Iren Sawas kan ong Doaropwehn Kasukuhl ong Mihting en Mour oh Kalohk
© 2025 Watch Tower Bible and Tract Society of Pennsylvania
JANUARY 5-11
SOAHNG KESEMPWAL KAN SANG MAHSEN EN KOHT AISEIA 17-20
“Pwais en Irail me Adihasang Kitail”
“Ei Wehi Kaidehn Kisehn Sampah Wet”
16 E uhdahn kesempwal kitail en wiahda wekidekla pwukat! Paipel mahsanih me aramas kin duwehte nansed me kin pwungupwungdekseli oh sohte kin meleilei. (Ais. 17:12; 57:20, 21; Kaud. 13:1) Soahng kan me kin pidada politik kin kalingeringerihada oh katohrepeseng aramas, oh pil kahrehda tiahk lemei. Ahpw kitail kin ahneki popohl oh kin miniminpene. Ni Siohwa eh kin ketin mahsanihada uwen tohrohrpeseng en aramas nin sampah, e kin uhdahn kupwurperenkihda miniminpene en sapwellime aramas akan.—Wadek Sepanaia 3:17.
Kolokol Omw Soupoupali nan Sampah Saminimin Ehu
4 Ele kitail mi wasa ehu me aramas akan sohte kasik kitail en uhki palien politik. Ahpw ni atail kerenlahng ni imwin ahn Sehdan koasoandi, e pahn apwalla atail kolokol atail soupoupali. Aramas akan rahnwet kasalehdahr “soh mahk” oh “loaumwohmw,” oh arail saminimin pahn laudsang mahs. (2 Tim. 3:3, 4) Ekei riatail kan lelohngehr soahng pwukat pwehki wekidekla kan me re sohte kasik nan palien politik en sapwarailo. Ihme kahrehda kitail anahne kaunopada pein kitail ahnsou wet pwehn kolokol atail soupoupali pil nan irair apwal ehu. Kitail pahn koasoia soahng pahieu me kitail kak wia pwehn kaunopada.
ip-1 198 par. 20
Sapwellimen Siohwa Kaweid ong Wehi kan
20 Imwilahn met? Aiseia koasoia: “Nin soutik mie masak. Mwohn nimenseng irail solahr. Ih met pwais en irail me adihasang kitail. Oh sohso en irail me kulih kitail.” (Aiseia 17:14, NW) Me tohto kin adihasang mehkan sang sapwellimen Siohwa aramas ni arail kin lemeiong irail oh mwamwahlikin irail. Irail kan me kin inenen uhwong oh kauwe Kristian mehlel kan kin mengeiki wia met pwehki Kristian mehlel kan kaidehn oh sohte men wia kisehn sampah. Ahpw sapwellimen Koht aramas akan kin koapworopworki me “nimenseng” pahn mwadang leledo ni ahnsou me arail kahpwal kan pahn imwisekla.—2 Deselonika 1:6-9; 1 Piter 5:6-11.
Ire Kesempwal kan
Ire Kesempwal akan Sang Nan Pwuhken Aiseia—I
20:2-5—Aiseia uhdahn kilisouda oh alialuhselihki erein sounpar siluh? Ele Aiseia kapwuhrasang ah likou puhp en likio kelehpw oh alialuhseli “likou menipinip.”—1 Samuel 19:24.
JANUARY 12-18
SOAHNG KESEMPWAL KAN SANG MAHSEN EN KOHT AISEIA 21-23
Dahme Kitail Sukuhlkihsang Dahme Wiawihong Sepna
Peneu Kadehdepen Sapwellimen Koht Limpoak
7 Pwehn wehwehki ia uwen peneu eh kesempwal, kitail pahn koasoiapene duwen ohl riemen me Siohwa ketin panawih. Emen iei Sepna, mehn Israel men me momour ni mwehin Nanmwarki Esekaia, oh ohl teio iei Graham, brother men nan atail ahnsou. Sepna iei “sounapwalih tehnpaso,” ele tehnpas en Nanmwarki Esekaia, oh e ahneki manaman laud. (Ais. 22:15) Ahpw Sepna aklapalapala oh men meteikan en medewe me e kesempwal. E pil wiahda eh sousou me inenen pweilaud, oh e kin dake ‘werennansapw en mahwen kan me e kin pohnmwahsohki.’—Ais. 22:16-18.
8 Pwehki Sepna kin medemedewehte pein wahupe, Koht ketikihsang ih nan dewe ileileo oh uhd ketikihong Elaiakim. (Ais. 22:19-21) Met wiawi ni ahnsou me Nanmwarki Senakerip en Asiria men mahweniong Serusalem. Mwuhr, Senakerip kadarala me lapalap kei oh karis en sounpei laud ehu pwehn kamasakih mehn Suhs kan oh song en kahrehiong Esekaia en dukula pahrail. (2 Nan. 18:17-25) Esekaia kadarala Elaiakim oh pil ohl riemen en tuhwong me lapalap ko. Emen ira iei Sepna, me ni ahnsowo wia sekteri men. Sang met kitail kak kilang me Sepna ele sukuhlki en aktikitik oh e sohte lingeringerda oh nsensuwedla. E perenki ale pwukoa tikitik kan. Mie mehn kasukuhl siluh me kitail kak sukuhlkihsang Sepna.
9 Keieu, Sepna sohla ahneki pwukoa. Dahme wiawihong ih kasalehda duwen mehn katamano me “aklapalap kin kahrehiong aramas en pwupwudi.” (Lep. Pad. 16:18) Ele mie atail pwukoa tohrohr kan nan mwomwohdiso, oh meteikan ele pahn medewe me kitail kesempwal. Ma met wiawi, kitail pahn kolokol atail aktikitik? Kitail pahn taman me koahiek koaros me kitail ahneki oh soahng koaros me mwahu kitail wiahdahr kin wiawi ihte pwehki Siohwa? (1 Kor. 4:7) Wahnpoaron Pohl ntingihedi: “I ndaiong kumwail koaros: kumwail dehr medemedewe me kumwail me lapalap. Ahpw kumwail en kin mehlel ni amwail medemedewe pein kumwail.”—Rom 12:3.
Peneu Kadehdepen Sapwellimen Koht Limpoak
10 Keriau, ni Siohwa eh ketin panawih laud Sepna, ele met kasalehda me e ketin kamehlele me Sepna kak wekila. (Lep. Pad. 3:11, 12) Met wia mehn kasukuhl mwahu ehu ong irail kan me sohla ahneki pwukoa tohrohr. Re sohte kin lingeringer, ahpw re kak pousehlahte patohwanohng Siohwa dahme keieu mwahu rehrail. Re kak pilada en wiahki peneu nin duwen mehn kadehde me Siohwa ketin poakohng irail. Tamataman me Samatailo pahn kedekedeo katingih irail kan me kin kolokolete arail aktikitik. (Wadek 1 Piter 5:6, 7.) Peneu ni limpoak kak wia sapwellimen Koht elen kaiahne kitail, eri kitail en materek pahn lime kan.
Peneu Kadehdepen Sapwellimen Koht Limpoak
11 Kesiluh, kitail sukuhlki mehn kasukuhl kesempwal ehu sang mwomwen sapwellimen Siohwa wiewia ong Sepna. Mendahki Siohwa ketin kalahdeki dihp, e kin ketin poakohngete mehmeno me wiahda dihpo. Siohwa kin ketin rapahki dahme mwahu rehn aramas. Ia duwe, ma kowe pahpa, nohno de elder men, ke pahn alasang mwomwen Siohwa eh kin ketin panawih emen?—Sud 22, 23.
Ire Kesempwal kan
Ire Kesempwal akan Sang Nan Pwuhken Aiseia—I
21:1—Iawasa me adaneki “sapwtehn en madau”? Mendahte Papilon ah sohte karanih sehd, e kin adaneki ahd wet. Met pwehki reken pihl sang pillap Iupreitis oh Daikris ah kin nan pahr koaros wiahda lapake me kin wiahda lehn pwehl akan me karasahiong “sehd.”
JANUARY 19-25
SOAHNG KESEMPWAL KAN SANG MAHSEN EN KOHT AISEIA 24-27
“Iei Ih me At Koht!”
cl 15 par. 21
“Iei Ih me At Koht!”
21 Mie pak ke kilang kisin seri men ni eh pohlki eh pahpao oh idih oh ndaiong ienge ko “Ih ahi pahpahn mwo”? Irail kan me kin kaudokiong Koht uhdahn ahneki kahrepe tohto en ahneki soangen pepehmohte ong Siohwa. Paipel kohpada duwen ahnsou ieu me aramas lelepek kan pahn nda: “Iei ih me at Koht!” (Aiseia 25:8, 9) Uwen laud en omw kalaudehla omw wehwehki sapwellimen Siohwa irair kan, ih uwen omw pahn kalaudehla omw pepehm me Siohwa iei Sahm me keieu mwahu.
Dahme Kitail Sukuhlkihsang Sapwellimen Sises Manaman en Pilawao
14 Ni Sises eh padahkihong kitail en kapakapki ‘atail tungoal me itar ong rahnwet,’ e pil ketin padahkihong kitail en kapakapki kupwuren Koht en wiawi “nin sampah duwen eh kin wiawi nanleng.” (Mad. 6:9-11) Ia pahn mwomwen sampah ni ahnsowo? Paipel kin kasalehda me kupwuren Koht nin sampah kin pidada mwenge mwahu. Aiseia 25:6-8 padahkihong kitail me e pahn mie diren mwenge iou ong aramas en perenki. Melkahka 72:16 mahsanih: “Reken wahn pilawa en kin wiewiawihte nan wehiet; wahnsahpw en kin kipehdi dohl akan.” Ia duwe, ke kasikasik ahnsowo me ke pahn wiahda soangsoangen pilawa de soangsoangen mwenge kan? Patehng met, ke kak padokedi omw mwetuwel en wain oh pereperenki. (Ais. 65: 21, 22) Oh aramas koaros nin sampah pahn perenki soahng kaselel pwukat.
Kapai kan me Kitail Ahneki Pwehki Siohwa Ketin Poakohng Kitail
11 Medewehla ia pahn mwomwen omw mour nan Paradais nin sampah. Ke solahr pahn pwunodki soumwahu de mehla. (Ais. 25:8; 33:24) Siohwa pahn ketikihong uhk soahng mwahu koaros me ke mwahuki. Dahme ke pahn men sukuhlki? Ke men kalaudehla omw sukuhlki duwen mahn kan? Ke men esehla keseng? Ke men esehla mahlen? Nan paradais, kitail pahn anahne irail kan me ese pilahnehda oh kauwada ihmw kan. Oh kitail pahn pil anahne irail kan me pahn padokedi wahntuhke kan ong mwenge, wiahda dipwisoun doadoahk kan, oh padokedi mwetuwel kan oh apwalih. (Ais. 35:1; 65:21) Ni omw pahn mour kohkohlahte, ke pahn ahneki ahnsou laud en wia soahng pwukat koaros oh pil soahng teikan.
12 Ia uwen eh pahn kaperen en kasamwo irail kan me iasada! (Wiewia 24:15) Pil medewehla ia uwen omw pahn perenki kalaudehla omw sukuhlki duwen Siohwa sang omw sukuhlki sapwellime kepikipik kan. (Mel. 104:24; Ais. 11:9) Oh mwahusang mepwukat koaros, ke solahr pahn wiahda sapwung, eri ke pahn kak papah Siohwa oh sohte anahne peki sapwellime mahk! Ke pahn kesehla soangen kapai pwukat pwehn “perenki dihp ahnsou mwotomwot”? (Ipru 11:25) Uhdahn soh! Mour kaselel me kitail pahn ahneki ahnsowo pahn uhdahn mwahusang soahng koaros me kitail kak alehdihsang sampah ahnsou wet. Tamataman me kitail sohte pahn ahnsou koaros kasikasik Paradais. Ehu rahn, e uhdahn pahn wiawi. Oh soahng pwukat kak wiawi pwehki Siohwa uhdahn ketin poakohng kitail me kahrehda e ketikihda pweinen pweipwei sapahlo!
Ire Kesempwal kan
w15 12/15 17 par. 1-3
Pwurehng Wiawihdahn New World Translation nan 2013
Dahme kahrehda tohtohla irelaud kan me mi ni mwomwen pwohem? Wasa tohto nan Paipel mi ni mwomwen pwohem ni ahnsou me e tepin wiawihda. Rahnpwukat lokaia tohto kin doadoahngki lepin lokaia kan me ngihl kan kin raim de duwepenehte nan pwoediri, ahpw nan pwoediri en lokaiahn Ipru, dahme keieu kesempwal iei ia duwen wehwehn lepin lokaia kan kin duwehpene de wekpeseng. Nan pwoediri en lokaiahn Ipru, kaidehn raim me kin kadoadoahk pwehn kahrehda nting kan en lingan oh maledek, ahpw mwomwen madamadau ehu eh kin koasoansoandi mwahu ni lepin lokaia kan.
New World Translation en mwowe ko kin kawehwehdi pwuhken Sohp oh Melkahka ni ahl ehu me pahn kasalehda me e tepin wiawihda ong koul de kapadal. Eh ntingdi ni mwomwen ahl wet kin sewese kasalehda kesempwalpen madamadau ehu de sewese emen en tamataman ire ko. Nan New World Translation en 2013, pwuhken Lepin Padahk kan, Melkahkahn Melkahka kan, oh irelaud tohto nan pwuhken soukohp ko kin pil ntingdi ni ahl wet pwehn kasalehda me ire pwukat kin ntingdi nin duwen pwohem kei oh kin kasalehda ire kan me wekpeseng oh duwehpene. Ehu karasepe iei me mi nan Aiseia 24:2, me ehuehu lain en nting kan kin kawehwehda mehkot me wekpeseng, oh ehuehu lain kin doulahte kasansalehda ire me sohte mehmen pahn pitsang sapwellimen Koht kadeik. En pohnese me ire pwukat ntingdi ni mwomwen pwoediri kin kasalehiong sounwadawado me sounnting en Paipelo sohte kin ihte kapwukapwurehiong lepin lokaia kan, ahpw me e kin doadoahngki pwoediri pwehn kasansalehda sapwellimen Koht rohng.
Wekpeseng en nting en Ipru ni mwomwen pwohem oh me sohte ntingdi ni mwomwen pwohem kin apwal en kilangada. Kahrehda kawehwehn Paipel kan kin mie wekpeseng wasa kan me re pilada en kawehwehdi ni mwomwen pwohem. Sounkawehwe kan kin koasoanehdi ia wasa nan Paipel pahn kawehwehdi ni mwomwen pwoediri. Ekei iren Paipel kan sohte ntingdi ni mwomwen pwoediri, ahpw kin doadoahngki lepin lokaia kaselel kan, de karasaras lingan kan oh koasoi maledek, oh lepin lokaia kan me kin kapahrekihpene soahng kan pwehn sewese emen en wehwehkihda ire ehu.
JANUARY 26–FEBRUARY 1
SOAHNG KESEMPWAL KAN SANG MAHSEN EN KOHT AISEIA 28-29
Wauneki Siohwa Sang ni Omw Koasoi kan oh Sang nan Omw Mohngiong
ip-1 299 par. 23
Aiseia Kohpada Sapwellimen Siohwa “Mwekid Kapwuriamwei”
23 Kaunen pelien lamalam en mehn Suhs kan dene re koahiek nan arail kaudok, ahpw re keselahr Siohwa. Irail kin padahngki pein arail madamadau duwen dahme pwung oh sapwung pwehn wiahda kahrepe kan ong arail wiewia suwed kan oh arail seupwoson me kahrehiong aramas akan sohla ahneki kupwuramwahu rehn Koht. Siohwa pahn ketin wia “mwekid kapwuriamwei” ehu pwehn kasalehda arail mwalaun. E ketin mahsanih: “Aramas pwukat kin nda me re kin kaudokiong ie, ahpw sohte audepen ar koasoi kan, oh mohngiongirail dohsang ie. Mwomwen arail mour en souleng kin pwilisang kosonned oh tiahk en aramas, me re pein wadlikihala. Eri, I pahn kaluskinirailda ei mwekid kapwuriamwei kan. Irail kan me loalokong pahn wiahla aramas pweipwei, oh arail koahiek koaros pahn sohla katepe.” (Aiseia 29:13, 14) En Suda loalokong me e pein wiahda sohrala ni ahnsou me Siohwa ketin kamwakid Wehin Papilon en kasohrehla en Suda koasoandi en pelien lamalam me kesehlahr kaudok mehlel. Ni mwehin tepin Kristian kan, soahngohte me pil wiawihong kaun en pelien lamalam en mehn Suhs kan me kin pwakih pein arail loalokong oh me kin kahluwa sapwung wehio. Mehkot duwehte met pahn pil wiawihong pwihn en Kristian likamw kan nan rahnpwukat.—Madiu 15:8, 9; Rom 11:8.
Sohte Mehkot Kak Kadipekelekele me Pwung kan
7 Ni eimah, Sises ketin kadeikada kaunen pelien lamalam kan ni eh mwehio pwehki re sohte kin padahkihong aramas akan en kaudokiong Siohwa ni pwung. Karasepe, e ketin kasalehda mwalaun en Parisi ko, me kin nsenohki mwomwen arail pahn omwiomw laudsang arail en apwalih arail pahpa nohno kan. (Mad. 15:1-11) Sapwellimen Sises tohnpadahk ko ele pwuriamweikihla sapwellime mahsen ko. Ni mehlel, re patohwan idek reh: “Komw mwahngih me Parisi ko dipekelekelki ar rong dahme komw mahsaniho?” Sises ketin sapeng mahsanih: “Tuhke koaros me Semei nanleng sohte ketin padokedi pahn usuhsdahsang. Kumwail pohnsehsehla irail. Sounkaweid maskun kei irail. Eri ma me maskun men kin kahre me maskun men, ira koaros pahn pwupwudiong nan pwoahr.” (Mad. 15:12-14) Mendahki kaunen pelien lamalam ko lingeringer pahn Sises pwehki soahng kan me e mahsanih, Sises sohte ketin uhdihsang eh padahngki dahme mehlel.
Wiahte Emen me Siohwa Ketin Lukehdo nan Tehnpese!
8 Irail me kin ‘koasoi mehlel nan arail mohngiong’ sohte kin peikiongete Koht ni meteikan ar kin kilang irail ahpw mwuhr wia soahng suwed kan. (Ais. 29:13) Irail sohte men wia aramas widing. Aramas widing men ele kin tepida medewe me sapwellimen Siohwa kosonned kan sohte kin ahnsou koaros mwahu. (Seims 1:5-8) Ele e sohte kin peikiong Siohwa ni soahng kan me e medewe me sohte nohn kesempwal. Eri ma soahng suwed kan sohte wiawihong ih ni ahnsou me e sapeik, ele e pahn tepida wia soahng kan me pil suwedsang. Mehnda ma e medewe me e kin papah Koht, Siohwa sohte pahn ketin kupwurki eh kaudok. (Ekl. 8:11) Ahpw kitail kin men mehlel ni soahng koaros.
Ire Kesempwal kan
it “Ariel” par. 1; it “Ariel” No. 3
Ariel
(Arʹi·el) [Wasahn Isihs en Pei Sarawi en Koht].
3. Ahd ehu me sohte nohn sansal me mi nan pwuhken Aiseia 29:1, 2, 7 (NW). Tehnpas en Koht mi nan Serusalem oh iei wasa me pei sarawi ong meirong kin mi ie. Ihme kahrehda kahnimw wet adanekihla wasahn isihs en pei sarawi en Koht. Uhdahno Serusalem pahn kin wia poahsoanpen sapwellimen Siohwa wasahn kaudok min. Ahpw, audepen Aiseia 29:1-4 (NW) kamasepwehk oh e kohpada me mehn Papilon pahn kauwehla Serusalem, me pahn wiawi nan pahr 607 Mwohn Krais. Ni ahnsowo, kahnimw wet pahn wiahla “wasahn isihs en pei sarawi” ni ehu wehwe tohrohr: kahnimwo pahn direkihla ntahn me kamakamala kan oh ohkihla kisiniei oh direkihla paliweren aramas me mehkihla kisiniei. Kahrepen kahpwal pwukat wiawi sansalda nan iretikitik 9 lel 16. Ahpw, Aiseia 29:7, 8 kasalehda me wehi kan me kahrehiong Serusalem kahpwal sohte pahn pweida nan dahme irail uhdahn men wia.
FEBRUARY 2-8
SOAHNG KESEMPWAL KAN SANG MAHSEN EN KOHT AISEIA 30-32
Likih me Siohwa Pahn Ketin Pereiuk
Siohwa Iei Atail Wasahn Ruk
7 Pwehki Siohwa iei atail wasahn ruk, kitail kin ale kamweit sang mahsen pwukat: “E pahn ketin koaduhpwalkinuhkedi lime kan; ke sohte pahn perki mehkot pahn epwelpen nin lime; sapwellime irair en mehlel pahn sinsileiuk oh doareiukala duwehte mehn sansar laud ehu.” (Melkahka 91:4, NW) Koht kin ketin pere kitail, duwehte menpihr nohno men kin koaduhpwalkin nah kan. (Aiseia 31:5) ‘E pahn ketin koaduhpwalkinuhkedi lime kan.’ Menpihr nohno men kin doadoahngki pehnpihr kan en koaduhpwalkin nah kan, oh pere irail sang imwintihti kan. Kitail kin rasehng menpihr pwulopwul kan, oh kin nsenamwahu pahn epwelpen Siohwa pwehki kitail kin mihmi nan sapwellimen Siohwa pwihn en Kristian mehlel kan.—Rud 2:12; Melkahka 5:1, 11.
Siohwa Pahn Ketin Seweseiuk Erein Ahnsou Apwal kan
13 Dahme kitail anahne wia. Song en dehr katohreiukla. Ni atail kin katohrekitailla, kitail kakete tepida medemedewehte pein kitail oh kahpwal kan me kitail kin lelohng. Soangen madamadau wet kak kahrehiong kitail en wiahda pilipil sapwung. (Lep. Pad. 18:1) Ei mehlel, kitail koaros anahne ahnsou en kelehpwla, ahpw mehlel ni ahnsou me kahpwal laud ehu wiawi nan atail mour. Oh ma ahnsou werei kitail kin katohrei kitail, kitail kakete soikala sawas sang irail me Siohwa kin ketin doadoahngki pwehn sewesei kitail. Eri mendahki e kin apwal en wia met erein kahpwal kan, ale sawas sang omw peneinei, kompoakepahmw, oh elder kan. Wiahki met me Siohwa kin ketin doadoahngki pwehn seweseiuk.—Lep. Pad. 17:17; Ais. 32:1, 2.
“E Pahn Ketin Kakehlaikumwailda”—Ia Duwen?
19 Ia duwen omw kak kakehlaka omw koapworopwor? Karasepe, ma ke ahneki koapworopwor en mour kohkohlahte nin sampah, wadek duwen Paipel eh kawehwehda Paradais oh doudouloale. (Ais. 25:8; 32:16-18) Medewe ia pahn mwomwen mour nan sampah kapwo. Medewehla ihs me ke pahn tuhwong, ngihl dah me ke pahn rong, oh ia pahn omw pepehm. Pwehn seweseiuk medewehla ia pahn mwomwen Paradais, kilang kilel kan nan neitail sawasepen Paipel kan de kilang kasdohn koul kan, me duwehte The New World to Come, Just Around the Corner, de Imagine the Time. Ma kitail kin kalapw wiahda ahnsou en doudouloale duwen koapworopwor en sampah kapwo, atail kahpwal kan pahn “ongete ahnsou kis oh me marahra.” (2 Kor. 4:17) Koapworopwor me Siohwa ketikihong uhk kak seweseiuk en dadaur pahn kahpwal kan.
Ire Kesempwal kan
it “Pilawa” par. 6
Pilawa
Ni Lokaiahn Karasaras. Mie soangsoangen wehwe kei me lepin lokaia “pilawa” kin kadoadoahk ong nan Paipel. Karasepe, ni Sosua oh Kalep ara padahkihong mehn Israel pokonpene ko me mehn Kenan kan duwehte ‘pilawa ong irail,’ met wehwehki me irail kak mwadang kalowehdi mehn Kenan kan oh met kakehlailihada mehn Israel ko. (Nem 14:9, NW, nting tikitik kan me mi pah.) Melkahka 80:5 (NW) kin mwomwen kasalehda duwen nsensuwed laud me ele kohsang en Koht sohte kupwurperenkin irail. Wasaht mahsanihki duwen Siohwa, Sounsilepen Israelo: “Komw kin ketin katungoalehkin irail pilen mas kan duwehte kanarail pilawa.” Paipel pil mahsanihki Siohwa eh ketikihong sapwellime aramas akan “pilawa ni mwomwen kahpwal oh pihl ni mwomwen kalokolok.” Met kin dokedoke irair me re mihla loale ni ahnsou me imwintihti ko kapilpene irail oh arail mihla nan irair wet rasehng pilawa oh pihl me re kin kang rahn koaros.—Ais 30:20, NW.
FEBRUARY 9-15
SOAHNG KESEMPWAL KAN SANG MAHSEN EN KOHT AISEIA 33-35
“Ih me Ketin Katengehdi Omw Ahnsou kan”
Siohwa Pahn Ketin Seweseiuk Erein Ahnsou Apwal kan
7 Kahpwalo. Ni atail kin lelohng kahpwal laud ehu, kitail kakete sohla ahneki pepehm, madamadau, de wiewia me kitail kin ahneki mahso. Duwehte sohp pwoat nan melimel eh kin pwungpwungdengkiseli ilok kan, atail pepehm pil kak wekiwekidekseli. Ana me kitail koasoiapene mwowe, koasoia me e ahneki soangsoangen pepehm tohto mwurin Luis eh mehla. E koasoia: “Ekei pak I kin pehm me I mworusala oh poakeiehla. I pil kin lingeringerkihda me e mehla.” Ekei ahnsou, Ana kin pehm me e kelekelehpw oh nsensuwedkihla me e anahne wiahda pilipil ong soahng kan me Luis kin apwalih mwahu. E pehm me ekei pak e kin mi nan melimel ehu nansed. Ia duwen Siohwa eh kin ketin sewesei kitail ni ahnsou me soangen pepehm pwukat kin tepida poweikitaildi?
8 Ia duwen Siohwa pahn ketin sewesei kitail. E ketin inoukihong kitail me e pahn katengeikitaildi. (Wadek Aiseia 33:6.) Ni ahnsou me mie melimel ehu nansed, sohp ehu kakete tepida pwungupwungudekseli. Pwe sohpo en kak mwamwahute, mie soahng kei ni pengepengen sohpo me kin katengehdi pwehn dehr nohn mwekimwekid. Pwehki met, aramas akan nan sohpo sohte pahn lelohng keper nan arail seiloak. Ahpw, mehn katengehdi sohp tohto kin keieu doadoahk mwahu ni ahnsou me sohpo kin tangatang kohwei. Duwehte met, Siohwa pahn ketin katengeikitaildi ni atail pousehlahte papah ih ni lelepek ni ahnsou apwal kan.
Ia Duwen Atail en Ahnekihte Peren ni Atail Kin Dadaur Pahn Kahpwal kan
10 Dahme kitail kak wia: Peki erpit sang rehn Siohwa. Pwe kitail en kak ahneki peren mendahki kahpwal kan, kitail anahne peki mahs rehn Siohwa ni kapakap en ketikihong kitail erpit me anahn pwehn wiahda pilipil mwahu kan. (Wadek Seims 1:5.) Dahme kitail pahn wia ma kitail pehm me Siohwa sohte ketin sapengala atail pekipek ni ahnsou mwadang? Seims nda me kitail anahne “usehlahte pekipeki” rehn Koht. Siohwa sohte kin ketin engiengda pahtail ma kitail kin pwurupwurehng peki erpit sang reh. Samatailo nanleng kin ketin “sapankihong” kitail erpit pwe kitail en kak powehdi kahpwal kan. (Mel. 25:12, 13) E ketin mwahngih duwen atail kahpwal kan, kupwurtoutoukihla atail kin lokolok, oh ketin kupwurki sewese kitail. Met kahrehiong kitail en uhdahn peren! Ahpw ia duwen Siohwa eh kin ketikihong kitail erpit?
11 Siohwa kin ketikihong kitail erpit sang sapwellime Mahsen. (Lep. Pad. 2:6) Pwehn alehdi erpit, kitail anahne onopki Mahsen en Koht oh sawasepen Paipel kan. Ahpw kitail anahne wia laudsang en ihte onop. Kitail anahne wia dahme Koht ketin mahsanihong kitail en wia. Seims ntingihedi: “Kumwail en peikiong mahseno ahnsou koaros, ahpw dehr kin rongorongete.” (Seims 1:22) Ni atail kin doadoahngki sapwellimen Koht kaweid, atail popohl, toupahrek, oh kadek kalahngan kin laudla. (Seims 3:17) Irair pwukat kin sewese kitail en dadaur pahn kahpwal sohte lipilipil oh ahnekihte peren.
ip-1 352-355 par. 21-22
“Sohte me Kin Kousoan Wasao Pahn Nda: ‘I Soumwahu’”
21 Ahpw, en Aiseia kokohp pahn pil pweida nan atail ahnsou. Rahnwet sapwellimen Siohwa aramas akan kin pil paieki arail ale sawas en kamwahwihala arail kaudok ong Koht. Irail maiaudahsang padahk likamw kan me duwehte, dene miehte mehkot nan paliwar me kin wie momour mwurin mehla, padahk en Koht Sahm, Koht Nah, Koht Ngehn Sarawi oh wasahn kalokolok nan kisiniei. Irail aleier kaweid mwahu kan me kin sewese irail en wiahda pilipil mwahu oh maiaudahsang tiahk suwed kan. Oh pwehki meirong en Sises Krais, irail kak mwakelekel mwohn silangin Koht oh ahneki nsenmwakelekel. (Kolose 1:13, 14; 1 Piter 2:24; 1 Sohn 4:10) Arail mwahula nan arail kaudok ong Koht pil sewese arail roson en paliwar. Karasepe, arail kin soikala tiahk samin me pid wia nsenen pwopwoud oh sohte sumwoak de kang tipaker kin pere irail sang soumwahu suwed kan oh ekei soangen soumwahu en kanser.—1 Korint 6:18; 2 Korint 7:1.
22 Ahpw pweidahn mahsen en kokohp kan en Aiseia 33:24 pahn pil laudsang met mwurin Armakedon nan sapwellimen Koht sampah kapw.Pahn kaundahn Wehin Mesaia, aramas akan pahn maiaudahsang arail soumwahu kan oh arail nanpwungmwahu rehn Siohwa pahn uhdahn kehlailla. (Kaudiahl 21:3, 4) Mwurinte kasohrlahn en Sehdan sampah, soangen manaman kan me duwehte manaman kan me Sises kin ketin wia ni eh ketiket sampah pahn pil ehu wiawi sampah pwon. Me maskun kan pahn kilangada wasa, me salengepon kan pahn rongada wasa, me dangepel pahn kak alu! (Aiseia 35:5, 6) Met pahn kahrehiong koaros me iang pitsang kahn kamakam kowahlapo en kak iang doadoahk laud en kaparadaisihala sampah.
Ire Kesempwal kan
Pousehlahte Kekeid nan “Ahl en Sarawi”
8 Ekei kakete medewe, ‘E mwahu en wehwehki met, ahpw ia duwe, e kesempwal ong kitail rahnwet dahme wiawihong mehn Suhs ko mahsie?’ Ei uhdahn, pwehki dahme kitail kin wia kin duwehte atail kekeid nan “Ahl en Sarawi.” Sohte lipilipil ma kitail me keidi kei, de “sihpw teikan,” kitail anahne kekeidte nan “Ahl en Sarawi.” Met pahn sewese kitail en doulahte kaudokiong Siohwa ahnsou wet oh pil ni ahnsou kohkohdo, ahnsou me Wehio pahn wahdo irair kaselel kan nin sampah. (Sohn 10:16) Sangete pahr 1919, ohl, lih, oh seri rar rar kei kohkohsangehr Papilon Lapalap, pelien lamalam likamw koaros nin sampah, oh tepida keid nan ahlo. Ele kowe emen irail. Aramas tepida keid nan ahl wet mpen sounpar 100 samwalahro, ahpw mie ekei me tepida kaunopada ahl wet sounpar tohto mwowe.
FEBRUARY 16-22
SOAHNG KESEMPWAL KAN SANG MAHSEN EN KOHT AISEIA 36-37
“Ke Dehr Masak Pwehki Koasoi kan me Ke Rongehr”
it “Esekaia” No. 1 par. 14
Esekaia
Senakerip Sohte Kak Powehdi Serusalem. Nin duwen me Esekaia kin medewe me pahn wiawi, Senakerip koasoanehdi me e pahn mahweniong Serusalem. Erein Senakerip oh nah sounpei kan ar kapilpene oh mahmahweniong kahnimw kehlail en Lakis, e kadarala ekei nah sounpei kan oh ekei wiliepen kaunen sounpei kan pwe ren idingkihong Serusalem en dukula pahn eh kaunda. Sounkair me koasoakoasoio iei Rapsake (kaidehn uhdahn ede, ahpw eh daidel en sounpei), me mai en lokaiahn Ipru. E kin ngihl laud kauwe Esekaia oh kepitki Siohwa, ni eh kin suweiki me Siohwa sohte kak doarehla Serusalem duwehte koht en wehi teikan ar sohte kak doarehla neirail sounkaudok kan sang Nanmwarkien Asiria.—2Na 18:13-35; 2Kr 32:9-15; Ais 36:2-20.
ip-1 387 par. 10
Ketingpen en Nanmwarki Men Pwoson
10 Mwurin mwo Rapsake katamankihong mehn Suhs kan me irail uhdahn luwet sang irail nan mahwen. E koasoi en pohnmwahso ni eh nda: “I pahn kihong uhk oahs 2,000 ma ke pahn kak rapahkihda uwen tohtohn soundak oahs pwukat.” (Aiseia 36:8) Ahpw ni mehlel, mie katepe ma nein Suda sounpei kan me kin dak oahs tohto de malaulau? Soh, pwe doarepen Suda sohte kohsang uwen kehlail en neirail sounpei kan. Lepin padahk 21:31 (NW) kawehwehda met ni ahl wet: “Oahs kin kaunopada ong rahnen mahwen, ahpw Siohwa me Sounkomour.” Eri, Rapsake kose me Siohwa kin ketin kapaia mehn Asiria kan a kaidehn mehn Suhs kan. Pwe dene ma soh, mehn Asiria kan sohte kak pedolong oh kohlongodo lel nan sapwen Suda.—Aiseia 36:9, 10.
ip-1 388 par. 13-14
Ketingpen en Nanmwarki Men Pwoson
13 Koasoi kamedek kan me Rapsake nda kin rasehng eh doadoahngki kepwehn mahwen. E kaperki mehn Suhs ko ren dehr kamehlele Esekaia, ni eh pahn nda: “KAUN-O pahn ketin doareikumwailla.” Rapsake katamankihong mehn Suhs kan me koht en Sameria kan sohte kak doarehla keinek eisek ko sang mehn Asiria. Oh ia koht en wehi teikan me Asiria kalowedier? “Ia irail met, koht kan en Amad oh Arpad? Ia koht en Separpaim? Mie emen me doarehla Sameria?”—Aiseia 36:18-20.
14 Mehlel, Rapsake me kin kaudokiong koht likamw akan, sohte wehwehki me mie wekpeseng laud nanpwungen Sameria me uhwongada kaudok mehlel oh Serusalem me mi pahn kaundahn Esekaia. En Sameria koht likamw akan sohte kak doarehla keinek eisek ko. (2 Nanmwarki 17:7, 17, 18) Ahpw Serusalem me mi pahn kaundahn Esekaia sohpeisangehr koht likamw akan oh pwurehng papah Siohwa. Ahpw, wiliepen Suda meh silimeno sohte kawehwehiong Rapsake duwen met. Re “nennenlahte sohte mwekid, nin duwen me Nanmwarki Esekaia mahsanihong irail re en wia; re sohte pahtohwanda lepin pato ehu.” (Aiseia 36:21) Elaiakim, Sepna, oh Soha ahpw pwurala rehn Esekaia oh pakairkihong en Rapsake koasoi ko.—Aiseia 36:22.
Ire Kesempwal kan
it “Mehn Kaweid Mahn” par. 4
Mehn Kaweid Mahn
Siohwa ketin mahsanihong Nanmwarki Senakerip en Asiria: “I pahn kihong nei kehs ni tumwomwen oh nei mehn kaweid mahn nanpwungen kilin ewomw kan.” (2Na 19:28; Ais 37:29, NW) Senakerip sohte men kohkohla, ahpw Siohwa ketin kahrehiong en kohkohla ni eh sohte kalowehdi Serusalem oh e pwurala Ninipe, wasa me nah pwutak riemeno kemehla ih. (2Na 19:32-37; Ais 37:33-38) Ni Siohwa eh kin ketikihong mehn kaweid mahn nan ewen imwintihti kan, met duwehte aramas ar kin kihong mehn kaweid mahn nan ewen mahn pwehn kaunda oh kamwakid.—Ais 30:28.
FEBRUARY 23–MARCH 1
SOAHNG KESEMPWAL KAN SANG MAHSEN EN KOHT AISEIA 38-40
“E Pahn Ketin Apwalih Sapwellime Pelin Sihpw Duwehte Silepen Sihpw Men”
Dahme Paipel Padahkihong Kitail Duwen Ih me Ketin Kaweid Ntingdahn Paipel
3 Wadek Aiseia 40:8. Mahsen en Koht kin kihda kaweid erpit kan ong ohl oh lih lelepek kan erein sounpar kid kid kei. Ia duwen met eh kak wiawi? Met wia peidek mwahu pwehki Paipel tepin ntingdi mahs mahsie nan doaropwehn mahs kan me kohkohla lao e ohla. Eri doaropwehn mahs ko sohte mi rehtail rahnwet. Ahpw Siohwa ketin tehk mwahu me aramas akan en wiahda copy kan en nting sarawi pwukat. Mendahki soun copy ko sohte unsek, irail kin uhdahn kanahieng arail doadoahk. Emen ohl saman ntingihedi duwen Palien Paipel ni Lokaiahn Ipru: “Kitail kak kamehlele me sohte pwuhken mahs ehu me aramas wiahda copy me uhdahn pwung duwehte Paipel.” Eri mendahki Paipel ntingdi mahsie nan doaropwe kan me kohkohla lao e ohla, oh soun copy kan sohte unsek, kitail kak kamehlele me mahsen kan me kitail wadek nan neitail Paipel rahnwet kin kasalehda madamadau en Siohwa, me ketin kaweid ntingdahn pwuhk wet.
4 Siohwa iei Utupen “kisakis mwahu oh unsek koaros.” (Seims 1:17) Paipel iei ehu kisakis me keieu mwahu me Siohwa ketikihong kitail. Kisakis ehu kin padahkihong kitail duwen soun kisakiso, ia uwen eh ese duwen kitail oh atail anahn kan. Met pil duwehte Ih me ketikihong kitail Paipel. Ni atail kin tehk kisakis wet, kitail kin sukuhlki laud duwen Siohwa. Kitail kin esehda uwen laud en eh ketin mwahngih duwen kitail oh atail anahn kan. Nan iren onop wet, kitail pahn koasoiapene ia duwen Paipel eh kasalehda sapwellimen Siohwa irair kaselel siluh: erpit, pwung pahrek, oh limpoak. Keieu, kitail pahn tehkpene ia duwen Paipel eh kasalehda sapwellimen Koht erpit.
cl 70 par. 7
Manaman en Pere—“Koht me Iei Atail Wasahn Ruk”
7 Ni Siohwa eh ketin karasahiong pein ih ong silepen sihpw men, e ketin kamehlelehiong kitail me e kupwurki pere kitail. (Esekiel 34:11-16) Tamanda dahme Aiseia 40:11 (NW) mahsaniheki duwen Siohwa, me mi nan irelaud 2 en pwuhk wet: “Duwehte silepen sihpw men e pahn ketin apwalih nah pelin sihpw. E pahn ketin kolkihpene sihmpwul kan lime, oh e pahn ketin wa irail ni pahnadi.” Ia duwen sihmpwulo eh mihla ni pahnadin silepen sihpwo—nan en silepen sihpwo likou puhp? Ele sihmpwulo tangodo rehn silepen sihpwo oh mwein pil irisekseli ni neh kan. Ahpw, silepen sihpwo me itiekidi oh pwekada sihmpwulo, oh koasoanediong ni pahnadio. Ia uwen mwekid wet eh kasalehda duwen Sounsilepatail Lapalapo eh ketin kupwurki sile oh apwalih kitail!
“E Kin Ketin Kakehlahda me Luwet oh me Pwangadahr kan”
4 Wadek Aiseia 40:26. Sohte me kak wadekedi usu kan koaros pahnlahng. Saintis kan kamehlele me ele mie mpen usu lik pak 400 nan ehute mwutumwut en usu me adaneki Milky Way. Ahpw Siohwa ketikihong eden ehuehu usu kan. Dahme met padahkihong kitail duwen Siohwa? Ma e kin ketin nsenohki ketikihong eden usu kan, medewehla ia sapwellime pepehm ong uhk! Ke kin papah ih, kaidehn pwehki ke anahne wia met, ahpw pwehki ke poakohng ih. (Mel. 19:1, 3, 14) Samatailo kin ketin mwahngih soahng koaros duwen kowe. Paipel mahsanih me “pil pitenmoangamwail koaros iangehr wadawadedi.” (Mad. 10:30) Siohwa ketin kupwurki kitail en ese me e “ketin mwahngih dahme aramas mwahu kan kin lelohng.” (Mel. 37:18, NW) E sansal me Siohwa kin ketin mwahngih kahpwal koaros me ke ahneki, oh e kak ketikihong uhk kehl me ke anahne pwehn dadaur pahn ehuehu kahpwal pwukat.
5 Wadek Aiseia 40:28. Siohwa iei utupen kehl koaros. Karasepe, medewehla uwen kehl me e ketikihong ketipin. Sounnting en palien sains me adaneki David Bodanis nda me uwen kehl me ketipino kin kihda nan seken koaros rasehng pospeseng en pakudang kehlail (atomic bomb) lik lik kei. Pil emen sounroporop kapatahda me ketipino kin kihda nan seken ehute kehl me itar en kaitarala anahn en aramas koaros nan sampah pwon ong erein sounpar 200,000! Eri Siohwa, me kin ketikihong ketipino kehl, kak ketikihong kitail kehl me kitail anahne pwehn dadaur pahn atail kahpwal kan.
6 Wadek Aiseia 40:29. Papah Siohwa kin wadohng kitail peren laud. Sises mahsanihong sapwellime tohnpadahk kan: “Ale ei mehn wisik.” E pil mahsanih: “Kumwail ahpw pahn diar nsenamwahu. Pwe ei mehn wisik me kansenamwahu oh dahme I peki kumwail en wahda me marahra.” (Mad. 11:28-30, NW) Met uhdahn mehlel! Ekei pak, ele kitail kin uhdahn pwangada ni atail kin kohkohsang ni imwatail pwehn iang towehda mihting kan de kohla kalohk. Ahpw ia atail pepehm ni ahnsou me kitail kin pwurala ni imwatail kan? Kitail kin nsenamwahula oh kakehr apwalih atail kahpwal kan. Mehlel, sapwellimen Sises mehn wisik me kansenamwahu.
Ire Kesempwal kan
ip-1 400 par. 7
“Koaloalamwahwihala Nei Aramas akan”
7 Kokohp wet sohte pweidahte ni ahnsou me onohnsapahl wiawi nan pahr 500 samwa Mwohn Krais. Pil mie me pweida ni mwehin tepin Kristian ko. Sohn Sounpapidais me wia ‘ngihl ehu me kin likilikwer’ nan sapwtehn, me kapwaiada Aiseia 40:3. (Luk 3:1-6) Pahn sapwellimen Koht kaweid, Sohn kasalehda me iei ih me Aiseia koasoakoasoia duwe. (Sohn 1:19-23) Sang pahr 29, Sohn tepida kaunopada elen Sises Krais. Pwehki Sohn eh tiengla oh kalohki duwen ih, e kamwakid aramas ako ren rapahki Mesaia me inoupe mie, pwe irail en pil kak rong ih oh idawehn. (Luk 1:13-17, 76) Pwehki Sises, Siohwa pahn ketin doadoahngki Wehin Koht pwehn kasaledekala me koluhla kan, sang ar sensel pahn dihp oh mehla. (Sohn 1:29; 8:32) En Aiseia mahsen ko pweida laud ni ahnsou me luhwen me keidi kan kohkohsang Papilon Lapalap nan pahr 1919 oh pwuralahng kaudok min.