Sop Lelepak ong Koht

KE SOH poakehla ohl soumwahu menet? Ede Sop, oh liho iei ah pwoud. Ke ese dahme e kin indaiong Sop? ‘Kariala Koht oh mehla.’ Kitail kilang dahme kahrehda e kak inda soahngen lokaia duwehte met, oh dahme kahrehda Sop kin weirek laud.

Sop ohl lelepak men me peikiong Siohwa. E kin koukousoan nan sahpwen Us, ekis doh sang Kenaan. Siohwa poakong Sop laud, ahpw mie emen me kailongki ih. Ke ese ihs?

Me kailongkio iei Sehdan me Tewil. Tamataman, pwe Sehdan emen tohnleng suwed me kailongki Siohwa. Ih me pitihdi Adam oh Ewa pwen sapeik ong Siohwa, oh e lemeleme me e kak pil pitihdi aramas koaros pwen sapeik ong Siohwa. Ahpw met e kak wia? Soh. Tamanda duen aramas lelepak tohto ohl oh lih me kitail sukuhlikiehr. Depe me ke kak tamanda adarail?

Mwehrin Seikop oh Sosep mehla nan Isip, Sop me keieu lelepak ong Siohwa nan sampah pwon. Siohwa mwahuki Sehdan en ese me e sohte kak pitihdi aramas koaros en wia me suwed, ih eri mahsanih: ‘Kilang Sop. Kilang duen lelepak en Sop ong ie.’

‘E lelepak,’ Sehdan akpwungki, ‘pwehki ke ketikihong ih me mwahu koaros oh kapaiada ih. Ahpw ma ke pahn ketikihsang mehpwukat, e pahn kariaiukala.’

Siohwa eri mahsanih: ‘Nna, kohwei. Kihsang mehpwukat. Wia me suwed koaros ong Sop me ke men wia. Kitail pahn kilang ma e pahn kariaiehla. Ihte ke dehr kamehla ih.’

Keieu, Sehdan kahreong loallap kan en pirapehla nain Sop kou oh sihpw oh kamel kan koaros. Mwuhri e kamehla nah pwutak kan oh serepein kan me 10 nan ehu melimel. Sehdan ahpw kasoumwahuiehda Sop ki soahngen soumwahu suwed. Sop inenen weirek laud. Ihme kahrehda ahn Sop pwoudo indaiong ih: ‘Kariala Koht oh mehla.’ Ahpw Sop sohte men wia met. Pil duwehte me kompoakpah likamw silimen ko me kohdo oh padahkiong ih me mwein ih aramas suwed men. Ahpw Sop kin kaukaule lelepak.

Met kahreong Siohwa en peren kowahlap, oh mwuhri e kapaiada Sop, oh ke kak kilang nan kilel wet. E kamwahuiahla ah soumwahu. Sop pil pwurehng naineki seri kasehlel ehk, oh nah kou kan, sihpw kan oh kamel kan pak riau tohto sang mahs.

Ke pahn ansou koaros lelepak ong Siohwa duwehte Sop? Ma ke wia due, Koht pil pahn ketikihong uhk kapai. Ke pahn pil kak en ehu rahn ale mour kohkohlahte soutuk ni ansou me sampah pwon pahn wiahla paradais ehu me lingan duwehte mwetuwel en Ihden.