Emen Lipirap Nan Israel

KILANG dahme ohl menet kin saripidi nan ihmweo! Ehu likou kasehlel, lepin kohl oh ekei silper. E alehda mehpwukat sang kahnihmwen Seriko. Ahpw dahme e pahn wiaiong mehpwukat me e ale sang Seriko? Ke tamataman?

Mehpwukat koaros en kasohrala, oh kohl oh silper pahn kohwong wasahn nahk nan ihmwen kaudok en Siohwa. Ihme aramas pwukat sapeik ong Koht. Re pirapehla mehkot me sapwellimen Koht. Eden ohl menet Ekan, oh irail kan me mi wasaht iei ah peneinei. Kitail pahn kilang dahme wiawi.

Mwehrin Ekan pirapehla dipwisou pwukat, Sosua kadarala ekei ohl pwen peiong kahnihmwen Ai. Ahpw irail lohdi nan mahwin. Ekei kamakamala, oh ekei tangwei. Sosua uhdahn insensuwed kowahlap. Ih eri dairukedi ong nan pwel mese oh kapakap ong Siohwa: ‘Dahme kahrehda ke mweidong met en wiawiong kiht?’

Siohwa sapeng: ‘Uhda! Israel wiahdahr dihp. Re alehdahr mehkot me kosoandi ong en kasohrala de kosoandi en kohwong tehnpas en Siohwa. Re pirapehla ehu likou en liki kasehlel oh wiahda met ni rir. I sohte pahn kapai kumwail lao kumwail kasohrala met, oh aramas me wiahda soahng pwukat.’ Siohwa mahsanih me e pahn kasaleong Sosua ihs ohl suwedo.

Sosua eri kihpene aramas kan koaros, oh Siohwa kasansalehda me ohl suwedo iei Ekan. Ekan eri inda: ‘I wiahdahr dihp. I kilang likou kasehlelo, oh lepin kohl oh ekei silper. I inenen men ahniki mehpwukat, ihme I alehki. Ke kak diar mehpwukat seridi nan ihmwei impwalo.’

Ni ansou me mehpwukat diarekda oh wisikdohng Sosua, ih eri indaiong Ekan: ‘Dahme kahrehda ke wiaiong kahpwal duwehte met kitail? Met Siohwa pahn uhd kapwurehong uhk kahpwal!’ Ansouohte aramas kan kate Ekan oh ah peneinei lao re mehla. Kaidehn met kasansaleong kitail me kitail en dehr ale mehkot me kaidehn atail?

Mwehrin met mehn Israel kan pil pwurala pwen peiong mehn Ai kan. Ansouwet Siohwa sewese sapwellime aramas kan, oh irail kana.