Uwen Tohtohn Mahn akan Rahnpwukat Malaulaula ni Uwen Persent 73 Sang Pahr 50 Samwalahro—⁠Dahme Paipel Mahsanih?

Ni October 9, 2024, World Wildlife Fund kihda ripoht kapwuriamwei ehu duwen dahme wiawihong mahn akan pwehki en aramas akan ar wiewia kan. E kasalehda me “erein sounpar 50 samwalahro (1970-2020), uwen tohtohn mahn akan me aramas kin tetehk malaulaukihla persent 73.” Ripohto kasalehda: “Kitail kak nda me dahme pahn wiawi erein sounpar limau sang met pahn koasoanehdi mwomwen mour nin Sampah ni ahnsou kohkohdo.”

Kitail kak wehwehki kahrepen aramas tohto kin pwuriamweikihla soangen ripoht pwukat. Kitail perenki pwe sampah kaselel oh kitail kahng kilang mahn akan ren lokolok. Kitail ahneki soangen pepehm wet pwehki Koht ketin kupwurki kitail en apwalih mahn akan.—Senesis 1:27, 28; Lepin Padahk 12:10.

Ele ke pahn medewe, ‘Kitail pahn kak pere mahn akan nin sampah? Dahme Paipel mahsanih?’

Koapworopwor ong ahnsou kohkohdo

Sohte lipilipil ia uwen laud en atail nantihong doare mahn akan, Koht kelehpw me kak uhdahn ketin pere irail. Nin duwen me Paipel kohpada nan Kaudiahl 11:18, Koht pahn ketin “kauwehla irail kan me kin kauwehla sampah.” Ireo padahkihong kitail soahng riau:

1. 1. Koht pahn ketin kauhdi aramas akan ren dehr kauwehla douluhl sampah.

2. 2. Kereniong Koht pahn ketin wia mehkot. Ia duwen atail ese met? Pwehki rahnpwukat aramas akan kin uhdahn kauwehla mouren mahn akan laudsang mahs.

Dahme Koht pahn ketin wia pwehn apwalihala kahpwal wet? E pahn ketin doadoahngki sapwellime koperment nanleng, de sapwellime Wehio, pwehn kaunda sampah pwon. (Madiu 6:10) Koperment wet pahn kihda kasukuhl oh kaiahn me aramas peik kan anahne pwe ren apwalih oh pere mouren mahn akan nin sampah.—Aiseia 11:9.