Iren Sawas kan ong Doaropwehn Kasukuhl ong Mihting en Mour oh Kalohk
August 6-12
SOAHNG KESEMPWAL KAN SANG MAHSEN EN KOHT | LUK 17-18
“Kasalehda Kalahngan”
nwtsty-E mehn onop kan ong Lu 17:12, 14
ohl tokutok ehk: Ni ahnsou kan nan Paipel, me tokutok kan kin pokonpene de kousoanpene ni pwihn, pwe ren kak sewese emenemen. (2Na 7:3-5) Sapwellimen Koht kosonned koasoanehdi me me tokutok kan pahn kin tohrohrala. Aramas tokutok men pil anahne pakairkihong meteikan ni eh pahn kohla wasa re mi ie oh pahn kin liklikwerseli, ndinda: “Samin, samin!” (Lip 13:45, 46) Nin duwen me kosonnedo koasoanehdi, me tokutok kan uh dohlahsang Sises.—Kilang mehn onop ong Md 8:2 oh Kawehwehn Lepin Lokaia kan, “Tokutok; Me tokutok.”
kohla kasalehiong samworo kan pein kumwail: Pwehki Sises Krais mi pahn kosonnedo ni eh ketiket sampah, e ketin pohnese me pwukoahn samworo ong peneinei en Aron wie manamante, oh e ketin kaweid irail me tokutok kan me e ketin kamwahwihala ren kohla rehn samworo. (Md 8:4; Mr 1:44) Nin duwen Kosonned en Moseso, samworo men anahne kasawih me me tokutoko mwahulahr. Me tokutok mwahulahro eri pahn seiloakla ni tehnpas sarawio wa mehn meirong de kisakis en menpihr mwakelekel momour riemen, rahntuhkehn sidar, likou weitahta, oh isop.—Lip 14:2-32.
w08-E 8/1 14-15 par. 8-9
Dahme Kahrehda Kitail en Kasalehda Kalahngan?
Sises kin ketin pohnsehsehla en meteikan ar sohte kin kasalehda kalahngan? Irehu pousehlahte koasoia: “Sises ketin sapeng mahsanih: ‘Kaidehn koaros meh ehk me mwakelekelda? Eri, ia meh duwemeno? Sohte emen me pwurodo likin ohl menet me kohsang ehu wehi tohrohr pwehn kalinganahda Koht?’”—Luk 17:17, 18.
Me tokutok duwemen teiko kaidehn ohl suwed kei. Mwohn mwo, irail kasaledahr ni mehlel ar pwoson Sises oh men peikiong sapwellime kaweid kan, me iangahki seiloakla Serusalem pwe ren kasalehiong pein irail samworo kan. Ahpw, mendahki arail uhdahn pehm me re kalahnganki laud sapwellimen Sises wiewiahn kadek, irail sohte kasalehda arail kalahngan ong ih. Mwomwarail ko kansensuwedihada Krais. A ia duwen kitail? Ni ahnsou me emen kin wia mwahu ong kitail, kitail kin mwadangete nda kalahngan oh, ma konehng, kitail kin kasalehda kalahngan sang ni atail ntingihada kisin likou ehu oh kadarala reh?
Raparapahki Soahng Kesempwal kan Sang Mahsen en Koht
nwtsty-E mehn onop ong Lu 17:10
soh katepe: Ni lokaiahn Krihk, “sohte katepe, sohte wede.” Sises sohte ketin padahngki nan karasaraso me ladu ko de sapwellime tohnpadahk ko en medewe me sohte kateparail de sohte wadarail. Nan ireo, “sohte katepe” kin wehwehki me ladu ko pahn medewehki pein irail ni lamalam en aktikitik oh dehr medewe me irail warohng ale kaping. Ekei semen kan kin medewehki lepin lokaia pwukat nin duwen ehu soangen karasaras me wehwehki “se wiahte ladu kei me sohte anahne aramas en tehk.”
nwtsty-E mehn onop ong Lu 18:8
pwoson wet: De “soangen pwoson wet.” LK, “pwoson.” Ni lokaiahn Krihs, mie ehu lepin lokaia me mi mwohn lepin lokaia “pwoson” oh met kasalehda me Sises ketin mahmahsanih kaidehn soangen pwoson sohte lipilipil, ahpw soangen pwoson tohrohr ehu me duwehte ahn liohdio nan sapwellime karasaraso. (Lu 18:1-8) Met pahn pil pidada ahneki pwoson kehl en kapakap oh pil ahneki pwoson me Koht pahn ketin wiahiong pwung pahrek en wiawihong sapwellime me pilipildahr kan. Ni sansal, Sises sohte ketin sapengala peideko duwen pwoson pwe sapwellime tohnpadahk kan en medewe duwen irair en arail pwoson. Karasaras duwen kapakap oh pwoson me keieu konehng pwehki Sises ahpwtehn mahmahsanih duwen kasongosong kan me sapwellime tohnpadahk ko pahn lelohng.—Lu 17:22-37.
August 13-19
SOAHNG KESEMPWAL KAN SANG MAHSEN EN KOHT | LUK 19-20
“Sukuhlkihsang Karasaras en Mina Eiseko”
jy-E 232 par. 2-4
Sapwellime Karasaras en Mina Eiseko
E ketin mahsanih: “Ohl soupeidi men seiloakla sahpw doh ehu pwe en ale manaman en nanmwarki oh pwurodo.” (Luk 19:12) Soangen seiloak wet anahne ahnsou laud. E sansal me Sises iei “Ohl soupeidi men” me ketin seiloakla “sahpw doh” ehu, ketidahla nanleng, wasa me Semeo pahn ketikihong ih manaman en nanmwarki.
Nan karasaraso, mwohn ‘Ohl soupeidio’ eh mweselda, e ketin ekerodo ladu ehk oh ketikihong emenemen irail mina silper ehu, mahsanihong irail: “Wia pesineski mepwukat lao I pwurodo.” (Luk 19:13) Uhdahn mina silper kan iei mwohni kesempwal kei. Uwen mina ehu kin pahrekiong pweinen doadoahk en soumwet men ong sounpwong siluh.
Tohnpadahk ko ele wehwehkihda me irail duwehte ladu ehko nan karasaraso, pwe Sises ketin karasahiongirailehr duwehte tohndoadoahk en dolung wahnsahpw kan. (Madiu 9:35-38) Ahpw e sohte peki irail en dolungada oh wahdo wahn krein kan. Pwe, doadoahk en dondol pil kin pidada tohnpadahk teikan me kak diarada wasa ehu nan Wehin Koht. Tohnpadahk ko doadoahngki kepwe kan me re ahneki pwe ren kadirehla irail me pahn sohsohki Wehio.
jy-E 232 par. 7
Sapwellime Karasaras en Mina Eiseko
Ma tohnpadahk ko wehwehkihda me irail duwehte ladu ko me doadoahngki arail kepwe kan ni uwen arail kak pwe ren katohtohwehla tohnpadahk kan, eri re kak kamehlele me Sises pahn ketin kupwurperenki. Oh re kak likih me e pahn ketin katingih soangen doadoahk ngoang wet. Ahpw ni mehlel, kaidehn sapwellimen Sises tohnpadahk kan koaros ahneki mour me duwepenehte, de ahneki irair tehieu de koahiek tehieu. Ahpw Sises, me ketikiher “manaman en nanmwarki” pahn ketin pohnese oh kapaiahda arail doadoahk laud en wia katohnpadahk ni loalopwoat.—Madiu 28:19, 20.
jy-E 233 par. 1
Sapwellime Karasaras en Mina Eiseko
Pwehki emen nanpwungen ladu ko sohte doadoahk pwehn kalaudehla en eh soumaso kepwe kan nan eh wehi, ladu menet katihasang eh pai. Wahnpoaron ko kin kasikasik sapwellimen Sises kaunda nan Wehin Koht. Eri sang ni dahme e ketin mahsanihki duwen ladu menet, irail wehwehkihda me ma re sohte ngoangki doadoahk, re sohte pahn diarada wasa ehu nan Wehio.
Raparapahki Soahng Kesempwal kan Sang Mahsen en Koht
nwtsty-E mehn onop ong Lu 19:43
kehl tuhke kengkeng: De “kehl me wiawihkihda tuhke kan.” Lepin lokaiahn Krihk, khaʹrax pwarada wasahtte nan Palien Paipel ni Lokaiahn Krihk. E kawehwehdi nin duwen “tuhke kengkeng de uhr pwoat me kadoadoahk pwehn kelepene wasa ehu; tuhke” oh pil nin duwen “wasahn sounpei me pid doadoahngki tuhke; kehl me wiawihkihda tuhke kan.” Mahsen en Sises pweida nan pahr 70, ni ahnsou me Titus kaweidki mehn Rom kan ren kauwada kehl, kehl me wiawihkihda tuhke kan me pidakihpene Serusalem. Titus ahneki mehn akadei siluh, iei en irehdi mehn Suhs ren dehr tang, oh en kangoange irail en pekmahk rehn mehn Rom, oh kaduhpekihla tohnkahnimwo pwe ren mihla pahn arail manaman. Pwehn kihda kepwehn kokoudahn kehl wet me pidakihpene Serusalem, sounpei en mehn Rom kan pelehdihsang tuhkehn nan sahpwo.
nwtsty-E mehn onop ong Lu 20:38
pwe irail koaros kin momouriong ih: De “e ketin kilangwohng irail koaros nin duwen aramas mour.” Paipel kasalehda me irail kan me momour ahpw dohsang Koht, duwehte aramas mehla mwohn silangin Koht. (Ep 2:1; 1Ti 5:6) Pil duwehte, ladu kan me Koht kin ketin kupwurki me melahr, duwehte irail wie momour mwohn silangin Siohwa, pwehki kupwure me e pahn ketin kaiasada irail uhdahn pahn pweida.—Ro 4:16, 17.
August 20-26
SOAHNG KESEMPWAL KAN SANG MAHSEN EN KOHT | LUK 21-22
“Komourpamwail Kerendohr”
kr-E 226 par. 9
Wehin Koht Pahn Kasohrehla Eh Imwintihti kan
9 Mwekid kan en audepen lahng. Sises ketin kohpada: “Ketipin pahn rotala, oh maram pahn sohla linge, oh usu kan pahn pwupwudihsang nanleng.” Sohte aramas pahn kilangwohng kaunen pelien lamalam kan pwe ren ale marain—re solahr pahn wia aramas akan me kin kihda marain. Ia duwe, Sises pil mahmahsanih duwen kasansalda kapwuriamwei kan nanleng? Mwein e ketin wia met. (Ais. 13:9-11; Soel 2:1, 30, 31) Ia duwen aramas akan ar pahn mwekidki dahme re kilang? Irail pahn “lokolok” pwehki re “sehsehla dahme re pahn wia.” (Luk 21:25; Sep. 1:17) Ei, imwintihti en Wehin Koht koaros—sang ‘nanmwarki kan lel ladu kan’—pahn ‘lipwongmaskihla ar masak oh ar kasikasik soahng kan me pahn kohdo’ oh pahn tangala rukala. Ahpw re sohte pahn diar wasahn rukula me pahn itar en perehla irail pwe irail en pitsang engieng en atail Nanmwarkio.—Luk 21:26; 23:30; Kaud. 6:15-17.
Koasoanehdi Kumwail en “Dadaurete Amwail Limpoakpene nin Duwen Pirien Ehu”!
17 “Kitail eimah.” (Wadek Ipru 13:6.) Atail likih Siohwa pahn kihong kitail eimah pwehn dadaur pahn kahpwal laud kan. Soangen eimah wet kin sewese kitail en ahneki madamadau pwung. Oh ni atail kin ahneki soangen madamadau wet, kitail kak limpoakpene nin duwen pirien ehu sang ni atail kangoange oh kansenamwahwih riatail Kristian kan. (1 Des. 5:14, 15) Pil erein kahn kamakam kowahlapo, kitail kak eimah oh ese me komourpatail kerendohr.—Luk 21:25-28.
“Komourpamwail Kerendohr”!
13 Dahme kuht kan pahn wia ni arail esehda me re pahn sohrala? Re “pahn sengiseng.” (Mad. 24:30) Ahpw dahme me keidi kan oh me kin utung irail pahn wia? Re pahn wia dahme Sises mahsanih: “Ni mepwukat eh pahn tepida wiawi, kumwail uhda oh sarada, pwe komourpamwail kerendohr.”—Luk 21:28.
Raparapahki Soahng Kesempwal kan Sang Mahsen en Koht
nwtsty-E mehn onop kan ong Lu 21:33
Nanleng oh sampah pahn sohrala: Ekei iren Paipel teikan kin kasalehda me lahng oh sampah pahn mihmi kohkohlahte. (Sen 9:16; Me 104:5; Ekl 1:4) Eri sapwellimen Sises mahsen ko kak wia karasaras ehu. Met kin wehwehki ma mehkot me sohte kak wiawi ahpw wiawi, oh lahng oh sampah sohrala, sapwellimen Sises mahsen ko pahn pil pweidahte. (Pil kilang Md 5:18.) Ahpw lahng oh sampah nan ire wet ele kin dokedoke lahng oh sampah ni karasaras me adaneki “lahng en mahso oh sampah en mahso” nan Kau 21:1.
ei mahsen kan sohte mwahn pahn sohrala: De “ei mahsen pahn uhdahn sohte sohrala.” Lepin lokaiahn Krihk kan me kadoadoahk wasaht kin kasalehda pepehm en sapwungki madamadau ehu, oh kasalehda ni sansal me sapwellimen Sises mahseno me poatopoat.
Kumwail Pahn Wiahla “Wehi Ehu me Pahn Papah Ie nin Duwen Samworo”
15 Mwurin Sises eh ketin wiahda Sak en Soutik en Kauno, e ketin wiahda inou ehu me adaneki inou en Wehio ong sapwellime tohnpadahk lelepek ko. (Wadek Luk 22:28-30.) Weksang inou teiko, Siohwa sohte ketin iang mi nan inou wet. Inou wet wiawihda nanpwungen Sises oh me keidi kan. Ni Sises eh mahsanih “nin duwen Semei eh ketikihongieier manaman en kaunda wasa,” ele e mahmahsanih duwen inou me Siohwa ketin wiahda ong ih pwehn “wiahla samworo kohkohlahte, nin duwen koasoandien Melkisedek.”—Ipru 5:5, 6.
16 Wahnpoaron ehk emen lelepek ko kolokolte arail lelepek ong Sises erein kasongosong koaros me lelohng ih. Inou en Wehio inoukihda me wahnpoaron ko pahn mwohd nan mwoahl kan oh iang Sises kakaun nanleng nin duwen nanmwarki oh papah nin duwen samworo kei. Ahpw kaidehn meh ehk emen kohte me pahn ahneki pai kaselel wet. Sises ketin pwarohng wahnpoaron Sohn nan kaudiahl ehu oh mahsanih: “Me kin dadaurete lao powehdi me suwed koaros, I pahn mweidohng en iang mwohd limwahn mwoalei, duwehte ei mwohd limwahn mwoalen Semei ahnsou wet.” (Kaud. 3:21) Inou en Wehio wiawihda ong Kristian keidi 144,000 ko. (Kaud. 7:4; 20:6) Inou wet iei me mweidada irail en iang Sises kakaun nanleng. Met kin duwehte lih kamwohd men me pilipilda pwehn pwoudikihda nanmwarki men. Ni ara pwopwoudida, lih kamwohdo kakete iang nanmwarkio kaunda. Ni mehlel, Paipel kin kahdaneki me keidi ko sapwellimen Krais “lih kamwohdo,” “meipwon mwakelekel emen” me inoudahr pwehn pwoudikihda Krais.—Kaud. 19:7, 8; 21:9; 2 Kor. 11:2.
August 27–September 2
SOAHNG KESEMPWAL KAN SANG MAHSEN EN KOHT | LUK 23-24
“Kasalehda Diren Mahk ong Meteikan”
cl-E 297 par. 16
“En Ese Limpoak en Krais”
16 Ni unsek Sises ketin kasalehda sapwellimen Semeo limpoak ni ahl kesempwal ehu—e ketin kasalehda “diren mahk.” (Melkahka 86:5) Eh ketin kupwurki wia met pil sansal ni ahnsou me e ketin langalang nin tuhkehn kalokoloko. Ni ahnsou me Sises ketin pwoula ni ahl kanamenek ehu, oh lime oh aluweluwe kan eh poskihdi mete kan, dahme e ketin mahsanih? E likweriong Siohwa pwehn peki en ketin kaloke irail me pahn kemehla ih? Soh, pwe kaimwiseklahn eh mahsen ko iei: “Ipa, komw ketin mahkohng irail pwe re sehse dahme re wiewia.”—Luk 23:34.
g-E 2/08 11 par. 5-6
Koht Kin Ketin Mahkohng Dihp Laud kan?
Kaidehn dihpohte me Siohwa ketin tehk, ahpw pil madamadau oh pepehm en me dipadao. (Aiseia 1:16-19) Song medewehla loallap riemeno me langada limwahn Sises. Ira koaros wiahda dihp laud, pwe emen rehra wehkada: “Ata kadeik me pwung, pwe kita alehdi dahme kita warohng ong soahng kan me kita wiadahr, ahpw ohl menet [Sises] sohte wiahda sapwung.” En loallapo koasoio kasalehda me e ese mehkot me pid duwen Sises. Oh eh ese met kakete kahrehiong ih en wekidala eh madamadau oh pepehm. Met sansal sang dahme e koasoia mwuhro ni eh peki rehn Sises, patohwan: “Komw ketin taman ie ni omwi pahn ketilong nan sapwellimomwi Wehi.” Ia en Krais pasapeng ong pekipek ngidingid wet? “I ndaiong uhk ni mehlel rahnwet, ke pahn iang ie mi nan Paradais.”—Luk 23:41-43.
Eri medewehla duwen met: Kaimwiseklahn mahsen en Siseso nin duwen aramas emen pil kin kasalehda mahk kalahngan ong ohl emen me wehkada me e warohng kamakamala. Ia uwen met eh wia mehn kangoang! Eri, kitail kak kamehlele me Sises Krais oh Semeo, Siohwa, pahn kin ketin poakehla koaros me kasalehda koluhla mehlel, mendahki arail wiewiahn mahs kan.—Rom 4:7.
cl-E 297-298 par. 17-18
“En Ese Limpoak en Krais”
17 Ele pil ehu mehn kahlemeng en Sises duwen mahk me uhdahn sair mohngiongitail kak sansal sang dahme e ketin wiahiong wahnpoaron Piter. Kitail sohte kak peikasalki ma Piter uhdahn poakohng Sises. Ni Nisan 14, ni kaimwiseklahn pwohng en Sises mour, Piter patohwanohng: “Maing Kaun, I onopadahr en iangkomwihla nan imweteng oh iang pwoula.” Ahpw mwurinte awa kei, Piter kahmahmkihla me e ese Sises pak siluh! Ni kesilipak en eh kahmahmkihlao, Paipel padahkihong kitail dahme wiawi: “Kauno ahpw ketin pirekek oh sohpeidohng Piter.” Pwehki Piter toutoukihla uwen laud en dipeo, e “kohieila likio oh sengiseng kowahlap.” Mwuhr ni rahno ni Sises eh ketin pwoula, wahnpoarono ele medewe, ‘Ia duwe, ei Kauno mahkohng ie?’—Luk 22:33, 61, 62.
18 Piter sohte anahne awih ahnsou reirei pwehn ale pasapeng. Sises ketin iasada ni menseng en Nisan 16, oh e sansal me ni rahnohte, e pein ketila rehn Piter. (Luk 24:34; 1 Korint 15:4-8) Dahme kahrehda Sises ketin kasalehda soangen nsenoh ong wahnpoarono me kehlailen kahmahmkihla Ih? Ele Sises kupwurki kamehlelehiong Piter me koluhlahro me e ketin poakohngte ih oh e kesempwalte rehn eh Kauno. Ahpw Sises pil ketin wia laudsang met pwehn kamehlelehiong Piter duwen met.
Raparapahki Soahng Kesempwal kan Sang Mahsen en Koht
nwtsty-E mehn onop ong Lu 23:31
ni tuhkeo eh momour, . . . ni eh mengila: Mwomwen me Sises ketin mahmahsanih mehkot me dokedoke Wehin Suda. Ni karasaras, Suda duwehte tuhke ehu me wie momour ahpw kereniongehr mehla, pwehki Sises ketin mihmihte wasao iangahki mehn Suhs kan me kin pwoson ih. Ahpw Sises pahn kereniong kamakamala, oh mehn Suhs me lelepek kan pahn keikihdi sapwellimen Koht manaman oh wiahla kisehn Israel en Koht. (Ro 2:28, 29; Kal 6:16) Ni ahnsowo, wehin Israel pahn ni karasaras mehla, eri e rasehng tuhke mengila ehu.—Md 21:43.
nwtsty-E kilel oh kisin kasdo kan
Mete Ehu ni Tihn Keimwen Neh
Kilel wet iei kilel en tihn keimwen nehn aramas men me mete ehu me reireiki 11.5 cm (4.5 in.) doakoahdi. Meteo ni tiho dierekda nan pahr 1968, ahnsou kan me re weirada wasa kei ni paliepeng en Serusalem, oh met wiawihda ni mwehin Rom. Met kihda mehn kadehde sang rehn sounpoadopoad kan me mete kin kadoadoahk ni ahnsou me aramas kin kamakamala. Re kin katengehkihdi aramaso ni tuhke pwoat meteo. Mete wet duwehte mete kan me sounpei en Rom kan doadoahngki pwe ren katengehkihdi Sises Krais ni tuhkeo. Meteo ni tiho dierekda nan koakon ehu me wiawihkihda takai, me adaneki ossuary, mehkot me aramas kin kihong tih madekeng en aramas mehla men mwurin paliwereo eh mwerpeseng. Met kasalehda me emen me kamakamala pohn tuhkeo kak seridi.