Peidek kan Sang Sounwadawad kan
“Madamadau” dahieu me Siohwa pahn ketikihong nan mohngiong en koperment kan ni ahnsou keren?
Me pid tepidahn kahn kamakam kowahlapo, Kaudiahl 17:16, 17 mahsanih: “Kode eisek me ke kilangehr oh mahn lawalou, irail pwukat pahn kailongkihla lihen netiki paliwereo oh kihsang mehkoaros me e ahneki oh kakilisawihada, oh re pahn kangala uduke oh isingkihla douluhl kisiniei. Pwe Koht ketin audehda arail mohngiong pwe ren kapwaiada kupwure, ei, re pahn kapwaiada madamadau tehieu ni arail pahn kihong mahn lawalou arail wehi.” Mahso, neitail sawaspen Paipel kan kin kasalehda me “madamadau” me Siohwa pahn ketikihong nan mohngiong en wehi kan iei ren kauwehla pelien lamalam likamw kan.
Ahpw mie wekidekla ehu duwen wehwehn met. “Madamadau” me Siohwa pahn ketikihong nan mohngiong en wehi kan iei ren “kihong mahn lawalou arail wehi.” Pwehn wehwehki ia duwen met eh pahn pweida, medewehla peidek pwukat me kileldi pah.
Ihs me kokohpo koasoakoasoia duwe? “Lihen netiki paliwereo” pil kin adaneki “Papilon Lapalap,” me iei pelien lamalam likamw kan en sampah. ‘Mahn lawalo weitahtao’ iei United Nations. Mwoweo, pwihn wet adaneki League of Nations me wiawihda nan pahr 1919 pwehn kolokol popohl. (Kaud. 17:3-5) ‘Kode eiseko’ iei koperment koaros me kin utung mahn lawalou.
Ia mwomwen nanpwungen lihen netiki paliwereo oh mahn lawalo weitahtao? Lihen netiki paliwereo kin “mwomwohd pohn” mahn lawalou, me wehwehki liho kin utung oh song en kaunda.
Dahme pahn wiawihong lihen netiki paliwereo? Mahn lawalou, iangahki kode eisek me kin utungo, “pahn kailongkihla lihen netiki paliwereo.” Uwen ar pahn kailongki, re pahn kihsang soahng koaros me liho ahneki oh kasalehiong koaros ia uwen eh suwed. Oh re pahn kamwomwala ih, nin duwen me Siohwa ketin mahsanih me pahn wiawi. (Kaud. 17:1; 18:8) Eri ni ahl wet, pelien lamalam likamw koaros pahn kasohrala. Ahpw, mwohn met eh pahn wiawi, Siohwa pahn ketin kahrehiong wehi kan en wia mehkot me saikinte wiawi pak ehu.
Dahme Siohwa pahn ketin kahrehiong wehi kan en wia? E pahn ketikihong nan mohngiong en kode eiseko “kupwure,” me iei ren ‘kihong mahn lawalo [weitahtao]’—United Nations—“arail kehl oh manaman en kakaun.” (Kaud. 17:13) Medewehla ia wehwehn met. Ia duwe, koperment kan en aramas pahn pein koasoanehdi en kihong mahn lawalou arail kehl oh manaman en kakaun? Soh! Kokohpo kasalehda me Koht me pahn ketin kamwakid irail en wia met. (Lep. Pad. 21:1; pil kilang Aiseia 44:28.) Wekidekla wet sohte pahn ekisekis wiawi, ahpw e pahn mwadangete wiawi. Mwuri, mahn lawalou pahn kauwehla pelien lamalam likamw koaros kohkohlahte.
Eri dahme kitail en kasik me pahn wiawi ni ahnsou kohkohdo? Kitail en dehr kasik en kilang nuhs duwen koperment kan ar ekisekis tepida utung United Nations. Ahpw ih met me kitail pahn kasik: Siohwa pahn ketin wiahkintehieu kahrehiong koperment kan koaros en kihong United Nations arail manaman. Ni ahnsou me met wiawi, kitail pahn ese me kahn kamakam kowahlapo pahn kereniong tepida. Ahpw erein atail awiawih, “kitail en pepehd oh kolokol atail koahiek en madamadau” pwehki wekidekla kan pahn mwadangete wiawi ni ahnsou keren!—1 Des. 5:6.