E Kaperenda Eh Pahpao oh Siohwa

Ke kilang serepein menet nan kilel wet?— Ih nein ohl emen me adaneki Sepda. Paipel sohte kasalehda eden serepein menet, ahpw kitail ese me e kaperenda eh pahpao oh Siohwa. Nna, kitail pahn sukuhlki duwen ih oh eh pahpa Sepda.

Sepda ohl mwahu men oh e kin doadoahngki ahnsou laud en padahkihong nah serepeino duwen Siohwa. E pil wia ohl kehlail men oh kaun mwahu men. Eri mehn Israel kan peki reh en kaunirailda ni arail mahwen ong arail imwintihti kan.

Sepda kapakapohng Koht pwehn sewese ih en kana. Sepda inoukihda me ma e kana, e pahn kihong Siohwa tepin aramas me pedoisang ni imweo ni ahnsou me e pahn pwurala ni imweo. Aramas menet pahn mihmi oh doadoahk erein eh mour ni impwal sarawi en Koht. Impwal sarawio iei wasa me aramas kin kohlahng kaudokiong Koht ahnsowo. Eri, Sepda kana nan mahweno! Ke ese ihs me tepin pedoisang ni imweo ni ahnsou me e pwurala mwo?—

Ei, nein Sepda serepeino! Ihte nah serien mwo, oh met Sepda pahn anahne kadarala ih. Met kahrehiong ih en uhdahn nsensuwed. Ahpw taman, e wiahdahr inou ehu. Ni ahnsowohte, nah serepeino nda: ‘Pahpa, ke wiahdahr inou ehu ong Siohwa, eri ke anahne kapwaiada.’

Nein Sepda serepeino pil nsensuwed. Ni impwal sarawio, e sohte kak pwopwoudida oh naineki seri. Ahpw e uhdahn men kapwaiada ahn eh pahpao inowo oh kaperenda Siohwa. Met uhdahn kesempwal ong ih sang pwopwoud de naineki seri. Eri e kohkohsang ni imweo oh mihla ni impwalo erein eh mour.

Ke leme dahme e wia kaperenda eh pahpao oh Siohwa?— Ei, uhdahn! Ma ke kin peik oh ke kin poakepoake Siohwa, ke pahn kak duwehte nein Sepda serepeino. Ke pil pahn kaperenda ahmw pahpa nohno oh Siohwa.