Soikala Madamadau en Roporop en Sampah Rahnwet
KE KIN tehk me aramas tohto nan sampah medewe me irailte me warohng alehdi soahng mwahu kan, de aramas en wia mwahu ong irail? Sohte lipilipil ia uwen me irail ale, re medewe me re warohng ale laudsang. Aramas me kin ahneki soangen madamadau wet kin roporop oh sohte kalahnganki dahme re ahneki. Ih met me Paipel mahsanih me aramas pahn wia erein imwin rahn akan.—2 Tim. 3:2.
Ei mehlel, sangete mahs mie aramas kan me kin roporop. Karasepe, Adam oh Ihp men ahneki pwung en pilada ong ira dahme pwung oh sapwung, oh kitail koaros lokolok pwehki ara pilipilo. Pil ehu karasaras iei Usaia, nanmwarki men en Suda. E medewe me e warohng isik war pwohmwahu nan tehnpas sarawio, ahpw e sohte ahneki pwung en wia met. (2 Kron. 26:18, 19) Duwehte met, Parisi ko oh Sadusi ko kamehlele me Koht anahne apwalih irail mwahusang meteikan pwehki irail kadaudok en Eipram.—Mad. 3:9.
Kitail mi nanpwungen aramas akan me kin roporop oh arail madamadau kakete kamwakid kitail. (Kal. 5:26) Kitail kakete tepida medewe me kitail warohng alehdi pwais kaselel ehu de meteikan en wia mwahu ong kitail. Dahme kak sewese kitail en dehr duwehla irail? Pwehn tepida, kitail anahne wehwehkihla dahme Siohwa ketin medewehki duwen irairo. Ire mehlel riau sang Paipel pahn sewese kitail.
Siohwa me kin ketin koasoanehdi dahme kitail en ale. Medewehla ekei karasepen met.
Nan koasoandien peneinei, ohl pwopwoud men kasik me eh pwoudo en wauneki ih oh lih pwopwoud men kasik me eh pwoudo en poakohng. (Ep. 5:33) Pwopwoud kan kak kasik me arail pwoud en kasalehda soangen limpoak me kin wiawihte nan pwopwoud. (1 Kor. 7:3) Pahpa nohno kan kak kasik me neirail seri kan en peikiong irail oh seri kan kak kasik arail pahpa nohno kan en apwalih oh poakohng irail.—2 Kor. 12:14; Ep. 6:2.
Nan mwomwohdiso, elder kan me kin doadoahk laud uhdahn warohng kitail en wauneki irail. (1 Des. 5:12) Ahpw, re sohte ahneki pwung en kaunda riarail Kristian kan.—1 Pit. 5:2, 3.
Koht ketikihong koperment en aramas akan pwuhng en ale daksis oh wahu sang irail kan me mi pahn ar manaman.—Rom 13:1, 6, 7.
Ni limpoak, Siohwa ketikihong kitail laudsang dahme kitail warohng. Pwehki kitail dipan, kitail warohng mehla. (Rom 6:23) Ahpw, Siohwa ketikihong kitail kapai tohto pwehki sapwellime limpoak loalopwoat ong kitail. (Mel. 103:10, 11) E ketikihong kitail kapai pwukat koaros oh pil tohtohsang, kaidehn pwehki kitail warohng, ahpw pwehki sapwellime kadek sapan.—Rom 12:6-8; Ep. 2:8.
IA DUWEN EN SOIKALA KAKAIRADA ROPOROP DE MEDEWE ME KITAIL KESEMPWAL SANG METEIKAN
Kanaiehng en dehr ahneki madamadau en sampah wet. Ma kitail sohte tehk, kitail kakete tepida medewe me kitail warohng ale laudsang meteikan. Sises ketin kasalehda ia uwen eh mengei en ahneki soangen madamadau wet sang ni eh ketin doadoahngki karasaras en tohndoadoahk ko me pweipweiki denari ehu. Ekei tohndoadoahk ko tepida ni menseng oh doadoahk rahno pwon pahn ketipino; ekei doadoahngkihte awa ehu. Pwihn me tepin doadoahko medewe me re konehng ale pweipwei laud ehu pwehki doadoahk me re wiao. (Mad. 20:1-16) Ni eh doadoahngki karasaras wet, Sises kasalehda me sapwellime tohnpadahk kan anahne itarki dahme Koht kupwurki ketikihong irail.
Ohl ako me doadoahk rahn pwon medewe me re warohng ale mwohni laud
Kasalehda kalahngan, oh dehr kasik soahng kan sang meteikan. (1 Des. 5:18) Kahlemengih wahnpoaron Pohl me sohte peki rie Kristian kan nan Korint ren kihong dahme e anahne mendahki e ahneki pwuhng en wia met. (1 Kor. 9:11-14) Kitail anahne kasalehda atail kalahnganki soahng koaros me aramas kin kihong kitail oh dehr kasik soahng kan sang meteikan.
Wahnpoaron Pohl sohte peki mwohni sang meteikan
Kasalehda aktikitik. Ni emen eh kin nohnla medewe duwen pein ih, e kin kalapw tepida medewe me e warohng ale laudsang dahme e ahneki. Ma kitail aktikitik, e pahn sewese kitail en dehr ahneki soangen madamadau keper wet.
Ahn soukohp Daniel aktikitik kahrehiong ih en kesempwal ong Siohwa
Soukohp Daniel wiahda mehn kahlemeng mwahu en kasalehda aktikitik. E kohsang peneinei kesempwal ehu, e masamwahu, loalokong, oh ahneki koahiek tohto. Eri e kakete medewe me e uhdahn warohng ale pwais kaselel kan me kohwong ih oh aramas akan anahne wia mwahu ong ih. (Dan. 1:3, 4, 19, 20) Ahpw, Daniel aktikitikte oh irair wet kahrehiong ih en kesempwal ong Siohwa.—Dan. 2:30; 10:11, 12.
Kitail en soikala madamadau en roporop oh kesempwalsang meteikan me reklahr nan sampah rahnwet. Ahpw, kitail en pousehlahte perenki ehuehu kapai kan me Siohwa ketikihong kitail pwehki sapwellime kadek kalahngan.