Sosep Kohwong Nan Imweteng

SOSEP mahkiehr sounpahr 17 ansou me irail wahdihlahng ih Isip. Wasao re netikiong ih emen ohl me adaneki Podipar. Podipar kin doadoahk ong nanmwahrki en Isip me adaneki Paroh.

Sosep eri doadoahk mwahu ong ah soumwas, Podipar. Kadekadeo Sosep ekis mahlahr, Podipar ahpw kasapwilada ih pohn ah mehkoaros. Eri, dahme kahrehda Sosep lekidek ong nan imweteng? Pwehki ahn Podipar pwoud.

Sosep laudla oh wiahla emen manakapw kasehlel, oh ahn Podipar pwoud mwahuki wendi reh. Ahpw Sosep ese me met sapwung, oh e sohte mweidong. Ahn Podipar pwoudo eri mwakarada kowahlap. Eri ni ansou me ah pwoud pwurohdo, e kinehda likamw ehu oh indaiong ih: ‘Me suwedo Sosep engkehlail ong ie pwen wendi rei!’ Podipar kamehlele ah pwoudo, oh mwakarada kowahlap ong Sosep. Ih eri kasehdi ih ong nan imweteng.

Ohl me kin apwahpwali imwetengo kilang me Sosep uhdahn aramas mwahu men. Ih eri kasapwilada Sosep en apwahpwali me selidi kan koaros. Mwuhri ekis Paroh mwakarada pahn ah sounlang dahl oh sounwia pilawa, oh pil kasehdi ira nan imweteng. Pwong ehu ira koaros auramenda, ahpw ira sehse wehwehn ara auramen ko. Rahn en mwuhri Sosep indaiong ira: ‘Padahkiong ie amwa auramen ko.’ Oh ni ara wia met, Sosep, ki sawas sang Koht, kawehwehda ara auramen ko.

Ong sounlang dahl, Sosep inda: ‘Ni rahn siluh ke pahn sapwadek sang nan imweteng, oh ke pahn pil pwurala wia sounlang dahl ong Paroh.’ Sosep eri kapataiong: ‘Ni ahmw pidoi, padahkiong Paroh duen ngehi, oh sewese ie pwe I en pidoi sang nan wasaht.’ Ahpw ong soun wia pilawa, Sosep inda: ‘Ni rahn siluh Paroh pahn lepuksang mwoangomw.’

Mwehrin rahn siluh mehpwukat pweida duwehte me Sosep koasoaiaehr. Paroh lepuksang mwoangen sounwia pilawao. Sounlang dahlo pidoi sang nan imweteng oh pwurala papahong nanmwahrkio. Ahpw sounlang dahlo manokehla duen Sosep! E sohte padahkiong Paroh duen ih, oh Sosep mihmihte nan imweteng.