Ketipin Sohte Mwekid

KILANG Sosua. E indinda: ‘Uhdi ketipin, dehr mwekid!’ Ketipino eri uhdi sohte mwekid. E kin mihmihte nan warengen lahng erein rahn ehu pwon. Siohwa me kahrehda met en kak wiawi! Kitail pahn kilang dahme kahrehda Sosua mwahuki ketipino en uhdi oh soh mwekid.

Ni ansou me nanmwahrki suwed limen ko nan sahpwen Kenaan tapiadahr peiong mehn Kipion ko, mehn Kipion ko eri kadarala ohl men pwen peki Sosua en sewese irail. ‘Kohdo mwadang!’ e indahda. ‘Doarekihtala! Nanmwahrki ko koaros me mi nan sahpwet kohdohr oh peiong omwail ladu kan.’

Ansouohte Sosua oh nah karis en mahwin ko kohieila. Pwong ehu pwon me re sapalki. Ni arail leldohng sahpwen Kipion, sounpei kan en nanmwahrki limen ko masapwehkada oh tapiada tang. Siohwa eri kahrehda ehu mwekid sang nanleng duwehte keteu ki ais kekeluwak mwerdihdo, oh kamehla sounpei tohto sang keteu me audaudki ais kekeluwak. Tohto mehkihla manamano sang me Sosua oh nah karis en sounpei ko kamehla.

Sosua kilang me kereniong ketipin pahn kihrla. E pahn rotorot, oh nain nanmwahrki limen sounpei ko pahn tangdowei. Ihme kahrehda Sosua kapakap ong Siohwa oh patohan ong: ‘Ketipin, en uhdi!’ Eri ni ansou me ketipino dakar irail sang nanleng, mehn Israel kan kak kaimwisekela arail pei oh kana.

Mie nanmwahrki suwed tohto nan sahpwen Kenaan me kailongki sapwellimen Koht aramas akan. Sosua oh nah sounpei kan mahwiniong irail pwukat sounpahr wenou oh kalowehdi nanmwahrki 31 nan sahpwo. Ni ansou me met pweidahr, Sosua eri nehkpesang sahpwen Kenaan ong kainok koaros me saikinte sapwasapw.

Mwehrin sounpahr ngeder mwuhri, Sosua eri mehla ni ah mahkiehr sounpahr 110. Erein ah kin memour, ih oh kiseh kan, iangahki aramas kan kin peikiong Siohwa. Ahpw ni en aramas mwahu pwukat mehla, aramas kan tapiada wia mehkan suwed oh lohdiong kahpwal tohto. Ih ansou me re kin anahne sawas sang rehn Koht.