Ohl Me Keieu Kehlail

KE ESE ihs ohl me keieu kehlail mour nan sampah? Ohlo iei sounkopwung Samson. Siohwa me ketikihong Samson ah kehl. Pil mwohn Samson ipwidi, Siohwa padahkiong ah nohno: ‘Ansou keren ke pahn naineki emen pwutak. E pahn tiehngala mwowe pwen doarehla mehn Israel kan sang rehn mehn Pilisdihn kan.’

Mehn Pilisdihn kan aramas suwed kei me kin koukousoan nan sahpwen Kenaan. Irail naineki sounpei tohto, oh re kin wia soahng kan me suwed oh kamadak ong mehn Israel. Ansou ehu, ni en Samson alialulahng wasa me mehn Pilisdihn kan kin mi ie, laion laud men weriwer oh tangdo pwen peiong ih. Samson kamehla laiono ki peh kelehpw. E pil kamehla mehn Pilisdihn epwuiki kei.

Mwuhri Samson mwahukihda lih men me adaneki Delailah. Kaun en mehn Pilisdihn kan inoukiong Delailah me emenemen irail pahn kihong ih silper 1,100 ma liho pahn padahkiong irail dahme kahrehda Samson e nohn kehlail. Delailah noaroke mwohni. Lih menet kaidehn kompoakpe mehlel en Samson, de sapwellimen Koht aramas kan. E kin kaukaule pekipeki rehn Samson en padahkiong ih dahme kahrehda e nohn kehlail.

Kadekadeo, Delailah eri esehda kahrepen ahn Samson kehlail. ‘Pitenmwoangei saikinte lepsang,’ e inda. ‘Sang ansou me I ipwidi, Koht piliehda pwen wia sapwellime ladu tohrohr me adaneki Nasirait. Ma pitenmwoangei pahn lepsang eri I pahn luwetela.’

Ni en Delailah esehda met, e kameiriahla Samson pohn neh. Mwuhri e likwerlahng aramas kan en kohdo oh lepuksang pitenmwoange. Ni en Samson pwourda, e diarada me e luwetlahr. Mehn Pilisdihn kan ahpw kohdo parokedi ih oh saliihdi. Irail kihsang pwoarenmese kan, oh wiahkihla ih ladu men.

Kadekadeo ehu rahn mehn Pilisdihn kan wia ehu kamadihpw laud ong arail Koht Dakon, irail eri wahdo Samson sang imweteng pwen wia mwadongki ih. Ansouo, pitenmwoangen Samson reireilahr. Samson eri peki rehn pwutak me kahre ih: ‘Kahreiehlahng ur lap pwe I en doahke.’ Samson ansouo kapakap ong Siohwa en ketikihong ih kehl, oh e koledi ur lap en ihmwo. Ih eri weriwer: ‘Mweidong ie en iang mehn Pilisdihn kan mehla.’ Mie mehn Pilisdihn 3,000 me towehda kamadihpwo, oh ni en Samson siken tapin ur lap ko, ihmwo pwon pwupwedi oh kamehla aramas suwed ko koaros.