Ahn Sepda Inou

MIE pak me ke inoukihdi mehkot oh mwuhri diar me apwal en kapwaiada? Ihme ohlo nan kilel wet wia, oh ihme kahrehda e pahtouki. Ohl kommwad menet ede Sepda, emen sounkopwung en Israel.

Sepda kin memour ansou ehu me mehn Israel akan sohlahr kaudokiong Siohwa. Irail pil pwurehng wia me suwed. Ihme Siohwa mweidong mehn Ammon kan en kaloke irail. Met kahreong mehn Israel kan en likwerlahng Siohwa: ‘Se wiahdahr dihp ong komwi. Menlau, doarekihtala!’

Aramas akan kolukihla me suwed kan me irail wiahda. Irail kasalehda me irail koluhla ni arail pwurehng kaudokiong Siohwa. Ihme Siohwa pil pwurehng sewese irail.

Aramas akan pilada Sepda pwen peiong mehn Ammon suwed kan. Sepda uhdahn anahne Siohwa en sewese ih nan mahwin. Ihme kahrehda e inoukiong Siohwa: ‘Ma ke pahn ketikihong ie kana rehn mehn Ammon kan, keieu en tohn ihmwei me kasamwo ie mwehrin ai pwurohdo sang mahwin kana I pahn kihong komwi.’

Siohwa mwahngih ahn Sepda inou oh sewese ih en kana. Ni en Sepda pwurohdo ong ah wasa, ke ese ihs me keieu kohdo kasamwo ih? Iei nah serepeino, me ihte nah seri. ‘Oh, nai serepein!’ Sepda sengesengki. ‘Kainsensuwed laud me ke kihong ie. Ahpw I wiahdahr inou ong Siohwa oh sohte kak soh kapwaiada.’

Ni ansou me nain Sepda serepeino tapin esehda duen inouo, e pil insensuwed. Pwe met wehwehki me a pahn sohla mi rehn ah pahpa oh kompoakpe kan. Ahpw erein ah mour e pahn papahong Siohwa nan ihmwen kaudoko nan Sailoh. Ihme e indaiong ah pahpa: ‘Ma ke wiahdahr inou ehu ong Siohwa, ke uhdahn pahn kapwaiada.’

Ihme nain Sepda serepeino eri kohla Sailoh, oh erein ah mour e papahong Siohwa nan sapwellime ihmwen kaudok. Rahn pahieu nan pahr koaros lih en Israel kan kohla mwemweit reh, oh irail kin ahnikipene ansou kaperen ehu. Aramas akan poakong nain Sepda serepeino pwehki e wia emen lidu mwahu en Siohwa.