Rien Sosep Kan Kailongki Ih

KILANG duen kainsensuwed oh kahpwal me lelohng pwutako. Met iei Sosep. Rie kan ahpwtehn netikihla ih rehn ohl kei me kohkohlahng Isip. Wasao re pahn netikihla Sosep pwen wiahla ladu men. Dahme kahrehda rie kan wia soahngen wiewia suwed duwehte met? Re wiahdahr met pwehki irail peirinki Sosep.

Arail pahpa Seikop kin poakepoake Sosep laud. E kasalehdahr ah poakepoake ih ki ah wiahda ah sekid kasehlel. Ni ansou me rie ohl 10 ko kilang duen laud en ahn Seikop poakepoake Sosep, irail eri peirin oh kailongki Sosep. Ahpw mie pil ehu kahrepe tohrohr me kahrehda irail kailongki ih.

Sosep auramenehda auramen riau. Nan auramen pwukat koaros rie kan kin dairukedi mwowe. Ni ansou me Sosep padahkiong rie kan duen auramen pwukat, arail kailongki ih uhd laudla.

Rahn ehu rien Sosep kan kin apwahpwali nain arail pahpa sihpw, Seikop eri ilakih Sosep en kilang iren rie kan. Ni en rie kan kilang Sosep kohkohdo, ekei irail inda: ‘Kitail kamehla ih!’ Ahpw Rupen me keieu laud, inda: ‘Soh, kumwail dehr!’ Irail eri parokedi Sosep oh kasehdi ih nan ehu pwarer me madada. Irail ahpw mwohndi limwahn pwarero oh koasokoasone dahme irail pahn wiaiong ih.

Ansouohte mehn Ismael kei leldo wasao. Sudah eri padahkiong rie kan: ‘Kitail netikihla ih ong mehn Ismael ko.’ Oh ihme re wiahda. Irail netikihla Sosep ki silper 20. Met uhdahn tiahk weid oh soh kadek!

Dahme irail pahn padahkiong arail pahpa? Irail eri kamehla emen kuht oh kaduhdi ahn Sosep sekid kasehlelo nan inta en kuhto. Irail ahpw wahla sekid wet rehn arail pahpa Seikop oh inda: ‘Se diarada met. Kilang ma kaidehn ahn Sosep sekid met.’

Seikop kilangada oh indahda: ‘Mahn lawalo men mwein kamehlahr Sosep.’ Ih eri mwaiei. Oh met ihme rien Sosep ko wiahda pwe arail pahpa en lemelemekiong. Seikop uhdahn pahtoula kowahlap. E mwaiei rahn tohto. Ahpw Sosep sohte mehla. Kitail pahn kilang dahme wiawiong ih nan wasa me e wisiklahng.