Peneineio Kohdihla Isip

SOSEP sohlahr kakong ah pehm. Ih eri padahkiong nah ladu kan en pidoi sang nan pereo. Ni ansou me e kelehpwla rehn rie ko, Sosep ahpw sengeseng. Kitail kak kilang duen pwuriamwei me rie ko wia, pwehki irail sohte ese dahme kahrehda e sengeseng. Ih eri indahda: ‘Ngehi Sosep. Semeio kin memourte?’

Rie kan uhdahn pwuriameikihla oh irail sohlahr kak koasoai. Irail pil masapwehkada. Ahpw Sosep indahda: ‘Menlau kumwail keido rei.’ Ni arail wia met, ih eri inda: ‘Ngehi riomwail Sosep, me kumail netikihla Isip.’

Sosep pil koasoaiong irail ni alen kadek: ‘Dehr kapwukoakin ie ong pein kumwail pwehki kumwail netikiniehla. Ni mehlel kupwuren Koht me kadariehdo Isip pwen doarehla mour en aramas kan. Paroh kasapwiliehdahr pwen wia emen kaun nan wehiet pwon. Eri kumwail en pitipit kohla rehn semeio oh padahkiong ih duen met. Oh padahkiong ih en kohdo oh kousoan wasaht.’

Sosep eri pwoaloapene rie kan oh metik irail koaros. Ni en Paroh rongadahr me rien Sosep kan kohdo, ih eri padahkiong Sosep: ‘Irail en alehda mehn dakepe kan oh kohla ale samarail oh arail peneinei kan oh pwurohdo met. I pahn kihong irail sahpw me keieu mwahu nan Isip pwon.’

Iet me re wiahdahr. Wasaht ke kak kilang Sosep tuhong seme ni ansou me e kohdihdo Isip iangahki ah peneinei pwon.

Peneinei en Seikop tohtohlahr met. Irail koaros me 70 me kohdihdo Isip, patohng Seikop oh nah seri kan oh nain nah seri kan. Pil iangahki arail pwoud kan, oh arail ladu tohto. Irail pwukat koaros kousoandi Isip. Irail adaneki mehn Israel, pwehki Koht wekidehr eden Seikop ong Israel. Mehn Israel kan kin wia aramas tohrohr kei ong Koht, duen me kitail pahn kilang mwuhr.