I Anahne Uhdihsang Diraip?

Ia duwe, ke mi nan soangen irair wet? Ma iei, dahme kak seweseiuk en pilada ma ke pahn pousehlahte diraip?

Nan ekei wehi kan, irail akan me kin diraip me lelehr soangen sounpar ehu oh men pwurehng wiahda neirail laisin anahne ale keseu mahs sang toahkte. Kristian kan me kousoan nan wehi pwukat kin peikiong kosonned. (Rom 13:1) Ahpw mehnda ma sohte soangen kosonned pwukat nan omw wehi, mie iren sawas kan me kak seweseiuk en pilada ma ke pahn pousehlahte diraip.

KASAWIH MWOMWEN OMW DIRAIP

Nin duwen me website en Wehin Amerika, National Institute on Aging (NIA) koasoia, ke kak pein idek mahs rehmw peidek pwukat:

• I kin apwalki wadek sain en pohn ahl akan de kilang mwahu nipwong?

• E apwal ong ien mwadang sohpeilahng kilahs kan oh tehk wasa kan me apwal en kilang?

• I apwalki mwadang kamwakid nehie sang ni kahso oh tiak brake?

• I kin diraip wawai me kahrehda traffic kin sohla tangamwahu?

• Me keren, I kin kalapw kereniong aksident, de mie pad de ohla kei ni werei sidohsao pwehki I doakoahdi mehkot?

• Mie pak polihs kan kin kauiehdi pwehki mwomwen ei diraip?

• Mie pak I meirla ni ei dirdiraip?

• I kin kangkang wini me kak suwediong ei diraip?

• Ei peneinei de kompoakepahi kan kin nda me re pwunodki mwomwen ei kin diraip?

Ma ke pahn sapeng ei ong ehu de riau peidek pwukat, eri mweinele met iei ahnsou en wiahda wekidekla kan. Karasepe, mwein ke anahne katikala omw kin diraip, ahpw mehlel nipwong kan. Pousehlahte tetehk mwomwen omw kin diraip. Ke kak peki rehn emen omw peneinei de kompoakepahmw en ndaiong uhk dahme re medewehki omw kin diraip. Ke pil kak medewe en ale kasukuhl ong mwomwen diraip me sohte keper. Ahpw, ma ke sapeng ei ong peidek riau de tohtohsang, e pahn mwahuwong uhk ken uhdihsang diraip.a

IA DUWEN PAIPEL EH KAK SEWESEIUK EN WIAHDA PILIPIL MWAHU?

Mwein e pahn apwal ong uhk en ese me ke sohla kak diraip mwahu duwehte mahso. Oh mwein ke kin apwalki medewe de koasoia ma ke pahn uhdihsang diraip. Ia duwen Paipel eh kak seweseiuk en medewe mwahu oh wiahda pilipil mwahu? Medewehla ire kesempwal riau pwukat.

Kolokol mpahi. (Lep. Pad. 11:2) Ni atail kin mahla, kitail sohla kin kak kilang mwahu, sohla kak rong mwahu oh paliwaratail kin luwetala. Karasepe, pali laud en aramas kin sohla iang mwadong ehu ni ar kin mahla pwehki re ese me re pahn mengei en medekla. Met pil duwehte diraip. Aramas mpahi men pahn uhdihsang diraip ma met keper ong ih. (Lep. Pad. 22:3) Oh aramas mpahi men pahn rong ma meteikan kasalehda ar pwunodki met.—Pil kilang 2 Samuel 21:​15-17.

Soikala dipen kamaramas. (Deud. 22:8) Ma aramas emen sohte diraip kanahieng, e kak kamedekihala de kemehla aramas. Aramas emen me pousehlahte diraip ni eh sohla kak diraip mwahu kakete kemehla pein ih de meteikan. Oh e pil kakete pwukoahkihdi dipen kamaramas.

Dehr medewe me meteikan sohla pahn waunekin uhk pwehki ke sohla diraip. Siohwa ketin poakohng uhk, oh e ketin kupwurperenki omw kin pohnese omw soh itar akan, omw kin aktikitik oh medewe meteikan. Oh e ketin inoukihda me e pahn seweseiuk oh kansenamwahwihiuk. (Ais. 46:4) E sohte pahn likidmelieiukala. Eri peki en ketin seweseiuk ken doadoahngki erpit oh kaweid en Paipel kan ni omw pahn pilada ma ke pahn uhdihsang diraip de soh.