Mehn Kipion Loalokong Kan

KAHNIHMW tohto nan Kenaan onopada pwen peiong mehn Israel kan. Re lemeleme re kak kana. Ahpw aramas kan me mi nan kahnihmwo limwarail me adaneki Kipion sohte lemeleme me re kak kana. Irail kamehlele me Koht kin sewese mehn Israel kan, oh re sohte men peiong Koht. Eri ke ese dahme mehn Kipion kan wia?

Irail kosonnedi en kinehda me arail wasa me doh. Ohl kei eri likoukihda likou mering me ohla oh suht mering. Irail pil audehda mehn dakepe kan ki ehd mering, iangahki pilawa me kiteila. Irail ahpw kohieila rehn Sosua oh inda: ‘Se kohsang wasa doh, pwehki se rongadahr duen omwail Koht lapalap, Siohwa. Se rongadahr duen mehkan koaros me e ketin wiaiong kumwail nan Isip. Ihme aht kaun ko padahkiong kiht en kihpene mwenge oh kauonopada ong seilok reirei wet pwen kohdo oh padahkiong kumwail me: “Se pahn wiahla omwail ladu kan. Kumwail en inoukihdi me kumwail sohte pahn mahwiniong kiht.” Kumwail kilang aht likou kan me pil meringlahr sang aht sapsapal werei oh kenaht kisin mwenge kan kiteilahr oh madakengalahr.’

Sosua oh kaun teikan en mehn Israel ko kamehlele mehn Kipion kan. Ihme re wiahda inou pwe re sohte pahn mahwiniong irail. Ahpw rahn siluh mwuhri irail diarada me mehn Kipion ko mihmi kereniong wasa me re mi ie.

‘Dahme kahrehda kumwail padahkiong kiht me kumwail kohsang sahpw doh?’ Sosua idek rehrail.

Mehn Kipion ko sapeng: ‘Se wia mwo pwehki se ese me omwail Koht Siohwa inoukihdi sahpwen Kenaan koaros pahn kohwong kumwail. Ihme se masapwehkada pwe kumwail de kamekihtala.’ Ahpw mehn Israel ko kin kolokol arail inou, oh re sohte kamehla mehn Kipion ko. Ahpw irail wiakihla arail ladu mehn Kipion kan.

Nanmwahrki en Serusalem mwakarada pwehki mehn Kipion ko wiahda inou en popohl rehn mehn Israel ko. Ih eri padahkiong nanmwahrki pahmen: ‘Kohdo oh sewese ie peiong mehn Kipion ko.’ Oh iet me nanmwahrki limen ko wia. Eri, mehn Kipion ko loalokong pwehki re wiahda inou en meleilei rehn mehn Israel ko, me met kahreong nanmwahrki ko en kohdo peiong irail? Kitail pahn kilang.