Kapai Laud ong Irail kan me Kin Pwurala nan Uhdahn Sapwarailo

RIATAIL Kristian tohto me mahso keseusang sapwarailo oh uhd keseula nan sahpw teikan pwehn koadoahkihada mwohni met pwuralahr nan uhdahn sapwarailo. Pwehki arail poakohng Siohwa oh aramas akan, irail kin keseula wasa kan me uhdahn anahne sounkalohk kan en Wehio. (Mad. 22:37-39) Soangen tounmetei dah me re wiahda, oh kapai dah kan me re alehdi? Pwehn esehda duwen met, kitail pahn koasoia duwen sahpwo Cameroon.

“WASA EHU ME MWAHU ONG ‘LAID’”

Nan pahr 1998, brother men me ede Onésime keseusang sapweo Cameroon. Erein sounpar 14 e kin kousoan nan ehu sahpw tohrohr. Ehu rahno nan ehu mihting en Kristian, e rong duwen karasaras ehu me pid doadoahk en kalohk. Me wia padahko nda, “Ma ke iang kompoakepahmwo kohla laid oh kumwa dohpeseng, oh ke esehda me kompoakepahmwo koledi mwahmw tohto wasa me e mi ieo, ke seu pahn keseula wasao?”

Karasaraso kahrehiong Onésime en medemedewe en pwurala Cameroon, wasa me aramas tohto kin men onopki Paipel, oh pwehn sewese sounkalohk kan wasao. Ahpw e ekis pwunodki met. Ia duwe, e kak pwurehng ahnla kousoan nan Cameroon mwurin eh mihmi nan ehu sahpw tohrohr erein sounpar tohto? Pwehn esehda ma e kak, e mwemweitla Cameroon sounpwong weneu. Mwuhr nan pahr 2012, e keseula oh mihmihla Cameroon.

Onésime nda: “I anahne ahnla karakar en sahpwo oh pil mour en wasao. Nan Wasahn Kaudoko, I anahne pwurehng ahnla mwohndi pohn sehr kekeluwak.” Ahpw e sirei oh nda, “Ni ei kalaudehla ei kin rong kanahieng prokramo, I sohla nohn medewe duwen kahpwalo.”

Nan pahr 2013, Onésime pwoudikihda Géraldine, me pwurala Cameroon mwurin eh kousoan France erein sounpar duwau. Ia duwen Siohwa eh ketin katingih ira pwehki ara kin wiahki kupwure me keieu kesempwal nan ara mour? Onésime nda: “Se iang Sukuhl ong Sounkalohki Wehio kan oh pil iang papah nan Pedel. Nan pahr nekiero, tohnsukuhl en Paipel 20 sang at mwomwohdisou papidaisla. I pehm me ahnsou wet, I mihmi wasa ehu me mwahu ong ‘laid.’” (Mark 1:17, 18) Géraldine pil nda: “I alehdier kapai me uhdahn laudsang me I kasik.”

KAPERENPEN DOADOAHK EN KATOHNPADAHK

Judith keseula nan Wehin Amerika ahpw e kin men kalaudehla eh doadoahk en kalohk. E nda: “Ahnsou koaros mwohnte ei pwurasang ei mwemweitla rehn ei peneineio nan Cameroon, I kin sengiseng pwehki I anahne kohkohsang aramas kei me I tepidahr onop Paipel rehrail.” Ahpw Judith kin pweiek en pwurehng keseula Cameroon. Eh doadoahk en mwohnio pweimwahu oh kin kak pwain pweinen wini kan me eh pahpao me mi Cameroon anahne. Ahpw Judith likih Siohwa oh eri keseula Cameroon. E nda me e wereisang soahng mwahu kan me e ahneki ni ahnsou me e kousoan nan Wehin Amerika. E kapakap ong Siohwa en ketin sewese ih ahnla wekidekla pwukat oh alehdi mehn kangoang kan me sounapwalih me kin seiloak oh eh pwoudo sewesehki.

Ni Judith eh tamanda ahnsou ko, e nda, “Erein sounpar siluh I perenkihda ei sewese aramas pahmen en papidaisla.” E tepida papah nin duwen emen pioneer tohrohr. Rahnwet, e kin iang eh pwoudo, Sam-Castel, wia doadoahk en sounapwalih me kin seiloak. Ahpw dahme wiawihong ahn Judith pahpao? Judith oh eh peneineio diarada imwen wini ehu nan ehu sahpw tohrohr pwehn sewese pwain pweinen en ah pahpao pwalo. E kaperen me en eh pahpao pwalo pweida mwahu.

ALEHDI SAPWELLIMEN SIOHWA SAWAS

Emen brother me adaneki Victor keseula Canada. Mwurin eh wadek ehu oaralap nan Kahn Iroir duwen sukuhl laud, e medewe mwahu duwen eh kin ale kasukuhl. E uhdihsang eh iang sukuhl laud oh uhd tepida ale kasukuhl en wia misihn ape me e sohte anahne sukuhlki ahnsou werei. E nda, “Met sewese ie en mwadang diarada ei doadoahk oh en wia dahme I kin uhdahn men wia, me iei en pioneer.” Mwuhr, Victor pwoudikihda Caroline, oh ira mwemweitla Cameroon. Ni ara mwemweitla ni ohpis en Sounkadehdehn Siohwa kan wasao, ekei brother ko kangoange ira en medewe ma ira kak papah nan Cameroon. Victor nda, “Se sohte ahneki kahrepe ehu en nda soh, oh pwehki at mour sohte kin kedirepwki soahng kan me sohte nohn kesempwal, se kak wia met.” Mendahki Caroline ahneki kahpwal en soumwahu, ira pilada en keseula Cameroon.

Victor oh Caroline tepida papah nin duwen pioneer kei pwehn sewese aramas akan koaros me ira tuhwong me kin perenki rong duwen Paipel. Pwehki mie neira mwohni me ira nekidala, kahrehda ira sohte anahne doadoahk nin tapio. Mwurin mwo, ira doadoahk nan Canada erein sounpwong kei, me sewese ira en pwurala Cameroon oh pousehlahte pioneer. Soangen kapai dah kan me ira alehdi? Ira iang Sukuhl ong Sounkalohki Wehio kan, papah nin duwen pioneer tohrohr kei, oh met ira kin iang sewese kauwada wasahn kaudok kan. Victor nda, “Pwehki se pwilikihdi at mour nsenamwahu, se anahne likih Siohwa en ketin apwalih kiht.”

KAPERENPEN SEWESE ARAMAS AKAN EN INOUKIHONG SIOHWA ARAIL MOUR

Nan pahr 2002, Alain, me kin iang sukuhl laud nan Sehmen, wadek kisin doaropweo Me Pwulopwul kan—Ia duwen Amwail Pahn Doadoahngki Amwail Mour? Dahme e wadek kamwakid ih en wiahda mehn akadei kapw kan. Nan pahr 2006, e iang Sukuhl en Brother kan ong Pwukoa Tohrohr kan oh eri pekederla Cameroon, sahpw me e ipwidi ieo.

Nan Cameroon, Alain diar eh doadoahk ong lepin ahnsou. Ahpw mwuhr, e diar doadoahk ehu me pweimwahu, ahpw e ekis pwunodki me doadoahko pahn katikala eh ahnsou ong kalohk. Eri ni ahnsou me e alehdi luhk en wiahla emen pioneer tohrohr, e mwadang pwungki. Eh kaunen doadoahko men kalaudehla pweineo ahpw Alain sohte dukiong oh wiahla pioneer tohrohr men. Mwuhr, Alain pwoudikihda Stéphanie, me kin kousoan France erein sounpar tohto. Soangen kahpwal dah me Stéphanie ahneki mwurin eh keseula Cameroon?

Stéphanie nda: “I ahnekihda soumwahu kei me sohte nohn laud, ahpw I kin kaukaule ale sawas en wini oh mwahula.” Pwopwoudo alehdi kapai kan pwehki ara kin dadaurete. Alain nda: “Ni ahnsou me se kohla kalohk Katé, kousapw ehu me uhdahn doh, se diar aramas kei me men onopki Paipel. Mwuhr, se kin kak doadoahngki nait delepwohn pwehn onop Paipel rehrail. Tohnsukuhl en Paipel riemen me papidaisla sang nanpwungarail, oh pwihn en kalohk ehu wiawihda.” Stéphanie pil nda: “Sohte ehu soangen peren me laudsang en sewese emen en inoukihong Siohwa eh mour. Pwehki at kin papah nan sahpw wet, se kin pehm soangen peren wet pak tohto.” Rahnwet, Alain oh Stéphanie kin papah nin duwen sounapwalih me kin seiloak.

“SE KAPWAIADA DAHME SE ANAHNE WIA”

Gisèle papidaisla erein eh kin iang sukuhl en toahkte nan Italy. E mwekidki soangen mour me pwopwoud pioneero me padahkihong ih duwen Paipel ahneki. Ara mour sohte kin kedirepwki wiewia kan me sohte uhdahn kesempwal. Oh Gisèle men kalaudehla eh doadoahk en kalohk. Eri Gisèle tepida pioneer erein eh kankanekehla eh sukuhlo.

Gisèle men pwurala Cameroon pwehn kalaudehla eh papah Siohwa, ahpw mie soahng kei me e pwunodki. E nda, “I sohla pahn naineki doaropwe kan pwe I en kak pwurala Italy, oh I pahn tohrohrasang kompoakepahi kan oh peneinei kan me mi Italy.” Mendahki met, nan May 2016, Gisèle keseula Cameroon. Mwuhr, e pwoudikihda Léonce, oh ohpis en Sounkadehdehn Siohwa kan nan Cameroon peki ira en keseula Ayos, kisin kahnimw ehu me mie anahn laud ong sounkalohk kan en Wehio.

Ia mwomwen mour nan Ayos? Gisèle nda: “Lioal kin kalapw kunla erein wihk kei, oh se sohte kak charge nait sehlpwohn ko. Pali laud en ahnsou, nait sehlpwohn ko sohte kak doadoahk. I sukuhlki en kuk pohn kisiniei, oh se kin doadoahngki wilpahro oh dengki pwehn kohla idipil nipwong ni piletik ehu oh ahnsou me malaulaula aramas.” Dahme sewese Gisèle oh eh pwoudo en dadaurete? Gisèle nda: “Sapwellimen Siohwa manaman sewese kiht en dadaurete. Oh ngehi oh ei pwoudo kin sawaspene. At peneinei oh kompoakepaht kan kin kangoange kiht oh ekei pak sewesehkin kiht mwohni.”

Ia duwe, Gisèle perenki eh pwurala nan sahpw me e ipwidi ieo? E nda: “Ei uhdahn! Nin tapio, mie soangen kahpwal kei oh pepehm en mwoaros, ahpw mwurin at powehdi soahng pwukat, ngehi oh ei pwoudo pehm me se kapwaiada dahme se anahne wia. Se kin likih Siohwa oh pil karanihala ih.” Léonce oh Gisèle iang Sukuhl ong Sounkalohki Wehio kan, oh met ira kin papah nin duwen pioneer tohrohr kei ong lepin ahnsou.

Duwehte sounlaid kan me kin eimah mendahki kahpwal en koledi mwahmw tohto, irail kan me pwurala nan uhdahn sapwarail kin pilada en wiahda tounmetei kan pwehn sewese irail me ahneki mohngiong pwung me kin mwekidki rongamwahu en Wehio. Siohwa pahn uhdahn ketin tamataman irail sounkalohk pwerisek pwukat pwehki arail kasalehda arail poakohng mwareo. (Neh. 5:19; Ipru 6:10) Ma ke kousoan nan ehu sahpw tohrohr oh ese me mie anahn laud ong sounkalohki Wehio kan nan sahpw me ke ipwidi ieo, ke pahn kak pwurala? Ma ke wia met, Siohwa pahn ketin katingihiuk.​—Lep. Pad. 10:22.