Iren Sawas kan ong Doaropwehn Kasukuhl ong Mihting en Mour oh Kalohk
August 7-13
SOAHNG KESEMPWAL KAN SANG MAHSEN EN KOHT | ESEKIEL 28-31
“Siohwa Ketin Katingih Wehin Likih Ehu”
it-2-E 1136 par. 4
Dair
Ohlahn Kahnimwo. Erein Nepukadnesar kapilpene Dair ni ahnsou werei, moangen nah sounpei ko “madkihda” arail lisoarop mete kan ar kin iris moangarail ko, oh pwopwarail ko “ohkihla” ar wahda wisik toutou kan me re doadoahngki ong kauwehla kahnimwo. Pwehki Nepukadnesar sohte mwahn paieki mehkot sang eh doadoahk laudo nin duwen emen me Koht ketin doadoahngki pwehn kadeikada Dair, Siohwa ketin inoukihda me e pahn ketikihong ih pai kan en Isip. (Ese 29:17-20) Soupoad en Suhs, Josephus, nda me mehn Papilon kan kapilpene Dair erein sounpar 13 (Against Apion, I, 156 [21]), oh re doadoahngkihla soahng tohto oh ahnsou laud ong met. Poadopoad teikan sohte uhdahn kasalehda ni pisetik ia uwen laud en Nepukadnesar eh wia met. Ahpw ele kamakamalahn mehn Dair kan inenen tohto oh ohlahn arail wasao uhdahn laud.—Ese 26:7-12.
it-1-E 698 par. 5
Isip, Mehn Isip
Ehu nting en Papilon me wiawihda ni pahr 37 en kaundahn Nepukadnesar (pahr 588 mwohn Krais), koasoia duwen Papilon eh uhwongada Isip. Kitail sohte kak nda ma met pidada arail uhdahn kalowehdi Dair de e pidada mahwen ehu me wiawi mwurin mwo. Mendahki met, Nepukadnesar ale pai kan en Isip nin duwen pweipwei ehu sang Siohwa sang ni Siohwa eh ketin doadoahngki ih en kadeikada Dair, me wia imwintihti en sapwellimen Koht aramas akan.—Ese 29:18-20; 30:10-12.
g86-E 11/8 27 par. 4-5
Daksis kan Koaros Anahne Pweipweila?
Pwehn sapengala met, kitail kak medewehla duwen Sounkapikadao eh ketin pwainla pweipwand ehu ong sahpis me koperment ehu wiahda. Sapwellimen Siohwa engieng me pwung me kahrehda en ketin koasoanehdi en kasohrehla kahnimw en Dair. Pwehn kapwaiada met, Koht ketin doadoahngki karis kehlail en Papilon me mi pahn kaundahn Nepukadnesar. Mendahki Papilon kana, re doadoahngkihla soahng tohto oh ahnsou laud ong met. Ihme kahrehda Siohwa ketin pehm me re anahne ale pweinen sahpis me re wiahdao. Sapwellime mahsen kan pwarada nan Esekiel 29:18, 19: “Kowe, nein aramas, Nepukadnesar, nanmwarkien Papilonia mahweniongehr Dair. . . . ahpw nanmwarkio de sapwellime karis sohte mwahn paieki mehkot sang ar doadoahk laudo. Eri, iet me ngehi KAUN-O, Wasa Lapalahpie, ketin mahmahsanih: ‘I pahn ketikihong Nanmwarki Nepukadnesar wehin Isip. E pahn kulihasang dipwisou kan oh kauwehla oh ketikihsang kepwe kesempwal koaros pwehn pwainkihla en sapwellime karis kan ar doadoahk.’”
Tohnsukuhl en Paipel kan ese me Nepukadnesar aklapalap, roporop, oh kin kaudokiong koht likamw kan. Me tohto ese me Papilon oh eh karis kan kin kaloke irail kan me re salihedi. Siohwa sohte ketin kupwurki soangen wiewia wet, ahpw ong ih pweipwand ehu wia pweipwand ehu, oh e ketin pwainla pwon pweipwando.
Raparapahki Soahng Kesempwal kan Sang Mahsen en Koht
it-2-E 604 par. 4-5
Unsek
Me tepin dipadao oh nanmwarki en Dair. Dipen aramas oh soh unsek wiawi mwurin dihp oh soh unsek wiawi nanleng, nin duwen me Sises mahsanih nan Sohn 8:44 oh nin duwen me Senesis irelaud 3 kasalehda. Koulo me kileldi nan Esekiel 28:12-19, mendahki met ong “nanmwarkien Dair,” kasalehda duwen dahme sapwellimen Koht tohnlengo me tepin dipadao wia. Koulo eh ndahki aklapalap en “nanmwarkien Dair,” eh wiahkin ih ‘koht men,’ “tohnleng kamasepwehk men,” oh duwen “Ihden, sapwellimen Koht mwetuwel,” uhdahn pahrekiong dahme Paipel mahsanihki Sehdan me Tepilo, me aklapalapala, wia serpento nan Ihden, oh “koht suwed en sampah wet.”—1Ti 3:6; Se 3:1-5, 14, 15; Kau 12:9; 2Ko 4:4.
Nanmwarkien Dair, me mihmi nan kahnimwo, suweiki me e “inenen kaselel,” “kupwurokong oh sileng mwahu” [lokaiahn Ipru, ka·lalʹ] oh e kin “wiewia mwahu [lokaiahn Ipru, ta·mimʹ]” sang ni eh kapikipikdao lao e tepida wia me suwed. (Ese 27:3; 28:12, 15) Koulo nan Esekiel ele dokedoke kaun en Dair ko a kaidehn ongete nanmwarki men. (Pil kilang kokohpo me pid “nanmwarkien Papilon” nan Ais 14:4-20.) Me pid met, e kak pidada tepin nanpwungmwahu oh utuht me nanmwarkien Dair ahneki ong Nanmwarki Depit oh Solomon, ni Dair eh sawaskihda dipwisou kan ong kokoupen sapwellimen Siohwa tehnpas sarawi nan Nahna Moria. Eri nin tapio, sohte wiewia sapwung ehu me me lapalap akan nan Dair wiahiong sapwellimen Siohwa aramas ako, Israel. (1Na 5:1-18; 9:10, 11, 14; 2Kr 2:3-16) Ahpw nanmwarki kan mwurin mwo, sohla kin “wiewia mwahu” oh sapwellimen Koht soukohp Soel oh Eimwos, oh pil Esekiel kadeikada Dair. (Soe 3:4-8; Ei 1:9, 10) Likin duwepenehn wiewiahn “nanmwarkien Dair” oh sapwellimen Koht imwintihti me keieu laud, kokohpo pwurehng kasalehda ia duwen “mehn karasepe kaselel” oh “wiewia mwahu” ar kak kadoadoahk ni ahnsou kiste.
Dahme Wiawi Ong Ira?
NOP oh No iei ahd en poasen kaun en kahnimw en Isip riau nan Paipel me iei Mempis oh Depes. Nop (Mempis) dohki mwail 14 palieir en Cairo, ni keilen Pillap Nail. Kedekedeo, Mempis sohla wia poasen kaun en Isip. Ni tepin senturi 15 B.C.E., No (Depes) wiahla poasen kaun kapw, oh e mih mpen mwail 300 palieir en Mempis. Nanpwungen wasahn kaudok kan nan Depes iei ehu me ede Karnak, oh dene iei ihmw me keieu laud me wiawihkihda uhr kan. Depes oh iangahki ah imwen kaudok Karnak wiahla wasahn kaudokiong arail koht Amon, me kaun en koht en mehn Isip akan.
Mehnia kokohp nan Paipel me dokedoke Mempis oh Depes? Mahsen en kadeik kohwong Parao en Isip oh arail koht akan, ahpw mehlel koht lapalap en “No me iei Amon.” (Seremaia 46:25, 26) Pokon en aramas me kin pokonpene wasao pwe en kaudok pahn “kamakamala.” (Esekiel 30:14, 15) Oh met pweidahr. Dahme luhwen kaudok en Amon iei mohn wasahn kaudok me mweredier. Nan rahnwet, kahnimw en Luxor mi nan apali wasa me kahnimw en Depes mie mahso, oh ehu kisin kousoan pil kokouda ekis wasa. Ahpw, kahnimw en Depes ohlahr.
Ah duwen Mempis: ihte me luhluhwe iei wasahn sousou kan ong me melahr akan. Ohl emen me wia semen en Paipel Louis Golding koasoia: “Pahr epwiki kei dower powe mehn Arab akan kalowehdi Isip oh doadoaleki lapalahn wasa en dipwisou mwerpeseng en kahnimw en Mempis pwe en kauwekihda arail poasen kaun [Cairo] apali pillapo. Eri, pillap Nile oh sounkauwada kahnimw en mehn Arab akan, irail kanekehsang audepen kahnimwo me kahrehda wasa koaros—wasa me mahs kahnimw en Mempis kin mihie, solahr takai me pwarapwar kohwei pohn pwehl toantoal en wasao.” Met pwungiong kokohp en Paipel me mahsanih me “Mempis pahn wiahla sapwtehn ehu, mohn ihmw me aramas sohla pahn kousoan ie.”—Seremaia 46:19.
August 14-20
SOAHNG KESEMPWAL KAN SANG MAHSEN EN KOHT | ESEKIEL 32-34
“En Sounsilasilo Pwukoa Laud”
it-2-E 1172 par. 2
Sounsilasil
Nin Duwen Karasaras. Siohwa ketin kesepwilda soukohp kei me ni karasaras wia sounsilasil ong wehin Israel (Ser 6:17), oh ekei pak re kin koasoia duwen sounsilasil kan ni elen karasaras. (Ais 21:6, 8; 52:8; 62:6; Os 9:8) Soukohp pwukat me pil wia sounsilasil kei ahneki pwukoa en kehkehlikihong me suwed kan duwen kamwomwala me pahn wiawi, oh ma re sohte pweida ni arail wia met, re pahn pwukoahkihdi. Ei mehlel, ma aramas akan sohte men rong kehkehliko, pein irail me pwukoahki arail pahn mehla. (Ese 3:17-21; 33:1-9) Soukohp salelepek men sohte katepe duwehte sounsilasil maskun men de kidi me sohte kin ngong.—Ais 56:10.
w88-E 1/1 28 par. 13
Doulahte Kalohki Duwen Wehio
Soikala Pwukoahki Mehlahn Aramas
13 Pwukoahn sapwellimen Siohwa Sounkadehde kan en kehkehlikihong aramas akan duwen sapwellimen Koht kadeik me pahn wiawi kak pahrekiong dahme wiawi ni mwehin Esekielo. Esekiel wia sounsilepen Israel. Eh pwukoa iei en kehkehlikihong mehn Israel ko duwen arail pahn kamakamala ma re sohte uhdihsang arail wiewia suwed kan. Ma nin duwen sounsilepe men e sohte kapwaiada eh wia kehkehlik wet, aramas suwed kan pahn kamakamalahte, ahpw sounsilepeo pahn pwukoahki arail mehla pwehki e sohte nsenohki. Siohwa ketin kasalehda sapwellime pepehm ong kadeik wet: “I sohte kin kupwurperenki mehlahn aramas dipan. Ahpw en wiliakapwasang eh suwed pwe en mour. Mehn Israel kan, kumwail tokedihsang amwail wiewia suwed kan. Dahme kumwail men mehkihla?”—Esekiel 33:1-11.
Kolokol Omw Pepehm en Karuwaru
DAHME KAHREHDA ATAIL DOADOAHK EN KALOHK KESEMPWAL?
3 Ni omw kin medewe ia duwen atail doadoahk en kalohk eh kak doarehla mouren aramas, ke pahn pehm me e kesempwal oh karuwaru en padahkihong meteikan duwen rongamwahwo. (Rom 10:13, 14) Mahsen en Koht mahsanih: “Ma I padahkihong aramas suwed men me e pahn mehla, e ahpw tokedihsang dipe kan oh wia dahme pwung oh mwahu . . . e sohte pahn mehla, ahpw e pahn mourla. I uhdahn pahn mahkikihong dipe kan.” (Esek. 33:14-16) Paipel mahsanihong sounkalohki rongamwahwo kan: “Ke pahn doarehla pein kowe oh pil irail kan me kin rong uhk.”—1 Tim. 4:16; Esek. 3:17-21.
Raparapahki Soahng Kesempwal kan Sang Mahsen en Koht
w91 9/1 28 par. 16-17
Tang Uk Duwehte Weren Siohwa Nanleng
Dehr Pweiengki Soukautih
16 Esekiel pil wia karasepe mwahu ieu ki peik oh e sohte mweidong pein ih en pweiengki soukautih oh kapailok. Duduwehte kitail, ki atail dehdehki kekeiradahn lokaian min, kitail pahn wehwehki wasa Soundake were soupeidio wetla ie. Ihme kitail onopadahr on mwekidki sapwellime mahsen kan, kehlailda pwehn deh pweiengki soukauti de kapailok sang rehn irail me se kalohkihong sapwellimen Siohwa mahsen en kadeik. Duwehte on Esekiel, Koht ketin kehsehkin kitail duwen ekei aramas pahn uhwong, keptakai oh kakeluwak. Meteikan sohte men rongasang Siohwa. (Esekiel 3:7-9) Pil mie irail mwalaun akan, duwehte me Esekiel 33:31, 32 mahsanih: “Nei aramas akan ahpw kin pokonpene pwe re en rong dahme ke pahn ndahng irail, re ahpw sohte kin kapwaiada. Pwe kikamw tohr me re kin ndahda, eh re men katohtowehla nain mwohni. Irail kin wiahkin uhk sounkamwaitki koulen limpoak men, de sounkaseng arp men. Re kin rong ahmw lokaia kan, re ahpw sohte kin kapwaiada.”
17 Ia pahn imwio? Iretiketik 33 kapataihong: “Ahpw ahmw kokohp kan koaros ni ahr kin pweida—pwe re uhdahn pahn pweida—iei ahnsou me aramas pwukat pahn dehdehkihla me soukohp emen koukousoan rehrail.” Mahsen pwukat kasalehda duwen Esekiel e sohte pwangada pwehki sohte me men rong. Soukautih en meteikan sohte kahrehong ih en pil sohte nsenohki. Mendah ma aramas rong de soh, e peikiong Koht oh kapwaiada eh doadoahk.
Ni Karakarahk Uhpa Silepen Sihpw Limpoak kan
3 Kokohp en Aiseia 40:10, 11 kin kawehwe duwen epwel keneinei me Siohwa kin ketin wiahiong sapwellime aramas akan. (Melkahka 23:1-6) Erein Sises kin papah nin sampah, e kin pil kasalehda soangen epwel keneinei ohte ong sapwellime tohn padahk kan oh pil aramas akan koaros. (Madiu 11:28-30; Mark 6:34) Ira koaros, Siohwa oh Sises kin uhdahn ketin kupwursuwedkihla en sounapwalih de kaun en Israel kan ahr kin soh mahk oh keptakai, irail me sohla namenekki arail epwel suwed oh kaweid sapwungih nehrail sihpw kan. (Esekiel 34:2-10; Madiu 23:3, 4, 15) Siohwa ketin inoukihda: “I pahn doarehla nei pelin sihpwo oh I sohte pahn mweidohng en pwurehng lokolok pahmwail. I pahn wia kopwung ong emenemen nei sihpw. . . . I pahn kihong irail emen nanmwarkien me duwehte ei ladu Depit pwe en wiahla sileparail tehmen, oh en kin apwahpwalih irail.” (Esekiel 34:22, 23) Ni ahnsou wet en imwin rahn akan, Sises Krais me Depit kin mwete iei “silepen sihpw men” me Siohwa ketin idihada pohn Sapwellime ladu kan koaros pohn sampah, iei irail Kristian koaros me keikihdi ngehn sarawi oh pil “sihpw teikan.”—Sohn 10:16, NW.
August 21-27
SOAHNG KESEMPWAL KAN SANG MAHSEN EN KOHT | ESEKIEL 35-38
“Ni Ahnsou Keren Kok En Makok Pahn Kasohrala”
Peidek kan Sang Sounwadawad kan
Eri, ihs Kok en Makok? Pwehn sapengala peidek wet, kitail anahne rapahki nan Paipel pwehn diarada ihs me kin uhwong sapwellimen Koht aramas akan. Paipel sohte ihte mahsanih duwen uhwong me kohsang ‘Kok en Makok’ ahpw e pil mahsanih duwen uhwong me kohsang “nanmwarkien paliepeng” oh “nanmwarki kan en sampah.” (Esek. 38:2, 10-13; Dan. 11:40 (NW), 44, 45; Kaud. 17:14; 19:19) Ia duwe, uhwong pwukat wekpeseng? Soh. Paipel mahmahsanih duwen uhwongohte, ahpw ahd kan me e doadoahngki wekpeseng. Dahme kahrehda kitail kak ndahki met? Pwehki Paipel mahsanih me wehi koaros nin sampah pahn iang pidada nan kaimwiseklahn uhwong wet me pahn kahrehda mahwen en Armakedon en tepida.—Kaud. 16:14, 16.
Ni atail kapahrekihpene iren Paipel pwukat koaros duwen kaimwiseklahn uhwong me kohwong sapwellimen Koht aramas akan, e pahn sansalda me ahd wet Kok en Makok kin dokedoke miniminpene ehu en wehi kan, ahpw kaidehn Sehdan. Ia duwe, “nanmwarkien paliepeng” pahn kahluwa miniminpene en wehi pwukat? Kitail sohte kak uhdahn nda met. Ahpw madamadau wet mwomwen pahrekiong dahme Siohwa ketin mahsanihki duwen Kok. E mahsanih me Kok pahn mwekid sang ‘nan eh wasa ni paliepeng, kahre lapalahn karis kehlail en sounpei sang wehi tohto, oh irail koaros pahn dak oahs.’—Esek. 38:6, 14, 15.
Ia Duwen Koasoandi en Sampah Wet Eh Pahn Imwisekla?
8 Mwurin pelien lamalam likamw eh pahn kasohrala, sapwellimen Koht ladu kan pahn ahnekihte “meleilei oh onepek mwahu” oh ‘sohte kehl oh poadoarparail.’ (Esek. 38:11, 14) Dahme pahn wiawihong pwihn en aramas pwukat me kin kaudokiong Siohwa oh me mwomwen sohte pereparail? E mwomwen me “lapalahn karis” ehu pahn uhwongirailda. Mahsen en Koht kawehwehda me met iei uhwong ehu sang “Kok, . . . nan sapwen Makok.” (Wadek Esekiel 38:2, 15, 16.) Ia atail pepehm ong uhwong wet?
9 Kitail ese me uhwong pahn wiawihong sapwellimen Koht aramas akan ahpw met sohte pahn kahrehiong kitail en nohn pwunod. Kasarawihlahn mwaren Siohwa oh kadehdehdahn sapwellime pwuhng en kaunda kesempwal sang ma kitail pahn mourla. Siohwa ketin mahsanih tohtohsang pak 60: “Kumwail pahn anahne ese me ngehi iei Siohwa.” (Esek. 6:7, NW) Kitail uhdahn men kilang ia duwen ire kesempwal wet nan ahn Esekiel kokohp eh pahn pweida. Oh kitail likih me “Kaun-o ketin mwahngih kapitasang me poadidi kan nan ar apwal akan.” (2 Pit. 2:9) Ni ahnsowohte, kitail men wia uwen atail kak koaros pwehn kakehlahda atail pwoson pwe kitail en kak kolokol atail lelepek ong Siohwa, sohte lipilipil dahme kitail anahne dadaur. Dahme kitail anahne wia? Kitail anahne kapakap, onopki oh doudouloale Mahsen en Koht oh padahkihong meteikan rohng en Wehio. Met pahn sewese kolokolte atail koapworopwor en mour soutuk en kehlail. Koapworopwor wet pahn duwehte “peipwung ehu,” de angke ehu me kin sewese kitail en lelepekohngete Koht.—Ipru 6:19; Mel. 25:21.
Met Kumwail Wialahr Sapwellimen Koht Aramas akan
16 Mwurin kasohrlahn Papilon Lapalap, uhwong laud pahn wiawihong sapwellimen Koht aramas akan. Kitail pahn anahne Siohwa en ketin pere kitail pwe kitail en pitla. Ni ahnsou me e ketin pilada, Siohwa pahn ketin kaweid koasoandi kan nin sampah, me pahn kahrehda uhwong laud en wiawiong sapwellime aramas akan. Met pahn tapiada imwilahn “kahn kamakam kowahlap” me iei Armakedon. (Mad. 24:21, NW; Esek. 38:2-4) Ni ahnsowo, Kok pahn mahweniong aramas akan me “kohpene sang nan wehi kan.” (Esek. 38:10-12) Ni met eh pahn wiawi, Siohwa pahn ketin mwadangete kauhdi oh kapitala sapwellime aramas akan oh ketin mahweniong Kok oh nah karis kan. Siohwa pahn ketin kasalehiong wehi koaros sapwellime pwuhng en kaunda oh kasarawihala mware. E ketin mahsanih: “Ih duwen met ei pahn kasalehiong wehi koaros me I me manaman oh sarawi. Irail pahn esehla me ngehi iei KAUN-O.”—Esek. 38:18-23.
Raparapahki Soahng Kesempwal kan Sang Mahsen en Koht
Sukuhliki Oh Padahki Duwen Tiahk Mwakelekel En Kristian
12 Wahnpoaron Pohl kasansalehda duwen ehu kahrepe kesempwal ong kitail en sukuhliki oh wia tiahk mwakelekel me kitail kin sukuhliki nan Paipel. Tiahk sapwung kan en mehn Suhs akan kin kauwehla mwaren Siohwa: “Ke kin suweiki omw ahneki Kosonned en Koht—a ia duwe, ke sohte kin kihsang waun Koht ni omw kin kauwehla sapwellime kosonned? Pwe Pwuhk Sarawi mahsanih, ‘Pwehki kumwail mehn Suhs akan me mwaren Koht wiemwahlkilahr rehn mehn liki kan.’” (Rom 2:23, 24) E pil pahn duwehte nan atail ahnsou—ma kitail sohte pahn katapanki tiahk mwakelekel me Kristian kan anahne kasalehda, kitail kin kauwehla mwaren Siohwa me kin wia Utupen koasoandi en tiahk mwakelekel kan. Ahpw, ma kitail pahn kolokol oh kapwaiada sapwellimen Koht koasoandi kan, met pahn kawahuwih Ih. (Aiseia 52:5; Esekiel 36:20) Ahmw kin wehwehki duwen met, pahn kak kakehlailih iuk en powehdi kasongosong kan me ke kin lelohng de ke pahn kak liksang irair akan me e pahn mengei ong uhk en pohnsehsehla tiahk mwahu en Kristian kan. Oh pil, sapwellimen Pohl mahsen kan kin pil padahkiong kitail duwen mehkot kesempwal. Laudsang ahmw kin pein wehwehki me ahmw tiahk kin kak kapinga Koht de soh, nin duwen ke kin padahkiong aramas teikan, sewese irail en wehwehki ni arail kin kapwaiada koasoandi en tiahk mwakelekel kan, met pahn wahdohng Siohwa kaping. Tiahk en Kristian akan sohte kin ihte kahrehong emen en nsenamwahu oh perehla pali roson en paliwar. E pil kin kawahuwih Ih me kin ketikihda koasoandi mwahu pwukat oh pil kin kangoange kitail en wia tiahk mwakelekel.—Melkahka 74:10; Seims 3:17.
w88-E 9/15 24 par. 11
‘Wehi kan Ahpw Pahn Esehla me Ngehi, Siohwa’
11 Mwurin luhwen mehn Israel ko ar pwurala Suda, sahpwo me sapwtehnla mahso duwelahr “mwetuwel en Ihden.” (Wadek Esekiel 36:33-36.) Duwehte met, sangete pahr 1919 Siohwa ketin kawekila irair en luhwen me keidi kan, me mwomwen tehnla, ong irair en popohl oh minimin me rasehng paradais me wie kekeirda oh me met “pokon kalaimwun” pil iang paieki. Pwehki irair en popohl oh minimin me rasehng paradais eh direkihla aramas sarawi kan, Kristian kan en doadoahk laud pwehn kolokol en mwakelekelte.—Esekiel 36:37, 38.
August 28–September 3
SOAHNG KESEMPWAL KAN SANG MAHSEN EN KOHT | ESEKIEL 39-41
“En Esekiel Kaudiahl en Tehnpaso oh Kowe”
“Koasoanehiong Mohngiongomw Pohn” Sapwellimen Koht Tehnpas Sarawi!
16 Kitail en pwurehng tehk kasansal ong pasepengpen peidek wet. Esekiel ntingihdi: “Nan kaudiahlo Koht ketikiniehla nan wehin Israel oh ketikiniehdi pohn nahna ile ehu. I ahpw kilangada ihmw kei mwohi me likamwete kahnimw ehu.” (Esekiel 40:2) Wasao nan kasansal wet, “nahna ile ehu,” kin katamankihong kitail duwen Maika 4:1: “Ni rahn akan me pahn kohdo dohl me Tehnpas Sarawien Kauno [“Siohwa,” NW] uhda powe pahn wiahla dohl me keieu ile nanpwungen dohl kan; e pahn sikdahsang dohl koaros. Wehi tohto pahn pokondohng ie.” Iahd kokohp wet pahn pweida? Maika 4:5 kin kasalehda me pweidahn kokohpo kin tepida ni ahnsou me wehi kan kin kaudokiong koht likamw akan. Ni mehlel, nan atail ahnsou, “ni imwin rahn akan,” kaudok min koukouda, oh pwurehng onehda sapahlda nan mouren sapwellimen Koht ladu kan.
Ire Kesempwal akan Sang nan Pwuhken Esekiel—II
40:3–43:17—Ia ire kesempwal en sosohng en tehnpas sarawio? Sosohng en tehnpas sarawio kin wia kilel ehu me kupwuren Siohwa me pid duwen kaudok min pahn uhdahn pweida.
Ire Kesempwal akan Sang nan Pwuhken Esekiel—II
40:14, 16, 22, 26. Tuhke pahm kan me perperda ni dihd me sohpeilahng wasahn alu kin kasalehda me ihte aramas akan me kin kolokol tiahk mwakelekel kak ale mweimwei en pidelong. (Melkahka 92:12) Met kin padahkiong kitail me Siohwa pahn ketin kupwurperenki atail kaudok ihte ma kitail kin mwakelekel.
Raparapahki Soahng Kesempwal kan Sang Mahsen en Koht
w12-E 9/1 21 par. 2
‘Wehi kan Ahpw Pahn Esehla me Ngehi, Siohwa’
Siohwa mahsanih: “I . . . sohte pwurehng mweidohng mwarei en sohla wauwi.” Ni aramas akan ar kapwukoahki ih wiewia sapahrek kan, re kin sohla kawauwih mwareo. Ia duwen? Nan Paipel, ‘mwar’ kin kalapw dokedoke ahn emen eh wiewia kan. Ehu pwuhk kasalehda me mwaren Koht kin dokedoke “dahme kitail ese duwen ih; e pil dokedoke sapwellime ndand, oh wahu.” Mwaren Siohwa kin pidada sapwellime wiewia kan. Ia sapwellimen Siohwa pepehm me pid wiewia sapahrek? E ketin kalahdeki! E pil kin ketin poakehla irail kan me lelohng met. (Eksodus 22:22-24) Ni aramas akan ar kin kapwukoahki Koht soahng kan me e ketin kalahdeki, re kin kauwehla mwareo. Re kin ‘mwamwahliki mwareo.’—Melkahka 74:10.
w89-E 8/15 14 par. 20
Kaunopada ong Mour nan Paradais
20 Ahpw dahme pahn wiawihong dipwisoun mahwen kan koaros? Me pid karasaras en ia uwen werei en kesehla dipwisoun mahwen pwukat, e pahn inenen laud. (Esekiel 39:8-10) Irail kan me pitsang Armakedon pahn kak doadoahngki luhwen dipwisoun mahwen ko ong soahng kan me mie katepe.—Aiseia 2:2-4.