Watchtower ONLINE LIBRARY
Watchtower
ONLINE LIBRARY
Ponapean
  • PAIPEL
  • SAWASEPEN PAIPEL KAN
  • MIHTING KAN
  • mwbr20 February pp. 1-6
  • Iren Sawas kan ong Doaropwehn Kasukuhl ong Mihting en Mour oh Kalohk

Sohte kasdo ong met

Kupwurmahk, mehkot sapwung en kihda kasdo

  • Iren Sawas kan ong Doaropwehn Kasukuhl ong Mihting en Mour oh Kalohk
  • Iren Sawas kan ong Doaropwehn Kasukuhl ong Mihting en Mour oh Kalohk—2020
  • Sawaspen Oaralap kan
  • February 3-9
  • February 10-16
  • February 17-23
  • February 24–March 1
Iren Sawas kan ong Doaropwehn Kasukuhl ong Mihting en Mour oh Kalohk—2020
mwbr20 February pp. 1-6

Iren Sawas kan ong Doaropwehn Kasukuhl ong Mihting en Mour oh Kalohk

February 3-9

SOAHNG KESEMPWAL KAN SANG MAHSEN EN KOHT | SENESIS 12-14

“Inou Lap Ehu me Pidada Kowe”

it-1-E 522 par. 4

Inou Lap

Inou Lap ong Eipraam. E sansal me inou lapo ong Eipraam tepidahr kadoadoahk ni ahnsou me Eipram (Eipraam) kotehla Iupreitis ni eh kohkohla Kenan. Kosonned en inou lapo wiawihda sounpar 430 mwuri. (Kal 3:17) Siohwa ketin mahseniongehr Eipraam ni ahnsou me e kin koukousoan nan Mesopodamia, nan Ur, sapwen mehn Kaldea kan, ni eh ketin mahsanihong en seiloaklahng sahpw ehu me Koht pahn ketin kasalehiong ih. (Wi 7:2, 3; Sen 11:31; 12:1-3) Eksodus 12:40, 41 (LXX) padahkihong kitail me ni imwin pahr 430 en arail mihmihkier nan Isip oh nan sapwen Kenan, ‘nin rahno,’ Israel me kalidulahr nan Isip eri kohkohla. Rahn me re pitla sang Isip iei ni Nisan 14, pahr 1513 Mwohn Krais ni rahn en Pahsohpao. (Eks 12:2, 6, 7) Met pahn mwomwen kasalehda me Eipraam kotehla Pillap Iupreitis ni eh kohkolahng Kenan ni Nisan 14, pahr 1943 Mwohn Krais, oh e sansal me ih ahnsowo me inou lap en Eipraam tepida kadoadoahk. Koht ketin pwurehng pwarohng Eipraam mwurin eh seiloakla Kenan oh lella Sekem oh ketin kalaudehla inowo mahsanih, “Ih sahpwet me I pahn kihong kadaudokomw kan.” Ni eh ketin mahsanih met, e ketin kasalehda me inou lapo dokedoke inowo nan Ihden, oh ketin kasalehda me ‘kadaudoko’ pahn kohsang aramas, me iei, pahn kohsang irekidien kadaudok en aramas. (Sen 12:4-7) Mwuhr Siohwa ketin kasalehda pil ekei kalaudepen inou lapo, me kileldi nan Senesis 13:14-17; 15:18; 17:2-8, 19; 22:15-18.

w89-E 7/1 3 par. 4

Dahme Kahrehda Ke Anahne Ese me Mehlel Duwen Eipraam

Met iei inou kapwuriamwei ehu, oh Eipraam rong Koht eh ketin mahsanih met pak riau de tohtohsang. (Senesis 18:18; 22:18) Pwe Koht en ketin kapwaiada met, e pahn pil ketin kaiasada wiliepen peneinei kan me melahr. Mour ong irail me iasadahr uhdahn pahn wia kapai ehu, pwehki pali tohtohn irail pahn pwurodohng irair en sampah ehu me duwehte Paradaiso me aramas kasalongehla nin tapio. Mwurin mwo, irail pahn sukuhlki ia duwen arail pahn alehdi kapai en mour soutuk.​—Senesis 2:8, 9, 15-17; 3:17-23.

it-2-E 213 par. 3

Kosonned

Poahsoankihda mehn kadehdepen poadopoad, ekei semen kan kamehlele me, ahnsoun netikihla sahpw, me pwaindao anahne kilang sahpwo sang wasa ile ehu, oh irepen sahpwo koasoansoandi pwe aramas en kak kilang irepen sahpwo pwon. Ni ahnsou me aramas me pwaindao nda, “I kilang,” e kasalehda me e pwungkiher ni kosonned. Ni ahnsou me Siohwa ketikihong Eipraam inou en alehda sapwen Kenan, Eipraam ale kehkehlik en kilang mahs ni keimw pahieu en sahpwo pwon. Eipraam sohte nda, “I kilang,” mwein pwehki Koht ketin mahsanihong me e pahn ketikihong Sapwen Inowo kadaudoken Eipraam kan mwuhr. (Sen 13:14, 15) Moses, nin duwen wiliepen Israel ni kosonned, ale kehkehlik en “kilang” sahpwo. Ma dahme kitail ahpwtehn koasoia me pwung, met pahn kasalehda sahpwo eh pahn uhd kohwong Israel ni kosonned, pwe irail en kak ale sahpwo pahn kaundahn Sosua. (Deud 3:27, 28; 34:4; pil medewehla mwomwen Sehdan eh song en kihong Sises soahng kan nan Mad 4:8.) Pil ehu mwekid me pwarada me uhdahn pwung iei: alu kotehla sahpwo de pedolong loale pwehn sapwenikihla. (Sen 13:17; 28:13) Nan ekei doaropwehn mahs akan, uwen tohtohn tuhke kan nan ehu pelien sahpw kin wadawadedi ni ehuehu ahnsoun netila.​—Pil kilang Sen 23:17, 18.

Raparapahki Soahng Kesempwal kan Sang Mahsen en Koht

w16.05 5 par. 12

Kapwungala Kahpwal kan Nanpwungamwail ni Elen Limpoak

Paipel kin kasalehda ia duwen sapwellimen Koht ladu kan ar kak kolokol popohl ni kahpwal kan ar pwarada. Karasepe, Eipraam oh Lohd koaros naineki mahn tohto, oh neira sounsilepen mahn ko tepida akamai pwehki sapwarailo sohla itar ong irail koaros. Pwehki Eipraam men kamwahwihala kahpwal wet, e mweidohng Lohd mahs en pilada mehnia sahpw me e mwahuki. (Sen. 13:1, 2, 5-9) Ia uwen met eh wia mehn kahlemeng mwahu ong kitail! Ia duwe, Eipraam apwalla pwehki eh kadek? Uhdahn soh. Mwurinte dahme wiawi, Siohwa ketin inoukihda en kapaiada Eipraam laudsang mahs. (Sen. 13:14-17) Dahme kitail sukuhlki? Mehnda ma kitail luhssang soahng kei, Siohwa pahn ketin kapaikitailda ni atail kapwungala kahpwal kan ni elen limpoak.

it-2-E 683 par. 1

Samworo

Melkisedek nanmwarkien Salem iei samworo (ko·henʹ) men me weksang meteikan. Paipel sohte kasalehda ihs eh peneinei, rahnen eh ipwidi, de eh mehla. E sohte sohsohki pwukoahn samworo, oh e sohte alehdi pwukoao sang rehn emen, oh pil sohte me alehdi pwukoao mwurin ih. Melkisedek kolokol pwukoahn nanmwarki oh pil samworo. Eh pwukoahn samworo lapalapasang pwukoa en samworo en mehn Lipai kan, pwe ni mehlel, Lipai pwainohng Melkisedek eisek kis ehu en soahng kan, pwehki e mihmihte nan kapehden Eipraam ni ahnsou me Eipraam meirongkihong eisek kis ehu en soahng kan rehn Melkisedek oh Melkisedek kapaiahda ih. (Sen 14:18-20; Ipr 7:4-10) Sang ni soahng pwukat, Melkisedek wia kasalepen Sises Krais, “samworo kohkohlahte duwehte Melkisedek.”​—Ipr 7:17.

February 10-16

SOAHNG KESEMPWAL KAN SANG MAHSEN EN KOHT | SENESIS 15-17

“Siohwa Ketin Wekidala Eden Eipram oh Sarai—Pwekida?”

it-1-E 817

Sapwung, Raparapahki Sapwung

Weksang met, elen aramas oh dahme aramas kin wiahda kin kalapw sapwung. Dihp oh sapwung iei mehkot me aramas koaros sohsohki sang Adam. (Ro 5:12; Me 51:5) Ahpw Siohwa me sohte kisin sapwung kis reh, ketin “mwahngih dahme kitail wiawihkihda; e pil ketin tamataman me kitail uhdahn pwehl,” oh e ketin kadek kalahngan. (Me 103:13, 14) E kin ketin kilangwohng ohl lelepek oh peik Noha me “ihete me keniken rehn Koht ahnsowo.” (Sen 6:9) E ketin kehkehlingkihong Eipraam mahsanih, “Ke pahn peikiong ie, oh wia dahme pwung ahnsou koaros.” (Sen 17:1) Mendahki ohl pwukat koaros ara sohte unsek oh melahr, Siohwa me kin ketin “kasawih nan mohngiong en aramas akan,” kin ketin kilangwohng ira nin duwen aramas kei me sohte kin wiahda sapwung. (1Sa 16:7; pil kilang 2Na 20:3; 2Kr 16:9.) E ketin kehkehlingkihong Israel: “Kumwail en loalopwoat mwuledek ong KAUN-O.” (Deu 18:13; 2Sa 22:24) E ketikihda sapwellime Ohl me sohte kisin sapwung kis reh (Ipr 7:26) nin duwen pweinen pweipwei sapahlo, oh poahsoankihda met, E kak ketin wiahki irail me kin kasalehda pwoson oh peik “me pwung” kei, de sohte wiahda sapwung, ni ahnsowohte kolokolete deweo nin duwen Sounkopwung men me pwung oh sohte wiahda sapwung.​—Ro 3:25, 26; kilang INTEGRITY; PERFECTION.

it-1-E 31 par. 1

Eipraam

Ahnsou reirei dower powe. Met ira mihmikiher nan Kenan mpen sounpar eisek, ahpw Sara pousehlahte wia lih emen me sohte nah seri. Ih eri pekihda pwe nah lidu mehn Isipo Akar en wiliandi ih pwe en kak naineki seri sang reh. Eipraam pwungki. Eri nan pahr 1932 Mwohn Krais, ni ahnsou me Eipraam sounpar 86, Ismael ipwidi. (Sen 16:3, 15, 16) Mwurin ahnsou reirei, nan pahr 1919 Mwohn Krais, ni ahnsou me Eipraam mahkihier sounpar 99, nin duwen kilel ehu ong kadehdehda inou lap tohrohr me mie nanpwungen pein ih oh Eipraam, Siohwa ketin kehkehlingki me ohl koaros me kin mi nan imwen Eipraamo pahn sirkumsaisla. Ni ahnsowohte Siohwa ketin wekidala edeo sang Eipram ong Eipraam, “pwehki I pahn wiahkinuhkala semen wehi ngedehrie.” (Sen 17:5, 9-27; Ro 4:11) Mwurinte mwo, tohnleng silimen ko me doadoahngki paliweren aramas me Eipraam kasamwohdo ni mwaren Siohwa inoukihda me Sara pahn liseianda oh naitikihedi pwutak emen, ei, nan sounpar kohkohdo!​—Sen 18:1-15.

w09-E 2/1 13

Ia Wehwehn Ahd Ehu?

Koht kin ketin pein wekidala eden ekei aramas laud kan pwehn kohpada dahme pahn wiawi. Karasepe, e ketin wekidala eden Eipram, me wehwehki “Sahm me Lapalapala,” ong Eipraam, me wehwehki “Semen me Ngedehrie.” Eri pahrekiong edeo, Eipraam wiahla semen wehi ngedehrie. (Sen 17:5, 6) Pil medewehla en Eipraam pwoudo, Sarai, me kakete wehwehki “Kin Akamai.” Ia uwen eh peren ni ahnsou me Koht ketin wekidohng edeo “Sara,” me wehwehki “Lih Soupeidi,” me kasalehda eh pahn wiahla lih kadaudok en nanmwarki kan.​—Senesis 17:15, 16.

Raparapahki Soahng Kesempwal kan Sang Mahsen en Koht

it-1-E 460-461

Keirekidi en Ahnsou kan

Siohwa ketin mahsanihong Eipram (Eipraam): “Kadaudokomw kan pahn keikeiruseli nan sapwen wai ehu; re pahn wiahla lidu wasao oh ale lokolok erein sounpar 400.” (Sen 15:13; pil kilang Wi 7:6, 7.) Mahsen wet wiawi mwohn ipwidien Aisek, serien sohso de ‘kadaudoko.’ Nan pahr 1932 Mwohn Krais, Ismael ipwidiong Eipram sang lidu serepein en Isipo Akar, oh Aisek ipwidi nan pahr 1918 Mwohn Krais. (Sen 16:16; 21:5) Sounpar 400 mwohn Eksoduso, me wia kilelepen kaimwiseklahn ‘kalokoloko’ (Sen 15:14), pahn lel pahr 1913 Mwohn Krais, oh ni ahnsowo me Aisek mahkier sounpar limau. E mwomwen me Aisek mweisangehr dihdi oh mihmiher “nan sapwen wai ehu” me kaidehn sapwe, met e tepidahr lelohng kokohp en soangen kalokolok me Ismael kin “kapakapailoke,” ahnsowo Ismael mahkier sounpar 19. (Sen 21:8, 9, NW) Mendahki nan rahnpwukat mwomwen en Ismael kapailoke nein Eipraam serien sohso mwomwen sohte kesempwal, ahpw e kesempwal ni mwehin kaunen peneinei kan ahnsowo. Kadehdepen eh kesempwal kohsang mwomwen en Sara mwekido oh Koht eh ketin kupwurki Sara en ngihtehtehki me Akar oh nah pwutako Ismael en pekeusla. (Sen 21:10-13) Ire mehlelo me dahme wiawi kileldi nan sapwellimen Koht pwuhko ni oaritik pil dokedoke kileldien tepidahn kokohp en kalokoloko me reireiki sounpar 400 me sohte pahn uhdi lao lel ni ahnsoun Eksodus.​—Kal 4:29.

it-1-E 778 par. 4

Eksodus

“Mwurin dih pahieu.” Kitail anahne tamataman me Siohwa ketin mahsanihong Eipraam me dih kapahieu en kadaudoke kan pahn pwurodo Kenan. (Sen 15:16) Erein pahr 430 sang ni ahnsou me inou lap en Eipraamo tepida manaman lel ni ahnsoun Eksoduso, dih tohtohsang pahieu mieier, mehnda ma kitail pil medewe duwen reirei en mour me re kin ahneki ni ahnsowo, nin duwen me kileldi. Ahpw sounparte 215 me mehn Israel kan mihmihki nan Isip. “Dih pahieu” mwurin ar pedolong nan Isip, kak kapatapatpene ni ahl wet, ni atail pahn doadoahngki ehute keinek en Israel ko nin duwen karasaras, keinek en Lipai: (1) Lipai, (2) Kohad, (3) Amram, oh (4) Moses.​—Eks 6:16, 18, 20.

February 17-23

SOAHNG KESEMPWAL KAN SANG MAHSEN EN KOHT | SENESIS 18-19

“‘Sounkopwung en Sampah Pwon’ Ketin Kasohrehla Sodom oh Komora”

w17.04 18 par. 1

“Sounkopwung en Sampah Pwon” Kin Ahnsou Koaros Ketin Wia Dahme Pwung

“SOUNKOPWUNG en sampah pwon uhdahn pahn kin pwung ni sapwellime wiewia kan.” (Sen. 18:25) Eipraam kasalehda me e likih me Siohwa pahn ketin kadeingkihda kahnimw en Sodom oh Komora sapwellime pwung pahrek me unsek. E uhdahn kamehlele me Siohwa sohte kak ketin “kemehla me dipan akan iangahki me sohte dipe kan.” Ong Eipraam, “met sohte kak wiawi.” Mwuhr, Siohwa ketin mahsanihki pein ih: “KAUN-O iei silepamwail me manaman, sapwellime wiewia kan me unsek oh pwung. Amwail Koht me loalopwoat oh mehlel, e kin ketin wiahda dahme pwung oh pahrek.”​—Deud. 31:19; 32:4.

w18.08 30 par. 4

Kanengamah​—Dadaurete Pwehki Kahrepe Ehu

Ei mehlel, Siohwa iei me ketikihda mehn kahlemeng keieu mwahu ong kitail en idawehn pwehn kasalehda kanengamah. (2 Pit. 3:15) Nan Paipel, pak tohto Siohwa kin ketin kasalehda kanengamah laud. (Neh. 9:30; Ais. 30:18) Karasepe, ia duwen Siohwa eh ketin mwekidki ni Eipraam eh patohwan idek reh peidek kan duwen Sapwellime pilipil en ketin kasohrehla Sodom? Nin tapio, Siohwa sohte ketin sopuk Eipraam ni eh pato mwohn silangi. Ahpw Siohwa ketin karonge ni kanengamah ehuehu peidek oh iren kapwunod kan me Eipraam ahneki. Siohwa eri ketin kasalehda me e karonge Eipraam ni eh ketin pwurehng mahsanih ire ko me Eipraam pwunodki. E pil ketin kamehlelehiong Eipraam me E pahn ketin kasohrehla Sodom mehnda ma aramas pwung ehkte me dierek nan kahnimwo. (Sen. 18:22-33) Ia uwen met eh wia mehn kahlemeng mwahu ehu duwen en rong oh sohte mwadang en lingeringerda!

w10 11/1 26 par. 12

Siohwa Iei Atail Kaun Wasa Lapalahpie!

Kitail kak kamehlele me kereniong Siohwa pahn ketin kasansalehda sapwellime pwuhng en kaunda. E sohte pahn ketin mweidohng suwed en mihmihte, oh kitail ese me kitail kin momour ni imwin rahn akan. Siohwa ketin kadeikada aramas suwed kan ni Nohliko. E ketin kamwomwala Sodom oh Komora oh Parao oh nah sounpei kan. Sisera oh nah sounpei kan oh Senakerip oh nah sounpei en Asiria ko sohte pweida ni arail uhwongada Wasa Lapalahpie. (Sen. 7:1, 23; 19:24, 25; Eks. 14:30, 31; Sounkopwung 4:15, 16; 2 Nan. 19:35, 36) Kahrehda, kitail kak kamehlele me Siohwa Koht sohte pahn ketin mweidohng aramas en kin pousehlahte mwamwahliki mware oh wia kauwe sapwellime Sounkadehde kan. Patehng met, kitail kin kilang kilel en Sises eh ketier oh kaimwiseklahn koasoandi suwed wet.​—Mad. 24:3.

Raparapahki Soahng Kesempwal kan Sang Mahsen en Koht

w88-E 5/15 23 par. 4-5

Mie me Kilangehr Koht?

Met kitail kak wehwehki kahrepen Eipraam eh koasoiong tohnleng me doadoahngki paliweren aramas me wia sapwellimen Koht sounkairo duwehte ma e patopatohieng Siohwa Koht. Pwehki tohnlengo koasoia ni pwung dahme Koht uhdahn ketin kupwurki mahsanihong Eipraam oh e pil pwarala pwehn wia Wiliepe, rekord en nan Paipel kak nda me “KAUN-O eri ketin pwarohng Eipraam.”​—Senesis 18:1.

Tamataman me tohnlengo me wia sapwellimen Koht sounkair kak pouse Sapwellime mahseno ni pwung duwehte delepwohn de redio ehu eh kak pouse atail koasoi kan ong aramas emen. Eri kitail kak wehwehki ia duwen Eipraam, Moses, Manoha oh meteikan arail kak koasoiong tohnleng men me doadoahngki paliweren aramas duwehte ma re koasoakoasoiong Koht. Emenemen irail pwukat kak kilang tohnleng ko oh lingan en Siohwa me sansalda rehrail, ahpw irail sohte kak kilang Koht. Kahrehda, met sohte pahn uhwong en wahnpoaron Sohn koasoio: “Sohte aramas emen kilangehr Koht.” (Sohn 1:18) Dahme ohl pwukat kilangada iei tohnleng kei me wia wiliepe ahpw kaidehn Koht.

w19.06 20 par. 3

Sewese Meteikan en Dadaur Pahn Arail Kapwunod kan

Lohd wiahda pilipil sapwung ehu ni eh pilada en kousoan nanpwungen mehn Sodom kan me kin wia tiahk samin. (Wadek 2 Piter 2:7, 8.) Sahpw wet me kepwehpwe, ahpw Lohd lelohng kahpwal tohto pwehki e keseula wasao. (Sen. 13:8-13; 14:12) Mwein eh pwoudo uhdahn mwahuki kahnimwo de pil ekei aramas en wasao kahrehda e sapeikiong Siohwa. E mehla ahnsou me Koht ketin kamwerehdi kisiniei oh suwepel wasao. Pil medewehla nein Lohd serepein riemeno. Ohl riemen ko me ira inou en pwopwoud ong pil mehla nan Sodom. Lohd luhssang imweo, eh kepwe kan oh, keieu kamedek, eh pwoudo iang mehla. (Sen. 19:12-14, 17, 26) Ia duwe, Siohwa sohla ketin kanengamahiong Lohd erein ahnsou kapwunodo? Soh.

February 24–March 1

SOAHNG KESEMPWAL KAN SANG MAHSEN EN KOHT | SENESIS 20-21

“Siohwa Kin Ketin Wia Dahme E Ketin Inoukihda Ahnsou Koaros”

wp17.5 14-15

Koht Ekerki Ih Lih Emen Sang Peneinei Soupeidi

Ia duwe, en Sara kouruhro kasalehda me e sohte pwoson? Soh douluhl. Paipel mahsanih: “Pwoson me kahrehiong Eipraam en kak wiahla sahm men nan eh likeilapalahr oh eh pwoud Sara lih depwen. E kamehlele me Koht pahn ketin kapwaiada sapwellime inou.” (Ipru 11:11) Sara ese duwen Siohwa; e ese me e kak ketin kapwaiada inou sohte lipilipil me e ketin wiahda. Ihs rehtail me sohte anahne kalaudehla soangen pwosono? E mwahu ong kitail en esehla douluhl Koht en Paipel. Ni atail wia met, kitail pahn kilang me Sara pwung ni eh ahneki pwoson. Siohwa kin ketin lelepek oh kapwaiada sapwellime inou koaros, ekei pak, e kakete wia met ni ahl akan me kin kahrehiong kitail en pwuriamweikihla oh kouruhrki pwe kitail sohte kamehlele!

“KAPWAIADA MEHKOAROS ME SARA PAHN NDAWEI”

Ni ahnsou me Sara sounpar 90, e alehdi dahme e kin kasikasik sangete ni eh laudla. E neitikiong eh pwoudo, me met sounparehr epwiki! Eipraam kihong eden serio Aisek, de “Kouruhr,” nin duwen me Koht mahsanih. Kitail kak medewehla ni Sara eh pwangada ahpw sinsirei oh nda: “Koht ketikihong ie peren oh kouruhr. Koaros me rong met pahn iang ie perenda.” (Senesis 21:6) Kisakis kapwuriamwei wet sang rehn Siohwa uhdahn kaperenda Sara lao lel imwilahn eh mour. Ahpw, met pil kihong ih pwukoa laud kan.

Ni ahnsou me Aisek sounpar limau, peneineio wiahda kamadipw ehu pwehn kasalehda rahn me serio mweisang dihdi. Ahpw soahng koaros saikinte mwahu. Kitail wadek me Sara kin tetehk wiewia kei me kin kalapw wiawi. Nein Akar pwutak Ismael me sounpar 19, kin kapailoke kisin pwutak Aisek. Met kaidehn kisin kamwan tikitik. Mwuhr wahnpoaron Pohl mwekidki en koasoia me Ismael kin kaloke Aisek. Sara tehkada me ahn Ismael kin lidere nah pwutako wia keper ehu ong Aisek. Sara wehwehki me Aisek sohte wiahte nah pwutak ahpw me Aisek pil ahneki pwukoa ehu ong kupwuren Siohwa. Eri ni eimah e kohla koasoi mehleliong Eipraam. E peki rehn Eipraam en kadarala Akar oh Ismael.​—Senesis 21:8-10; Kalesia 4:22, 23, 29.

Ia duwen Eipraam eh mwekidki met? Kitail wadek: “Met kapwunodehda kowahlap Eipraam, pwe Ismael pil uhdahn nah seri.” E poakepoake Ismael, oh eh pepehm nin duwen pahpa men kahrehda e sohte kak kilang mwahu ire wet. Ahpw, Siohwa mwahngih mwahu duwen irair wet, ih eri ketin mwekid. Kitail wadek: “Koht eri ketin mahsanihong, ‘Ke dehr pwunodki pwutaken oh omw lidu Akar. Kapwaiada mehkoaros me Sara pahn ndawei, pwe kadaudokomw kan me I inoukihonguhkehr pahn tepisang Aisek.’” Siohwa ketin kamehlelehiong Eipraam me Akar oh pwutako pahn ale epwelpara. Ohl lelepek Eipraam eri peikiong.​—Senesis 21:11-14.

Raparapahki Soahng Kesempwal kan Sang Mahsen en Koht

wp17.3 12, ntp.

“Lih Masamwahu Men Kowe”

Sara rianiki Eipraam. Tera me wia ara pahpa, ahpw ira nohnopeseng. (Senesis 20:12) Soangen pwopwoud wet sohte konehng rahnpwukat, ahpw e kesempwal en tamataman ia duwen soahng kan mahso eh weksang ahnsou wet. Aramas akan karanih unsek me Adam oh Ihp ahneki ahpw ira luhssang. Ong soangen aramas pwukat, pwoudiki kisehn peneinei keren kan sohte kin kahrehda keper ong seri kan. Ahpw, sounpar 400 kei mwuri, uwen reirei en mouren aramas duwehla mouren aramas en rahnpwukat. Nan ahnsowo, Kosonned en Moseso keinapwidi wia nsenen pwopwoud nanpwungen peneinei keren kan.​—Lipai 18:6.

w89-E 7/1 20 par. 9

Eipraam​—Karasaras Ehu ong Koaros me Kin Song en Kompoakepahnki Koht

9 Eipram mwekidki met sang ni eh kasalehda Pil ehu wiewiahn pwoson. Nin duwen me ireo mahsanih: “Eipram eri kauwada pei sarawi ehu wasao ong KAUN-O.” (Senesis 12:7) Met kakete iangahki meirong en mahn emen, pwe lepin lokaiahn Ipruo ong “pei sarawi” kin wehwehki “wasahn meirong.” Mwuhr, Eipram pwurehng wia wiewiahn pwoson pwukat nan ekei wasa nan sahpwo. Patehng met, e kin “likweriong mwaren Siohwa.” (Senesis 12:8, NW; 13:18; 21:33, NW) Lepin lokaiahn Ipruo “likweriong mwaren Siohwa” pil kin wehwehki “kalohkdahn (kalohki) mwaro.” Tohn imwen Eipram oh pil mehn Kenan kan kakete rong eh kalohki ni eimah mwaren eh Kohto, Siohwa. (Senesis 14:22-24) Pil duwehte, koaros me kin song en kompoakepahnkihla Koht rahnpwukat anahne likweriong mwareo ni pwoson. Met pahn iangahki kalohk ong wehipokon, “patohwanohng Koht meirong en kaping ahnsou koaros, me iei, wahn kilin ewetail me kin lohkihong wehipokon mwareo.”​—Ipru 13:15; Rom 10:10.

    Pwuhk kan en lokaiahn Pohnpei (1987-2025)
    Log Out
    Log In
    • Ponapean
    • Share
    • Me Ke Mwahuki
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share