange noumw tohnsukuhlo en kin wadek ekei ire kan nan Paipel rahn koaros. Kasalehiong ih koasoandi en wadawad en Paipel nan jw.org, me kasalehda ahl me keieu mwahuong ih en wia met. Anahne emen en tengediong kakairada tiahk en wadawad en Paipel rahn koaros, ahpw eh kin nannanti wia met uhdahn mie katepe.—Mel. 1:2, 3.
Kasalehiong noumw tohnsukuhlo ia duwen eh pahn kak diarada pasapeng kan sang nan Paipel ni eh doadoahngki Watchtower Library de Watchtower ONLINE LIBRARY. Sewese ih en kasawihada mesen nting kan me kasalehda mehnia pwuhk kan me kin kalapw kadoadoahk nan mihting en mwomwohdiso kan.

Song Wia Met Erein Sounpwongo:

Mwurin ehu oaralap de sawaspen oaralap ehu, peki rehn noumw tohnsukuhl en Paipelo en oaralapihada ni mwotomwot dahme e ahpwtehn onopki. Ma sohte noumw tohnsukuhl, praktis en oaralapihada ehu koasoi en Paipel de ehu parakrap sang nan Kahn Iroir pwehn kamwahwihala omw wehwehki dahme ke wadewadek.