2 | “Kakehlepen Loalatail me Kohsang Nting Sarawi kan”

PAIPEL MAHSANIH: “Mehkoaros me ntingdier mwowe, ntingdier pwe en padahkih kitail pwe kitail en ahneki koapworopwor sang ni atail kin dadaur oh sang ni kakehlepen loalatail me kohsang Nting Sarawi kan.”—ROM 15:4.

Met Wehwehki

Paipel kak kakehlakahkin kitail mahsen kansenamwahu kan me kak sewesei kitail ma atail elen madamadau kan kin sapwung. Rohng en Paipel pil kin kihong kitail koapworopwor me ni ahnsou keren kitail sohla pahn ahneki pepehm kamedek kan.

Ia Duwen Met Kak Sawas

Ekei pak, kitail koaros kin nsensuwed; ahpw irail akan me kin lokolongki soumwahu en nsensuwed de pwunod ele kin ahneki pepehm kamedek ahnsou koaros. Ia duwen Paipel eh kak sawas?

Paipel kin kasalehda madamadau pwung tohto me kak wiliandi madamadau sapwung kan. (Pilipai 4:8) E kak uhdahn kansenamwahwih atail madamadau, pwehn sewesei kitail en kaunda atail pepehm.—Melkahka 94:18, 19.
Paipel kak sewesei kitail en uhdihsang medewe me sohte katepatail.—Luk 12:6, 7.
Iren Paipel tohto kin kamehlelehiong kitail me kitail sohte kelehpw oh Sounkapikpatail, Koht uhdahn ketin mwahngih atail pepehm kan.—Melkahka 34:18; 1 Sohn 3:19, 20.
Paipel inoukihda me Koht pahn ketikihsang soahng kamedek kan me kitail kin tamanda. (Aiseia 65:17; Kaudiahl 21:4) Ma kitail kin lokolongki madamadau en pwunod oh pepehm en masepwehk, ele inou wet pahn sewesei kitail en dadaurete.

Ia Duwen Paipel Eh Kin Sewese Jessica

Dahme Soumwahu en Nsensuwed Kin Wiahiong Ie

“Ni ei sounpar 25, I ahnekihda pwunod laud ehu oh toahkte kan nda me I ahneki soumwahu en nsensuwed laud. I kin lokolongki ei kin wiahkintehieu tamanda soahng kamedek kan me wiawihong ie mahso. Toahkte kan sewese ie en wehwehki me ahi soumwahwo kohsang ei kin ahneki madamadau sapwung kan pwehki soahng kamedek kan me wiawihong ie. Patehngete wini me mwahuong ie, I anahne sawas sang toahktehn madamadau pwehn sewese ie en esehda oh kapwungala ei madamadau sapwung kan.”

Ia Duwen Paipel Eh Kin Sewese Ie

“Ni ahi soumwahu en nsensuwed eh kin uhdahn laud, I kin ahneki pepehm en masepwehk, pwunod laud oh sohte kak meir. Pak tohto nipwong kan, pwunod laud kin poweiehdi oh I sohte kak kauhdi. Duwehte me Melkahka 94:19 kawehwehda, Koht kak ketin kansenamwahwih oh kaloalamwahwih kitail ni ahnsou me pwunod kan kin kipeikitaildi. I kin kihdi nei Paipelo oh pwuhk me I ntingihdi iren Paipel kangoang kan loale limwahn ei pehto. Ni ei sohte kak meir, I kin wadek ekei iren Paipel kan, met kin mweidohng sapwellimen Koht madamadau en kansenamwahwih ie.

“Paipel kangoange kitail en powehdi madamadau kan me weksang dahme kitail kin ese duwen Koht. Mahso, I kin kamehlele me ngehi aramas mwahl men, sohte me kin poakohng ie, oh sohte katepei. Ahpw I sukuhlki me soangen madamadau pwukat uhdahn weksang Paipel me kin kasalehda Koht nin duwen Sahm limpoak men oh kadek kalahngan oh kin ketin nsenohki emenemen kitail. I ekisekis kaunda ei madamadau oh sohte mweidohng ei madamadau en kauniehda. I sukuhlki en kilangwohng pein ngehi duwehte Koht eh kin ketin kilangwohng ie. Met kahk kesempwal ehu me sewese ie en kauhdi madamadau sapwung me I kin ahneki duwen pein ngehi.

“I kin kasikasik ahnsou me I sohla pahn tamanda soahng kamedek kan oh madamadau sapwung kan me I ahneki pahn sohrala. Ni ei esehda me soumwahu en madamadau pahn wiahla soahng kan en mahso oh pil koapworopwor kaselel ong ahnsou kohkohdo me I solahr anahne nannanti powehdi soumwahu en nsensuwed, met kin kakehlaka ie en dadaur pahn ei luwet akan met.”